Post: #1
Title: حراااااااااااااام عليكم يا ناس سوداتل !!!
Author: wadismail
Date: 06-09-2007, 10:43 AM
سلام يا ناس البورد كلكم بدون فرز .... جيناكم راجعين بعد غياب قسري إستمر أكثر من إسبوع .... ما مننا بس من العلينا من ناس سوداتل ... و هاكم الحكاية التالية :
يوم الأربعاء الماضي 30 مايو منتصف اليوم إنقطعت خدمة الإنترنت و الهاتف من مكاتب الشركة و قام موظف الشركة بالإبلاغ عن العطل و تم وعده وعدا قاطعا بأن الخدمة سترجع قريبا جدا و أن الموضوع لا يعدو كونه عطل صغير و كل الأحوال تحت السيطرة !!!!!!!!!! إلى هنا و الأمر يبدو طبيعيا جدا ... عطل + بلاغ + صيانة = رجوع الخدمة و السلام
و تمر الأيام ... الخميس : مافي خبر ، الجمعة مافي خبر ، السبت قمنا مشينا بذات أنفسنا لناس سوداتل و قالوا لينا الموضوع دا ساهل جدا بس في عطل خفيف و الآن قيد المعالجة و الموضوع دا يا أخواننا إطمئنوا جدا لأنو ما إنتو براكم القاطعين : في 45 غيركم متوقفين معاكم !!!!!!!!!!! و الفنيين بتاعيننا شغالين ي الكبينة الجنبكم ..... صدق يا مؤمن جينا الكبينة : غير بتاع الهدف مافي طيرة حايمة جنبها ، سألناهو يا بو الشباب الفنيين مش شغالين هنا ؟ قال لينا : أنا بايت من أمبارح ما في زول ظهر !!! قلنا الغايب عذرو معاو ....
الأحد مافي خبر ، الإتنين إنتظرناهم لما ما جوا مشينا زرناهم و ما قصروا تب .... يا أخواننا حسع دي الشباب ديل يتحركوا معاكم عشان يعرفوا الحاصل شنو و المشكلة و ين ( إتخيلوا ! )
الشباب بعد ما أخدوا شورتم قالوا الكيبل دا إلا يتغير و فاتو جابو الكيبل (تاني يوم طبعا) ... بعد ما جابو قالو لينا يا أخواننا : زي ما عارفين الكيبل دا لازم نحفر ليهو و ندفنو و دايرين لينا عمال : نمشي و نجيكم بكرة !!!!! قلنا ليهم يمين ما تمشوا !!! عليكم أمان الله عندنا عمال صينين أديناهم إتنين بس أنجزوا ليك المهمة في أقل من ساعة .....
إنتهينا من قصة الكيبل : أها يا الأخوان : تاني في حاجة ؟ لا أبدا و الله ما قصرتو ، بس تاني أدونا ربع ساعة كدا نرجع المقسم و ربع ساعة بعدا الخدمة بترجع ليكم ..... ودعناهم و الدموع في عيوننا و عليكم أمان الله كان ما الظروف بت الكلب كان أكرمناهم و ضبحناهم .. أقصد ضبحنا ليهم ...
أها يا أخواننا القصة ما إنتهت ، الربع ساعة الأولى إنتهت لكن علي اليمين التانية ما إنتهت إلا قبل شوية ........
إستشارة قانونية :
يا أخواننا لو الشركة شغلها كلو قائم على المراسلات الإلكترونية و الفاكسات و التلفونات و أصابا ضرر بالغ جدا من إنقطاع الخدمة للفترة الطويلة دي و كمان بتدفع مقابل الخدمة إيجار شهري ثابت و الخدمة إنقطعت منها لعشرة أيام : ما من حقها تخصم قروش العشرة أيام دي ؟ بل و تطالب بتعويض مادي محترم مقابل الخسائر الكبيرة دي ؟
شنكل :
إنتو يا أخواننا ناس القانون الشركة دي ما قالو حققت أكبر ربح في تاريخا و أظنو أكبر معدل ربح في الشركات العاملة في السودان .... بس وروني ربحوها كيفن ؟
بصلة :
يا أخواننا زول يلحقني (برفرش سريع) أو ( أبديت) عن أخبار المنتدى و الناس كلهم .... أخوكم ما عندو زمن يقرأ البوستات كلها ...... حدنا زماااان كان خلوة خالد بحر و سد مال ناذر الخليفة .... من هنا وواصلوا لي عليكم الله .....
|
Post: #2
Title: Re: حراااااااااااااام عليكم يا ناس سوداتل !!!
Author: اساسي
Date: 06-09-2007, 11:04 AM
Parent: #1
| Quote: يا أخواننا زول يلحقني (برفرش سريع) أو ( أبديت) عن أخبار المنتدى و الناس كلهم . |
اول حدث كبير بعد ما مشيت بكري قصر المنبر وبقيت الصفحة قصيرة الظلامين قالوا زي جلابية انصار السنة والاظلم منهم قالوا جكسة في خط مافي والناس المعتدلين قالوا تنانير يعني بالعربي ( اسكيرتات ) الان المنبر رجع زي ما هو زي (اسكيرت الماكسي ) ..دا شمار اول
الشمار التاني محسن خالد انطرد من سودان فور ال ورجع لي مراحه ( مثل غير سري) وقام كتب عن الامثال السرية المنتشرة في السودان يعني الامثال القايمة علي الكلام ( التحت الصرة قلبة وعدلة) اها المنبر قام وقف علي رجل واحدة واحدين متكيفين من الموضوع زي ناس دكين و معروف سند وغيرهم وواحدين شامين الوضع ومستنكرين الامثال دي زي ناس رافت ميلاد ونيستا و محمد اي سليمان وغيرهم وطبعا في انحنا الهتيفة والفريجة بنشجع اللعبة الحلوة وما عندنا راي ولا شورة يعني مجموعة من الامعات قاعدين يقولوا في كلام لا في السما ولا في ا
عماد عبد الله كان حردان المنبر وهاجر لي تشاد وزي ما مشي عاد .. جا بنظرية الهواء النظيف يعني لما ليك في الارشيف دا من يوم شختوا المنبر واشتغل ينفخ في الهواء النضيف لحدي ما ستف الصفحة الالي والتانية والتالتة .. شكلة اثناء النفخ دا ملاسي اتذكم في ناس قالوا ملاسي ما بيقدر يعيش في جو نضيف وفي ناس قالوا ملاسي عنده حق الداير الارشيف يرجع يقراهو بدون ما تزحم الدنيا ..قام ملاسي ردا بي بوست اسمه الهُراء النضيف يعني عبر عن انه اتهري هري من رفع الارشيف النضيف وكالعادة قعدوا يتغالطو في الصبغة ومشاكل منتصف العمر .
اها اشراقة مصطفي وعواطف و نادية السر بيمروا بلحظات تجلي الايام دي وعندهم بوستات ما حصلت
اما اذا دار محور سؤالكم عنا فانا عملت اربعة اعتذارات في الايام الفاتت مريت بلحظة تصالح مع النفس وقمت عممتها واصبحت تصالح مع الجميع يعني بالعربي اعتذرت لطوب البورد . وبحكم اني استغلالي زي ما انت عارفني فانا استغليت شكلة محسن خالد مع سودان فور ال وقمت نزلت بوست عن حسن موسى ما معروف تصنيف البوست زاته شنو اللهم كلمة في الاحداث
بالنسبة لي ناذر من سد ماله تاني ما جا طبعا انا شاكي انه الزول دا يكون استعجل ودخل من سد المال او يكونوا ما كلمهو انه سد المال دا ما فيهو نزول لانه ورقك ما بيغطي او ما كامل بس شكله فرش ورقه الزول دا .
خالد بحر بعد انتهي من الخلوة قام يهاجم في الدبابين ..والميل اربعين
تاني مافي حاجة مهمة يقولوا عليها يعني البوستات العادية
|
Post: #3
Title: Re: حراااااااااااااام عليكم يا ناس سوداتل !!!
Author: wadismail
Date: 06-09-2007, 11:26 AM
Parent: #2
و الله يا أساسي ما قصرتا معاي تب ، إلا بس نسيت أخبار أعمدة المنبر ناس ... و ... و ......... و شلة ال ... و ال ....... و ال..............
نرجع لموضوع الإستشارة القانونية يا ناس ..
|
|