Post: #1 Title: المكارم غرقنا ساسن والمجاهل من غيرنا ساسن!!!!!! Author: wesamm Date: 06-03-2007, 06:22 AM Parent: #0
نانسي عجاج والرائعان محمدية وعوض احمودي
Post: #2 Title: Re: المكارم غرقنا ساسن والمجاهل من غيرنا ساسن!!!!!! Author: wesamm Date: 06-03-2007, 06:27 AM
أغنية في الضواحي وطرف المدائن من كلمات الراحل المقيم خليل فرح
في الضواحى وطرف المداين
يلا ننظر شفق الصباح
قوموا خلو الضيق في الجناين
شوفوا عز الصيد في العساين
يله نقنص نطرد نعاين
النهار أن حر الكماين
كلبي يا جمجوم أصله خاين
شوفوا كيفن يبرأ الملاين
هب شال وكشح المراح
للقنيص الخيل خف راسن
نحن ما بنخاف من مراسن
المكارم غرقنا ساسن والمجاهل
مين غيرنا ساسن
ان عطشنا نمز مر وآسن
وأن عشقنا بنعشق محاسن
فى المحاسن كفي يومنا راح
في الخميلة انجلت المحاسن
عيني حايرة ومشي قلبي جاسن
بعض حسنك هي يا محاسن
الحرير حين قدميك داسن
والزهور حين شفتيك باسن
والغصون من لدنك مياسن
والنسيم فاح بكر الملاح
يا الطبيعه الواديك ساكن
ما في مثلك قط في الأماكن
يا جمال النال في ثراكن
ياحلاة البرعن أراكن
في قفاهن تور قرنه ماكن
لا غشن لا شافن مساكن
في الخزام والشيخ والبراح
شوف صباح الوادي وجماله
وشوف خضاره وصيده ورماله
شوف يمينه وعاين شماله
شوف نسيم الليل صاحي ماله
شوف فريع الشاو مين أماله
القمر خجلان من كماله
والصباح لاح بهل الوشاح
يا أم لسانا لسع معجن
كلمة كلمة وحروفه ضجن
ديل خدودك غير داعي وجن
ديل عيونك من غير سبه لجن
ديل دموعك من نظرة شجن
ده دلال ايه ده دلال معجن
محن الامات يا رداح
ماك نسيم الليل بي برودك
نامت الازهار فوق خدودك
غرد العصفور فوق عودك
النفوس ما اتعدت حدودك
ما عرفنا عدوك من ودودك
بس أنا المقسوم لي صدودك
يا حياتي وأملي اللي راح
Post: #3 Title: Re: المكارم غرقنا ساسن والمجاهل من غيرنا ساسن!!!!!! Author: الطيب شيقوق Date: 06-03-2007, 06:44 AM Parent: #2
وسام
يا اخوانا مالكم علينا والله الاغنية دى انا بتشعل جواى نار عدييييييييل وتانى ياني ساكن هنا بس وياريت لو جانا العريس ناذر ونزل لينا نانسي عجاج .
شفت يا وسام انا اولادى عارفين فعائل الاغنية دى فيني ووقت ارجع السودان طوالى البيت يملوهو ضجيك في كل ناصية يشغلوها بالشفيع في ناصية وبمصطفي سيد احمد في ناصية واتصلوا فيني من السودان قالوا لى نسمعك نانسي بتغنيها . وقالوا لى نحن في غيابك ما بنقدر نسمعها بتعذبنا .
السمحة ام ولدى بتحب حبي للاغنية دى لانها قالت لى ما بتحمل ذكريات حبيبة غيرها وانما الى الطبيعة الواديها ساكن .
يا حليل خليل فرح
لك اطيب المنى
Post: #4 Title: Re: المكارم غرقنا ساسن والمجاهل من غيرنا ساسن!!!!!! Author: wesamm Date: 06-03-2007, 06:49 AM Parent: #3
العزيز الطيب شيقوق التحية لك ولسمعك وحسك المرهف لكن بت عجاج جضمت الغنية جضيم شديد اتمني لك دوام العافيه !!!!!!
Post: #5 Title: Re: المكارم غرقنا ساسن والمجاهل من غيرنا ساسن!!!!!! Author: الطيب شيقوق Date: 06-03-2007, 06:56 AM Parent: #4
Quote: جضمت الغنية جضيم شديد
وحيات ربك لما تجر المقطع البيقول (ده دلال اييييييييييييييييييييييييييييييييييييييييييييييييه) اخوك بنتكي معاها زى السايق سيارة ودايس ابنص .
Post: #6 Title: Re: المكارم غرقنا ساسن والمجاهل من غيرنا ساسن!!!!!! Author: wesamm Date: 06-03-2007, 07:21 AM Parent: #5
والله يا الطيب يا خوي حالتك دي اخير منها حالة صاحبنا عبد المنعم الجزولي لما يسمع الغنية دي بيهضرب عديل لكن انتا حالتك صعبة خالص يا خي اسف اذا حدث ضرر!!!!!
Post: #7 Title: Re: المكارم غرقنا ساسن والمجاهل من غيرنا ساسن!!!!!! Author: الطيب شيقوق Date: 06-03-2007, 07:27 AM Parent: #6