عليكم الله شوفو الناس دي ساكنة وين

تحية لكل قراء المنبر ..

عايزة أوريكم صور أدهشتني إلتقطا خالي لمن جانا شهر أغسطس 2006 طبعا هي صور لمناطق في اليمن .. واستغربت انو نحن قاعدين المدة دي كلها وما شفنا المناظر البديعة دي .. والأغرب انو الناس دي ساكنة وين .. والفرق الشاسع بين تضاريسنا في السودان والسهلة والواسعة وانك تشوف السما لما يلاقي ا .. هنا في اليمن ما في حاجة اسمها خط الافق إلا في المناطق الساحلية ..
المهم حبيت أوريكم المناظر دي ..
واحكي ليكم عن بعض المواقف الطريفة الحصلت لي سودانين أول ما وصلو اليمن واتفاجأو بكمية من الجبال .. وعرفو انو العقبة (بتاعت كسلا) دي كلام فاضي بالنسبة للعقبات والهاويات الموجودة هنا ..
من القصص دي .. في أستاذ معار جديد لنج جابو اليمن وصل مطار صنعاء وادوهو نبزه عن التضاريس وشاف جبال صنعاء كويس وبقى مستعد .. المهم لي التعتره ودوهو لي قرية من قرى اليمن المعلقة ديك صاحبنا ركب البص ولمن نزل في آخر محطة افتكر روحو المفروض خلاص وصل .. ناس القرية قالو ليهو اطلع في القفة دي (قفة كبيرة مربوطة بي كمية من الحبال) صاحبنا طلع لقى ليك روحو معلق بين الجبال وانو القفة دي هي الحتوصلو للقرية المفروض يدرس فيها واول ما وصل بهناك .. قال ليهم ياجماعة الحاجة دي عجبتني ممكن ترجعوني وتجيبوني تاني .. قالو ليهو مافي مانع يا استاذ .. وصاحبنا طلع القفة تاني ورجع محل ما جا واول ما نزل بهناك قال يا فكيك ورجع السودان ..
وبالجد لمن تكون طالع بص سفر عادي وطالع في الجبال دي وتعاين بالشباك كانك راكب طيارة ما بص .. المهم ما أطول عليكم واخليكم مع الصور ..

شكراً يا أ|مل للصورة الجمية و في انتظار البقية
محبتي

العزيزة لنا ..

عطرتي البوست بمرورك البهي

الأخت أمـــــل

مستنين الصور الجميلة عن اليمن
ما تتاخري علييييينا



أحمــــد

أمول يا أحلى زول !!!

منظر مدهش ذكرني زيارتي لليمن سنة 83 يالها من بلد ويالهم من أناس كرماء أصيلين تسلمي يا رائعة !

عطوفة يا عسولة ..

بالجد البلد دي سمحة ونحنا قاعدين في صنعاء

ولمن طلعنا دهشنا بالمناظر الجميلة دي ..

مودتي

د.احمد أمين

انشاء الله تكون بقية الصور عجبتك

تسلم على المرور

ده خالي هو الخلانا نتعرف على المناظر الجميلة دي

العزيزة امل...

يالها من لوحة، رسمتها اليد الخفية، كورت الجبل، كما تكور يدي امي الخبيز، ثم نخفت فيه الخضرة، كطفل ينخف بالونه الاخضر، ثم مسحت جبينه بنسيم واعد....

للجبال جسارة، تتذوقها النفس، فتحس بمومض هوان لذيذ، أمام كون مترامي الأطراف، فتحس بوخز الإطلاق، بوحي اللانهائي النبيل....

الجبال غموض، وقوة، ورقة، معا، أهي نهد الأرض، أم يدها، أم عنقها القوي، ... ومع هذا تمد جذورها، كالشجر، كي تحفظ توازن الارض...

أغلب العباد اتخذوا من الجبل متكأ، بوذا، زرادشت، النبي، مار متى......


من قمته (سترى أكبر إطار، يحوي داخله لوحة حية من العصافير والسحب والبيوت والجمال، لوحة تترك الذهن مندهشا، كما لو أنه طفل صغير)...

للجبال جسارة، بحق، جسارة ملموسة، كعنفوانه، وشموخه، وعزته...

لا أ دري، كيف تسلقته هذه الاشجار، وبساقه الواحدة، وركونها للوحدة، يظهر أنها تتأمل ذاتها، ولها، فتأمل الذات، يبدأ ولا ينتهي، كحنان الأم...

وما هذه الحشائش على ظهر الجبل، هل تصورته ثور أو حجر أم، حتى انت ايتها الحشائش قادرة على صعود الجبال (ولم نام البشر في السفح)، وكيف استطعت ايتها الحشائش ان تغرزي جذورك الواهنة في ارضه الصلبة، يا لرقتك القوية، للحق، عيون الحسان تهزم جيوش العضلات...

يالها من حشائش...


شكرا، أمل...
وللجبال نشوة، وخمر، وكبرياء دائم، لا تجلس، بل تتظل دوما، واقفا، تراقب الأفاق البعيدة، حيث ينتهي البصر خسيئا...


لك الجمال...

أخ عبد الغني ..

لقد رسمت لنا لوحة وصف شعرية بديعة الألوان ..

بالفعل يمتلكك الاندهاش ويأخذك سحر منظر حشائش خضراء اختارت الأحجار

التي نصفها عادة بالقسوة والجدب ..

نحسبها وحيدة ولكنها تنعم بمناغاة الطبيعة الساحرة .. وتأمل الذات

مودتي

الأخت أمل

صور رائعة و تحكي عن مصور فنان...

بس قصة القفة دي مبالغة عديل و الاستاذ اتصرف صاح لأنو ممكن الطلبة يعملوا مظاهرات بدل يقفلوا الطريق يقطعوا القفة لووووووووووول

الحاج حمد

hajhamad

حكاية المظاهره وقطع القفة دي قطعت مصاريني بالضحك ..

مرورك اسعدني

اتخيلي يا امل انك ساكنه في البيت الفوق ده
وشالك حمار النوم

حااايحصل شنو




مدخل للخروج :

بالجد صور تستحق الاشادة


البصاص

أبوعبيدة البصاص..

هاهاهاها تتخيل .. غايتو انا كان ساكنة هناك

كان زمان اتلحست ..

تفنوشي الفي الصورة ده عسل ولدك؟

مودتي ..

د

Quote: هاهاهاها تتخيل .. غايتو انا كان ساكنة هناك كان زمان اتلحست .. تفنوشي الفي الصورة ده عسل ولدك؟

ان شاء الله بعد طول عمر

اما بخصوص سؤال التاني خمسه وخميسه

ايوه ده

الايهم اخر العنقود


البصاص

دي اسمه

سكنة بين طيات السحاب

ألأخت/أمل

سلامى

وشكرآ عللى البوست الجميل.

ويا أمل القفة دى إن شاء الله يدها تكون مكربة كويس خوفآ من القطع.


لكن منظر جميل

مودتى

إسماعيل محمد أحمد عباس.............

أخ اسماعيل ..

طبعا الناس بتتكيف على حسب تضاريسها

والناس دي شديدة شدة .. والله لمن تشوف الطرف في الجبال

تقول إلا الواحد مجنون البطلع هناك .. لكن الناس عايشة

وبتسافر .. ومكربة الحبال وزي العجب ..

مودتي

Quote: ومكربة الحبال وزي العجب ..

أمل انتي مريخابية و الله شنو؟ طبع المريخاب ديل عندهم عجب واحد فلما تجي سيرتو مع الكريب دا بيكون العجب بتاعهم و بس..

تحياتي

الحاج حمد

hajhamad

بي مناسبة العجب دي .. عندي حبوبتي (الله يرحمها) كانت لما يقولها

(زي العجب) تقول العجب اعمى ..

وما عارفة هل العجب كان بقولو عنو الكلام ده منو وهل هو اعمى وللا لا

وبي مناسبة المريخ كنت مريخابية وانا صغيرة ولمن الحال بقت صعبة اعتزلت التشجيع

سلامي

إزيك يا أمل

تعرفى

عشان كده زمان سموهو اليمن السعيد

وزى ما بقول أبوبكر المحضار

يمن سعيد
وسعيد اللى شافه
وشاف اللى شافه

بالله يا أمل قاعد تسمعى المطرب "فيصل علوى" ؟

لو ما سمعتيهو حاولى وما حتندمى

سلام يا امل

لكن ما وريتينا كبار السن ديل بطلعو الجبال دي كيف ؟؟

مودتي

أخ علاء الدين .. سلام

البحيروك هم اليمنين الكبار في السن .. ديل موضوع براهم

يطلعو ليك الجبال دي زي الطالع ليهو عتبة .. ونشيطين نشاط غريب (ماشاءالله)

بي سؤالك ده ذكرتني موقف حصل لينا ونحن في (بيت الحجر) ده في صنعاء وهو عبارة عن بيت

مبني على حجر بحاول انزل صورتو .. انو قلنا لي أمي يلا معانا وشوفي البيت من جوا ..

قالت لينا البطلعني هناك شنو ؟

قمنا مشينا لقينا ليك مرا يمنية عجوزة 80 -90 اقل من كده ما بتديها طالعة ليك زي الترتيب

(لو قلت زي العجب حاج احمد بجيني ناطي)

ضحكنا واستعجبنا ..

سلامي أستاذ أبوذر ..

بالجد البلد دي مناظرها جميلة ..

سمعت فيصل علوي وصوتو جميل عادة نحن في البيت بنستمتع بأغاني جنوب اليمن أكتر

وانا بحب بي شكل خاص ابوبكر سالم ..

مودتي

يا امل الجميلة
هى اليمن اواليمن السعيد ( شقيق صديقنا وزميل الدراسة عادل السعيد الذى اخذه اليمن منا لامد طال )
لكننى اتعجب لهؤلاء الناس
الا يختنقون من قلة الاكسجين ؟
وكيف يصعدون الى تلك الاعالى ؟ هل توجد (مصاعد ؟)
شخصيا من هسى اوعه تقول لى تعالى اليمن بفطس من المطار قبل ما تنزل الطيارة
لانى عانيت من هذا العلو اينما حلت بى رواحلى
وهذا اليمن بالحقيقة حببنى فيه عديد اصدقاء
دكتور عبد الشافى صديق ودكتور مبارك حسن خليفة
واصدقاء رحلوا عن فانيتنا لكنهم كانوا فى اليمن
لك مودتى ابنتى وتحياتى لنهال الطيب وتراث والجندرية

ماما سلمى ست الكل وست الحبايب ..

جميلة انت كما هي حروفك ..

بعد الشر عليك .. لكن لمن تجي صنعاء مثلا ما بتحسي بالعلو الشاهق البتشوفيهو في الصور الفوق دي

ويا ريت تجينا وأوعدك بفسحك في صنعا بس وما بوديك الحتت العالية دي ..

كل الذكرتيهم بعرفهم وهو لي بمثابة الأهل هنا في الغربة ..

قلة الأوكسجين واضحة خاصة الايام دي مع الصيف بتكون شوية صعبة

لكن نحن خلاص اتعودنا ..

عميق محبتي

الأخت أمل،

بلاد اليمن مهد الحضارات.. مثل هذه المناظر تذكرني دائما بمنطقة الباحة وبلجرشي جنوب المملكة العربية السعودية..
وهي تكاد تكون متشابهة من حيث المناظر الخلابة وجمال الطبيعة التي حباها الله والخضرة والهواء النقي..
عشت في تلك المناطق مدة ستة شهور كاملة بين قبائل غامد وزهران.. ورغم بساطتهم وتواضع أحوالهم
المعيشية في ذلك الوقت كانوا يحبون كل سوداني يفد إليهم ويعيش وسطهم.. لدي ذكريات عن تلك المناطق لن أنساها.
هذه المناطق تمتاز بالزراعة على سفوح الجبال لأن الأمطار فيها على مدار السنة..
كنا نزور المناطق ونشاهد الوديان وحقول الفواكه مثل الرمان والبرتقال والعنب والخضروات بأنواعها من سفوح الجبال الشاهقة.
ولو لا الضباب المتواصل وقلة الأكسجين وشعوري بضيق في التنفس لما تركت تلك المناطق لأن الطبيعة
هناك تختلف عن الطبيعة التي عشتها في بلدي.

شكرا على هذا البوست المميز.

أخ عزيز ..

أول منطقة نزورها خارج صنعاء كانت إب

زورناهاسنة 94 وهي منطقة جميلة خالص وتنتشر فيها المدرجات الخضراء والمطر طول السنة

استمتعنا جداً ..

تسلم على المرور

بلد جميلة فعلا اليمن. تستحق الزيارة. اعزمونا يا امل احمد عمر والجندرية وتراث. فى هذا الفيديو ابو بكر سالم يغنى فى إب.
http://www.youtube.com/watch?v=_qebudm8Lmo

جبال تهامه والسروات خضره و ضباب
وانسان طوع الجبل ليزرعه مدرجا

شكرا على الصور اللوحات

أمل


بالله من الصور ساي راسي لفى
حاخد حبة الحساسية وأشيل النومة كل السكة
لانو دي أخر سفرة لي في جبال اليمن
ونمشي لسهول بلدنا الممتدة

تحياتي لأبوهريرة على الصور الجميلة

مودتي

نهول أزيك ..

ذكرتيني جرسة السفر عبر الجبال الشاهقة دي

وحبة الحساسية ودييك يالنومة ..

سهولنا جميلة وتزداد روعة بي ناسا..ولكل بلد ما يميزه عن غيره

سلامي

شهاب الفاتح ..

من الطرايف المتعلقة بالجو الجميل في اليمن

في واحد من الاستادة جاب امو تصوم معاهو رمضان .. صامت رمضان وعايزة ترجع

قامت قالت يا ولدي انا ماشة اطبق الشهر ده في السودان ما اظنو شال ..

وانت البيوت الناس ديل بنوها والجبال قامت بيها ..

Adil Osman

من هسي عازمنك .. بس ورينا داير تجي متين

شكرا على ابوبكر

المنطقة جميلة ورائعة وانت يا أمل اروع
بس ما بلقي لي ملحق
الكاميرا عندك

امل بت بتول
امل بت احمد عمر

ماشاء الله كبرت وبقيتي تكتبي

فعلا بنت الفنان بتطلع (حفارة)

تحياتي لماما وبابا
واخوانك واخواتك

وتحية خاصة لصديقي الصغير الشفيع

بس اوعي يكون هو كمان طلع برضو (حفار).



عمو صلاح الامين .

الجميله بت الجميل
صناع الجمال
ازيكم كلكم والبلد السمحه القاعدين فيها دي
وكان كدي جاينكم تب
وبيني وبينك سرا كده انا وصلت لحدي صلاله
لكن ما عارف انو بي هناك عامله كده ولا عارفكم انتو بي هناك
كنت جيتكم ناطي
بعدين اعترفي ده تصوير خالك ولا تصويرك
الواحد يعمل ليهو صور سمحه كدي ويقول خالي
مودتي ليك والاستاذ
والوالده الما قادره تصل بيت الحجر
ارقدو عافيه

أبو العربي تسلم ..

الصور سمحة والمناظر على الطبيعة اسمح ..

ومرحب بيك .. والله لو في طريقة اقول انا الصورتها

كنت قلتها لكن مافي داعي للكضب .. ده أبوي وخالي وكيرن زوجة

خالي متناوبين على التصوير .. فتوغرافيا وفيدو

تحياتي

عمو صلاح أزيك .. كيف احوالك واخبار

وين أراضيك اول ما شفت المداخلة منك جري كلمت امي وابوي

عمو طارق كان متواصل معانا الفترة الفاتت دي

تحياتي وسلام كل ناس البيت امي ابوي كل الشباب لحد الشفيع

تسلم يا مهلب خلف الله ..

البوست ازداد روعة بي تشريفك لينا

باقي الصور موجودة لو ده قصدك ..

ان حاكلم لنا مهدي اقول ليها هما برضو فطوني

-

شوفوا الناس دي ساكنة وين..
ولا شوفوا البلد دي عاملة كيف؟


مناظر جميلة على الصورة..
فما بالك أن يصبح الواحد على طبيعة كهذه كل يوم؟

مشكورة يا أمل..

الابنة امل
صور جميلة
ود المخلينا نهاتى باليمن حتى الان
تحياتى لاحمد عمر الجميل
على بابكر
على الهادى
تراث
امانى
نهال

استاذي محمد سيد احمد

فاقدنكم وفاقدين ايامكم الجميلة ..

معاكم راحت بهجة صنعاء إلا من ناس الجندرية وتراث

وعلي الهادي ..

وبرضو منتظرين تجوناانشاء اله زيارة

تحاياك وصلت ..

سلامي ليك وللأسرة

نجوان ..

انا نزلت المناظر الحلوة دي عشان اي زول يشوفا

يقرر يجينا بي هنا .. ونزيد من كوم بورداب صنعاء

سعيدة بمرورك هنا

د. محمد حسن

منو القال الكلام ده .. مافي اي زول يقدر يفطك

تحديدا انا على العموم لو في مداخلة انا ما رديت عليها

العتب على نظاراتي الماليات وشي ديل ..

لك العتبى حتى ترضى

أموله وضيوفها ..

علكم عافية .. صلاح الأمين

كيف زمانك والله مشتاقين ..تواصلت مع طارق قبل زمن ليس ببعيد

تمنياتي لك بالسعادة والهناء في هذه الدنيا (الفرندقس) ..

أمل .. موضوعاتك زي موية بااااردة مسحوا بيها عيون مفصول للصالح العام طالع في مظاهرة

بـ(أبوجنزير) وهاكم البطاقة دي :-

الطبيعة في اليمن السعيد اخاذة ومدهشة ونقف نحن سكان السهول برهبة أمامها

ونخت أيدينا فوق قلوبنا عندما تبدأ السيارة بـ (Take of) فرغم وعورة التضاريس

إلا أن الانسان اليمني استطاع أن يقهر الارتفاعات المهولة ويشق الطرق الاسفلتية

فوق السحاب ليربط بين مختلف المدن والبلدات المتناثرة على قمم الجبال فالبيوت

والأبنية التي تراها معلقة بين يدي الله وانت بعيد ..تتبدد رهبتك ومخاوفك كلما اقتربت

منها ويملؤك الامان وانت منحدراً أو صاعداً بين أزقتها ومنعطفاتها وتتمنى من الله أن يهبك

آلاف العيون لتحتوي بها هذا التنوع الباذخ من المنحدرات والقمم الشواهق والوديان ومدرجات

الزراعة والضباب والسحب الزاحفة على الطرقات المبللة ..

الألوان .. الظلال .. الأضواء ... و ... يلا كمل يا محمد سيد أحمد .. فأنت واسرتك العزيزة

ما زلتم تسكنون قلوبنا المعلقة ..

ومرحب بالجميع في اليمن السعيد

امل الفنانة بت الفنان احمد عمر
نكات اليمن وخاصة بتاعت المدرسين كتيرة ولذيذة
منها
مدرس بتاع عرقى رجع من اليمن
اصحابو فى السودان بيسالو فيهو
اها يافردة لقيت العرقى فى البلد ديك
رد
افرض لقيتو
الواطا البترتح فيها القاها وين