بين شرطة امن المجتمع وشرطة لبع المجتمع وفي الحالتين انا الضايع

بين شرطة امن المجتمع وشرطة لبع المجتمع وفي الحالتين انا الضايع


04-30-2007, 07:01 AM


  » http://sudaneseonline.com/cgi-bin/sdb/2bb.cgi?seq=msg&board=100&msg=1177912876&rn=3


Post: #1
Title: بين شرطة امن المجتمع وشرطة لبع المجتمع وفي الحالتين انا الضايع
Author: د.محمد حسن
Date: 04-30-2007, 07:01 AM
Parent: #0

قدر ما اقول اصوم عن الكتابة وخاصة فيما يتعلق بالحكومية منها القى انه الحكومة بتستفزني وتجيب حاجات تخليني محتار ، يا ربي الصاح ده هاجر لي ياتو بلد عشان اهاجر ليه
، قبل يومين وفي جريدة السوداني ( زمان كانت الدولية ، لكن الظاهر درون نزلها التانية ) انه تم تكوين شرطة لمحاربة الفساد واظن الاختلاسات. العنوان ده رجعني لسنتين لي ورا في اخر زيارة لي للسودان ( سبحان الله السودان الكان بلدنا بقينا نمشي ليه زيارة _ طبعا بعد البترول حيكون في عمرة وحج ) لقيت مبنى كبير مكتوب عليه شرطة امن المجتمع، طيب ما هو اساسا الشرطة لامن المجتمع
والشرطة لمحاربة الفساد والاختلاسات
لانه الاختلاس سرقة
والمختلس حرامي
والشرطة مهمتها تقبض الحرامية
ده معروف من 19 ديسمبر 1955
الجديد شنو انه في ابريل 2007 الحكومة تكون شرطة لمحاربة الاختلاسات؟
وبديت ارجع بالذاكرة
قبل ما اطا ارض الاغتراب كان عندي عمل صغير اترزق منه وعشمان ابقى زي ود الجبل ، وفجأ يوم بعد صلاة المغرب يجيني بوكس مليان ناس بالزي الرسمي
قلت يا ساتر من الدعاتر
دخل لي ضابط المحلية قال لي الرخصة وين
قلت ليه والله بديت اجراءاتها وجيتك في المكتب كذا مرة وما حصلتك لاني انا زاتي عايز اكون نظامي
قال لي ما مشكلة نحن جيناك لحد عندك
قلت ليه والله شكرا. المطلوب
قال لي تدفع مبلغ كذا
فوجئت لانه في تلك الايام ودالجبل زاتو ما بكون عنده المبلغ الذكره لي في اللحظة ديك
قلت ليه حاضر جنابك بكرة الله يحيينا اجيك في المكتب وادفع
قال لي لا تدفع هسة والا البوليس يقبض عليك
يا ربي
قلت ليه لا كله الا القبض ، والبوليس ينظر الي متحفزا
المهم سريع دخلت الاماكن المجاورة ( حلوة الاماكن المجاورة دي نغمها فضولي) ولملمت القروش ، والناس اتلموا كالعادة بين شامت ومتعاطف ومستهجن والمافاهم حاجة، اديتوا المبلغ على داير المليم وقلت ليهو الايصال؟
قال لي الايصال تعال شيلوا بكرة في المكتب!!!!
وخوفا من لبع البوليس بلعت زعلتي
وطبعا الى ان قيض لي الله السفر والاغتراب الزابط ما اداني الايصال
اها طبعا امن المجتمع بعد احداث الاثنين الاسود واحداث المهندسين والحاجات الصغار البيناتهم بقى مافي
اما لبع المجتمع فاكبره لبع المظاهرات السلمية ، والمسيرات التي لاتخرج من المؤتمر الوطني و الحركة الشعبية لانها شريك ( شركة السودان الوطنية الشعبية المحدودة)
ولبع ستات الشاي
ولبع المرور
وده لبع مجيه يضربك تقع
تضربه تقع
وفي النهاية
في الحالتين انا الضايع

Post: #2
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: Ammir Mohamed
Date: 04-30-2007, 09:41 AM
Parent: #1

ياد. محمد حسن موضوعك (لذيذ)

شكلك انت ما سمعت بي حاجة اسمها (الأمن الإيجابي) طبعا دي شغالين فيها العساكر نص كم النزلوهم الصالح العام من الدفاع الشعبي وخليني أحكي ليك الحكيوة دي

يوم كان عندي البلاتين بتاع تقوم الأسنان دي جاي من مصر .. مشينا أنا ومعاي 3 من أصحابي شارع الدكاترة أمدرمان نبيعهم هناك ونرجع نتشرشح بالقروش ... كنا طالعين من امتحان وقلنا خلاص نمر نبيعهم ونشوف ... راكبين عربية (سيارة) كريسيدا وبنسمع في موسيقى راب شباب حلوين وكدة وصلنا هناك واقفين جنب عيادة كدة ولحدي ما ننزل أنا وصحبي نبيع السمنة دي جينا لقينا لينا واحد واقف جنب العربية وبتكلم مع أصحابنا الاتنين الفضلو في العربية ووقف يسمع في الراب وبعد دقيقة قال ليهم الله الشريط بتاعكم ده حلو بتاع منو ... المهم بعد شوية طلع لينا كارنيه وقال لينا معاكم الأمن الإيجابي اتفضلو معاي القسم الشرقي شال بطاقاتنا وكنا بنقرا في جامعة أمدرمان والجامعة الأيام ديك بتاع المرور بفتش لي في حجة معاهم .. المهم وصلنا الشرقي كان في عقيد قاعد ، بتاع الأمن الإيجابي قال ليه لقيت ديل مشغلين شريط سيكس(sex) كاسيت في العربية وواقفين جنب مدرسة البنات !!!! الحيوان كذب ونحن اتسيكنا .. المهم العقيد قال لينا اقيفو هناك هسع حنعرف بتاع البنقو وبتاع البنات والبسكر منو.!!! عندنا واحد كدة (إبراهيم عطا) كبكبة شديدة قال للعقيد ده ياخي الراجل بتاعك كاذبلانكا!! فداك قال شنو قام بي نهرة كدة قال العسكري بتاعك ده كذاااااااااب العربية عندك برة أمشي شوفها وأسمع الشريط وإذا سمعت ليكصوت بت تعال ودينا بوركينافسو خلي السجن! العقيد قال انت الليلة أنا بسوي ليك الشطة !!

ده شنو!! أنا فاتح في البوست بتاعك ده كأنو حقي!!! المهم القصة انتهت بي إنو بتاع الأمن الإيجابي عمل فيها بطل بعد العقيد ما مشى وقال لينا أمشو يا شباب بس تاني ما تكرروها!!!!! ما كررناها خلينا السودان كلناوهسع متنيلين بره من العفن والمرض المستشري هناك ده.

في ضفدعة قالت لي أختها ما تمشي البحيرة ديك فيها ضفدع صعلوك وقليل الأدب !! أول أمبارح مشيت قام اغتصبني أمبارح مشيت أغتصبني ... والليلة ماشة بس الله يستر ساكت!

فكيتها فيك صاح!

أمير

Post: #3
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: د.محمد حسن
Date: 04-30-2007, 12:55 PM
Parent: #2

امير يا خطييير

فكيتها فيني ساي

سموهو امن ايجابي عشان بجيب ناس الراب الزيكم

بعدين العقيد بليد

كيف تكون مشغل شؤيك سكس في العربية

لو سي دي نقول

وبعدين ما يتأكد

بس الضفدعة بالغت

Post: #4
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: د.محمد حسن
Date: 05-01-2007, 07:31 AM
Parent: #1

وبعدين امن المجتمع ده صميم عمل الشرطة

فلما نقوم نعمل شرطة خاصة بي امن المجتمع يبقى الشرطة الام عندها شغل تاني

يعني انا لو حسيت اني ما آمن اجتماعيا
ما امشي النقطة
امشي نقطة امن ىالمجتمع
طيب ودي القاها وين؟
لو مشيت النقطة العادية هل حيسمعوا شكوتي والا حيوحولوني ؟

وبعد ما يحوولوني حيسالوني
انت ما آمن اجتماعيا ليه

اقول ليهم شالوني الصالح العام

يقولوا لي الشالك منو

اقول ليهم الحكومة
وانا عايز افتح بلاغ في الحكومة
هل حيفتحوا لي البلاغ؟

Post: #5
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: ابو جهينة
Date: 05-01-2007, 12:03 PM
Parent: #4

الملبوع د. محمد حسن

Quote: وخوفا من لبع البوليس بلعت زعلتي


يعني لو سألوك الوكت داك : ليه ما إحتجيت و أخدت الإيصال كنت حتقول :

خوفا من بلع البوليس لبعت زعلتي

Post: #7
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: د.محمد حسن
Date: 05-02-2007, 10:58 AM
Parent: #5

الحبيب ابو جهينة

يا ها زاتها

انت ابلع لي وانا بلبع ليك

Post: #6
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: خالدة البدوي
Date: 05-01-2007, 12:57 PM
Parent: #1

ما ده المجنن بوبي ذاتو

يا د/ محمد

كل ما نفكر ننهي الغربة دي وقطع سنينه

نذكر انه قدر البجي من دخل إذا وجد

نتحير وين نودية ندفعة مدارس للاولاد والله

نشتري بيه علاج للملاريا والامراض الثانية دي

والله نديه ناس اللبع ديل ..

الاكل والشراب ما مشكله في أي حوش بتلقى ليك

لقمة ..

نحسب سداسيها في رباعيها ما تلفق نقوم نلبق

سنة ثانية وهكذا دواليك بالضبط الموضوع دهـ

ليهو طسعطاشر سنة .. والشغلة جاره ..

في السثف الماضي عاد شوف عيني ما حكوه لي

في اللفة في الكلاكلة شفت كمية من الفاكهة

اللذيذه المروية بموية النيل الحلوه والمزروعة

على الارض الخصبة الخاليه من السماد الكيماوي

يعني ماذي ما نحن بناكل .. المهم كلها ماليه

مكشوحة عديل على الأرض واصحابها واقفين جنبها

حزينين .. وقفنا جنب واحد سألنا ده شنو قال

والله دي المحليه وعشان ما دفعو كبو ليهم خضارهم

واردف قائلاً : اصلهم هم بدفعول ليهم كم مره

قبل شوية جاء واحد ودفعنا ليهو وهسه جاء الثاني

ولمن قلنا ليهو دفعنا قال عاوزين تدفعو والله لا ؟

وقبل ما نرد كان الخضار في الأرض ..

يالله يا د محممد صاحبك بطيبه اهلي ديك اول حاجة خته لي

تربيزه كدي وقالي اقعدي يا بت الشيخ وجاب ديك الجوافه

وغسلها بموية باردة فيها تلج شكله مويته البشربه

وخته داك الصحن بجوافة صفراء تقول يا ليل .. لكن وحياتك

مرقت من نفسي بالمنظر الكان ..

آهـ يا بلد ..

آهـ يا وطن ..

والخافي اعظم ..

صدقني دكتور قلبي بيوجعني ..

Post: #8
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: د.محمد حسن
Date: 05-02-2007, 11:00 AM
Parent: #6

سلامة قلبك يا خالدة

بس نخت ايدينا الخضرة
في ارض الطيبين
لمن الشرطة الجديدة بتاعة الفسصاد والاختلاسات تشوف شغلها

Post: #9
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: Ammir Mohamed
Date: 05-03-2007, 09:06 AM
Parent: #8

يا د. محمد حسن والله الليلة إلا تقوم جاري

طبعا الفساد في الدوائر الحكومية بخلعك يعني تلقى العسكري بلبع وبأكل الضابط ولو عندك قروش (ضحاكات ، قنذب، صفق ، تشجير) ممكن الضابط يجب ليك كبدة غزال (الغزال عنو كبدة!!؟) المهم

أخوي كان مسافر السعودية وكان مفروض يعمل الفيش والتشبيه لكن ما عندو وقت ... قلت ليه كدي جيب القروش أنا بمشي أعمل ليك الحاجة دي ... قال تعمل شنو الشغلة فيها بصمات وما في شبه بيني وبينك ... المهم قلت أديني الصور ووالقروش ومشيت...

طبعا بتجس النبض انت بتشوف أكتر عسكري حركي فيهم وتمشي عليه ...لقيت لي واحد كدة من أولاد الثورة (ما ثورة الانقاذ) قال لي ما عندك مشكلة لكن تتسهل معانا بعدين أوكيّّ!!

أها أخوي دة ما بشبهني والبصمة ما بصمتوا وأنا بصمت ليه بالعشرة والصورة قدام الضبط وبعاين ليها وبعاين لي وما في شبه ... وبعد ده وقع والمعاملة انتهت !!

صحبك العسكري نرجع ليه ... الإجراء كان بكلف حوالي 33 ألف جنيه سنة 98 قمت حاولت أحنكه كدة وقلت ليه والله يا بن العم دي قروش الرسوم ودي ألفين جنيه وربنا يديك العافية

صاحبك هاج وقال لي ألفين .. والله يديك العافية !!! أسمع يا خوي أنا عافية من غير قروش ما داير بتدفع عشرة ألف ولا أمشي ألغي ليك دي وألبسك تهمة تزوير وتغمص شخصية !!!!


القصة انتهت

العسكري البطل ده لاقيته سنة 2000 بالصدفة في حفلة في مدينة الدمام لمن كنت في السعودية واتخيل !! كان هو الفنان واسمه منو كدة الثورة... الفنانين بتاعين الغنا ا .

كفاية ... حرام.. حرام .. كفاية بري

شكرا
أمير

برجع ليك أنا .. حتروح من ربنا فين!!

Post: #10
Title: Re: بين شرطة امن المجتمع وشرطة لبع المجتمع وفي الحالتين انا الضايع
Author: Ammir Mohamed
Date: 05-03-2007, 09:06 AM
Parent: #8

يا د. محمد حسن والله الليلة إلا تقوم جاري

طبعا الفساد في الدوائر الحكومية بخلعك يعني تلقى العسكري بلبع وبأكل الضابط ولو عندك قروش (ضحاكات ، قنذب، صفق ، تشجير) ممكن الضابط يجب ليك كبدة غزال (الغزال عنو كبدة!!؟) المهم

أخوي كان مسافر السعودية وكان مفروض يعمل الفيش والتشبيه لكن ما عندو وقت ... قلت ليه كدي جيب القروش أنا بمشي أعمل ليك الحاجة دي ... قال تعمل شنو الشغلة فيها بصمات وما في شبه بيني وبينك ... المهم قلت أديني الصور ووالقروش ومشيت...

طبعا بتجس النبض انت بتشوف أكتر عسكري حركي فيهم وتمشي عليه ...لقيت لي واحد كدة من أولاد الثورة (ما ثورة الانقاذ) قال لي ما عندك مشكلة لكن تتسهل معانا بعدين أوكيّّ!!

أها أخوي دة ما بشبهني والبصمة ما بصمتوا وأنا بصمت ليه بالعشرة والصورة قدام الضبط وبعاين ليها وبعاين لي وما في شبه ... وبعد ده وقع والمعاملة انتهت !!

صحبك العسكري نرجع ليه ... الإجراء كان بكلف حوالي 33 ألف جنيه سنة 98 قمت حاولت أحنكه كدة وقلت ليه والله يا بن العم دي قروش الرسوم ودي ألفين جنيه وربنا يديك العافية

صاحبك هاج وقال لي ألفين .. والله يديك العافية !!! أسمع يا خوي أنا عافية من غير قروش ما داير بتدفع عشرة ألف ولا أمشي ألغي ليك دي وألبسك تهمة تزوير وتغمص شخصية !!!!


القصة انتهت

العسكري البطل ده لاقيته سنة 2000 بالصدفة في حفلة في مدينة الدمام لمن كنت في السعودية واتخيل !! كان هو الفنان واسمه منو كدة الثورة... الفنانين بتاعين الغنا ا .

كفاية ... حرام.. حرام .. كفاية بري

شكرا
أمير

برجع ليك أنا .. حتروح مني فين!!