يا احبابي كلكم دون فرز انجدوني محتاجه ليكم

وصلتني رساله من ايميلي ولي ايميلي
فيها فديوهات وعناوينها تحدث عن مضمونها (كلها كلام ما كويس )
طبعا ما قمت بتحميل الفديوهات المرسله شطبت الرساله فورا .
كدي الفاهم فيكم الحاصل يوريني المصيبه دي شنو ؟؟
هكروني؟؟؟ ولا كيف زول يرسل من حسابي من غير معرفتي ؟؟
الحقني يا تمبس
الحقني يا تمبس
وكل خبراء الكومبيوتر والنت
ويا حبان اي زوله او زول تصلها او تصله الرساله دي
انا برئيه منها
وما تفتحوها اظنها مفخخه

العزيزة دوما
تحياتي
والله انا قبل يومين استلمت رسالة فيها افلام فيدو اباحية
قمت بمسح الرسالة فورا
واحترت مثلك كيف يصل هؤلاء الى ايميلي
مودتي
وبالله العارف طريقة نمنع فيها مثل هذه الرسائل يورينا

والله يا خاله اخوك مسطح في الكمبيوتر ، لكن مره
حصلت لي حاجة زي دي ، جاني ئميل باسمي ، احترت فيه ، وفي النهاية عملت ربلاي تو اول

اتخيل اكتشفت انه الئميل مختلف ، والزول الرسل الرسالة عمل اسمه(النيك نيم باسم الئميل بتاعي )

، كدي جربي اعملي ربلاي (لو ما مسحتي الرسالة ) شوفي العنوان البجيك شنو ؟

اغايتو كان كلامي ده طلع صاح ، يكون يضع سره في اضعف خلقه .

زي ما قال الاخ رقم صفر
الايميل ما بتاعك
فقط مروس باسمك. و دي حيلة قديمة من ناس الجنك ميل و الاسبام
anyway be more vigilant
Internet is not a friendly place anymore

Quote: anyway be more vigilant Internet is not a friendly place anymore

فى غالب الامر ان فيروسا ضرب احد كمبيوترات الاشخاص الموجودين فى الكونتاكت ليست الموجودة ببريدك الالكترونى وعقب وصول هذا الفايروس الى بريدك الالكترونى يقوم بارسال ايميلات تلقائيا الى اى شخص موجود فى الكونتاك ليست حقك بما فيهم اسمك اذكان موجودا فى قائمتك
وعليك تنظيف كمبيوترك ومن ثم تنبيه كل الموجودين الى ان كمبيوترك اصيب بفايروس فتك ويتوجب عليهم عدم فتح اى بريد يحمل عنوانك
جنى

Quote: وعليك تنظيف كمبيوترك ومن ثم تنبيه كل الموجودين الى ان كمبيوترك اصيب بفايروس فتك ويتوجب عليهم عدم فتح اى بريد يحمل عنوانك جنى

دي ماالمشكله زاتها يا جني التنظيف دا .
اها يا ناس زول يفتح رساله مني ما في انا زاتي ما بالحيل علي كتابه الرسائل.

لاحظوا في عنوان الراسل:

هل هو .com أم .ca أم .org إلخ .. و قارنوه بي عناوينكم

إذا في إختلاف (أو مافي حتى) ممكن تعملوا Block لعنوان الراسل (و أي عنوان آخر لا ترغبوا في رسائل منه) كالآتي:

تعملوا paste & copy للعنوان الغير مرغوب فيه أولا..
بتلاقوا كلمة options على الصفحة البريدية, أضغطوا عليها,
بتديكم مجموعة خيارات.. إختاروا Block و أضغطوا عليها
أنزلوا العنوان غير المرغوب فيه هنا ثم أكبسوا Block
بي كده بتكونوا وديتوه الدروشاب!
و تاني ما بتصلكم منه رسائل,

الخالة دوما

سلام

قطعتي قلبي والله

دخلت وأقول يا رب أستر

الحمد لله مصيبة أهون من مصيبة ، وربنا يشل يد العادي الباغي .

ويلا يا خبراء ساعدوا الخالة ، وربنا يحفظها من كل سوء

محبتي

أحمد

كدي ابدا من ابني ولياب واختتم بالابن خالد شكرا ليكم جميعا احبائي احمد , المعز, ثروت, رقم صفر وخالد العبيد واظن كلام رقم صفر وثروت صحيح انا من الهجمه ما شفت اي شئ غير عنواني الما يغباني ومولعه الايقونه خضراء وبسرعه البرق مسحتها والاميل طفشتوا الله بيني ما بينو . شكرا للتوضيح

سلامات خالتنا دومة
للضمان وكت لسة بتقدري تعملي login على ايميلك أدخلى على الـOptions و غيري الـPassword...
خلى الـ Password دايما معقدة شويةيعني دخلي في بدايتها او نصها او نهايتا حاجات زي (!@#$%^&*)() و Caps سريع، وغالبا ايميلك ايميلك ما اتهكر بتكون ترك زي القالوها الشباب لانو لو هكروهو اول حاجة بيغيرو الـ password.

تحياتي ويوم هكرك ما يجي

العزيزة دومة ..
هناك خيار في option اسمه mark as spam ممكن تحددي هذه العناوين بهذه الصفة وستتوقف الرسائل ..

شكرا العزيز نستا حاولت اجرب وصيتك قدر ما سجيت فيها مانجحت الكومبيوتر بصلب

حبابك يا محمد الحاج ولدي اجتهدت كثير في تغيير الباسويرد قدر ما اكتبها يقولوا لي ما ياها في النهايه قنعت منها ومن الاميل زاتو . الا اسجل ايميل جديد . شكرا لاهتمامكم جميعا

العزيز دومة
أشطبي بس
زي مابعمل أنا مع عشرات الرسايل من هذا النوع

اهلا ابو ساندرا
ان شاء الله رشيده تكون تماثلت للشفاء ليها تحياتي هي والبنات .
والله كنت مرتاحه من الجنك ميل والاسبام البقولوه دا
الا بعد دا ما في راحه تب اها غايتو الاميل زاتو جدعتوا وارتحت منه

العزيزة شدييييد دوما

لقيت ندائك دا وبدون تفكير جيت جاري ونطيت الحيطة
أها بعد ما اتوكرت جوة الدارة
اكتشفت ليك اني ما شايل عكاز ولا طبنجة
يعني أباطي والنجم والساتر الله .
لكن لقيت أهل الحارة ما قصروا
أبقي عشرة على إيميلك . الزمن دا بقى وشو زي قفاهو

تحياتي وأطيب أمنياتي

وليااااااب

عاطر التحايا وأطيب المنى

العزيزة دوما
بوستك مسكون اول زول رديت ليك
الساعة الطار البوست وإختفى
عرفت المسالة فيها إن
وممكن إضربني فايروس
طلعت
وحسي جيت راجع
قولي يامدني السني
جلابية بيضا ومكوية
يالسني بسحروك لي
تلقي النجدة جنبك
تهبشو ساكت القاليك
افتحي البريد منو؟

[العزيزة دوما
بوستك مسكون اول زول رديت ليك
الساعة الطار البوست وإختفى
عرفت المسالة فيها إن
وممكن إضربني فايروس
طلعت
وحسي جيت راجع
قولي يامدني السني
جلابية بيضا ومكوية
يالسني بسحروك لي
تلقي النجدة جنبك
تهبشو ساكت القاليك
افتحي البريد منو؟]
لوووووووول يا محمد سني يعني تراني ما براي انا زاتي البوست دا فتشتو سماء ارض ما لقيتو قلت لي دكتوره بيان يا اخي بكري دا حاقر بي مالوا بوستيني كتبتو قلت كان الوليدات يوروني اعمل شنو شالوا كشحه وما قلت فيه اي كلاما اعوج.؟تراهو بكري المسكين لا شالو لا شافو البوست تقول فيه شيطان اسم الله الف مره والكومبيوتر اتلكك وقف عديل كدا حرن المهم بعد خراج روح لقيتو ردت علي حباني الفوق ديلاك تاني الكومبيوتر اتلكك قربت اجدعه بالشباك . اسه الله يستر ما يحرن تاني ارد علي الحبان ديل

هلا ستنا دومة

عفوا جيناك متأخيرين ولكن الشباب أهل الفزعة ما قصروووا، وكمان فزعتك جابت ٍنجاوي المختفي ليهو سنين..
فأهلا بك سنجاوي...فمنذ فترة بعيدة جدا لم أقرأك.

هلا ابني الحبيب نادوس والابنوسه والله متلللللللللللومه معاكم لوم شديد ربنا يهون لي اناغمكم مشتاقه ليكم كثير

سنجاوي اب كلاما بداوي والله اتوحشناك شديد علي قول الجنا محسن خالد وين انت ؟؟؟وين زمنكم الجميل ؟؟؟ كلما اتذكركم اتذكر مام يا حليلو وحليل ناس شتات وبناديها ما فضل الا ولدي ولياب دا ربي يديه العافيه بنسمع من بعض من وقت لاخر .
ابقي قريب وبركه الجيتني وشفتك

يا حبوبة دومة
إنتي مالك و مال الكمبيوترات و الإيميلات?
أمشي الحج....
و أغشي بالمرةالظلامية بيان و سوقيها معاك كمان ...


هكروني قالت

يعني حبوبتك دومه ما شبه الهكر ؟؟
انت عاد يا يايا ما اتفلهمت وسويت ليك جيب في الطاقيه
.الظلاميه نديداتها لسه ما اكلو حلوهن انت جاي ترسلها الحج مع حبوبتك دومه ؟؟!!

إنتي كويس يا doma رسلو ليك... أنا رسلو مـِــنـِّي !

ياجماعه احمد الريح يرسل لى رسائل فاضحه هذه عينه منها ..الحاصل شنو؟؟

والله يا احمد الريح يا ولدي ناس الانترنت ديل صعبين بالحيل يلبسو الزول جريمه لا ايدو لا كراعو اسع انا من الهجمه حيلي انبتا غايتو يا ناسي الحاضر يكلم الغايب اي رساله مني ما تفتحوها

Quote: الحقني يا تمبس الحقني يا تمبس

والله ضحكتيني ضحك..

محبتي كاملة غير منقوصة..

علا الكمبيوتر نحنا ما من اهله..

الخالة دومة تحياتي

الناس الفوق الطيبين ديل ما خلو حاجة

بس انا جيت اتضامن معاكي

اما بالنسبة :

Quote: الحقني يا تمبس الحقني يا تمبس

لما يجي اذا جاء حيلقاكي نسيتي الموضوع

المرة الجاية كوركي لي زول سمعوا خفيف

الحمد لله شغلانية انطرنت ساي ؟

الخالة دومة تصدقي قريت العنوان قربت اخش جوه الشاشة افا افا الخالة دومة عاوزة نجده واخوان البنات حايمين ما جايبين خبر افو افو

علا الحمد لله الجاتك في ايميلك سامحتك اعملي ايميل جديد ولا غيري الباسوورد وكمان لامن تغيري الباسوورد لازم تكتبي في ورقة وتحفظيها في الجزلان

حسب فهمي البسيط احيانا بيكون في فايروس في الكمبيوتر بيرسل عشوائي لكل العناوين المسجلة ويمكن انتي مسجلة عنوانك برضو

http://www.symantec.com/smb/security_response/writeup.j...=2006-011712-3235-99

W32.Blackmal@mm

الخالة دومة
تحياتي واحترامي يا غالية

أعتقد أن جهازك اصابه هذا الفايرس المذكور في اللنك اعلاه
من خصائص هذا الفايرس انه :
1- يمنع عمل الأنتي فايرس الموجود في الجهاز
2- يمنع تحميل وتشغيل اي برنامج أنتي فايرس
3- يدخل الى قائمة ال contacts ويبدأ في ارسال رسائل من البريد الالكتروني
4- يستطيع اراسل الرسائل باللغتين العربية والإنجليزية .
5- أحيانا يقوم بتغيير الباسوورد

لمعالجة هذا الفايرس :
ادخلي على الرابط لتحميل أداة التنظيف الخاصة بالفايرس المذكور
حملي البرنامج على فلاش ميموري
لأن الفايرس يمنع التحميل على الجهاز
قومي بتشغيل البرنامج من الفلاش لتنظيف الجهاز من الفايرس بعد فصل النت من الجهاز
بعد ذلك يمكنك اعادة تركيب برنامج الحماية الخاص بك قبل توصيل النت
ثم عمل تحديث للبرنامج وتشغيل خاصية ال protection الآلية

هذا والله اعلم ...
يمكنك الاستعانة باي شخص له خبرة في الكمبيوتر

Quote: خالة دومة تحياتي واحترامي يا غالية أعتقد أن جهازك اصابه هذا الفايرس المذكور في اللنك اعلاه من خصائص هذا الفايرس انه : 1- يمنع عمل الأنتي فايرس الموجود في الجهاز 2- يمنع تحميل وتشغيل اي برنامج أنتي فايرس 3- يدخل الى قائمة ال contacts ويبدأ في ارسال رسائل من البريد الالكتروني 4- يستطيع اراسل الرسائل باللغتين العربية والإنجليزية . 5- أحيانا يقوم بتغيير الباسوورد

يا ود القريش
الفايرس دا شكيتو شكيه لا تتعطل لا تتبطل الباسويرد نعمني كاتباها وحافظاها في النوته قدر عليها غيرها .
يتغير يا يابا حالو .كدي النطايب الناس ديل اولا بعدين نشوف موضوع الفيروس دا

ابني الحبيب ود العمده نحن العشوائي دا اصلوا ما بفارقنا
سكن عشوائي فايرص عشوائي

الخالة دومة
سلامتك من الهكر..
وعلي اهبة الاستعداد لمضاربة الهكر ده وين ما هو قاعد
وضربه ضرب غرائب (الهكر)...
نصيحتي غيري الفيرشن بناع الهوت ميل بتاعك للاصدار الجديد فهو محمي بخدمة
تقفل كل الرسائل ذات الملفات الملحقة حتي تعطيها انتي القرين لايت...
جاهزين يا دومة..ولعن الله الهكر

Quote: لخالة دومة سلامتك من الهكر.. وعلي اهبة الاستعداد لمضاربة الهكر ده وين ما هو قاعد وضربه ضرب غرائب (الهكر)... نصيحتي غيري الفيرشن بناع الهوت ميل بتاعك للاصدار الجديد فهو محمي بخدمة تقفل كل الرسائل ذات الملفات الملحقة حتي تعطيها انتي القرين لايت... جاهزين يا دومة..ولعن الله الهكر

كدي تعال لي بالمخسوس حضر لي اللنك للداون لودينق ] يا ولد يا كيكي انت مالك حاربتني ؟؟

والله يا اسعد يا ولدي تمبس بقي ما فاضي لي ابدا وكم مره وعدني واخلف
الا تقول شنو اصلو حالتك دومه ولوفه والولف كتال

رشويه بركه الضحكتي
والله تمبس دا من شده ما مطنشني لما المغسه جايه تشقني من تالاهو .
يا دكتوره وكت لاقيتك هنا النشكي اليك من وجع المفاصل دا.
اسع بجي كوستاوي يقول لي لن تصلح رشا ما افسده الدهر .

الاخت دومة
تحية وبعد
سألت الوداعية الساكنة جنبنا عن هذا الموضوع، فقالت إن دومة محسودة. ولها خصوم وخصمات كتار. بالذات الخصمات.
وقالت ايضآ إن خصومة قريبة، ربما تكون هى السبب فيما حصل لحاسوبها. يبدو ان خصمتها ارسلت لها فايروس ابو حديد لتخريب حاسوبها. حاسوب دوما.
ونصحتك الوداعية يا دوما باجراء فحص فيروسى عاجل على حاسوبك.
وتجديد اشتراكك فى مكافحة الفيروسات والحاسدات ومن لف لفهن.

وقالت الوداعية لو كانت دوما تستخدم انترنيت اكسبلورر كمتصفح عليها بالتغيير للمتصفح المدرع والمحصن فايرفوكس firefox
ويمكن لدوما تنصيب هذا المتصفح من هذا الموقع مجان:
http://www.mozilla.com/en-US/firefox/

شكرا عادل عثمان
وبياض الوداعيه علي قل ليها الدفع باليوان ولا الدينار ؟؟
بس في مشكله سيوله الايام دي انت ادفع ونتحاسب اليوم الاخر .
شكرا علي الرابط

العزيزه وغاليه دومـه

....ينعم صباحك خير ..ويسعد مساك النور

..منو البيسمع العزيزه دومه تطلب شي ومايجي..زي ما

قال العزيز سنجاوي اهل الحاره ما قصرو..وسلامتك...

مع تحياتي وتقديري وسلامي لك ولكل المتداخلين باعلاه

..وخاصه للطال غيابهم الاعزاء ولياب وسنجاوي

....مع خالص الود.

...SHATAT

شتات مامعقوووووول يا حليلهم دوام بطراهم
الجابك وجاب سنجاوي يجيب بناديها ودبلاوي . شاكره للطله البهيه

الاخت دوما

تحياتي

الموضوع عبارة عن Email Spoofing وهو احد صور ال Spam وكل المكن تعمليهو انك تمسحيها

Email spoofing واحد من المشاكل الكثيرة جدا في انترنت اليوم

اللنك ده فيهو معلومات عن الموضوع

http://www.lse.ac.uk/itservices/help/spamming&spoofing.htm

تحياتي

العزيزه دوما

الكلب ينبح والجمل ماشى !

ويا جبل مايهزك ريح !

لا تلتفتى للوراء

وخليك منهم .

وتسلمى من كل بلا .

الابن مامون احمد ابراهيم
مشكور كثير نجيك في السمح ان شاءالله
وما تشوف لا فايرص لا اسبام

العزيز احمد حمزه تشكر علي اللنك يا هميم شاكره كثير والله . ومرحب بيك في دائره ابنائي

Quote: يا حبوبة دومة إنتي مالك و مال الكمبيوترات و الإيميلات? أمشي الحج.... و أغشي بالمرةالظلامية بيان و سوقيها معاك كمان ...

العزيزة دومة سلامات.

أمسحي بس زي ما قال لك أبو ساندرا.

يا كوستاوي, هو الظلامية بيان دي لسه ما مشت الحج؟
الراجية ليها شنو, والعمر ده فضل فيهو كم؟

دينق.

Quote: يا كوستاوي, هو الظلامية بيان دي لسه ما مشت الحج؟ الراجية ليها شنو, والعمر ده فضل فيهو كم؟ دينق.

لوووووووول يا دينق خسمتك بالجكس الجديد وشديد لو ما لاقيتنا في الخرطوم السنه البعد الجايه كان الموت خلاني واوريك بيان دي للدنيا والزمان عمر الزهور عمر المني ما شاء الله العين الحاسده ما تشوفها

الأخت دوما..
كويس انك عملت البوست ده ، بصراحة اتنورنا..
شكرا لكل الزملاء على المعلومات القيمة .

نورتينا يا امونه وحرام تنسينا يا امونه
اسعدتني الطله كثير .

يا دوما العزيزة

خرعتينا (زي ما تقول الاعراب هنا يعني خوفتينا)...ما اسهل ان يلقط اي واحد عنوان الاخلر في الزمن الاسفيري ...الحكاية دايرة شرح وحارجع ليكي بعد ما اصل الشغل اصلو كدة ساعة

دوما
ما حدث عندك شائع وبكثرة وله اسماء واهمها spam و hacking stmp

تعددت الاسباب والspam واحد والسادة ال spammers وعدد الاسبام مرتبط بنشاطاتك وابحارك في الشبكة دون ان تحمي نفسك ولو ان حتي الحماية لا تمنع الاسبامرز من الحصول علي عنوانك بوةاسطة كوكيز او بوب ابز ... المهم ان هنالك وسائل متعددة تمكن الهاكرز من الحصول علي عنوان اي عنوان وحتي انشاء قاعدة معلومات منها ثم اعادة ارسال كثير من الرسائل السيئة وملحقاتها relaying of spam والفيروسات هي واحدة فقط من المعينات وهي اقلهم ضررا حيث يمكن التعرف علي الفيروس والقضاء عليه اما الاسبام فيلزم اشياء معقدة كثيرة منها معرفة الجهة التي تكتب اليك والاتصال بمدير السيرفر في تلك الجهة او حتي الاتصال بجهة حكومية امريكية مهمتها مناهضة الاسبام ...عموما كاحتياط استعملي برامج
antispam
anti-virus
وكذلك تاكدي من انك
blocked pop ups
clean cockies regularly

,وللفائدة العامة ارجو قراءة ما في الروابط التالية :
http://www.defendingthenet.com/NewsLetters/HackingSMTPG...CommandReference.htm
http://www.itsecurity.com/features/99-email-security-tips-112006
/

لوووووووووول لازماني مذاكره شديده يا باشمهندس بارك الله فيكم اصلو الزوج بتاعنا حسادتن ماتفوته مامن كومبيوتره وكومبيوتري في السهله قال لي انت عندك فيه شنو ؟؟ لا نمره حساب لا كرتد كارد ما يهكروك كان هكروك بلقوا فيه شنو غير سودانيزاولاين
النبي شفتوا حساده المخلوق دا ؟؟؟!!!
صدقت ست الودع يا عادل عثمان وبياضها علي الحاسد الراصد قريب مني وفي بطن بيتي والله اكبر عليه .

دومه:

سلامتك والألم بيزول ... كفارة ليك يا زول.

ولا تشتغلي بالموضوع عادي جدا .... اعمل البلوك القالو ليك
للعنوان الجاب ليك المشكلة .... واتوقعي تاني يرسل ليك
انتي تاني أعملي بلوك ... أنا في واحد مصري متلحني......
برسل في الاسبوع مية ايميل .. كل مرة بي عنوان مختلف في حروف بسيطة
اصلو ما زهجت .... هو يرسل... وانا اقفلو... لحدي ما زهج مني ووقف الحكاية دي.

مشتاقووووون والله.

اهلين هونولولو مشتاقوووون والله .
غايتو بذاكر الكلام الكتبوه دا واشوف لي برامج حمايه من الفيروسات اصلوا كومبيوتري باقي عمر يضربو سارس يجيب خبرو

كيفك يا خالة دوما ..
لازمك تبخريهو كمبيوترك دا الظاهر أدوهو عين

الشباب ما قصرو أدوك المفيد وزي ما قالو هو نوع من أنواع الملفات المزروعة البتنسخ نفسها وترسل رسائل للموجودين عندك وكويس إنك مسحتيها ..
عليك بتغيير الباسوورد ووضع برنامج حماية كويس وعمل إسكان للجهاز حتى لا تتعرضي لمثل هذه المشاكل مره أخرى ..

تحياتي ..

انتي مابتجيك عوجة يا دوما حسناتك بتوقيك.

تحياتي وتضامني.

ياحاجــة .. ويا ماما ..
ما تشوفي شــر . والدناك بالشر .. الله يكسر راسو ..
الايميلات دائا عرضه لي ضعاف النفوس .. الناس اليدهم خفيفة بيجو داخلين يشليلو حاجة ما حقتهم .. والبجيبو ليك حاجة حاجه ام ليك بيها علاقة .. وفي البيجي يطبق ليهو نظرية جديدة اتعلمه .. وفي كمان التقنية البتضر نفسها بنفسها ..
زي ما قال ليك معتصم .. هناك الكثير من الملفات بتاعت التجسس .. والملفات البتنسخ نفسها بنفسها وتكون حايمه الدنيا..
طالما حذفتي الملف .. عوجه مافي .. والكثير من الأخوان ساهموا بشكل فعال في التوضيح
وانا متأسف خالص البوست ده نبهوني ليهو الليلة الصباح ده يا حاجة بقينا نجي داخلين البورد ده والواحد لابس ليهو نضارت شمش من السخف المبالغ فيهو ده ..
البريد المجاني دائما مشاكلو كتيرة والحقوق فيه وبتضيع
الباص وورد غيريهو من فترة لي أخرى كلما تحسي انو في أجسام غريبة أو في رسائل متكررة بشكل دوري ..
ما تفتحي ليك رسالة ما عارفاها من وين .. وبالذات البتجي في الجنك ميل
أعملي حساب اي رسالة بتجيك في شكل مرفق اتاشمنت ومضغوطة على نسق Winzip

تعرفي ياحاجة ..
عندي واحد لذيذوني كدا .. متلحني من قبل فترة
كلما اصحى الصباح اللقاهو ليك مرسل لي رسالة .. عينك ما تشوف إلا النــور
وكل يوم بيزيد فيها ..
غايتو ما خلى ليهو نبذ في الدنيا .. ما جابو لي
ما فاضل ليهو إلا يدخل ناس قوقل ايرس يجيب لي خريطة الغرفة بتاعتي وشجرة الليمون .. قام بي كل قلة أدب قال لي بعرف بيتكم بي وين ..
تخيلي زول من سقط لقط .. يقول ليك انا بعرف بيتكم .. والكلام البتكتبو في سودانيز اونلاين ح نسوي ليك بيهو وح نعمل ليك
عليك النبي ياحاجة زي النوعية دي .. كان مشيت حسع دي كريت ليكم الجهاز بتاعو ده جبتو ليك هنا اكون غلطان ؟؟ كان جريتو هو زاتو من اضانو دي .. الله بيحاسبني ؟
الكلام دا كتبتو ليك هنا لانو البورد ده مليان ناس نفوسة ضعيفة ..
واصلو ما ترقدي ليك على جنب ... وما تطمني ..
أقرب الناس ليك ممكن يخذلك بس لمجرد اختلفتي معاهو في طرحــو
واسهل حاجة تضر ليك شخص عن طريق التقنية دي .. واصعب حاجة إنو النوعية دي بس تفكر مجرد تفكير أنو لو عامل فيها شفت .. حواء دي والده..
..
.
كان لاقتك اي مشكلة رسلي في الخاص برضو عارف قلوبنا دي مفتوحة ليك قدر كيف

العزيزة الخالة دومه تحياتي

والله إرتفعت نسبة الخوف لدي بمجرد رؤية البوست وعنوانة والحمد لله جات علي كدا وبنقرة كي بورد تستطيعي تجاوز هذه الأزمة وطبعن كلمة أزمة تستوعب هذه الحالة بالذات لي حالتنا دي حيث تواضعنا في فهم تقنيات الكمبيوتر ولو ربنا أطال العمر بإذن الله بنلحق وبنصبح جهابزة .

بحيراوي

شكرا لكل ابنائي الاحباء
معتصم دفع الله , ابومهيار, تمبس و البحيراوي .
ان شاء الله اجيكم في السمح , ويعوضني الله في ايميلي ما قدرت استرد الباسوير د للان .
لكين عملت برنامج حمايه من الفيروسات وفير وول وتاني لو ما اتاكدت من اسم الراسل ما بفتح اي ايميل
والشكر الجزيل للبشامهندس وما عدمناك يا هندسه .تسلموا جميعا

ســـلامات يا خالتو دومه
مشتااااااقين والله ، ولينا زمن من البورد، دحين إذكرتيني يا ماما دومه،
تبري من الهكر ‘نت وإنشاء الله السلامة
ودي وتحياتي

بوردابي قدييييييييييييييييييييييييييم

الرايق الما ضايق
حبببببببببابك ويوما سعيد الجابك
اسعدتني الطله حليل ايامكم والزمن الجميل
عودا حميدا مستطاب.
تسلم ابني الغالي