احنا جيل استمارة 130 مطبعة ...

والله العظيم انا حركة استمارة 130 مطبعة القفلوا بيها (الصحافة) دي كيفتني عدييييل كده !!!

أرجو ألا يتجرأ الحاقدون منكم مجددا على القول بأننا شعب (غير مبدع) أو (غير خلاق) ... والله إننا لأكثر شعوبه (خلقنة)

أنا - شخصيا – سأبرهن لكم بالدليل القاطع والبرهان الساطع أن هذه (الحركة) هي فتح جديد في التاريخ السوداني من حيث المنظور الداخلي والخارجي والبؤري المتناهي إلى ما لا نهاية ..

وسأبدأ بحثي هذا (بالفتح) في آلية اتخاذ القرار والمنهجية العلمية التي إن اتبعها السودانيون فسيصيرون في مصاف الأمم العظيمة لا محالة:

1. آلية اتخاذ القرار

تذكرت ذلك المشهد العبقري لعادل إمام (المحامي) ويسرا (فتاة الليل) في فيلم (طيور الظلام) .. وكان عادل إمام ينظر للقاهرة لأول مرة من شرفة غرفة بأعلى فنادق القاهرة .. فعلق بحسرة:

- "البلد دي اللي يشوفها من فوووق غير اللي يشوفها من تحت"

فردّت يسرا "وهو اللي فوق أحلى ولا اللي تحت ؟؟!!!"

أسع يا ربي ... القرار ده جا من فووووق ولا من تححححت !!!

لو قلتوا جا من فوووووووق ما ممكن .. ناس فوووووق ديل ما محتاجين لفّة قدر دي

طيب جا من تححححححت ... ما تقنعوني (العبقرية) دي تكون بتاعت (تحت) أبدا أبدا !!

تذكرت أفلام الأكشن الأمريكية ... وردّدت بثقة (مع هزة راس):

- لا بد وأنهم قد استعانوا بــ (الجهاز) !

لكن أنا زول بتاع كمبيوتر وعارف ... (الجهاز) ده غبي وما بيفهم ... يعني تديهو data بيطلع منها information بناء على Algorithm ثابتة دون أدنى قدرة على التفكير

يعني اتخيلوا معاي (الجهاز) ده أدوهو معطيات:

صحفي قليل أدب + صحيفة شايفة روحها + ناس عاملين شرفاء

قام طلع ليهم النتيجة:

استمارة 130 مطبعة !!!

امممممممممممممممممممممممممممم ( ده أنا بافكر !!)

برضو .. نظرا لعلمي بطريقة عمل هذا (الجهاز) ومدى غبائه ... فهذا مستحيل علميا... فكما سبق وذكرت أن هذا الجهاز يعتمد على خوارزمية ثابتة ..

يعني في هذه الحالة لو أدوهو معطيات:

قوات أممية + ضغوط دولية + عقوبات مجلس الأمن

برضو حيطلع نتيجة:

استمارة 130 مطبعة !!!

واتخيلوووا الحيحصل لو وقفوا كل موظف UN وقاموا ملّوهو استمارة زي دي !!!

امممممممممممممممممممممممممممم (أنا بافكر تاني !!)

برضو لأني أنا متخصص في هذا (الجهاز) .. تذكرت أنه في سنة أولى كلية أدونا حاجة اسمها Random Function ... طيب امكن (الجهاز) شغال بالـ Random !!!

لكني سرعان ما استبعدت هذه الفكرة عندما تذكرت تعليق أستاذي على هذه الدالة العشوائية "دي عاملة زي الدنيا ... ما تقدر تعرف حتديك ياتو قيمة !"

يعني لو أخد نفس المعطيات ممكن مرة يدي نتيجة "استمارة 130 مطبعة" لكن برضو فيه احتمال انه يدي حاجة كعبة زي:

(إلغاء المادة 130) ولا (حرية التعبير) والعياذ بالله ...

فأكيد أكيد ما ممكن أنه القائمين على (الجهاز) يخلونا تحت رحمة (الدالة العشوائية)!

امممممممممممممممممممممممممممممممممممم (انا نمت شوية !!)

وجدتها !

بعد تفكير طويل، تذكرت أستاذ الرياضيات ... مع أول مبادئ الرياضيات الحديثة سألنا:

"واحد + واحد تساوي كم ؟؟"

طبعا حتقولوا (اتنين) ...

غلط !!!!

أهم مبادئ الرياضيات الحديثة هي أنو (واحد زايد واحد ما بتساوي اتنين)

انت ممكن تفترض انو واحد + واحد بتساوي أي حاجة وتبني افتراضك على هذا الأساس وتكوّن رياضياتك الخاصة الفيها واحد + واحد بتساوي (أي حاجة)

يعني ممكن تخلي مثلا:

حرية + تعبير = كارثة

إذا حرية = كارثة – تعبير

ولو افترضنا أنه السودان الآن كارثة .. يعني

السودان = كارثة

إذا حرية = السودان – تعبير

يعني شيل التعبير من السودان يبقى عندك حرية !!!

بعد جهد جهيد ... توصلت إلى طريقة عمل (الجهاز)

.
.
.
.
.

الجهاز شغال (بالرياضيات الحديثة) يا جهلة !!!!

المنظور الاجتماعي – التاريخي

طالما شكوت بأننا جيل بلا ذكريات ولا أحداث ... دائما ما ينتابني ذلك الهاجس بأني عندما أجلس مع أحفادي لن أجد ما أحكيه لهم !!

يعني ... هناك جيل الاستقلال الذي عاصر تلك الفترة المجيدة والأحلام البريئة والجنيه البيساوي تلاتة دولار ...

وهناك جيل أكتوبر .. بفخره بالثورة وحكاويه عن الزمن الجميل والترماي والأفلام البتتعرض مع أوربا ....

وجيل الانتفاضة بحكاويه عن النضال وشجاعة فاطمة ومحمود وقصص نميري

كلها أجيال لها ما تحكيه ... لكن ماذا سأحكي لأحفادي ؟؟؟

فأنا لم أعاصر انتفاضة أو ثورة أو حتى انقلاب ... لا ترماي لا سينما لا كورة ولا حتى بني آدمين ...

حتى جاء هذا اليوم العظيم ... احنا – بلا فخر - جيل استمارة 130 مطبعة !!!

أشعر بمنتهى الزهو والفخر لأني عشت لأرى هذا اليوم ...

المصريين .. عندهم مقولة بتقول "ادوهو استمارة ستة" بمعنى أنهم فنّشوهو ولا انتهو منه .. والحكاية أنه في زمن الملكية كانت هناك استمارة يملؤها الموظف عند (تفنيشه) هي استمارة رقم 6

تخيلوا مدى الفخر الذي يشعر به أبناء هذا الرجل الذي اخترع (استمارة ستة) وهم يرون استمارة والدهم تعيش كل هذه الأعوام وتتحول إلى مصطلح يستخدم في المذاكرة واللعب والحب و و و و .... يا بختهم !

تخيلت حفيدي وهو يركض نحوي مهللا " جدو جدو ... وائل أدوهو استمارة 130"

فأرد باستغراب "استمارة 130 ؟؟؟؟"

يرد تامر "آاااااي .... الجيرل فريند حقتو سابتو"

فأرد ضاحكا "والله انتو جيل غريب ... اسمها أدتو شاكووووش ... شنو الألفاظ الغريبة بتاعتكم دي"

ثم أحن إلى ذكريات الزمن الجميل "يااااه ... الله يرحم تلك الأيام ... ثم أضبط قعدتي وأمسك الشفع أمامي وأضع الآي بود جانبا وأحكي:

"انتو عارفين أصلا حكاية استمارة 130 دي شنو ؟؟؟ "

وأبدأ في سرد تفاصيل تلك الفترة الجميلة التي عايشتها ويندمج الولدان بشدة ويسألني وائل "لكن يا جدو ... ديل ما ناس عباقرة"

أرد بفخر "طبعا انتو السودان ده قايلننا بنيناهو ساي كده ... ما (بعقول) زي دي"

لكن وائل يوقفني "السودان ده شنو يا جدو ؟؟؟"

أضطرب قليلا وأخرج الخريطة من جهاز الآي بود "شايف المنطقة دي كان اسمها السودان"

يمسك الولد الجهاز ويقرأ:

"يستنكحون واخوانه للاستثمارات المحدودة" تمت خصخصتها عام ألفين وشوية، المساحة 2 مليون مربع، ومملوكة لمجموعة استثمارية عالمية

يتوجه وائل الملعون نحوي:

- يعني انتو الجيل الباع السودان ؟؟؟

فأرد بحسرة:

- لا والله يا ولدي ... احنا الجيل الأدوهو استمارة 130 !!

روعة

كلامك روعة يا كابروس

ماعارف اضحك

ولا ابكى....

بالذات جملتك دى

Quote: يتوجه وائل الملعون نحوي: - يعني انتو الجيل الباع السودان ؟؟؟ فأرد بحسرة: - لا والله يا ولدي ... احنا الجيل الأدوهو استمارة 130 !!

حزين عليك ياوطن

- أصلو ناس جيلكم ده كلهم كانوا لسانهم طويل ؟
أبدا ..
بعضهم كان ايده طويلة لكن الجهاز لانه شغال بخوارزمية ثابته
لما تنزل معلوماتهم كان بديك مقابلها علامة صاح ..
..
..

يلا واصل ياكبروس ..

الحل للأزمة الراهنة

حقيقة أننا لو تكاتفنا واستخدمنا مثل هذه الطرق المبتكرة فإننا – لا محالة – سنتمكن من الخروج من النفق المظلم الذي تمر به بلادنا.

لكن المصيبة تكمن في أصحاب الأفكار التقليدية البالية الذين يملؤون سماءنا جعجعة : الحريات – الديموقراطية – حقوق الانسان – الشفافية ... كلام فارغ !!

انا – كزول مبتكر ومزاجي عالي – أتقدم بهذا المقترح والذي سأفصله في الأيام التالية وأتمنى أن يجد مكانه للمناقشة في المجلس الوطني وبين أهل الاختصاص (يعني جات علي أنا يا فِرد)

الحل هو في نظام "الكفيل" !!

كل مواطن – من السودان القديم – يكون لديه كفيل – من السودان الجديد – يكون هو المسؤول عنه وعن تصرفاته أمام القانون.

أبدأ مقترحي هذا بافتراض أساسي سأبرهن عليه بالأدلة وهي أنه - كده كده - أصلا السودان ده ما حقنا وانه أصلا (سيستم الكفيل) ده شغال وماشي في السودان فقط يحتاج إلى شوية (تظبيط) ووضعه في قالب علمي متماسك.

حكاية on the side:

صديقتي توجهت الأسبوع الماضي إلى إحدى الشركات الأجنبية – بناء على إعلان وظيفة – الشركة مقرها عمارة فخمة في الطايف .. المهم أنه (الانتيرفيو) مشى تمام لكن صاحبتي (الشليقة) سألت الراجل سؤال بسيط: "الشركة دي شغالة في شنو ؟؟"

رد الراجل : "الشركة حتعمل كاونتري كلب في السودان Country Clubs"

ردت صديقتي مندهشة: "كاونتري كلب !!!!!!!!!!!!!"

رد الراجل (بالانجليزي طبعا): "لا ... ما كاونتري كلب واحد ... كاونتري كلبسسس"

البت المسكينة ترقد في حالة نفسية سيئة وهي ما زالت تردد منذ أسبوع "كاونتري كلبسس ... في السودان حقنا ده !!!!!!!"

وللذين يودون في الدخول في مجادلة حول فرضيتي هذه (أنو أصلا السودان ده ما حقنا) أقول ليهم أها وروني – واحد فيكم – يشتغل في شركة اتصالات ولا بترول ولا وزارة بدون كفيل ... أو حتى يطلع بطاقة ولا باسبورت ولا كرت خدمة ولا واطة بدون كفيل ...

الحل – يا سادتي – هو في نظام متطور مقنن لهذه الكفالة:

1.1: الكفلاء

يقسّم – الكفلاء – حسب نظام إلكتروني متطور:

يعني في السعودية كمثال .. انت لو كفيلك أمير أكيد ما زي لما يكون كفيلك غفير

بما أننا بدأنا – مع استمارة 130 مطبعة دي – بدأنا عصرا جديدا للابتكار والإبداع ... فأقترح نظاما - أكثر تواؤما مع المرحلة – لفرز الكفلاء:

يعني أول حاجة في نوعين أساسيين من الكفلاء: (الجماعة) و(العاملين روحهم جماعة) وعلى أساس النقطتين يحصل المرشح على نقاط معينة يحددها جكس (جهاز الكفالة السوداني)

وبعد فرز الكيمان المبدئي نتوجه لنقاط أخرى: مثلا علاقة المرشح بالجهاز (جكس) وتاريخ انضمامه له واسهاماته النظرية والعملية وكده ...

ثم بعد تحديد قوة علاقة المرشح بـ (الجهاز) نذهب لأمور أخرى جانبية: استثمارات المرشح – المعدل الثرائي (الثروة / زمن تكوين الثروة) قدراته الاختلاقية إلخ إلخ ...

من فوائد هذه المنهجية العلمية:

1.

القضاء على ظاهرة الهوا:

من الملاحظ في الفترة الأخيرة، مع دخول وجوه جديدة (للسيستم)، تنامي ظاهرة (الناس الهوا) و(الناس الهبوب) يعني زمان كانوا معروفين الناس الهوا ديل منو وكانت (بطاقتك) بتحدد مقدار (الهوا) المصاحب لسيادتك ... لكن مع وجود حكومتين وجيشين وتلاتة أربعة حركات أصبحت الجهات المعنية في حيرة من أمرها لتحديد من أكثر (هوائية) ممن ؟؟

هذا الجهاز سيحل هذه المشكلة نهائيا، فلو فرضنا اتنين اختلفوا في الشارع، وجاء أفراد (جكس) لحل المشكلة .. بس يطلبوا من الحاضرين إبراز بطاقاتهم الجكسية ويتم تمرير البطاقتين عبر الجهاز فيقوم بعقد مقارنة سريعة بين الكفيلين فيحدد من منهم أكثر (هوائية) ويحدد الغلطان طوالي ... حتى العقوبة يتم تحديدها بعلاقة رياضية بسيطة:

(هوائية الزول الغلطان / هوائية الزول الما غلطان) * المعدل الهوائي لكفيل الزول الغلطان

ولن يتمكن أحد في التشكيك في نزاهة هذا النظام لأنه الموضوع محسوم بالعلم والرياضيات.

سأواصل – بإذن الله (ثم) الجهات الجكسية - عرض مشروعي (الجادّ) هذا تحت شعار:

الله – الوطن – الكفيل !!

ولا أقول ليكم ... الله - الكفيل - الوطن

ولا عارفين .. خلوها (الكفيل وبس والباقي كله خس)

حسع الساعة عندي 2 بعد الظهر ..
كدا دق علي الجهاز وورينا الكفيل الاقوي منو في اللحظه دي ؟

Quote: طالما شكوت بأننا جيل بلا ذكريات ولا أحداث ... دائما ما ينتابني ذلك الهاجس بأني عندما أجلس مع أحفادي لن أجد ما أحكيه لهم !!

هذا محزن، محزن جدا يامظفر

الأعزاء حسن واشراقة ومحمد علي

Quote: عبسا بقول واقرا في سورة عبس ما تلومش حد إن ابتسم أو عبس فيه ناس تقول الهزل يطلع جد وناس تقول الجد يطلع عبث

لكم حبي وتقديري

الجهاز ده دخلت ليهو كل المعطيات ... لكن على راي الميكانيكية جاب (جاز) !!


فاصل ونواصل ..