اخوانى البورداب / قضيتوا جمعتكم وين ؟؟ انا قضيتها مع المشرقة غادة نورى / لقيتونى كيف ؟؟؟؟؟

كانت احلى جمعة
مع الامل والاشراق والحب
مع غادة نورى

غادة نورى يا جماعة تجبر اى انسان يجلس معها ان يكون مبتسم دائما
مشرقة وديعة ,,
بصراحة كدة بعد ما قريت البوست بتاع ماسا غادة نورى الى الصين يوم الاثنين القادم
قررت ان اكون اول المودعين .
مشيت ليها متلهفة للقائها ووجدتها قوية ثابتة مؤمنة بارادة الله وان كل ما حدث هو قدرها
وهى راضية وتتمنى ان يشفيها الله لأجل والديها واخوانها الصغار .
بيتها عامر بالضيوف والمودعين وهى توزع الابتسامات الحلوة على الجميع تداعب الصغار
وتبتسم للكبار .
ذهبت ومعى ابنى وضاح وابناء اختى محمد عوض وابوزيد عبد العظيم اللذين يعرفونها من المنبر فقط وتمنوا لقائها وكان اللقاء الجميل وجلسنا الساعات الطوال ولم نشبع من الكم الهائل من التفاؤل والامل والشكر والثناء لكم اخوانها اللذين استمدت الامل من وقوفكم بجانبها تشكركم واحدا واحد بدون فرز وقالت ليكم ::
احبكم كتييير ,,,,
انتوا الامل
وانتوا الاهل
ادعوا لى كلكم
ولكم التحايا
ام وضاح

ملحوظة
راجعة ليكم تانى عشان اكلمكم عن الجمعة مع غادة وعن تفاصيل الرحلة للصين .

Quote: انتوا الامل وانتوا الاهل ادعوا لى كلكم ولكم التحايا

اللهم يا شافي اشفها
اللهم يا لطيف الطف بها
اللهم يا كريم اكرمها بتمام الصحة والعافية
اللهم يا الله اجب دعائنا بجاه حبيبك وصفيك سيدنا محمد عليه أفضل الصلوات وأتم التسليم .

Quote: مشيت ليها متلهفة للقائها ووجدتها قوية ثابتة مؤمنة بارادة الله وان كل ما حدث هو قدرها وهى راضية وتتمنى ان يشفيها الله لأجل والديها واخوانها الصغار . بيتها عامر بالضيوف والمودعين وهى توزع الابتسامات الحلوة على الجميع تداعب الصغار وتبتسم للكبار .

أصيلة أختي أم وضاح
وفي إنتظار التفاصيل

اللهم يا شافي اشفها
اللهم يا لطيف الطف بها
اللهم يا كريم اكرمها بتمام الصحة والعافية
اللهم يا الله اجب دعائنا بجاه حبيبك وصفيك سيدنا محمد عليه أفضل الصلوات وأتم التسليم

دعاك من جوه قلبك يا اصيل
ربنا يستجيب ان شاء الله
قول آمين يا عاطف
ودعواتكلها
ام وضاح

الحبيبات أمال وغادة..

سلام ليكم وحاسدينكم على الجمعة الجميلة..

إن شا الله يا غادة يا بت حوا وآدم تمشي وترجعي كلك صحة وعافية. وتطمًني قلب أمك واخوانك وكل البيحبوك..

أم وضاح.. عارفاك هميمة وأم الواجب زاتو.. بتذكر جيتك لي الفجر عشان تودعيني قبل ما أمشي المطار..

يا غادة: لا إله إلا الله.......................

تميها يا حبيبة


تخريمة: يا أمال إتغديتو بي شنو؟ أوعك تقولي بأم رقيقة خفيييفة وكسرة.. بالهنا

سلام ليكم وحاسدينكم على الجمعة الجميلة..
فعلا جمعة يحسدونى عليها ؛

إن شا الله يا غادة يا بت حوا وآدم تمشي وترجعي كلك صحة وعافية. وتطمًني قلب أمك واخوانك وكل البيحبوك
آمييييين

والله يا رجاء غادة رائعة لدرجة كبيرة
ربنا يجبر خاطرها بالصحة والعافية

يا أمال إتغديتو بي شنو؟ أوعك تقولي بأم رقيقة خفيييفة وكسرة.. بالهنا


ام رقيقة بس ؟؟؟؟
ما خفى اعظم .
انت لسه فاكرة انى جيتك الصباح بدرى لوداعك
انا اجيك من آخر الدنيا يا ست البنات .
دعواتكم ,ام وضاح

تغادر غادة نورى الخرطوم متوجهة للصين يوم الاثنين القادم فى تمام الساعة
الرابعة عصرا ان شاء الله بطيران الامارات مرورا بدبى .
وسوف تدخل مركز زراعة الكبد فى نفس اليوم وكان رقمها فى العمليات رقم 27
ولكن بمساعدة دكتورة سودانية جزاها الله خيرا تمكنت ان تضعها رقم اربعة فى
القائمة واذا وجدت الانسجة المطابقة تتمكن من اجراء العملية فورا وبعد العملية ان شاء الله بالنجاح سوف تكون تحت المراقبة التامة لمدة ثلاثة اشهر كاملة .
دعواتكم ,,,,
ولكن احبائى ما زالت غادة ينقصها من المبلغ الكامل الكتير .
وافقت الصين بداية باجراء العملية على اساس اكمال المبلغ فى الايام القادمة
اثناء وجودى مع غادة تمت اتصالات من السعودية والدوحة وارسلوا لها جزء من المبلغ والامل فيكم كتير لاكمال المبلغ المتبقى .
ما زالت لديها وعود فى اليومين المتبقيات لها فى الخرطوم واملنا على الله كبير .
لدى رقم حساب لها فى بنك ابو ظبى الوطنى بالخرطوم وبامكانها سحب اى مبلغ من البنك
فى الصين .
ساعود لاحقا
تحياتى
ام وضاح

غادة نورى محتاجة لمبلغ عشربن الف دولار [ 20,000 دولار ]
كانت موعودة من جهات لم تلتزم بوعدها,,
مسافرة على امل ,,
ماذا نحن فاعلون ؟؟؟
يلا ايد على ايد
يا اخوان واخوات غادة
ولكم التحايا
ام وضاح