Post: #1
Title: جينا بعد الفرقة نســأل ..
Author: معتصم دفع الله
Date: 05-15-2007, 11:58 AM
جينا نلقى محنه عندك ..
بنحكى ليك عن ليل شقانا ..
عن متاهات نجم بعدك ..
نحن سالمناك بى الطيبة ..
و ياما بكى عيونا ردك ..
ليك زمان أديتنا ريدك ..
جيت حرمتنا تاني منك ..
وكم منعت اللحظة خواطر ..
برضو ما قادر .. ملامك ..
ما .. سلامك ( )
|
Post: #2
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 12:04 PM
Parent: #1
كنا قايلين بى ورانا ..
انت زينا طاري ديمة ..
كنا قايلين نحن عندك
زى عيونك لينا قيمة
قلنا تتلقانا انت
الزهور تحضن نسيما ..
الا ريدك تارى روح
عدى فات زى كل غيمة
جينا ليك بالابتسامة
الا ما لقينا ابتسامه ..
|
Post: #3
Title: Re: جينا بعد الفرقة نســأل ..
Author: Elmosley
Date: 05-15-2007, 12:04 PM
Parent: #1
معتصم خير
الحاصل شنو 
|
Post: #4
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 12:08 PM
Parent: #3
بنحكى ليك عن ليل شقانا ..
عن متاهات نجم بعــــدك ..
Quote: معتصم خير
الحاصل شنو |
شفت شوقنا قدر شنو يا أستاذ ؟
قلنا نسأل بس 
سلاااام كتااااار ..
|
Post: #5
Title: Re: جينا بعد الفرقة نســأل ..
Author: ابو جهينة
Date: 05-15-2007, 12:09 PM
Parent: #3
معتصم
صحي مالك ؟
أسوأ شي .. زول كان بيسالمك بي طيبة .. و فجأة تجي تسلم عليهو .. يسلم عليك بي أطراف أصابعو .. و التكشيرة مفروشة في الوش .. و البوز ملوي و ممدود قدااااااااام
الواحد يندم على قولة ( سلام ) ...
عارف دي زهجة ..
الله يهون القواسي يا معتصم
|
Post: #6
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 12:19 PM
Parent: #5
| Quote: أسوأ شي .. زول كان بيسالمك بي طيبة .. و فجأة تجي تسلم عليهو .. يسلم عليك بي أطراف أصابعو .. |
أو حتى ما يسالمك زاتو ..
أو يرد عليك بابتسامة ..
فعلاً أستاذنا أبوجهينة دي حالة محزنة ولحظات يتمنى الإنسان ما تحصل ليهو ..
أهو الدنيا فيها ناس زي ديل ..
وفي ناس فرحانين لي فرحنا ..
زي ما قلت ..
الله يهون القواسي ..
|
Post: #7
Title: Re: جينا بعد الفرقة نســأل ..
Author: مجاهد عبد الرحمن
Date: 05-15-2007, 12:25 PM
Parent: #6
الحبيب معتصم
عساك طيب
حقيقة...
الغربة في الزول التريدو
ويقسى في آخر المسافة
.
.
.
نحكي ليك عن ليل شقانا
وعن متاهات نجمو بعدك
.
.
.
الله يهون القواسي
مودتي
|
Post: #11
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 03:10 PM
Parent: #7
Quote: الغربة في الزول التريدو
ويقسى في آخر المسافة |
مجاهد كيفك يا صاحب ..
دا كلام عميق أتمنى إنو ما يحصل لي زول ..
أها مرات كده بتبقى هترشات غربة وأشجان ..
ربك يهون القواسي ..
أبقى طيب ..
|
Post: #9
Title: Re: جينا بعد الفرقة نســأل ..
Author: عفاف أبو حريرة
Date: 05-15-2007, 12:31 PM
Parent: #6
معتصم لما تكون انسان مرهف شديد وشفاف
بتحس وبتشوف كل المشاعر الحولك حتي لوما كنت
عايش نفس الكلام !!اتمني انه يكون شجن المرهفين
وحلاوة الاستاذ مجذوب اونسه وجينا شايلين ليك فرحنا
وربناما يقسي عليك قلب حبيب
صحي مالك
|
Post: #13
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 03:25 PM
Parent: #9
لا يخلو ليل المغنيين من شجن ..
هي توريطة يا عفاف ..
أسواء حاجة يجيك إحساس إنك ظلمت ليك زول وهو ما حاصل ..
أو تحس إنو في إنسان ظالمك وانت ما عارف هو ظالمك ليه ..
صدقيني هي بعض شجون ..
وقد يكون هناك شي عالق بالنفس كله وارد ..
ويمكن أونسه هو الحرك الحاجات دي بي غنائه الطاعم ..
أسعدني مرورك يا عفاف وكلماتك ..
أصلو الضرس يتاور صاحبي الكاشف تمبس ..
تقوم الحمى تمسكني أنا 
أبقي طيبة وبألف خير ..
|
Post: #8
Title: Re: جينا بعد الفرقة نســأل ..
Author: حافظ العشا
Date: 05-15-2007, 12:29 PM
Parent: #1
ياودعمتي
مالك في شنو انا سافرت وخليتك شديد
مالك اتهبشت بي وراي والله شنو
|
Post: #10
Title: Re: جينا بعد الفرقة نســأل ..
Author: Mohamed Abdelgaleel
Date: 05-15-2007, 01:50 PM
Parent: #8
العزيز معتصم
يا حليلك يا معتصم
هو أن تظل على الأصابع رعشة
وعلى الشفاه المطبقات سؤال
هو جدول الأحزان في أعماقنا
تنمو كروم حوله وغلال
هو هذه الكف التي تغتالنا
ونقبل الكف التي تغتال
فأسال حتى يرضى .. وإن لم .. فألتزم السؤال
|
Post: #12
Title: Re: جينا بعد الفرقة نســأل ..
Author: احمد العمار
Date: 05-15-2007, 03:20 PM
Parent: #10
قوية والله يا معتصم
ان شاء الله خير
أحمد العمار
|
Post: #17
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 06:01 PM
Parent: #12
مش كده عليك الله يا أبوحميد ..
قوية لمن عقدتني أنا زاااتو ..
خير إن شاء الله ما تاخدش في بالك ..
أصلو الضرس تاور صاحبي اليومين ديل
أرقد عافية ..
|
Post: #16
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 04:47 PM
Parent: #10
تحياتي محمد عبدالجليل ..
تقد تكون الأسئلة ليست لها إجابة ..
أو الكتابة في حد زاته مخاوف وذو حدين ..
قدرنا أننا نرمي أنفسنا في موضع الوهن ولا شفاء لجرح الألم ..
وأحياناً لا نجد الكف الذي نقبله أو لا يقبل ذلك ..
وبرضو بعد دا كلو جينا نسأل ..
كل حبي وتقديري ..
|
Post: #14
Title: Re: جينا بعد الفرقة نســأل ..
Author: معتصم دفع الله
Date: 05-15-2007, 03:30 PM
Parent: #8
ما هو المشكلة في سفرك دا يا إبن خالي ..
في حد قال ليك جيب سيرة البحر ..
|
Post: #15
Title: Re: جينا بعد الفرقة نســأل ..
Author: خالد عبد الله محمود
Date: 05-15-2007, 03:58 PM
Parent: #14
معتصم
ده عزمي أحمد خليل مش؟؟
خالد
|
Post: #18
Title: Re: جينا بعد الفرقة نســأل ..
Author: نهال الطيب
Date: 05-15-2007, 09:03 PM
Parent: #15
أنا قلبي أتصبر
لمن تعب صباره
نظرة بكايةحزينة
كان وراءهاوداره
يوم رحلت وشلت
بهجته وأنواره
لا أرتويت من عطفه
ولا أكتويت بي ناره
والله وحدوا بينا البرحوناوراحوا
شالوا من وادينا بهجته وأفراحه
بالكتير يا حليلهم
يا حليل الراحوا
معتصم ياوريف أقيف في وش الخريف ما أنت الربيع
|
Post: #25
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 07:02 AM
Parent: #18
يا نهال إنتِ ما سمعتي أونسة وهو يغني ..
والخريف ودي طبعاً رددها كثيراً ..
يحرم غمامك
شكراً يا غالية وتحياتي ..
|
Post: #24
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 06:42 AM
Parent: #15
كيفك يا خالد ..
الكلمات لحسين أونسة وهو شقيق مجذوب ..
إلا إذا جاء واحد هنا وصححني ..
تحياتي ..
|
Post: #19
Title: Re: جينا بعد الفرقة نســأل ..
Author: امجد محمد الأمين
Date: 05-15-2007, 09:22 PM
Parent: #1
معتصم حبينا ,,,
سيد الروائع ..
احييي انا ...
نسوي شنوو مع القليب الهبابه دا ...
وديتني هنالك وما رجعتني ...
مرات
أغنية ..
عطر ..
كلمة ...
بتعمل ليك flashback لا حتات كتيرة ...
هسي انا مشيت و ما اظني ارجع الليله ..
المشكلة عندي داوم بكرة ..
وعندي موضوع DSL عاوز متابعة ...
و المسافة الفاصلة بعيده مئات الفراسخ ..
بمقياس المسافة
السرعة في الزمن ...
لكن عشان شلنا شوقنا و رجعنا بيه ...
بنرجع بسرعة ..
ما سلامك...
تسلم يا معتصم
|
Post: #20
Title: Re: جينا بعد الفرقة نســأل ..
Author: خالد المحرب
Date: 05-16-2007, 04:24 AM
Parent: #19
|
Post: #21
Title: Re: جينا بعد الفرقة نســأل ..
Author: عفاف أبو حريرة
Date: 05-16-2007, 04:39 AM
Parent: #20
Quote: أصلو الضرس يتاور صاحبي الكاشف تمبس ..
تقوم الحمى تمسكني أنا |
معتصم تمبس ده وجع ضرس ولا ست الريد
يعني تامبا يحب وانت تبكي ليه!!!
تامبا بطل الدلع وماتجرس اخوك البعشيك بعد
الليل يمسيك
انتم الاتنين بطلو حركاتكم دي نحن
راجين الصيفيه وبرامجكم الحلوه
وجع الضرس بدري عليه
|
Post: #22
Title: Re: جينا بعد الفرقة نســأل ..
Author: salma subhi
Date: 05-16-2007, 05:29 AM
Parent: #21
معتصم دفع الله
عساك بألف خير
والله يا معتصم الدنيا دي صعبة....والفراق كعب
الله يلمك في جماعتك
|
Post: #23
Title: Re: جينا بعد الفرقة نســأل ..
Author: abuguta
Date: 05-16-2007, 06:40 AM
Parent: #22
معتصم
صوت مجذوب حنين وفيه شجن
لكن مش هنالك شبه بينه وصديق عباس
اسى انا عنكم بسال
وعن منتداكم العسل
حلتكم كتيرة البصل
عصيركم المعتق وصل
انا عارفكم مكتولين
فى ذوات الخصل
المرسومات فى قلوبكم شتل
بس ورينى ايه الحصل
والجابك بعد الفرقة تسال
ابقوتة فى اول الدوام
|
Post: #31
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 09:58 AM
Parent: #23
أبوقوتة يا حبيب وينك ما ظاهر ..
أظهر عليك الأمان ..
تعرف هناك قاسم مشترك في الغناء السوداني وهو الحنين والشجن وهناك أيضاً كمية الأحزان البتكون فيها ..
دا كلو بخلي في شبه بين بعض الفنانين ..
قصديتك عثل بس وديها للجنة المصنفات عديييل كده ..
تخيل تنفع تتغنى ..
أرقد عافية يا جميل ..
|
Post: #30
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 09:25 AM
Parent: #22
| Quote: الله يلمك في جماعتك |
بس ديل ما يكونو جماعة أبو سياف يا سلمى
ما قلنا ليكم نحن لسه بدري على الحاجات دي وعايزين نقرأ كمان ..
غايتو يا أونسة بهدلتنا معاك ..
يديك العافية يا غالية ..
محبتي وتقديري ..
|
Post: #29
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 09:07 AM
Parent: #21
Quote: معتصم تمبس ده وجع ضرس ولا ست الريد
يعني تامبا يحب وانت تبكي ليه!!! |
أها دي يا عفاف ما لاقين ليها تفسير ..
غايتو في واحدين قالوا علينا معيونين ولازكم بخور تيمان يا تيمان
غايتو حركاتنا دي ما بنبطله إلا تكتبوا لينا خروج نهائي للسودان
إن شاء الله ربنا يقدرنا ونعمل ليكم برامج صيفية حلوة خليكم قراب ..
تحياتي ومعزتي ..
|
Post: #27
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 07:29 AM
Parent: #20
سلام يا محرب ..
شكراً لي زيارتك ..
بس الأغنية دي ما تكون ودتك بعيييد محل ما مشينا نحن ..
الله يهون بس ..
دم بألف خير ..
(عدل بواسطة خالد المحرب on 16-05-2007, 04:28 ص)
|
Post: #26
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 07:19 AM
Parent: #19
انت يا دوب رحت هناك يا أمجد ؟
ياخي نحن رايحين من زمان وما رجعنا لي هسي ..
أها دا من فعل الزمن وتراكمات الغربة ..
خلت حساسيتنا ألـ1000ـف زي فورة تمبس مرات بزيده كوز ويقول مليون
جيب شوقك يا حبيب وخليك مرابط هنا ..
سجن سجن غرامة غرامة ..
أبقى طيب ..
|
Post: #28
Title: Re: جينا بعد الفرقة نســأل ..
Author: محمد علي ياسين
Date: 05-16-2007, 08:35 AM
Parent: #1
Quote: - معتصم خير الحاصل شنو
- Quote: عارف دي زهجة ..
- Quote: لا يخلو ليل المغنيين(المحبين) من شجن صح كلامك
- Quote: أصلو الضرس يتاور صاحبي الكاشف تمبس ..
تقوم الحمى تمسكني أنا ( )
- Quote: قوية لمن عقدتني أنا زاااتو ..
- Quote:وأحياناً لا نجد الكف الذي نقبله أو لا يقبل ذلك ..
- Quote:الله يلمك في جماعتك ((()))) .
يا حنين زي عش العفصور معروش بالنور كله محبة (يلا يا تامبا نزل الاغنية عشان خاطر صاحبك إمكن تخفف عليه شويه) .
ووعدي معك يا إبن عمتي هذه الصيفية يا كتبنا كتابك يا شرطنا كتابك وكفاك وجع قلب
وسلام
إبن خالك / محمد علي
|
Post: #33
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 03:12 PM
Parent: #28
يا إبن خالي في داعي لكشف الحال المجاني ..
ياخي كان تاخد حق الروشتة على الأقل
| Quote: ووعدي معك يا إبن عمتي هذه الصيفية يا كتبنا كتابك يا شرطنا كتابك وكفاك وجع قلب |
يعني طريقة الواحد يكب الزوغة مافي 
| Quote: يا حنين زي عش العصفور معروش بالنور كله محبة |
بعدين أخوي الكاشف دا زي سيم سيم مقطعه في حنانه ساي وصابر
يعني بقينا أحمد وحاج أحمد ..
أبقى طيب يا إبن خالي ..
|
Post: #32
Title: Re: جينا بعد الفرقة نســأل ..
Author: انعام عبد الحفيظ
Date: 05-16-2007, 10:26 AM
Parent: #1
الحاصل شنو كلمونا؟
|
Post: #34
Title: Re: جينا بعد الفرقة نســأل ..
Author: غادة عبدالعزيز خالد
Date: 05-16-2007, 03:19 PM
Parent: #32
يا إلهي يا معتصم
أستمع بوجل
كن طيبا
و شفيفا كما أنت
غادة
.
.
.
|
Post: #36
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 04:06 PM
Parent: #34
Quote: يا إلهي يا معتصم
أستمع بوجل |
ليه دائماً يا غادة مكتوب علينا الخوف والحزن ؟
مساحات واسعة منه تحتضننا وتحتضن آلامنا ..
في سكناتنا حزن ..
في صراخنا وضجيجنا حزن ..
في غربتنا وسفرنا ..
في هجعتنا ومنامنا حزن ..
تعرفي يا غادة هي مجموعة بتاعت تراكمات من فعل الزمن الردئ ..
كنت كل ما أسمع أغنية أو قصة حزينة أبكي معها وأنعل سلسفيل الزمن والمكان ..
قبل إنزال هذه الأغنية فكرت فيها كثيراً وزي ما قلت لمحمد عبدالجليل الإجابة عن الأسئلة المغلقة تحتاج لسواقة ..
وأرجع تاني لي نفس البدايات وأكون أنا لسه ما إبتديت برضو ..
شكراً يا غادة ..
طلتك دائماً تسعدنا وتفرحنا ..
محبتي وتقديري ..
|
Post: #35
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 03:52 PM
Parent: #32
| Quote: الحاصل شنو كلمونا؟ |
مشكلتك جيتي متأخرة تسألي يا انعام ..
ونحن لينا مدة نسأل
يا جماعة واحد يوريها مافي
أبقي طيبة وبألف خير ..
|
Post: #37
Title: Re: جينا بعد الفرقة نســأل ..
Author: هاشم أحمد خلف الله
Date: 05-16-2007, 04:34 PM
Parent: #35
معتصم إنت بجدك كده والله ما كنت قايل مكالمة لندن عملت فيك كده , ياخي أنا والله أسف المرة الجاية
المكالمة بحولها لصاحبك دكين ولا تمبس ولا أقول ليك خلاص شتات موجود , والله حكم لكن الفيك إتعرفت
يا خفيف !!!
|
Post: #38
Title: Re: جينا بعد الفرقة نســأل ..
Author: معتصم دفع الله
Date: 05-16-2007, 05:20 PM
Parent: #37
تعرف يا هاشم أخوي مرات الواحد بتكون الزهجة حاكمه معاهو وما عارف يعمل شنو ..
أها يقوم ينزل أغنية حزاينية زي دي أو زي ما غنى ودالأمين مناحات ريد حزاينية ..
وأنا لا واهب قصائدي الباكية ولا حاجة دي بتكون خطرفات زول مدبرس ..
هس عليك الله زي حالتنا دي بنفع معاها تليفون ؟ دي تليفون العالم قدر ما يحول ما تنفع ..
وأهو زي ما انت شايف كشف الحال مبارينا مبارينا وحاتك نحن الواحد (مسردب) ساي ومقطعه في حنانو والدرب دا نحن زمان فارقناهو ..
غايتو عندك باقي العصابة ديل شوفهم ..
أبقى طيب يا قريبي ..
|
Post: #58
Title: Re: جينا بعد الفرقة نســأل ..
Author: انعام عبد الحفيظ
Date: 06-17-2007, 12:29 PM
Parent: #35
Quote: Quote: الحاصل شنو كلمونا؟
مشكلتك جيتي متأخرة تسألي يا انعام ..
ونحن لينا مدة نسأل
يا جماعة واحد يوريها مافي
|
عارف يا معتصم
انا كتبت المداخلة دي بتاريخ 16/5/2007
واليوم 17 /6/2007 يعني شهر ويومين
ولسه مافي زول وراني حاجة
انتو الظاهر بقيتو ما بتكلموني 
|
Post: #39
Title: Re: جينا بعد الفرقة نســأل ..
Author: walid taha
Date: 05-16-2007, 05:26 PM
Parent: #1
كلامى ما بيقع الواطا يا موو
اسمع تخريمة ما تنسى :
UMAX
512DDR2
1GB
|
Post: #40
Title: Re: جينا بعد الفرقة نســأل ..
Author: معتصم دفع الله
Date: 05-17-2007, 06:32 AM
Parent: #39
يا ولي مسألة الأب قريد دي مهمة جداً عشان كلامك ما يقع الواطـة صحيح ..
يعني هسي انت محتاج ليك لي 2 قيقا عشان تظبط معاك ..
أنا غايتو بعد محاولات لقيت المسألة دي كفاية علي 1 قيقا بس
ولازم الحاجة دي تكون دي دي رام2 ..
وكمان غير معاك الـUMAX دي عشان قرايته صعبه ياخ بتمرق من جوووه
أرقد عافية يا صاحب ..
|
Post: #41
Title: Re: جينا بعد الفرقة نســأل ..
Author: معتصم دفع الله
Date: 06-13-2007, 03:05 PM
Parent: #1
تصحيح ..
فعلاً يا خالد بعد البحث اتضح بأن الأغنية للشاعر عزمي أحمد خليل ..
له التحية والعتبى حتى يرضى ..
ولك مثلها من التحايا ..
والتحية لكل من سأل عنا في غيابنا ..
|
Post: #42
Title: Re: جينا بعد الفرقة نســأل ..
Author: خالدة البدوي
Date: 06-13-2007, 03:35 PM
Parent: #41
مرحبتين معتصم
وحمد على السلامة ..
المنبر نور بيك يا غالي ..
مودتي ،،
|
Post: #43
Title: Re: جينا بعد الفرقة نســأل ..
Author: عماد محمود علي
Date: 06-13-2007, 04:20 PM
Parent: #42
صديقي الحبيب مووو
| Quote: برضو يعني نويت تسيبنا .. |
وهو في حد في الدنيا دي يقدر يسيبك يا مووو
هسه إنت يعني ناوي تسيبنا ولا شنو ؟!!!!
الحياة من بعدكم حرام ....
ح ترجع ولا ......
مـودتــــــي ، ، ،
|
Post: #44
Title: Re: جينا بعد الفرقة نســأل ..
Author: نهال الطيب
Date: 06-13-2007, 09:22 PM
Parent: #43
حمدلله على السلامة
يا باعث الربيع
مودتي
|
Post: #45
Title: Re: جينا بعد الفرقة نســأل ..
Author: Ahmed Abdallah
Date: 06-13-2007, 09:27 PM
Parent: #44
معتصم ...
جيت راجع خلاص ؟؟
|
Post: #46
Title: Re: جينا بعد الفرقة نســأل ..
Author: عماد محمود علي
Date: 06-14-2007, 08:04 AM
Parent: #45
| Quote: المنبر نور بيك يا غالي .. |
هسه عليك الله شوف جنس كلام خلود ده ما برد الروح ، تقول لي نهاجر ياأخي هجرة شنو . لا هجرة بعد الفتح ولكن جهاد ونية .....
تسلمي يا خلود ...
أهلاً مووو ..
مودتي ...
|
Post: #50
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 10:26 AM
Parent: #45
Quote: معتصم ...
جيت راجع خلاص ؟؟ |
اشتقنا لي مطايبتكم قلنا نرجع نسوي شنو ..
يا أبوحميد ..
مطايبة شديييييييدة ..
|
Post: #49
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 10:23 AM
Parent: #43
وفي حد يقدر ينسى نفسه يا عمده ..
جاوب انت نيابه عني ..
نغني مع البلابل ..
رجعنالكم يا حلوين ..
|
Post: #48
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 09:56 AM
Parent: #42
منور بيك يا غاليه ..
اها جينا لكن بدون فرقه يا خالده
تسلمي ويديك العافية ..
|
Post: #47
Title: Re: جينا بعد الفرقة نســأل ..
Author: عبد الدائم سيد أحمد
Date: 06-14-2007, 08:26 AM
Parent: #1
Quote: كنا قايلين بى ورانا ..
انت زينا طاري ديمة ..
كنا قايلين نحن عندك
زى عيونك لينا قيمة
قلنا تتلقانا انت
الزهور تحضن نسيما ..
الا ريدك تارى روح
عدى فات زى كل غيمة
جينا ليك بالابتسامة
الا ما لقينا ابتسامه |
جينا نسأل ونسالم بنفس سرعة رزم الكوبليه ده
مش اونسة بقولو شديد شديد
ويطلع الشتر بره الرزم
لكين نحن ايقاعنا معاك لحظة بلحظة
|
Post: #52
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 03:59 PM
Parent: #47
ونحن كمان أيقاعنا معاك يا عبده ..
أيقاع المحبة والمشاعر الأخوية النبيله ..
جينا ليكم نسارع الخطى ..
أبقو طيبين ..
|
Post: #51
Title: Re: جينا بعد الفرقة نســأل ..
Author: محمد علي ياسين
Date: 06-14-2007, 11:00 AM
Parent: #1
أخي الحبيب معتصم
حمد لله على سلامة العودة
<<< رغم غيابك كنت دائما على الخاطر >>>
مزيدا من الابداع يا حبيب
وسلام
محمد علي
|
Post: #53
Title: Re: جينا بعد الفرقة نســأل ..
Author: Tragie Mustafa
Date: 06-14-2007, 04:06 PM
Parent: #51
بركه الجيت يا معتصم.
|
Post: #54
Title: Re: جينا بعد الفرقة نســأل ..
Author: على محمد على بشير
Date: 06-14-2007, 04:16 PM
Parent: #53
معتصم ود دفع الله
الله يرخى شباحات مقاومتك ويجهجه باكاتك .. قول امين
مالك علينا يا ود الناس
غايتو الله يسامحك
اكان زكرتنا بالذى مضى .
|
Post: #57
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 04:41 PM
Parent: #54
| Quote: الله يرخى شباحات مقاومتك ويجهجه باكاتك .. قول امين |
الله يجازي محنك يا علي ..
يعني دي هسي زي جهجهة كلاتشي لدفاع المريخ
بيني وبينك الحالة صعبة والجهجهة حاصله والنفس قايم ..
خليك مع ذكريات الزمن الذي مضى فما أجمله ..
يديك العافية يا حبيب ..
|
Post: #56
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 04:35 PM
Parent: #53
تسلمي يا تراجي ..
بيكم ببقى الزمن أجمل ..
ويمتد حبل التواصل والمحبة ..
أبقي طيبة ..
|
Post: #55
Title: Re: جينا بعد الفرقة نســأل ..
Author: معتصم دفع الله
Date: 06-14-2007, 04:30 PM
Parent: #51
وانت كمان يا ابن خالي في القلب متحكر ..
سعيد انا بيكم يعلم الله ..
ربنا ما يحرمنا منكم ..
|
|