مبروووك...معاوية التوم محمد طه.مستشارآ لوزير الثقافة والشباب والرياضة للشئون السياحية

أصدر ألأستاذ/عبدألأله أبوسن وزير الثقافة والشباب والرياضة بولاية القضارف قرارآ بتعيين

ألسيد/معاوية التوم محمد طه مستشارآ له لشؤون السياحة.بتاريخ 24/5/2007م.

وقد صادف ألأختيار أهله..وألأخ معاوية التوم من ألكوادر المؤهلة التى سوف تساعد بأذن الله فى هذا المجال.

عمل ألأخ معاوية مديرآ للتسويق بشركة أنتارا العالمية الماليزية ومقرها كوالمبور.

وفندق قراند هوليداى فيلا بالخرطوم.

عمل صحفيآ فى مجلة المسافر ,مشرفآ على الملفات ألأعلامية والسياحية.

نال عدة دورات تدريبية فى مجال السياحة الفندقية بكلية لندن الجامعية إدارة سياحة وفندقة,ألأتحاد ألأمريكى لأدارة الفنادق والتسويق الفندقى.

والعديد من السمنارات والندوات وألمؤتمرات فى مجال السياحة والفندقة.

نتمنى له التوفيق .

Quote: أصدر ألأستاذ/عبدألأله أبوسن وزير الثقافة والشباب والرياضة بولاية القضارف قرارآ بتعيين ألسيد/معاوية التوم محمد طه مستشارآ له لشؤون السياحة.بتاريخ 24/5/2007م. وقد صادف ألأختيار أهله..وألأخ معاوية التوم من ألكوادر المؤهلة التى سوف تساعد بأذن الله فى هذا المجال. عمل ألأخ معاوية مديرآ للتسويق بشركة أنتارا العالمية الماليزية ومقرها كوالمبور. وفندق قراند هوليداى فيلا بالخرطوم. عمل صحفيآ فى مجلة المسافر ,مشرفآ على الملفات ألأعلامية والسياحية.

الأخ إسماعيل الف الف مبروك لاخونا معاوية التوم ومزيد من النجاحات والتقدم إنشاء الله .

مبروك معاويه

لكن البدخلك مع الناس ديل شنو؟؟؟

الف مبروك استاذى واخى العزيز دوما معاوية التوم

اختيار صادف اهله لاننى اعرفه جيدا وفيه كل الصفات الجميله واقدم احر التهانى للاهل بالقضارف وبوجه الخصوص الى الاسرة بالقرية النموذجية ...
كم انا مسرور بذلك


مودتى الخالصة لك


ايمن هارون

الاخ العزيزأيمن هارون
لك التحية و التقدير
عبرك أحى كل أبناء القضارف بالمهاجر المختلفة و هى دعوة للعودة الطوعية و الهجرة العكسية للاسهام فى نهضة و تنمية القضارف . مع مودتى
دوما
معاوية التوم

الاخ العزيز أيمن هارون
لك شكرى الجزيل و تحياتى للاسرة الكريمة و انشاء الله أكون عند حسن الظن
مع جبى و تقديرى

ألأخ/هاشسم
السلام عليكم


ما بنجا فيك لو إصطفيت غيرنا أحبا با ود يا حبة.....


شكرأ على المرور

إسماعيل محمد أحمد عباس.................أم درمان

ألظريف /صديق الموج


لا سلام منك ولا منك نحية..


السلام عليكم.....ووينك با رجل ...إشتقنا ليك شوق السحابة الراحلة فى عز صيف الرياض الحار.


سلام كتير

إسماعيل محمد أحمد عباس..............................................أم درمان

ألأخ/أيمن هارون


لك التحية



وشكرآ على مرورك الظريف...

إسماعيل محمد أحمد عباس...............أم درمان

مبروك معاوية
لكن بيني وبينك دي دايره ليها تلفون كارب
.
.
شكراً إسماعيل

الاخ العزيز اسماعيل وراق

التحية و التقدير و الاعزاز
ما زلنا فى انتظار تلفونك (الكارب )و و عارفك مشغول( بالسماية )
مع تقديرى و حبى

الاخ معاوية

الف الف مبروك

ورغم انها جاءات في ظروف قاسية على شخصي انت اكثر الناس الماما بهاومنسقا لتخفيف آثارها ...

الف مبروك ... ونتقابل يوما ما في القضارف
ونعيد ذكريات الرياض

صلاح غريبة - الرياض

الف مبروك...للصديق العزيز: معاوية التوم...الشاب النشط الواعي والمثقف...وفعلا اختيار في محله


فانت رجل شايف ودارس...عليك الله ....برمج لينا السياحة...علي كيفك الفنان...

Quote: الاخ معاوية الف الف مبروك ورغم انها جاءات في ظروف قاسية على شخصي انت اكثر الناس الماما بهاومنسقا لتخفيف آثارها ... الف مبروك ... ونتقابل يوما ما في القضارف ونعيد ذكريات الرياض صلاح غريبة - الرياض

نفهم من كلامك يا غريبة...كانوا عايزين يعينوك مستشار سياحة...

مستشار اعلامي ما كفاية يعني؟

ألأخ/إسماعيل وراق



تحياتى

وشكرآ لمرورك الكريم......وكيف حال المولود الجديد إن شاء الله يكون هو وألأسرة الكريمة بخير


لك ودى..

إسماعيل محمد أحمد عباس.................................

ألأخ/صلاح غريبة


كل ألأمنيات الطيبة لك وللأخ معاوية بالتوقيق..


وشكرآ

إسماعيل

الاخ معاوية
مسكاقمي
تهانينا والف الف مبروك
والله يوفقك

الاخ حمزاوى
لك الحب و التقدير و الاعزاز
اشكرك على هذه المشاعر الفياضة

ألأخ/نذار حسين



شكرآ على مرورك الجميل وكلامك الراقى عن ألأخ معاوية وفعلآ يستاهل كل خير



لك عاطر التحايا...........


وشكرآ

إسماعيل محمد أحمد عباس....أم درمان

ألأخ/حمزاوى


الرجل ألأصيل...مافى تهنئية أو عزاء إلا ووجدته فيه,,,,الله إديك العافية يا أخو الرجال



إسماعيل محمد أحمد عباس.......أم درمان

شكراً اسماعيل
وألف مبروك للأستاذ معاوية
إختيار صادف أهله
نتمنى له التوفيق

آلااااااااااااف مبروك الأخ معاوية...

ونسأل الله يوفقك في مهامك ويسدد على طريق الخير خطاك..

وعقبال الوزارة ياااااااااااااارب...

قواسيب مودتي... وتحياتي أخي إسماعيل يا بشير الخير...


أبو الحســـــــــين...

أخى الودود .. والصديق الصدوق .. لقد تمنيت فى هذه اللحظات أن اكون شاعرا اواديبا لكى انظم كلماتى وحروفى تجاه هذا النبأ ,, فالتحية لك ايها الحبيب الغالى وانت تلبس هذا الثوب الانيق .. مره اخرى أقول الف مبروك والف مبروك ..

ألأخ/مجاهد عبدالرحمن


شكرآ يا جميل



لك التحية.....

إسماعيل محمد أحمد عباس.....................................أم درمان

ألأخ/أبواحسين

المليح


أنت من إسنتطق الصخر العصيآ

يا بتاع القواسيب..با مرهف ..يا كتاب

يا ماضى الشايقية المشرق

لك الود وشكرآ للكلام الجميل إنت كلك زوق


إسماعيل محمد أحمد عباس..............أم درمان

ألأنيق/تاج السر محمد حامد

ألأنيق


شعرك إنساب عذبآ نديآ......شكرآ لأحساسك المرهف..


أنت أديب ومؤدب...شكرآ على مرورك

إسماعيل محمد أحمد عباس........أم درمان

الاخ العزيز صديق الموج

لك الود و التقدير
أشكرك جزيل الشكر على المداخلة بس حبيت اذكرك انو (الجماعة ديل )ماهم الجماعة القاصدهم و لا هو منصب دستورى (دى حكومة الوحدة الوطنية )و الموضوع بسيط جدا أنا مرتبط بالقضارف وجدانيا لانها شهدت اجمل ايام الصبا و درست كل مراحلى الدراسية و اشتغلت فترة طويلة فيها . شعرت بسعادة لهذا القرار الذى يمكننى من اسداء بعض الجميل لهذه المدينة المعطاءه و اسال الله سبحانه و تعالى ان يوفقنى ان اكون قدر هذه الثقة.

أخى صديق---: اظنك توافقنى الرأى ان هذا التوجه بقليل من الدعم توجه سليم أذا كل ولاية استقطبت كوادرهابالخارج ووفرت لهم معينات العمل و استفادت من خبراتهم فى المجالات المختلفه.
حاشية --- ( الجماعة ديل ) لو بديت معاهم يوم 30 يونيو 1989 ( بى وكيل عريف سياحة و فندقة ) ( دفعة الجامعيين ) كنت أكون الان (لواء سياحة و فندقة ).

لك المودة و الاحترام
معاوية التوم

الرجل المناسب في المكان المناسب
التحية للسيد الوزير / الذي أحسن الاختيار
شكرا الاخ/ اسماعيل
مزيدا من التوفيق معاوية التوم

محمد الحسن عبد المطلب

Quote: يا بتاع القواسيب..با مرهف ..يا كتاب يا ماضى الشايقية المشرق لك الود وشكرآ للكلام الجميل إنت كلك زوق

الحبيب إسماعيل
أبو الحسين بتاع القواسيب .. طيب أنا بتاع شنووووووو ؟؟؟؟

الأخ معاوية التوم
إبن السودان البار عموما والقضارف خصوصا ، هيامك الدائم بالقضارف وأهلها يحببها حتى لغير أهلها فكان طبيعيا أن ترد لك القضارف وفاءً بوفاء .. إختيار صادف أهله وتكليف لا تشريف يلقي عليك مزيدا من العبء ولكن أنت دائما لها .ألف مبروك ولك أهدي :

الاخ العزيز عادل جبارة
تحياتى بمقدار اشواقى
شكرا جزيلا على الاهداء أحى عبرك رابطة أبناء الصحافة بالرياض وما زلنا فى انتظار المنتديات الثقافية و الفنية و الفكرية التى عودتنا عليها هذه الرابطة الفتية .
مع حبى و احترامى

Quote: الاخ العزيز صديق الموج لك الود و التقدير أشكرك جزيل الشكر على المداخلة بس حبيت اذكرك انو (الجماعة ديل )ماهم الجماعة القاصدهم و لا هو منصب دستورى (دى حكومة الوحدة الوطنية )و الموضوع بسيط جدا أنا مرتبط بالقضارف وجدانيا لانها شهدت اجمل ايام الصبا و درست كل مراحلى الدراسية و اشتغلت فترة طويلة فيها . شعرت بسعادة لهذا القرار الذى يمكننى من اسداء بعض الجميل لهذه المدينة المعطاءه و اسال الله سبحانه و تعالى ان يوفقنى ان اكون قدر هذه الثقة. أخى صديق---: اظنك توافقنى الرأى ان هذا التوجه بقليل من الدعم توجه سليم أذا كل ولاية استقطبت كوادرهابالخارج ووفرت لهم معينات العمل و استفادت من خبراتهم فى المجالات المختلفه. حاشية --- ( الجماعة ديل ) لو بديت معاهم يوم 30 يونيو 1989 ( بى وكيل عريف سياحة و فندقة ) ( دفعة الجامعيين ) كنت أكون الان (لواء سياحة و فندقة ). لك المودة و الاحترام معاوية التوم

سعادة المستشار معاوية تحياتى
السيد الصادق المهدى لمن سال عن عدم اشتراك حزب الامه فى حكومة
الوحدة الوطنية قال:ما ينمشطها بى قملها.
دحين ناس الانقاذ ديل كان لقيناهم لازين ليهم عربيه ما بندفر معاهم،،،
طبعا فى المنبر حا تلحق عبد الاله ايو سن من يوم عينوه وزير
طيرة ابريش من الدريش....موفق يا زول،،،

ألأخ/محمد الحسن


لك التحية ولك اشكر على مرورك الجميل


شكرآ

إسماعيل محمد احمد عباس..........

ألحبيب /عادل جبارة


أبو الحسين وأنت قلبكم مثل بياض الوردة التى أهديتها للأخ/معاوية


وإنت بتاع..............................................

ما أحسن تخليها ألأبام دى..ما فى داعى أقول يا بتاع ال.......وأول القمر....وأول البقر وأول البن....وفلسفتها........


لك التحية......

إسماعيل محمد أحمد عباس......................

معاويه التوم

استاذي في القضارف الاهليه

الكورس الصيفي,تكريم المتفوقين بنادي المصارف

المنتديات والايام المفتوحه بدار المزارعين

اه لقد هاجت الذكري واندلق الحنين المبين

معاوية التوم مستشارالعبدالاله ابوسن;
ورغم اننا نكره لك ان تتوحل في زمان البرك الاسنة

وان تتلبك بطين هؤلاء ولكنا رغم ذلك نزف لك التهنئة
ونطلب لك التوفيق لانك تقدر ان تقيس الاشياء بحجمها المناسب

وعلي الود نلتقي

الاخ العزيز الدكتور هشام عثمان ادم
اشكرك جزيل الشكر على هذه المشاعر الفياضة و ذكرياتك الحلوة للقضارف . و الكلام الجميل دا حصل فى زمن ولى , و انا برضو ما زلت أذكر تلك الايام و الحياة كانت بسيطة بدون تعقيدات و عشان بحن للقضارف و لى تراب القضارف و لى اهل القضارف الميامين و بى حبة الخبرة و الدراسة المتواضعة فى مجال السياحة و الفندقةعايز اقدم لى القضارف شىء فى مجال تخصصى بغض النظر عن الوزير منو و لا هو مؤتمر وطنى او حركة شعبية ,عموما أخى دكتور هشام سعيد جدا جدا بى مداخلتك وانت فى ( أيرلندا )تنهل من العلم كل امنياتى لك بالتوفيق و السداد .
أمل ارسال تلفونك على الماسنجر و انا فخور بتلاميذى المتفوقين و الذين حققا نجاحات فى مجالات مختلفه .
مع حبى و مودتى وتحياتى لكل ابناء القضارف بالمملكة المتحدة و ايرلندا .
معاوية التوم

بروك المنصب يا معاوية وهذا الشخص الذي عينك في المنصب له توجهه الهوسي يعني هو كوز بدرجة قف تامل

وبعدين حجة الاصلاح والعمل من الداخل دي غير مرتبطة بالعمل في منصب تعييني من قبل هذه الحكومة السيئة السمعة وخاصة في وقت اصبحت اكثر تنفيرا
لاحظ لدور الشيوعيين في المشاركة ضمن التجمع الوطني بالبرلمان حالهم زي الحمار المابي البنطون
انا اكتب اليك من هنا قبل ان تبدا ان خطوة اصلاح الحال السياحي لمدينة القضارف لن ولا يتم
وبعدين العطش قرض اهل القضارف قرض

انا اعتقد ان هذا شرك لك انت الانسان الجميل ونبيل لمرمطة اسمك بهذا التنظيم الذي قتل البسمة في شفاه الاطفال وصادر اللقمة من الجيعان
ودعا الي التفسخ الخلقي والدعارة بل يمارسها قيادات في كل الولايات


عشمي ان تدرس هذا الامر جيدا انا اعرف صدق نواياك
ولكن الاستاذ محمود قال لجمال عبد الناصر انت حسن النية
وحسن النوايا لا يحكم الشعوب
اقول قولي الان وانتظر

ألأخ/صبرى الشريف

لك التحية

وشكرآ على مرورك الجميل


إسماعيل محمد أحمد عباس...............أم درمان

الاخ العزيز صبرى الشريف

لك منى الاف التحايا . شكرا و شكرا جزيلا و كلامك واضح و أنا صاحى و مفتح عيونى , أقدر جدا شعورك و دمت اخا وفيا مخلصا .
معاوية التوم

الاخ معاوية التوم
تحياتي كيف حالك والاسـرة وصـديقي الاستاذ اسـامة التـوم مـحمد طه
القضارف تلك المدينة الصامدة مظلومة مـن كل الحكومات المتعاقبة وعانت وذاق مـواطنوها الامـرين وافقرت اقتصاديا واصبحت البقـرة الحلوب
ومصدر للنهب السـريع من كل ولاتها المستوردين خصيصالذلك
رغـم ثقتنـا في كفائتكم الا اننا نتمني لو تم اختياركم منذ فترة لمراقبة
العصابة المنظمةالتي افقرت اغنياء المدينة ومواطنيها
تهانينا مليون وزف تهاينا للاستاذ الخلوق عبد الاله ابوسـن الذي عاصرناه
لاعبا هو شـاب قدوة سـيقدم الكثير للرياضة والرياضيين بالمدينة
وابقوا عشـرة
اخوك عادل خميـس

الاخ عادل خميس
لك الاف التحايا و اشكرك على المرور و يدنا على يدكم لنزيل الغبار و نعمل من اجل القضارف .
مع تحياتى للاسرة

الأخ / معاوية التوم
الاعلامي الجهبذ
سوف نبارك للمنصب لانك قطعا اكبر من كل المناصب
السودان سوف يذدان بك... ليست القضارف وحدها لكن كل القري والبندر
سوف نفتقدك بالرياض لانك كنت واحدا من صناع الفرح والجمال وسمار الليالي وفرسان الأمسيات الحالمة
........
دعك من كل شئ ذلك أن السودان يستحق أن ياخذ مثلما قدم ويستحق خبرات الطيور المهاجرة من أمثالك وتستحق أنت أن ترتاح
تحت ظل ظليل
ونسم عليل
ووجه جميل
وأنت تغني مع طفل صغير يا سمسم القضارف ..الزول صغير ما عارف

ألأخ/على الكرار هاشم

السلام عليكم


وشكرآ على مرورك الجميل وكلامك ألأجمل

ده من حسن أدبك يا رائع....

إسماعيل محمد أحمد عباس..............................أم درمان.

Quote: انا اعتقد ان هذا شرك لك انت الانسان الجميل ونبيل لمرمطة اسمك بهذا التنظيم الذي قتل البسمة في شفاه الاطفال وصادر اللقمة من الجيعان

A trap or an invitation for others to think "sell-out". I hope for non
but I can't really find a reasonable excuse.. Working from within can be done
without joining the crew.. my regards to Sabri and Sidig for clearly stating it out

التحية والاجلال تاني
لقد ناوشتني كلمة الاخ عادل خنيس حياه الله
ان شخص عبد الاله لا علاقة لنا به بس فكرته هي التي اغتالت اهل دارفور وشرق السودان وجنوبه وشماله ووسطه وهي التي جعلت العواصف تاتي الينا من اي ناحية بسبب الدولة الدينية سيئة السمعه في 1989 احتا انا
اولا العلاقات الاجتماعية لا تجعل ان تنظيم الجبهة الاسلامية الفاشي ان تمتد له اليد كنت اكون فرحان لو ان الاخ معاوية انتظر حكومة ديمقراطية منتخبة هنا سيدور فقي فلك عصابة يونيو القبيحة ويكون اسمه ارتبط بهذا النظام

والله انا اعرف الجهد في معالجة الفنانين وموقف معاوية من اهل القضارف لنا ناس كتار هنا

هذه الحيكومة زي جراب الدقيق من دخل فيها اتسخ ولو كان نضيف

كيف يتسق هذا مع جرائم ضد الانسان في جميع النواحي
وكيف يتسق هذا وغالبية اهل النظام ودفته شوهو اخلاق المجتمع السوداني وساهموا في اظدياد ظاهرة الدعارة والتفسخ الاخلاقي وعبد الاله ان كان له خير كان قالها في وجه هذا السلطان الجائر الاحمق الذي سوف يضيع الوطن


اقول قولي هذا واتمني للاخ مرتضي اقامة طيبة في الوظيفة الجديدة لكن غدا لناظره قريب


سيكون مكتوف الايدي لفعل ما امن به مع هذه العصابة

لقد اتي شدو بعناية سبدرات والان عبد الاله يجرجرك اخي معاوية لجهودك الجيدة في العمل الجماهيري القضارف محتاجة لخدمتك نعم لكن السودان يحتاجك اكثر من القضارف
المعركة معركة زوال نظام اعاق الحياة وشوهها

المحترم صـبري الشـريف
مـواقفنا ثابته من النظام واذياله والقضارف مـعروفه بنضالها واحزابها
التاريخية الامـة والاتحادي والشـيوعي امـا الجبهـه فهي نبت شـيطاني في
المدينة فعلاقاتنا الاجتماعية قبل ان يغذوالفكـر التنظيم المدبنة
فتوجيهاتنا للاخـوة ان يبقوا عـشرة لمراقبة العصابة المنظمـةالتي افقرت
اغنياء المدينة ومـواطنيهاوشلت اقتصادها واضحت ولاية للنهب الـسريع
واخيرا استوزر ابناءها وثقتنا ان ولاءهـم للقضـارف يسـبق ولاءهـم للفكر والتنظيم منهم الاتحادي والامة والحركة الشعبية

مع تحياتي اخوك عادل خميس

الاخ العزيز على الكرار
التحية و التقدير و الاعزاز
شكرا على هذه الكلمات و اتمنى ان اكون عند حسن الظن و اسأل الله العلى القدير أن أوفق فى تقديم رؤية جديدة لتفعيل العمل السياحى و الفندقى و مد الاخوة الزملاء مدراء السياحة بالولايات بالمعايير الدولية و الاحكام و التشريعات السياحية وكل معينات العمل التى تؤدى للارتقاء و تطوير السياحة فى السودان و تسليط الضوء على المشروعات السياحية والعمل على جذب المستثمرين للاستثمار فى مجال السياحة و الفندقة .
مع مودتى

حيا الله أستاذنا معاوية التوم .. المعلم و الإعلامي و الرجل المبادر..

المنصب أقل من قامتك بكثييييييييييييير...

لكن الأمر إليك...


تستاهل يعينوك والي القضارف.. لأن الفتق هناك يتسع على رتق منصبك هذا..


الواثق الصادق-حي الموظفين

صديقى العزيز معاوية التوم
حسن النية برضو ممكن يدخلك
الجحيم وبقدر احترامى لخيارك
اختلف معه

الاخ العزيز بدر الدين الامير
لك ودى و معزتى ما زلت فى انتظار التصور لتأبين الراحل المقيم هاشم ميرغنى و هنالك أتفاق مع جريدة الخرطوم لصفحة كاملة تغطى المناسبة .
مع شكرى و تقديرى

ألأخ/الواثق الصادق


لك التحية

وشكرآ لمرورك الجميل

إسماعيل محمد أحمد عباس......أم درمان

ألأخ/ بدرالدين ألأمير



حالص النحايا والود


وشكرآ على المرور


إسماعيل محمد أحمد عباس..................أم درمان

ألأخوة /بمجموعة الطيار للسفر والسياحة


تهنىْء ألأخ/معاوية التوم على هذا المنصب ,ألذى صادف أهله

وألأخ/معاوية من الكوادر المؤهلة التى يمكنها أن تساعد وتساهم فى مجال السياحة,


ألأمنيات الطيبة له بالتوفيق.

الاخ العزيز الواثق الصادق الله جابو
لك منى الاف الاف الشكر و التقدير على المداخلة و انا اكملت ليك اسمك لحدى جدك عشان اوضح ليك انك فى الذاكرة لانك كنت (شاطر ) و تم تكريمك فى تلفزيون القضارف فى برنامج ( افاق تربوية ) و كنت قد احرزت المركز الاول على مستوى المحافظة.
تحياتى للاستاذة مربية الاجيال ( ثريا ادريس يونس ) و الابنة الصحافية و الاعلامية و المذيعة ( فاطمة الصادق ) و تحية خاصة للاخ الصادق الله جابو .
مع مودتى

ألأخ/معاوية


ماجننت الواثق الصادق جنس جن لحدى ما صدق ولا واثق من الكلام الكتبتوا ده من راسك أم من كراسك


لكم التحية جميعآ// وبركات البوست بدت تظهر بالتعارف الجميل ...مودتى

إسماعيل محمد أحمد عباس...............

و الله يا أستاذ ماشاء الله عليك..

الزمان: 1993 م

المكان :هيئة الثقافة و الفنون

المناسبة : تكريم المتفوقين بالمراحل الابتدائية و المتوسطة و الثانوية لذلك العام

الجهة المكرمة : تلفزيون القضارف .. و الدينمو المحرك الأستاذ معاوية التوم..

موقعي : الأول على البنين في محافظة القضارف و السابع على الولاية الشرقية

ما زلت محتفظاً بتلك الشهادة التقديرية و التي وقع عليها السيد جعفر محمد علي رئيس مجلس أمناء التلفزيون في ذلك الزمن



و الله أيام يا أستاذ..

تصدق لما جيت الأول في الثانوي التلفزيون ما جاب لينا خبر ذاتو..

يا حليلك..

كلنا أمل أن تتحرك ريشتك بالإبداع على اللوحة الكئيبة الجاثمة على صدر القضارف الآن..

خالص محبتي

الاخ العزيز الواثق الصادق
برانامج أفاق تربوية أول برنامج يهتم بتكريم المتفوقين فى امتحانات الشهادات الثلاث( ابتدائى ,متوسط , ثانوى ) وقد ساهم كثيرا فى تحفيز الطلبة و الطالبات لبذل المذيد من الجهد فى درب العلم و المعرفة و هنا احى كل الذين دعموه مادياو معنويا (بدون اسماء ) لانهم كثر .
أخى الواثق لك التحية لقد أخرجتنى من أطابير العمل و هيجت الذكرى للقضارف و اهلها الميامين .
دوما
معاوية التوم

اخى العزيز تاج السر محمد حامد

التحية ليك و للاسرة الكريمة . ظللت اتابع كتاباتك عبر ( جريدة الرأى العام ) فى صفحتكم منبر الغتربين و التى لعبت دورا كبيرا فى حل العديد من قضايا الجالية السودانية بالمهاجر المختلفة و معجبا جدا بطريقة طرحكم و المعالجات لهذه المشاكل ( المزمنة ) .
و سعدت جدا الاسبوع الماضى بعمودكم المقروء ( بدون فلوس ) وأنتهز الفرصة لاناشد الاخوة اصحاب الجرائد و الاخوة رؤساء التحرير بالتركيز على استقطاب كوادر صحافية مؤهلة و محترفة للعمل الصحافى و الاعلامى ( أمثالكم ) و هذه حقيقةلان معظم الجرائد بها كمية من المواضيع (الحشو )التى لا تخدم اى قضية و هى من باب الاستهلاك و تسويق المطبوعة . مرة اخرى احييك اخى تاج السر و نلتفى .
و لنا عودة
مع مودتى

الف مبروك استاذ معاوية

أتمنى ان ترفع من ثقافة السيد الوزير اولا ثم تكون اضافة حقيقية للمثقف السوداني ..


مودتي

الاخ بدلر الدين الامير
تحياتى بمقدار اشواقى
رأيك محل الاحترام و لنا عودة فى هذا الموضوع .

أنسق هذه الايام مع الاخوة بالرياض لاقامة ( تأبين للراحل المقيم الفنان هاشم ميرغنى ) عليه رحمة الله فى ذكراه الاولى حيث يصادف الثامن من يونيو القادم الذكرى السنوية للمبدع الراحل هاشم ميرغنى .
امل موافاتى بتحرك الجالية السودانية بقطر فى هذا الشأن .
تحياتى لبورداب الدوحة

ألأخ/علاءالدين حيموره


السلام عليكم


كيفك يا راجل ياظريف......لك التحية بمرورك الجميل

أسعدتنا


إسماعيل محمد أحمد عباس............

إسماعيل عباس ومعاوية التوم
لا أغرد خارج السرب ولكني أقولها صادقا ...
أنتما تمثلان نموذجاحقيقيا للتفوق المهني المحترف ،،
نعم أعرفكما عن قرب وأعرف كيف ارتقيتما سلم الخبرة
وكيف ارتقت بكما وكالة الطيار والتي تحولت إلى شركة الطيار
مع كوكبة من الموظفين السودانيين الذين أحسن اختيارهم
من قبل شركة الطيار أصبحت تلك الشركة رائدة في مجالها
وتفوقت على مثيلاتها في مجال الطيران والسياحة حول العالم
وهذا المثال يأتي ليؤكد تفوقنا خارج الوطن ويدعونا لدراسة
أسباب تخلفنا داخل الوطن ،،،
أحي من خلالكما الأستاذ أحمد التجاني المثال الآخر للتفوق
ومحمد عمر .. العلم الذي على رأسه نار ... والتحية لشركة
الطيار التي أحسنت الأختيار وخرجت لنا مستشارا سياحيا ولائيا ..

ود عباس !!!

الفي القهوة ما جلاس ,,,

لا أعرف من هو معاوية ولكن كل ما يسر بالك ويسعدك بلا شك يسر بال الجميع ,, الف مبروك لمعاوية

وتسلم ,,

الاخت العزيزة جدا عواطف أدريس اسماعيل
لك الود والتقدير و الاعزاز
طبعا ( الفنان ما بيعرف المعجبين , لكن المعجبين بيعرفوا الفنان ) و لانك انتى فنانة انا بعرفك , و بعرفك من خلال ( بوستاتك ) الرائعة و من المتابعين لكل القضاياالتى طرحتيها على طاولة النقاش و خاصة قضايا المرأة السودانية. عموما لك الشكر و مرحبا بك و يبدو ان الاخ اسماعيل عباس ( من عندكم ) .
مع خالص التحايا
معاوية التوم

الاخ العزيز عادل جبارة
لك منى الاف التحايا و جزيل الشكر على المرور و افيدكم ان مجموعة الطيار للسفر و السيلحة بها العديد من الكوادر السودابية التى نالت خبرات عالمية فى مجال السفر و السيلحة و فى هذه السانحه احى الدكتور ناصر بن عقيل عبد الله الطيلر ( الرئيس ) و هو أول سعودى ينال درجة الدكتوراه فى مجال التسويق السيلحى و كان بحث التخرج لنيل درجة الدكتوراه ( أثر السياحة على أقتصاديات المملكة العربية السعودية )
مع مودتى
معاوية التوم

Quote: أتمنى ان ترفع من ثقافة السيد الوزير اولا ثم تكون اضافة حقيقية للمثقف السوداني ..

الأخ العزيز علاء
والأخوة المحترمين
الأخ عبدالاله أبوسن الذى أعرفه عن قرب ( رفيق سكن 5 سنوات) كان وزير ثقافتنا قبل أن يعين وزيرا
بزمن طويل... استفدنا من زمالتة كثير و كان شعلة ثقافة لها عظيم الأثر في من حوله و أنا أحدهم
عرفناه أديبا شاعرا و قاصا .... ولاعب كورة بدرجة سيدا
كان كابتن فريق الأهلي القضارف و كابتن منتخب الاقليم الشرقى زمن الأقاليم وكان يمكن أن نراه في الهلال أو المريخ لكنه فضل الدراسة علي الكورة
خريج كلية العلوم حامعة شمس
دبلوم عالي فى الدراسات الدبلوماسية
ماجستير أعلام من جامعة الخرطوم
ويعد رسالة دكتوراه في الجودة الشاملة
بالله يا معاوية قول ليهو رعم بعدي برسل سلامى
مع أمنياتي لك بالتوفيق و الؤدد








التغديل بسبب فقد جزء من النص%E

الاخ العزيز القرضابى
لك التحية و المودة
شكرا جزيلا على التوضيح و يبدو أنك ( دفعة مع السيد الوزير ) و ملم بسيرة الاستاذ عبد الاله الذاتية و فعلا هو الصحافى و الاعلامى و الرياضى ( و لاعب مخضرم )بجانب أنو ( شيخ عرب ) و هذه حقائق .
مرة أخرى لك التحية و التقدير و أخدت تلفونك من البروفايل و سوف أتصل بك .
معاوية التوم

في لقاء جمعني بمعاوية التوم واثناء النقاش أصرّ الأخ معاوية على أن الشخص يجب أن تتوافق شهاداته مع عمله وحينها كان قد إستغرب كيفية ولوج أشخاص أمثالنا سلك التعليم العالي عبر بوابة التدريس ..
العجلة تدور والليلة ليك وبكرة عليك ..
أسة عليك الله يا معاوية في ذمتك شن بيلم التربية على السياحة ..
شفت اللخبطة دي كيفنها ..
ليهو حق الزبير بشير طه يكون وزير الداخلية ..
تخريمة :
يا زول مبروك عليك وتستاهل والله . بس تاني ما تستعجل في إصدار الأحكام وأوووعك تقول لي ديك كانت ونسة مجالس ساي
سمح؟

الاخ العزيز عمر الفاروق
مليون سلام و مليون تحية
لك الشكر و التقدير على مرورك . و لنا عودة لتوضيح العلاقة بين التربية و السياحة . و ايضا لللقاء الذى جمعنا و ما تنسى انو كان ( موثق ) و موجود , لك منى الاف الشكر .
مع مودتى و حبى
معاوية التوم

ألأخ/العزيز

الظريف
الخلوق

عادل جبارة لك التحية وألأعزاز..وأحجلت تواضعى ياراقى........

عمومآ مجموعة الطيار بها مجمومعة طيبة من السودانين ذوى الخبرة من غيرنا...وتعلمنا الكثير والحمدلله فى هذا الصرح الكبير الذى قاده د/ناصر الطيار بعصامية تعلمنا منه الكثير..

وألأب الروحى لهذه المجموعة ألأخ/محمد عمر مصطفى والقيادى المتميز ألأخ/على التجانى أحمد..

نسأل الله ألتوفيق للجميع وهذا من فضل الله علينا.

لك ودى أخى عادل جبارة.

حفيدتى//

الظريفة

عواطف إدريس إسماعيل..

(ألأسم الرفم)...غبتى كثير لما إشتقنا ليك..كيف ألأولاد وكيف صحتك وجريك بين الشارقة وأبوظبى..

شكرآ على مرورك الجميل..وإنتى عارفة مرورك بضيف للبوست نكهة القرنفل..

لكى منى خالص التحية

إسماعيل محمد أحمد عباس.

انا حقيقة لا أعرف السيد الوزير ولكن أعرف الاستاذ معاوية التوم فهو أهل ليكون وزيرا للثقافة وليس مستشارا .. فهو اديب وبليغ ومرهف ومثقف وفنان ..دائما يقود كل الاعمال الثقافية بنجاح باهر ..


وعندما قلت ان يرفع من ثقافة الوزير لاننا لم نرى وزيرا للثقافة في عهد الانقاذ كان مثقفا ..


واتمنى ان يؤدي الاخ معاوية ما منوط به من دور في رفع وعي محمد احمد ..


مودتي ..


شكرا اسماعيل ود عباس ..

الاخ علاء حيمورة
لك التحية و التقدير
شكرا على التوضيح و انت كلك زوق و فرحانه بيك كل مدينة الصحافة التى قدمت لها الكثير و الكثير .
تحياتى لكل الاخوان الزملاء برابطة الصحافة بالرياض.
مع حبى و تقديرى

الجميل سمعة !!!

ليك وحشة والله ,,, نحن بخير لانفتقد سوى مداخلاتكم الرائعة وشكرا على السؤال وعلى الكلمات الطيبة,,

ألأخ/القرضابى

لك التحية

وشكرآ على المرور الجميل


سملمت

إسماعيل محمد أحمد عباس..............

ألأخ/عمر الفاروق


سلام وتحية كبيرة


وسكرآ على المرور



إسماعيل محمد أحمد عباس..................

أحبتي ..
لم يكتب لي من قبل شرف المعرفة بالأستاذ معاوية ..
أمنياتي له بالتوفيق ..
ثناء وتقدير أخوة أعزهم بث في روعي ثقة غير محدوده بكفاءتك أخي معاوية ..
فالاشخاص تقيمهم معارفهم العلمية والإجتماعية ..
ليوفقك الله ..

والله نطيط (سمعه) وفرحه الشديد بيك هو الجابني ليك .

دامت لكم العافية.

الاخ العزيز محمد على طه الملك
الاف التحايا و مليون سلام
أتشرف جدا بمعرفتك و أشكرك جزيل الشكر على هذه الكلمات العطرات فى حقى و كل امنياتى أن أوفق و ان اكون عند حسن ظن الاخوه الزملاء .
لك مودتى
معاوية التوم

محمد الملك


إنت بجد ملك

يا ملك كيف ما تنطنى وإنت الملك

لك الشكر على مرورك الملكى

إسماعيل محمد أحمد عباس...................

الف مبروك اخى العزيز

ربنا يقدرك وشد حيلك

قدها وقدود

الاخ العزيز مزاحم الضوى
التحية و التقدير , كيف الاحوال
شكرا جزيلا واسال الله سبحانه و تعالى ان نقدم للقضارف و لاهل القضارف الميامين
مرة اخرى لك حبى و تقديرى
معاوية التوم

التهنئة لوزير السياحة/ عبد الأله ابو سن
فهنيئا له ولوزارته
هذه الشخصية الإعلامية البارزة
خصوصا في مجال السياحة
معاوية التوم ليس محل تعريف هنا
فهو علامة في الرياض وفي السودان
نحن في انتظار الكثير منك
اخي معاوية
وانا عارفة انك اهل لما حملت به
فليحفظك الرب

الاخت العزيزة سارة عمر يوسف
لك التحية و التقدير
شكرا جزيلا و انت رائدة من رائدات العمل النسوى فى الرياض و تشهد جمعية الصحفيين السودانية بالرياض على نشاطك الدافق و عطائك الثر و انت رئيسة القسم النسائى بالجمعية و لعل الندوة التى قدمها البروفسيور توفيق حمزة جعفر بمركز الدكتور سليمان الحبيب الطبى مؤخرا خير دليل على اهتمامكم بقضايا المرأة السودانية بالخارج . مرة اخرى احى الاخوة الزملاء بجمعية الصحفيين .
مع احترامى الزائد
معاوية التوم