ســــــاعــــــة لـــقــلـبك

اجبتى احبهم لانهم احبتى ... ورد فى خاطرى اضافة هذا البوست للهروب من زحمة الحياة ومعاناتها من خلال تبادل الطرائف من المواقف الواقعية التى ماتزال تحدث فى كل لحظة واخرى لاحدنا وقد يغض النظر عنها خجلا ولكن البوح محطة ننزل فيها متاعنا لنستطيع السير من جديد الى حد البصر

مشاركتكم مهمة

أخونا ود أم درمان الفنان عاصم
لينا زمن نفتش ليك وجيتنا الليله كايسنا ؟؟
طبعا ما قصدت القاصدو الشاعر فى وقت تاليفه للقصيدة.

احكى ليك موقف طريف وسخيف فى نفس الوقت.
كنا ثلاثه شباب اصدقاء من وجهاء أم درمان
وفى ذلك الوقت كان "زيدان ابر اهيم" فنان الشباب .. وقصر الشوق .. وما بداخله من جمال.
وكانت أغنيته "كنوز محبة" من الأغنيات التى تدخلنى فى عالم آخر يشبه حال دراويش الصوفيه.. خصوصا حينما يصرخ يا ربيع .. يا ربيع!!
لعلى كنت احب حسناء بالقرب من ميدان الربيع أو حب فريق الربيع الذى كان يسمى (مدرسة الربيع) وكان يلعب له الأسطورة جكسا.
الشاهد فى الأمر كنا مدعوين فى حفل لأقارب صديق لعله فى "القلعه" أو شئ من هذا القبيل.
وحينما وصلنا بيت (العرس) لحسن حظنا كان زيدان يغنى فى تلك الأغنيه، ولسوء حظنا، الأتجاه الذى يدخلنا كان من خلف الخيمه، ولكى نذهب لواجهتها فعلينا ان نقطع مشوارا دائريا طويلا يستغرق أكثر من 5 دقائق زمن الأغنيه، اظنك تعلم زقاقات وشوارع أم در!!
المهم اتفقنا ثلاثتنا أن نكمل استماع أغنية زيدان كنوز محبه، ثم نتحرك ونلف لندخل من واجهة الخيمه.
فاذا بواحد من النوع الذى تعرفه فى الحفلات ، يصيح (هى انتو الواقفين هناك نعالو بى قدام) وكل الجالسين اتجهوا للخلف ليروا من يعنيه زعيم الحفله !!
فهل ذهبنا واتينا بى قدام ؟؟
لا يمكن لأم درمانى أصيل أن يواصل الأستماع أو الأستمتاع بحفل تعرض فيه لمثل ذلك الحرج!!
عملنا خلف دور وبى وجهنا رجعنا من حيث أتينا دون أن نكمل الأغنيه ودن أن نستمع الى اغنية اخرى جميله مثل " والله ما منى".
حليل زمان الناس كانت بتحس وتشعر!!

لا حوللااااااااااااااااه !!!!!

عاصم البنا !!!

يا زول وين إنت إختفيت ؟!

جيتنا في رمضان فرقت الوكت مجرد ما جا العيد تاني ما جيت !!

بركة الشفناك طيب ..

جاييك بعد شوية بي طرائف الفنانين ..

أبو أحمد سلام،
نقول العندنا كلو ؟

راجع ليك

العزيز / عاصم البنا

اهلا ومرحبا بك مرة اخرى فى المنبر بعد ان افتقدناك فترة طويلة ....

هاك دي يا عاصم من الإرشيف .

في يدايات تكويننا لجمعية الموسيقى والمسرح بمدرسة الخرطوم الثانوية الجديدة شرعنا على الفور في إقامة علاقات مع المدارس المتوسطة والثانوية وإقامة العروض التجريبية للجمعية ..

وقد تصادف في تلك الأيام ان كان هنالك إسبوع ثقافي بمدرسة البشير بنات بالحلة الجديدة وقد تمت دعوتنا لإقامة عرض هناك ... وقد كان إشتراطنا أن توفر لنا إدارة المدرسة ساوند + جهاز أورغن ياماها 600 PSR لإقامة العرض فوعدت المدرسة بتوفيرهما وطلبت فقط حضورنا في المواعيد ...

وفعلا ذهبنا في وقت العرض لنتفاجأ بأن المدرسة لم تستطع توفير سوى جهاز الساوند سيستم وجهاز أورغن كاسيو دون المواصفات فإحتجينا على ذلك ورفضنا إداء العرض رغم (التحانيس ) ..

وقد كانت هنالك إحدى طالبات المدرسة (ذوات الخفة الزائدة والجمال الهادي) مكلفة بالتفاوض معنا والقيام بضيافتنا .. فكانت تأتي إلينا في المكتب الذي خصصوه لنا (وتتظارف) بتملق ظاهر معنا حتى نقيم العرض ...

فكان أن جاءت إلينا في المرة الأخيرة بعد ان يئست من إقناعنا ف سألتنا في دلال شديد ورقة مبالغ فيها كادت أن تثني عزيمة البعض :

(إنتو هسي دايرين شنو وأنا أقوم أوفرو ليكم عشان اليوم ما يبوظ ؟؟)

فأجابها أحد زملاءناالوسيمين :

(نحنا بس دايرين أورغن ياماها) ...

فردت بي سرعة شديدة وبلهجة تفوح منها رائحة غيرة واضحة :

(أنا ما مها ... أنا إبتسام) ...

فما كان منا إلا الإنفجار ضحكا وتركناها متحيرة فيم نضحك !!

قبل فترة طويلة أيام الثانوي مشيت إشتغلت حفلة في القطينة المناسبة كانت حنة بتاعت عرس .. في أثناء أنا بغني شايف واحد من بعيد بيبشر لي وبيحاول يجي ناحيتي بصعوبة بسبب الزحمة ..

من طريقة مشيتو لا حظت إنو الزول سكران وكدة.. قمت إستعوذت ودعيت ربنا يجيب العواقب سليمة.. صحبك طلع بعد تعب المسرح وجايي بيبشر وأنا خاتي بالي معاهو ..

إتخيل في اللحظة ديك جات طالعة جكساية ظريفة ورشيقة من الناحية التانية للبشير والشبال .. قمت جليت صحبي السكران داك (مع إنو كان وصلني) وقعدت أبشر للجكساية والسكران واقف جنبي منتظرني أعاين ليهو ...

الجكساية طلعت غتيتة وكترت من البشير لمن السكران إتغاظ مني (ألف) .. لمن هناية ديك مشت قبلت على السكران عشان أجاملو بالبشير قام رفع يدو وصراني ليك كف صرررررر .. لمن أنا قلت الكهرباء قطعت ..

الجو إتكهرب والسكران قعد يكورك (يعني أنا ما راجل ولا شنو ؟؟ عشان هي بت وأحلى مني ؟؟!!) ...

طبعا الناس مسكوا السكران وبتاع الأورغن خاف على جهازو لماهو والمسرح إتملا فل .. طبعا أخوك جاهو إحراج وجاهو بهق من الكف

الجماعة شبكوني ليك (خلاص السكران طلعناهو ليك واصل الحفلة) .. لكن بي ياتو وش ؟؟!! قلت لو واصلت الناس دي بتضحك فيني ... قمت قلت ليهم أنا ماشي بيتنا .. قالو لي خلاص إتعشى أول .. قلت ليهم ماليش نفس ..

صدق يا عاصم من
ديك (والقصة دي ليها أكتر من 8 سنوات) بقى حدي في الحفلات الكلاكلات بس .. لمن تجيني حفلة في القطينةأو الجبل أقول للزول : بللللايي !!! قايلني عوير ولا شنو ؟؟!! شوف ليك زول داقس غيري يتكفت هناك ..

شفت الصراحة دي كيف ..

ودي رشوة صغيرة يا عاصم عشان تاني ما تغيب :

وانت ذاتك يا نازر فى ؟ فتشنا وفى الأخير غنينا:-
_________________________

أين منى الودعته شاهق
باكى ناهد لسه مراهق
من علايل ابروق للمزالق
من فتيح *" للخور" للمغالق
قدله يا مولاى حافى حالق
بالطريق الشاقيه الترام


عنكبه:-
* وهنا برضو ما لقيناك.
* لو فى خور تانى وأنا ما عارفو
فتش سمح امكن تلقى لى بوست
رايح عن الهلال ، زعلان عليهو شديد.

سلام يا تاج ..

الأيامات دي أعمل حساب مداخلاتك وبوستاتك شديد ..

في بوستات كدة بتروح وبتجي براها وهسي شايف الموصلي داقي جرس في بوست بتاعو وما لا مي فيهو ..

موضوع الخور دا أنا ختيتو والحمد لله .. وبكري زااتو نشف الخور

كدي النتونس مع عاصم دا شوية ..

سلامات و تحايا للجميع
ناذر كان صريح للغاية
نطلب و بكل خبث من العزيز عاصم ان يحكى بذات الصراحة
ههههههههههه

ههههههههههههههههه
تعرضت الان لموقف محرج من الاخ ناذر
و انا خاشى على البوست فجاءة اشتغلت اتوماتيكيا الاغنية المنزلة ناذر
و انا الان شغال يوم الجمعةو الساعة اربعة الا
مديرى جمبى قاعد و الصوت فجاءة علا
حدرنى و قال دا منو
قلت ليهو عاصم البنا
و ابتسم بعد ماقطع قلبى
الله يسامحك ياناذر

و من المواقف المحرجة . فى رمضان الفات كنت متابع لحلقات جلسة مامنظور مثيلا يوميا على قناة النيل الازرق.فى اخر رمضان ماقدرت اتابعا كان عندنا بكا و كنت متشوق اعرف فرفور بكى و لا بكى من شدة الضحك ليه. قمت سالت واحد بعد فترة معرفتو بيهو سطحية قام صفق يدينو مع بعض و قال بضحك (غايتو فى ناس)

كل التحايا الأخ والصديق الفنان المبدع عاصم البنا

ومرحبا بعودتك

سلامات يا أبو بكر ...

Quote: ههههههههههههههههه تعرضت الان لموقف محرج من الاخ ناذر و انا خاشى على البوست فجاءة اشتغلت اتوماتيكيا الاغنية المنزلة ناذر و انا الان شغال يوم الجمعةو الساعة اربعة الا مديرى جمبى قاعد و الصوت فجاءة علا حدرنى و قال دا منو قلت ليهو عاصم البنا و ابتسم بعد ماقطع قلبى الله يسامحك ياناذر

شايفك قبل يومين فاتح ليك بوست بتتجرس فيهو وبتشكيإنو ما في بورداب معاك

تعرف يا حبيب في واحد عضو المنبر هنا إسمو ناصر محمد خليل شغال في شركة بتاعت طرق وجسور في شرق السودان شغالين زي ما بيقول ناصر في طريق حدودي ما بيجو بيهو إلا المهربين بتاعين البضايع وأطن عملو عشان الحكومة تسهل ليهم وصول البضائع المهربة للسوق بي أسرع وكت ممكن ..


المهم ......

ناصر دا كل فترة بيضرب لي تلفون ويقعد يبكي ويتجرس ويشبكني الغربة حارة وأخبار سودانيز أون لاين شنو ؟ وتراجي كيفنها ؟ وتمبس أخبارو شنو وأساسي نعلو طيب ؟!! دا كلو بيحكيهو وهو بيتجرس ويقول مناهو بس يدوهو مشوار القضارف عشان يقدر يخش نيت ويقرا المنبر ..

أها دحن لو إنت شغال في الشرق برضو والزول دا زميلك (خاويهو) وأعملو فرع ورداب هناك

كمية من الاعتزارات للرائع عاصم لانى حخش ليفت فى البوست و كدا
و الله ياناذر انا بعتبر الحاجة دى جدعة يعنى بوردابى وحيد و كدا
فالتفرد شئ جميل. تخيل لقب البوردابى الوحيد
تحياتى لك عاصم البنا و اللذيذ ناذر
هههههههههه لكن الكف بتاعك بديع و كدا

أها يا عاصم ..