Post: #1
Title: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 09:27 AM
Parent: #0
اسمعو
انتو ناذر ده لما نزل البوست بتاعو الأول الكان سبب في الاشكال ده .. قلتو ليهو يعتذر , قام ناذر طلب سحب البوست وفعلا اتسحب, وكتب بوست اسمو اعتذار وقال انا آسف , قلتو لا ما كفاية لازم تورينا انت قلت كده ليه؟؟
قام تاني عمل بوست اسمو مزيد من التوضيح وقال كلام بالواضح انو في معلومات متضاربه في قروش اترسلت من بره وفي عضو قال القروش دي ما اترسلت, وتاني ناذر اعتذر لكل من مسه الموضوع ... بقت الناس تطارد فيهو من بوست لي بوست ... وتسمعو ميه كلمة....
طيب .... انتو عايزين منو شنو بالظبط ؟؟ عايزين تذليهو؟؟ ولا عايزين تركعوهو؟؟ ولا عايزينو يجي يبوس جزمة كل واحد فيكم ؟؟؟ ناس كتار طلبو منكم تسامحو الزول ده ... وانتو ما شغالين بأي زول !!! ناس قالو ليكم عشان خاطر غاده نوري برضو ما هببتهو ليهم !!! ناذر اعتدر أكتر من أربعة مرات في أربعة بوستات مختلفة برضو ما شغالين بيهو.
انتو دايرين الجد ولا أخوهو ؟؟؟ الحكاية دي ظاهرة شديد !!! موضوع بتاع شلليات وحزبية ما أقل ولا أكتر وفي ناس شايلاهم الهاشمية وخاشين في النص وما دارين النقطة دي ... قبل فترة مش في بوست اتفتح عن استخدام الالفاظ البذيئة في المنبر ده والاساءات ؟؟ ما لكم كلكم وقفتو بين صامت وعامل فيها ماشايف البوست وبين مؤيد عديل للالفاظ البذئية والاساءات!!! اها الليلة لما بقت عليكم كل واحد جاي سالي سكينو علي ناذر وعايز يبشع بيهو رغم اعتذارو .... يعني الكلام ده لو طلع من واحد غير ناذر من شلتكم ولا حزبكم كنتو لقيتو ليهو مليون عذر وغطيتو ليهو الموضوع زي الما حصل شئ.
انتو الاساءات الفي المنبر وضرورة الوقوف ضده قايلنها قميص بيتفصل حسب الزول الطالعه منو الاساءة ولا شنو؟؟ ولا قايلنها بطيخة بتتقطع علي حسب المزاج؟
لما الناس تتكلم عن الاساءات الفي المنبر وضرورة ايقافها تجو تقولو دي حرية تعبير بس عشان جاية من زولكم.
يا اما الناس تقيف ضد الممارسات الخاطئة بغض النظر عن الزول ولا كمان الناس تتحمل البتجيها.
بعدين تعالو شابكنو أطعن في الفيل وما تطعن في ضلو !!! هسي البطعن في الضل هو ولا انتو؟؟؟ الزول ده قاليكم في قروش اترسلت من بره في تساؤل حولها ... المفروض طوالي تشوفو القروش الاترسلت من بره وتجو هنا ده وتنشرو المبالغ الاترسلت من بره وبعد ده الزول الرسل قروش وما ظهرت حيقول انو قروشو ما ظهرت ليه ؟؟ أو لو مافي زول قال كده يبقي انتو عملتو العليكم.
بعدين انتو مش عندكم زول مسئول من الماليه ؟؟؟ خلاص تعالو ورو الناس الحسابات........ مش لأنو ما في ثقة لكن لأنو الموضوع بقي عام واتنقل هنا ... يعني بعد ده من حق كل الناس تعرف بالظبط ليه ناذر قال كده عايزين نادر يقول ليكم اسم الزول ؟؟؟ والله لو ناذر عمل كده يكون غلط غلطة عمرو.... بعدين ليه يعني عايزنين الموضوع يبقي بين ناذر والزول التاني ؟؟؟؟ عشان تجو بي وراهو وتطاردو ناذر وتناصرو زولكم ؟؟؟ هو انتو لسه ناذر ما قال اسم الزول شايلين ليهو مية سكينة !!! امال لو قال اسم حتعملو ليه شنو ؟؟؟
الناس الاتداخلت كلها أكدت ثقتها الكبيرة فيكم وبرضو ما عاجبكم .... انتو عايزين جنازة تشبعو فيها لطم وخلاص؟؟
اها ... الكلام الجد النقولو ليكم:
أنقول ليكم كلام القانون كمان:
من ناحية قانون ما عندكم علي ناذر ده أي حاجة ... قولو لي كيف ؟؟؟
الماده 159 من القانون الجنائي السوداني لسنة 1991 بتقول الآتي
يعد مرتكبا جريمة اشانة السمعة : كل من ينشر أو يروي أو ينقل وقائع مسنده الي شخص آخر , أو تقويما لسلوكه
قاصدا بذلك الأضرار بسمعته.
بعد داك الماده ذكرت استثناءات عده تسقط جريمة اشانة السمعة في حال توافر أي واحده من هذه الاستثناءات
وبصراحة كده لو فتحتو بلاغ حيتشطب في مرحلة العريضة يعني بالبلدي كده من قولة تيت .... مش كده وبس ممكن ناذر يرفع عليكم قضية بتاعة اتهام كاذب ... طبعا الكلام حتشوفوهو غريب ... زمان قلت ليكم المنبر ده بذكرني بي أهل الكهف ما صدقتو !!!! يعني حيجي كل واحد ينظر ويعمل فيها أبو عرام ... لكن في النهاية يا ها دي الحقيقة بلاغ مشطوب مشطوب ... ما في زول يقول لي منو القال حنفتح بلاغ ؟؟ في القال كده ... الموضوع ده انا متابعو من أول بوست بتاع : ليه ما عزمتوني؟ العمل الاشكال ده كلو .. وأول متداخل مع نادر كان عصام عبدالحفيظ..... ورد عصام كان مهذب جدا جدا .... بعد ده جات الناس الباقية في بوست الاعتذار الأول
والتاني وبوست ما تهتمو للايام .... يعني أنامتابع وبدقة شديده ... وبرضو البوست الاتفتح بعد سحب بوست ناذر الاول
بعدين الماده بتاعة اشانة السمعة دي ما تشفوفو التعريف ده وتقولو طيب ما كلها بتنطبق علي ناذر !!!! ده من الوهلة الاولي ... لكن لو تمعنتو كل كلمة في التعريف وكل حرف فيهو بسهولة حتلقوها ما بتنطبق ... غير كده في أي جريمة لازم توافر ركنين مهمين جدا واللي هما الركن المادي والركن المعنوي ... والركنين ديل ما عندكم طريقة تثبتوهم .... ده غير ان ناذر طلب مهلة اربعة وعشرين ساعة وقبل المده دي سحب البوست ونزل بوست اعتذار ... وتاني نزل مزيد من التوضيح ....
بعدين ليه أي زول حاول يتدخل تقومو يا اما تهاجمو ولا كمان تحاولو تخلوهو طوالي يقيف ضد ناذر يا اخي احترمو آراء الغير حتي لو مختلفين معاكم يعني الزول الداير يقول ليهو كلمة ما لازم في الاول يسمح لي ناذر الارض عشان يقدر ي قول رايو ولا شنو يعني؟؟؟
سمعتو بالعميان المسكو العكاز ؟؟؟ أي واحد جاي داخل شابكنا الرهيفة تنقد ....الرهيفة تنقد ....والكلام أصبح مكرر...
عندكم حلين:
مافي تالت ليهم , يا اما تسامحو الزول ده وتقفلو الموضوع ده ...ولا كمان أمشو أفتحو بلاغ وريحوهو من كتلوك ولا جوك جوك العاملنها ليهو دي.
لو خليتو االشلليات والنظرة الحزبية لأي موضوع ... السودان ما بتجيهو عوجة ... وطبعا الحكاية دي مستحيلة وبالتالي السوداني جاتو وحتجيهو مليون عوجة
ما كنت عايز أتكلم في الموضوع ده نهائي لكن القصه بقت مكررة والزول اعتذر لمن قال الروب وبرضو ما
سايبنو.... عالم ما عندها رحمه .. يا ناس اتعلمو معني التسامح ... بكره الزمن بدور والدور بجي عليكم.
حلو عن طارة كاتش الراجل وأنزلو من سقالة أفكارو.
.غرزة وطبزة : كهف وصاحبو غايب .......عملتو لينا وجع عضم شيطان كيبورد
|
Post: #2
Title: Re: الي: ناذر الخليفة ...... والناس الشانين حمله عليهو!
Author: سيف الدين حسن العوض
Date: 05-09-2007, 10:23 AM
Parent: #1
الف حمد لله على السلامة اخ محمد عبد المطلب
الغياب طال ...حتى قلنا احتمال انسحابك وارد
خاصة بعد كذبة ابريل ديك وعيييك
ناذر خليفة ده ما بنخاف عليهو
راجل حقانى ..واخو اخوان
الا الجماعة اياهم عندهم مرض اسمو اعتذر
وبرضو ده ما بيحلك منهم الا تكون معاهم
في البيسوهو حتى ولو كان نبذ ساكت
واظن صاحبنا ناذر ما بيعملها
لانو زول فنان
وكل فنان عندى احساس مرهف
عودا حميدا اخ محمد وارجو انك ما تسجل غياب بدون اعذار مرة اخرى
لانو بتشغلنا عليك
|
Post: #3
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 10:31 AM
Parent: #2
سيف العوض
تحية واجلال واحترام وتقدير
الانسحاب ما من طبعي ابدا ابدا
لكنها الظروف القاهرة فقط
كان من الواجب تنبيهكم لهذا الغياب
عذرا ....
انا ها هنا قاعدون.....
قبل فترة شفت شريط في يو تيوب
لي شابة مصرية بعذبو فيها ناس الشرطة
لانتزاع اعتراف بجريمة قتل ... فمن هول
التعذيب اقرت بالتهمة.... فالضابط قال ليها
لا انتي كذابه ... انتي ما قتلتي.
يعني ناذر ده اعتذر في تلاتة بوستات او اربعة
الغريب لسه في ناس يقولو ليه اعتذر....
عالم يحير السمبر.
شكرا علي الاهتمام والمرور والسؤال يا عزيزي.
|
Post: #4
Title: Re: الي: ناذر الخليفة ...... والناس الشانين حمله عليهو!
Author: اساسي
Date: 05-09-2007, 10:41 AM
Parent: #3
والله كلامك يجيب روح معنوية
ياخي لمن وصلت النهاية لمن فتشت علي نفسي الاتقطع
انا لو محل ناذر وبعد اقرا الكلام دا طوالي بشوف لي جنزير وكم باغة فاضية ولستك عربية قديمة وبطلع مظاهرات
|
Post: #5
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 10:58 AM
Parent: #4
اساسي قبل الكراسي
Quote: والله كلامك يجيب روح معنوية
ياخي لمن وصلت النهاية لمن فتشت علي نفسي الاتقطع
انا لو محل ناذر وبعد اقرا الكلام دا طوالي بشوف لي جنزير وكم باغة فاضية ولستك عربية قديمة وبطلع مظاهرات |
الناس ديل عملو لي نفسيات زاتي والله ... عالم تحير السمبر!!!
بيني وبينك انا زاتي لما قريت الكلام تاني قلت والله كان كده ناذر ده
بعاني معاناة شديدة خلاص.... قربت اطلع مظاهرة.
تحياتي للمرور الاساسي.
|
Post: #6
Title: Re: الي: ناذر الخليفة ...... والناس الشانين حمله عليهو!
Author: امير مصطفى احمد
Date: 05-09-2007, 10:59 AM
Parent: #1
تسلم يا ود عبدالمطلب
اتفق تماما مع كلامك الموضوعي ، واقف بجانب ناذز الخليفة في موقفه ، وتنقطع الشلليات وينقطع يومها ، لانها هي سبب تاخرنا وتخلفنا عن العالم ، عارف يا محمد كل الناس المتداخلة بتحلم بتغيير الواقع للافضل ، سوا اكان هذا التغيير سياسيا او اجتماعيا ، ولكن كيف دا يحل ونحن ذرة ( تسامح ) ما عندنا؟
|
Post: #7
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 11:12 AM
Parent: #6
أمير يا أمير:
والله كلامك كلام أمراء بحق.
يعني الناس مفروض توسع صدرها والزول البقول غلطان
الناس تسامحو مش تذلو وتركعو ... الرسول ص استعاذ من قهر الرجال
وما في اجمل من العفو عند المقدره.
صدقني السودان ده نهائي ما متوقع ليهو يبقي دوله يقولو عليها
عشان التعصب الأعمي والقبليه والحزبية والعنصرية الفيهو.
والله السودان ده محتاج لأكتر من معجزة الهيه.
|
Post: #8
Title: Re: الي: ناذر الخليفة ...... والناس الشانين حمله عليهو!
Author: bayan
Date: 05-09-2007, 11:15 AM
Parent: #6
Quote: انتو الاساءات الفي المنبر وضرورة الوقوف ضده قايلنها قميص بيتفصل حسب الزول الطالعه منو الاساءة ولا شنو؟؟ ولا قايلنها بطيخة بتتقطع علي حسب المزاج؟
لما الناس تتكلم عن الاساءات الفي المنبر وضرورة ايقافها تجو تقولو دي حرية تعبير بس عشان جاية من زولكم.
يا اما الناس تقيف ضد الممارسات الخاطئة بغض النظر عن الزول ولا كمان الناس تتحمل البتجيها. |
كلام درر
مرحب بعودتك يا محمد...
واتفرج بالله في المنبر
|
Post: #9
Title: Re: الي: ناذر الخليفة ...... والناس الشانين حمله عليهو!
Author: الواثق الصادق
Date: 05-09-2007, 11:27 AM
Parent: #8
(يداً بيد) لنصرة نوارة المنبر ناذر..
(جبهة) عريضة ضد شلليات الضلال بالمنبر..
المحيرني في الموضوع لماذا لا يخرج توضيح شافي من الجهة المعنية بالأمر؟؟؟
مع ناذر حتى النصر
|
Post: #10
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 11:33 AM
Parent: #8
بيان
شكرا علي الوقفة هنا.
والله المنبر حالتو مستعصية...
الناس مبارية بوستات القطيعة والالفاظ النابية
ولو زول فتح خشمو يجو ناطين ليهو في حلقو
وده كلو حسب الشلة وحسب الحزب ..
عجيب أمر السودان ...
مسكين المواطن المغلوب علي امره ببحث عن لقمة عيشو ويحلم
بي بديل .... وما عارف الراجيهو.
السودان مافي أي أمل في اصلاحو ... عايزين اقل حاجة
تلاتة ولا اربعة اجيال تنقرض عشان يكون في أمل في تقدمو.
|
Post: #11
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 11:43 AM
Parent: #10
الواثق في نفسه والصادق مع نفسه: الواثق
Quote: (يداً بيد) لنصرة نوارة المنبر ناذر..
(جبهة) عريضة ضد شلليات الضلال بالمنبر..
المحيرني في الموضوع لماذا لا يخرج توضيح شافي من الجهة المعنية بالأمر؟؟؟
|
معك نسأل!!! فهل من مجيب؟؟؟
سحقا للشلليات.
|
Post: #12
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 11:50 AM
Parent: #1
الأخ/ محمد عبدالمطلب
تحياتي ..
أتفق معك تماماً فى كل جئت به بداية ببوست الأخ/ناذر الذي تم سحبه
وأتفق معك ببوستات الأعتذار التي جاءت بعد ذلك ..
ولكن دعنا نتفق على مبدأ الأعتذارت كيفيتها .. ومن يتم قبولها من عدمه
أي بمعني أن الموضوع كانت بها أتهامات لمجموعة من الأعضاء ومن حقها أيضاً
تبرئة ساحتها مما نسب أليها ..
فكان الأعتذران موضوع الحديث مبتوران من تسمية الأشياء بأسمها صراحة..
فى دلالة على أن السيد/ ناذر خليفة قد تكرم بقفل الموضوع لأعتبارات أخري
وليس لأنه لا يملك الأدلة الكافية لأثبات حديثه ..
أياً كان الأمر فأنا ألوم الأخ ناذر كثيرا مع قبولي الشخصي لأعتذاره ..
وأيضاً أخي محمد للموضوع علاقة صريحة بتقدم السودان بما فيه هذا الجيل حيث
أن ترك الأمور بمبدأ التسامح هي أحدي عيوبنا ..
فيسرق رئيس الدولة ويعتزر وعلينا مسامحته !!!
الأمور لا تأخذ بمبدأ الشللية وعلماً تربطني صداقة قوية بالأخ/ ناذر
وهذا لا يعني بأي حال أن أخطأ فأنا معه !!!
ولا ألأوم الأعضاء الذين طالبوا ناذر بذلك .. وأعيب على ناذر أيضاً فتح
موضوع لا يستطيع تحمل تبعاته ..
لك وللجميع خالص مودتي ..
|
Post: #13
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 11:59 AM
Parent: #12
الأخ الفاضل معروف
لك كل التقدير
لكن ياأخي هذا قياس مع الفارق....
والفرق هنا كبير ... ناذر لم يحقق
كسبا لنفسه من هذا الأمر .. بل علي
العكس فقد أوضح ان دافعه هو حرصه علي
شفافية الحملة برمتها ... وكان الآحري عدم
محاولة تركيعه بعد كل الاعتذارات.
وأشكرك من كل قلبي ان قبلت اعتذاره.
لقد ذكرت ان الكل يثق فيكم جميعا كل الثقة وما زلنا
لقد لكل انسان هفوة ... وعلينا أن نقبل اعتذار المخطئ
والغفران ... انت وكلنا نعلم ان غاده نوري في قلوب الكل
ونتمني لها الخير كله.
شكرا علي الرد الموضوعي الجميل.
ودمت والجميع لبلادي.
|
Post: #14
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 12:17 PM
Parent: #1
Quote: كتب محمد عبدالمطلب
لكن ياأخي هذا قياس مع الفارق....
والفرق هنا كبير ... ناذر لم يحقق
كسبا لنفسه من هذا الأمر .. بل علي
العكس فقد أوضح ان دافعه هو حرصه علي
شفافية الحملة برمتها ... وكان الآحري عدم
محاولة تركيعه بعد كل الاعتذارات. |
عزيزي محمد
عارف ليه الناس دي عاوزه تعرف الحقيقة
أقول ليك أنا يا عزيزي بمنتهي الصدق وفى النهاية
من هو منوط بالعفو هو صاحب المال لا أنا ولا أنت ..
ولكن للمستقبل عشان الناس دي أسرة واحدة وشغالين
بضمير وأخلاص هدفها من السمو مانفتخر به جميعا ..
ولكن أن يكون فى وسطهم من يعتدي على حقوق الغير يا محمد شىء فظيع !!!
كيف تتولد الثقة بالمجموعة مستقبلاً ..والشرخ مازال موجوداً ..
الموضوع ده فى غاية الحساسية مما يجعل مستقبلاً مجرد التفكير
فى أمر مثل هذا ضرباً من المحال ..
أنه بداية لهدم قيم لم نصدق أنها مازالت موجودة فى مجموعة ( الأمل العام )
لأجل ذلك كانت المناداة بمعرفة من هو ذلك الشخص ؟؟؟
|
Post: #17
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 12:28 PM
Parent: #14
أخي معروف
الخطأ في كل موضوع وارد ...والنقطة
التي أركز عليها أن ناذر اعتذر عن الخطأ
لكن لم يجد من يغفر له... ولم يفقد
أجد ثقته في المجموعة ... كل ما طلبته أن
يقبل اعتذار ناذر .... يا أخ معروف
اهلنا بقولو الرقبة بفوتوها.... يعني موضوع
زي ده كان متوقع انو الناس تسامح... كمان ما ممكن نطالب ناذر
انو ينقل المسكلة تاني مع زول آخر عشان كده ما من الحكمة انو يذكر اسماء
ده غير انو من السهل علي اللجنة انها تحصر الموضوع وتعالجو بسرعة.
شكرا مرة تانية علي النفس الهادئ والروح العاليه في النقاش.
دائما لك التقدير كله والعرفان.
|
Post: #15
Title: Re: الي: ناذر الخليفة ...... والناس الشانين حمله عليهو!
Author: ناذر محمد الخليفة
Date: 05-09-2007, 12:20 PM
Parent: #1
تسلم كتير يا محمد هونولولو ..
Quote: أي بمعني أن الموضوع كانت بها أتهامات لمجموعة من الأعضاء ومن حقها أيضاً
تبرئة ساحتها مما نسب أليها ..
|
ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !!
|
Post: #16
Title: Re: الي: ناذر الخليفة ...... والناس الشانين حمله عليهو!
Author: انعام حيمورة
Date: 05-09-2007, 12:26 PM
Parent: #1
Quote: الماده 159 من القانون الجنائي السوداني لسنة 1991 بتقول الآتي
يعد مرتكبا جريمة اشانة السمعة : كل من ينشر أو يروي أو ينقل وقائع مسنده الي شخص آخر , أو تقويما لسلوكه قاصدا بذلك الأضرار بسمعته. |
كويس انك عارف المادة دي !!!!!
الله يستر ما يجيني ايميل طاشئ !!!
|
Post: #19
Title: Re: الي: ناذر الخليفة ...... والناس الشانين حمله عليهو!
Author: Nadia Elsir
Date: 05-09-2007, 12:32 PM
Parent: #16
| Quote: ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !! |
للتاريخ و الله فى
|
Post: #18
Title: Re: الي: ناذر الخليفة ...... والناس الشانين حمله عليهو!
Author: السمؤال بدرالدين
Date: 05-09-2007, 12:29 PM
Parent: #1
ناذر الحيران
انت جبان ليه
خليك راجل
اكتب بالواضح
انو فلان الفلاني حول قروش لي علان
بدل كلام النسوان
والله الشجاعة ماب تجيك الا تكون مهبب يا رخيص
|
Post: #21
Title: Re: الي: ناذر الخليفة ...... والناس الشانين حمله عليهو!
Author: ناذر محمد الخليفة
Date: 05-09-2007, 12:34 PM
Parent: #18
الناس قاعدة تتناقش بي موضوعية يا سموؤل ..
الإساءات دي مقدور عليها ..
خليك قدر مستوى الحوار ..
|
Post: #22
Title: Re: الي: ناذر الخليفة ...... والناس الشانين حمله عليهو!
Author: bayan
Date: 05-09-2007, 12:37 PM
Parent: #18
الاخ العزيز معروف
والله كلكم فوق مستوى الشبهات..
ولقد فتحتوا باب الامل..
وحدتوا كل القلوب على اختلافاتها...
غادة صارت ابنةو اخت للكل..
لقد اعتذر ناذر عن الخطأ..
ليتكم تقبلون الاعتذار جميعا..
وانتم قلوبكم ابواب مشرعة للحب والود..
ربنا يفرحنا جميعا بان يتم شفاء غادة..
وهذا هو المطلوب...
التحية لكل الشباب والشابات..
والتحية لغادة وربنا يتمم الشفاء
ويحقق الاماني..
|
Post: #20
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 12:33 PM
Parent: #1
ناذر
تحياتي
عارف شكل مداخلاتكـ دي ح تفتح الموضوع تاااااني ..
| Quote: ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !! |
اللجنة لم تتهم حد .. ولا عندها شكـ فى أي شخص
أنت من أتهمت الجميع بدون فرز وقلت عندك الأدلة .. تنتظرها علي أي أساس بالمنطق كدا !!!
وتبرىء ساحتها من شنو يا ناذر؟؟؟
عليك الله خليك جادي شويه !!!
|
Post: #23
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 12:38 PM
Parent: #20
| Quote: تسلم كتير يا محمد هونولولو .. |
العفو يا ناذر
الأمنيات دايما بالتوفيق والسداد.
|
Post: #26
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-09-2007, 12:43 PM
Parent: #23
الأعزاء ومعروف وناذر
كل التحايا لكما.
نود أن لا نرجع خطوات للوراء.
كما بدأتم بموضوعيه أرجو الاستمرار فيها.
مع عميق تقديري.
بيان
شكرا علي الكلمات المعبره.
|
Post: #24
Title: Re: الي: ناذر الخليفة ...... والناس الشانين حمله عليهو!
Author: ناذر محمد الخليفة
Date: 05-09-2007, 12:38 PM
Parent: #20
يا معروف ...
دي طبيعة العمل العام ..
ويفترض أي لجنة مالية تتعامل مع أي إتهام ليها (إن وجد) كشي طبيعي !
|
Post: #25
Title: Re: الي: ناذر الخليفة ...... والناس الشانين حمله عليهو!
Author: Nadia Elsir
Date: 05-09-2007, 12:41 PM
Parent: #24
Quote: دي طبيعة العمل العام ..
ويفترض أي لجنة مالية تتعامل مع أي إتهام ليها (إن وجد) كشي طبيعي ! |
ناذر انت مصر ما كان مجرد همس بقى اتهام لكن الله فى و كبير و قادر و بينه و دعوة المظلوم مافى حجاب !
|
Post: #41
Title: Re: الي: ناذر الخليفة ...... والناس الشانين حمله عليهو!
Author: انعام عبد الحفيظ
Date: 05-09-2007, 03:00 PM
Parent: #20
Quote: اللجنة لم تتهم حد .. ولا عندها شكـ فى أي شخص
أنت من أتهمت الجميع بدون فرز وقلت عندك الأدلة .. تنتظرها علي أي أساس بالمنطق كدا !!!
وتبرىء ساحتها من شنو يا ناذر؟؟؟
عليك الله خليك جادي شويه !!! |
والله دي قصة أغرب من غريبة
ببساطة ناذر هو الإتهم الناس
يبقى مفروض يجيب دليلو
مافي حاجة إسمها إعتذار
في حاجة إسمها ذمة مالية نظيفة
ما دام الإتهام لسه موجود يبقى ناذر يجيب دليلو
Quote:
Quote: أي بمعني أن الموضوع كانت بها أتهامات لمجموعة من الأعضاء ومن حقها أيضاً
تبرئة ساحتها مما نسب أليها ..
ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !! |
نحن ننتظر أن تكمّل لنا معلوماتك وتورينا دليلك
انت قلت في سرقة يبقى في سارق ومعناها في دليل
يلا عشان ما يكون اتهام ساي بدون أدلة يبقى لازم تقول كل العندك
انا قناعتي الشخصية ما دام ما قادر تجيب دليل يبقى الكلام دا كلو كلام سااااااااااي
Quote: ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !!
|
بس عينة كلامك دا بخليني ارجع عن رأيي لأنو لسه انت مصر على كلامك
وبتوحي للناس انو في كلام لسه ما إتقال
كان تكون شجاع وتقول كل الكلام ( لو عندك) او تقول انا ما عندي دليل
Quote: غايتو أنا لو منك باقوم أفتو وأجيب اسم الزول القال حول القروش ديل، وأوضح قالا كيف بالتلفون وللا بي ماسنجر داخلي وللا في بوست.
عشان بعدين ما ينكر وعشان إنت كمان مصداقيتك ما تحوم حولها الشكوك.
لأنك طالما لم تحرص على سمعة أعضاء الحملة مافي سبب واحد يخليك تحرص على سمعة الزول القال حول القروش دا.
والقصة واضحة وضوح الشمس. في حالة عدم فتك ليهو (وعاجلا جداً) معناها إنت ملفق الخبر وقاصد الإساءة لأعضاء الحملة. |
|
Post: #27
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 12:47 PM
Parent: #1
Quote: ناذر خليفة
يا معروف ...
دي طبيعة العمل العام ..
ويفترض أي لجنة مالية تتعامل مع أي إتهام ليها (إن وجد) كشي طبيعي ! |
وجاء دور المنطق يا عزيري ..
وأحدثك بسر قد يعيب علي شباب ( الأمل العام ) ذلكـ ..
هل تعلم أن كل قرش دخل لهذا الموضوع مسجل بكراسة تحمل حتي
الأسماء والمناطق ..
جاء دوركـ لتحدد أنت الأسم والمرسل ..
وسترجع اللجنة المالية لكراستها .. اذا لم تجد ذلك عندها سيكتبونها لك هنا !!!
أم تريد منهم أسماء ومبالغ وكشف حساب كامل مكمل هنا ؟؟؟
حرام عليك أن تصل بهم لهذه الدرجة وعشان شنو ما تجيبها من الآخر !!!
|
Post: #28
Title: Re: الي: ناذر الخليفة ...... والناس الشانين حمله عليهو!
Author: السمؤال بدرالدين
Date: 05-09-2007, 12:48 PM
Parent: #1
وين الموضوعية في كلامك
ليه تجيب حاجة مبتورة
تتم الموضوع للاخر
الزول اتصلك بيك وافادك بموضوع التحويل
تتاكد عن طريق ايصال التحويل وباسم من التحويل
بعد تتأكد من الدليل تنزلوا شوف كان زول قاليك تلت التلاتة كم
تسلم
وفي الختام لاني زول حقاني
اعتزر ليك اعتزار واضح بما مسك من كلام نتيجة الغضب الشديد
السموءل بدر الدين عبد الرحيم
|
Post: #29
Title: Re: الي: ناذر الخليفة ...... والناس الشانين حمله عليهو!
Author: ناذر محمد الخليفة
Date: 05-09-2007, 12:49 PM
Parent: #1
نادية ...
إن وجد الموجودة بين قوسين دي(إن وجد) ما شفتيها ولا شنو !!
بعدين أنا بتكلم بصورة عامة ودا واضح من خلال مداخلتي ..
بردي نفسك شوية ..
|
Post: #30
Title: Re: الي: ناذر الخليفة ...... والناس الشانين حمله عليهو!
Author: ناذر محمد الخليفة
Date: 05-09-2007, 12:55 PM
Parent: #1
السموءل ..
Quote: اعتزر ليك اعتزار واضح بما مسك من كلام نتيجة الغضب الشديد
|
إعتذارك مقبول جدا وأنا مقدر الظرف ومقدر شعورك ..
تسلم
|
Post: #31
Title: Re: الي: ناذر الخليفة ...... والناس الشانين حمله عليهو!
Author: وليد محمد المبارك
Date: 05-09-2007, 12:59 PM
Parent: #30
ناذر عليك الله قول اسماء النفرين
نشوف بعد داك البحصل شنو ؟
|
Post: #36
Title: Re: الي: ناذر الخليفة ...... والناس الشانين حمله عليهو!
Author: Yassir Tayfour
Date: 05-09-2007, 01:55 PM
Parent: #31
الصديق ناذر أخطأ وإعتذر
وبعض من مجموعة الأمل لم يقبلوا إعتذاره
ودي يحلوها كيف!؟
والله جد أمر يحير
أنا أقف ضد إشانة سمعة مجموعة الأمل، وفي نفس الوقت أقف ضد ملاحقة ناذر بالصورة الجماعية المرعبة دي بعد أن إعتذر..
لأنو ناذر Already واقع في مشكلة، فليه الناس دايرنو يقع في مشكلة تانية بذكر الأطراف التانية؟
ناذر تحمل المشكلة بمفرده لأنه أدرك خطأه، فلا يريد أن يُرَكِبْ الخطأ..
أنا أصلاً عندي مشكلة مع الإعتذارات الراقة "قش" في المنبر ده.. ولكن دي تبقى مشكلتي أنا..
إذن،فما هو الحل؟؟
ناذر إعتذر ولم يُقبل إعتذاره
فلا بد له أن يخرج من هذا النفق بأقل الخسائر..
يبدو أنه قد خسر مجموعة الأمل، فلماذا يخسر أكثر من ذلك بذكر أطراف تانية؟؟
يا مجموعة الأمل، لقد أبرأتم ذمتكم التي لم تكن في يومٍ ما موضع شك، الكل يشهد لكم بتفانيكم ومروءتكم وتصديكم لعمل الخير في زمنٍ الكل فيه مشغول بنفسه وكأننا في يوم حشرٍ عظيم.. فمطالبتكم لناذر مشروعة ولكنها تدخله في مشكلة أخرى مع أطراف آخرين.. فما هو الحل؟؟؟
فطالما تحمل ناذر المسؤلية بمفرده، وأقر بخطأه، وإعتذر عنه..
فماهو المخرج من هذا النفق الذي تتأذى منه المكلومة، الصابرة، غاده نوري، شفاها الله وأعادها لنا وأهلها بكامل الصحة والعافية؟؟؟
|
Post: #32
Title: Re: الي: ناذر الخليفة ...... والناس الشانين حمله عليهو!
Author: Ahmed Mohammed Osman
Date: 05-09-2007, 01:22 PM
Parent: #1
فكرة الامل فكرة انسانية دون شك، ومن حملوها علي غاتقهم حركتهم دوافع انسانية،، لذا،، استطيع ان المس مقدار
الجرح الذي عانوه ولازالو يعانونه من قنبلة نازر التي اطلقها..
دون شك من امر الاشياء علي الانسان هو الشعور بالظلم خاصة عندما يظلم الانسان في ضميره،، وايضا التشكيك في نيته السليمة...
لكن الواضح ان نازر عندو كلام داير يقولو
يمكن اتسرع قبل الادلة طرح الموضوع
لكن
هل انتو متاكدين انو نيتو ما سليمة؟؟(وحازروا من الاجابة قبل التاكد عشان ما تظلموهو في نيتو لو كانت سليمة)
اوكي
تجاوزا للنية
مادام الموضوع مس سمعة ناس كتار في اللجنة،، لماذا لا يقوم القائمين باللجنة بتوضيح الملابسات حول هذا الموضوع بدل انتظار نازر لغاية ما يجيب اخروا؟؟؟؟
ولا ما كدا
ضفرة:
نازر ...................
|
Post: #34
Title: Re: الي: ناذر الخليفة ...... والناس الشانين حمله عليهو!
Author: Tragie Mustafa
Date: 05-09-2007, 01:49 PM
Parent: #32
التنظير خلوه يا جماعه
في اتهام بشع وفي حقيقه ابشع
الاتهام لناس من حملة الامل انها ...نامت ببعض القروش الاتحولت.
والحقيقه البشعه
ان ناذر نفسه ادعى انه عارف الكلام ده من زمان وساكت
ونكشه بس لما ما عزموه....
بالله في اسخف من كده؟؟؟؟
ساكت معناها انت شريك في الجريمه
ولا شفافيه ولا يحزنون....
مستخدم هذه الورقه الآن بحجة استبعادك وعدم عزومتك بدخلنا في شك اكيد انه نيتك سيئه
وهدفك لا الشفافيه ولا يحزنون
توهمت انك تملك ورقة ضغط تذل بها من استبعدك
فرد الله كيدك في نحرك
ودخلت في حته ضيقه
لا اتمناها لاخ او حبيب....يا ستار.
انا بعتقد الحل تبعد عن الردود لانه كل رد بجيب لك كبوة جديده
وتبعد اصحابك الشلة اياها
لانه اي بوست زي ده ماقعد يصب في مصلحتك
لانه اصحابك بجوا بتفاصحوا بلا ادله ومن حق الناس انه ترد عليهم بكل حده.
نصيحه اخيره يا ناذر
اياك ان تصدق كل ما يقال لك في التلفونات
ولما قلتها لك من قبل ما صدقتني
وقعدت تتفاصح
من القال لك بتصل بفلان وعلان
وانا بعتقد انك ضحيه للزول الصدقته ولبد خلاك في المعمعه دي
لكن برضوا التأني ضروري....ولو سألت ناس الامل من قبل كان افضل بدل
تجي تنكت القصص دي لما ما عزموك بس.
|
Post: #33
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 01:37 PM
Parent: #1
Quote: تجاوزا للنية
مادام الموضوع مس سمعة ناس كتار في اللجنة،، لماذا لا يقوم القائمين باللجنة بتوضيح الملابسات حول هذا الموضوع بدل انتظار نازر لغاية ما يجيب اخروا؟؟؟؟ |
عزيزي محمد
شكلكـ كدا قانوني00 لعمري لم أسمع بأثبات تهمة منقوصة..
ناذر أتهم أتهام عام بدون تحديد لشخص معين .. ما جمع من مال
كان على مستوي السودان والشتات .. عاوزين أثبات حاضرين
بس حدد أنت التهمة كاملة ..
المبلغ المنهوب كم ؟؟؟
مرسل من منو ؟؟؟
مرسل لمنو ؟؟؟
ونتعهد نحن بالتقصي وأثبات الحقائق كاملةوعرضها على الملا ..
وبمنتهي الحيادية ..
ولو صح ذلك .. سنعتذر للسيد ناذر الخليفة
أها رأيك شنو !!!
|
Post: #35
Title: Re: الي: ناذر الخليفة ...... والناس الشانين حمله عليهو!
Author: Ahmed Mohammed Osman
Date: 05-09-2007, 01:49 PM
Parent: #1
معروف حمدين
كلامك صح!!
طيب
لو ما قال؟؟؟؟؟؟ هل تكون التهمة ثابتة ام انتفت بعدم وجود الادلة؟؟؟؟
|
Post: #38
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 01:59 PM
Parent: #1
| Quote: لو ما قال؟؟؟؟؟؟ هل تكون التهمة ثابتة ام انتفت بعدم وجود الادلة؟؟؟؟ |
أنت رأيكـ شنو !!!
لأني مصنف ضمن المتهمين
فكيف أكون القاضي والجـــلاد ؟؟؟
|
Post: #39
Title: Re: الي: ناذر الخليفة ...... والناس الشانين حمله عليهو!
Author: Ahmed Mohammed Osman
Date: 05-09-2007, 02:24 PM
Parent: #1
راي يا معروف انو لو ما قال
فالتهمة ساقطة ودي ما بتغالطو فيها اتنين
مافي دليل = مافي تهمة
بالاضافة لي دا
اقتبس جملة ياسر طيفور
Quote: يا مجموعة الأمل، لقد أبرأتم ذمتكم التي لم تكن في يومٍ ما موضع شك، الكل يشهد لكم بتفانيكم ومروءتكم وتصديكم لعمل الخير في زمنٍ الكل فيه مشغول بنفسه وكأننا في يوم حشرٍ عظيم.. فمطالبتكم لناذر مشروعة ولكنها تدخله في مشكلة أخرى مع أطراف آخرين.. فما هو الحل؟؟؟
|
انت رأيك شنو؟؟
|
Post: #40
Title: Re: الي: ناذر الخليفة ...... والناس الشانين حمله عليهو!
Author: معروف حمدين
Date: 05-09-2007, 02:44 PM
Parent: #1
Quote: راي يا معروف انو لو ما قال
فالتهمة ساقطة ودي ما بتغالطو فيها اتنين
مافي دليل = مافي تهمة
|
هنا أؤيدك تماماً .. وأتفق معك فى الشكل العام للقضية
ولكن نريد أن نضع سابقة هنا فى المنبر ..
عندما يكتب شخص كلام مغلوط من حقه الأعتذار .. ومن حق من أخطأ فى حقهم
قبول ذلك الأعتذار ..
بشرط ..
تسمية الأعتذار تكون مقرونة بما نسبه الشخص من أخطاء
ولو كنت مكان ناذر لقلت بصريح العبارة
آسفي وأعتذارى بشأن ( ويسمي هنا تحديداً أصل الخطأ )
لقد كانت معلوماتي خاطئة بشأن الموضوع ولم أتبين ذلك بداية
ورجعت للحقيقة وأعتذر عن ذلك ..
هنا يكون من مستهم التهمة براء أمام الكل .. أما أطلاق أعتذار
حمال للأوجه لا يقبله أي أنسان مهما كان الأمر.
|
Post: #42
Title: Re: الي: ناذر الخليفة ...... والناس الشانين حمله عليهو!
Author: انعام عبد الحفيظ
Date: 05-09-2007, 03:13 PM
Parent: #40
Quote: ولو كنت مكان ناذر لقلت بصريح العبارة
آسفي وأعتذارى بشأن ( ويسمي هنا تحديداً أصل الخطأ )
لقد كانت معلوماتي خاطئة بشأن الموضوع ولم أتبين ذلك بداية
ورجعت للحقيقة وأعتذر عن ذلك ..
هنا يكون من مستهم التهمة براء أمام الكل .. أما أطلاق أعتذار
حمال للأوجه لا يقبله أي أنسان مهما كان الأمر. |
|
Post: #43
Title: Re: الي: ناذر الخليفة ...... والناس الشانين حمله عليهو!
Author: انعام عبد الحفيظ
Date: 05-09-2007, 03:20 PM
Parent: #42
Quote: مافي دليل = مافي تهمة
|
دا أصل الكلام ومتفق حولو
Quote: Quote: أي بمعني أن الموضوع كانت بها أتهامات لمجموعة من الأعضاء ومن حقها أيضاً
تبرئة ساحتها مما نسب أليها ..
ولكن اللجنة لا تريد أن تفعل يا معروف وبدلا من ذلك تنتظرني أنا كي أبرئ ساحتها !! |
لكن تلميحات ناذر مستمرة بدليل طلبه لأعضاء اللجنة
وبكدا ناذر مصر يزرع الشك داخل الكل بأنو في حلقة مفقودة
ودا النحنا رافضنو ببساطة لأنو من غير دليل
وطالبناه يجيب معلوماتو كلها
اها جنس الحالة دي يعلوا فيها شنو؟؟؟؟
|
Post: #46
Title: Re: الي: ناذر الخليفة ...... والناس الشانين حمله عليهو!
Author: رشا سالم
Date: 05-09-2007, 05:49 PM
Parent: #43
| Quote: اها جنس الحالة دي يعلوا فيها شنو؟؟؟؟ |
قولي حسبي الله ونعم الوكيل يا انعام..
|
Post: #44
Title: Re: الي: ناذر الخليفة ...... والناس الشانين حمله عليهو!
Author: محمد الامين احمد
Date: 05-09-2007, 05:10 PM
Parent: #1
| Quote: انتو ناذر ده لما نزل البوست بتاعو الأول الكان سبب في الاشكال ده .. قلتو ليهو يعتذر |
يا محمد عبد المطلب ، ما تلوى عنق الحقائق من البداية ، ما قالوا ليهو اعتذر
قالو ليهو اذكر اسامى الناس ! هو براهو الاعتذر لمن لقى نفسو اتزنق.
|
Post: #45
Title: Re: الي: ناذر الخليفة ...... والناس الشانين حمله عليهو!
Author: ASAAD IBRAHIM
Date: 05-09-2007, 05:19 PM
Parent: #44
واعو
اني اري رؤوسا قد اينعت وحان قطافها
واني لصاحبها
محمد اخوي لو عاوز تتضامن مع الاخ العزيز ناذر مدخلك دة ما صحيح
وزي ما انت شايف ذاد الاشكال وممكن يتطور لا سمح الله
الحل هو ان ننتظر الاخ عبدالرحمن عزاز لأن اسمو ورد في الكلام
يجي يتكلم هو حول قروش ولا ولا
ولو حول هل تم استلامها ولا لا
وبعد اجابتو ومتأكد انا من صدقو ونزاهتو
اذا قال حول وما استلمت ببقي الباقي علي اللجنة ولناذر الشكر والتقدير والاعتذار كمان
عشان نبه الناس لمشكلة حاصلة فعلا
واذا قال حول القروش واستلموها وكلو تمام
يبقي ناذر يجي يقول بصريح العبارة انو بني معلوماتو علي خطأ او ظن
ويعتذر عنها وصدقني الناس حتقبل الاعتذار
غير كدة اي كلام تاني من نوع "اسمعوا" بعقد ما بيحل
كل التقدير
|
Post: #47
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-10-2007, 06:18 AM
Parent: #45
الأعزاء نادر , السمؤال:
شكرا علي روح التسامح وهو هدف الجميع في هذه المرحلة.
وليد محمد المبارك :
مع تقديري الأكيد لوجهة نظرك , فقط أسمح لي أن
أختلف معك : ذكر أي أسماء في ظل التوتر الحاصل كأننا بنعالج
مشكلة بي مشكلة أكبر بي كتير , والموضوع ممكن يتطور لأكتر من كده,
شكرا للطرح الهادف الموضوعي.
ياسر طيفور:
تحياتي واحترامي وتقديري:
فعلا عرفت شخصت المشكلة بدقة متناهيه , معك أتمني أن تسود روح التسامح وأن يصفح
الجميع عن ناذر. شكرا علي المشاركة الواعيه.
محمد الأمين أحمد:
لك اسمي آيات التقدير عزيزي:
وجهة نظرك مقدرة وعلي العين والرأس , لكن أفيدك أنني كنت متابع للأمر ومن الدقيقة الأولي
حتي أن اللحظات الأولي بعد انزال البوست المعني أصابت الكثيرين بربكه كبيرة الا الأخ
عسام عبد الحفيط الذي تعامل بحكمة ورجاحة عقل كبيرتين يشكر عليها, لكن بعد ذلك اختلط
الأمر فطالب البعض بتوضيح وطالب آخرون باعتذار , و كنت متابعا حتي للبوستات الأخري التي وردت
فيها مداخلات تخص المشكلة دون أن بكون هدفها مناقشة المشكلة.
شكرا للمداخلة الهادفة.
الأخ : أسعد ابراهيم:
معا لنتجاوز الأمر لتسود روح التسامح هنا... أكيد احترامي وعظيم امتناني للمشاركة القيمة.
|
Post: #48
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-10-2007, 06:30 AM
Parent: #47
الأخ أحمد محمد عثمان :
| Quote: مادام الموضوع مس سمعة ناس كتار في اللجنة،، لماذا لا يقوم القائمين باللجنة بتوضيح الملابسات حول هذا الموضوع بدل انتظار نازر لغاية ما يجيب اخروا؟؟؟؟ |
تحياتي أخ أحمد علي شجاعتك في طرح فكرة واضحه ومباشره
والأمر من قبل ومن بعد لا علاقة له بالثقة المطلقة التي
يحملها الجميع للجميع لكن الأمر أصبح واقعا مفروضا يستدعي التعامل
معه بحلول مختلفه. فاللضرورة أحكام.
شكرا علي مرورك من هنا.
|
Post: #49
Title: Re: الي: ناذر الخليفة ...... والناس الشانين حمله عليهو!
Author: Nadia Elsir
Date: 05-10-2007, 07:12 AM
Parent: #48
Quote: مادام الموضوع مس سمعة ناس كتار في اللجنة،، لماذا لا يقوم القائمين باللجنة بتوضيح الملابسات حول هذا الموضوع بدل انتظار نازر لغاية ما يجيب اخروا؟؟؟؟
|
شكرا الاهتمام و ده التوضيح و انا من اعضاء اللجنة :
لاهل الامل وحراس ابوابه المفتوحة هنا و هناك رسالة امتنان و بعض توضيح !
|
Post: #50
Title: Re: الي: ناذر الخليفة ...... والناس الشانين حمله عليهو!
Author: Ahmed Mohammed Osman
Date: 05-10-2007, 07:49 AM
Parent: #1
حقيقة ما اثير حول هذا الموضوع كافي جدا...
وزي ما قال احد الاعضاء
لا تقتلو المروءة بين الناس
اتمني انو الناس تقيف عند الحد دا
لا مذيدا من المشاركات
ويكون الحل:
اذا ناذر جاب الاسماء يبقي دا فهم براهو
واذا ما جابا ما محتاج الموضوع لاثبات تهمة ساقطة كما ذكرت سابقا
نحن هسي لافين في دايرة فارغة
والسلام
عكلتة:
ناذر + مجموعة الامل = كلكم اخوه اعزاء لانشكك في مصداقيتكم
ولكنه الشيطان لعنه الله قد دخل بين الناس
|
Post: #51
Title: Re: الي: ناذر الخليفة ...... والناس الشانين حمله عليهو!
Author: Mohamed Abdelmotalib Hassan
Date: 05-10-2007, 08:47 AM
Parent: #50
Quote: حقيقة ما اثير حول هذا الموضوع كافي جدا...
وزي ما قال احد الاعضاء
لا تقتلو المروءة بين الناس
اتمني انو الناس تقيف عند الحد دا
لا مذيدا من المشاركات |
شكرا أخي أحمد:
أوافقك الرأي تماما , وأتمني أن
يفتح الجميع صفحة جديدة مع الأخ ناذر
وأن تسود روح التسامح بيننا.
تحياتي واحترامي للرأي السديد.
|
|