والله منبركم دا جاب لي روح معنوية

ياخي عندي مشكلة كبيرة داير احكيها ليكم .. اسمعوني وادوني رايكم وان كنتم مثلي احكوا عن تجاربكم ..
يبدأ يومك عادي وفي مثل هذه البلاد التي تعتمد الروتين في حياتها ( شخصيا انا مقيم في اكثر دولة روتينية في العالم ابسط الاشياء ان سعر الدولار بالنسبة للريال السعودي لم يتغير منذ اكثر من ثلاثون عام ؟؟) واتخيل ليك روتين بعد كدا .. كما اسلفت يبدا يومك كالعادة متكاسل لا جديد في الافق المترقب تتوقعه يجعل الادريانين يتدفق في دمائك فيهبك طاقة التحرك .. كالرجل الالي تتحرك تمارس طقوس الصباح في هدؤ وسكينة الي ان تصل الي عملك .. والذي هو الة الروتين الكبري ..لا جديد كالعادة بضع شوام علي شوية مصرين وكم بنغالي علي رشة هنود مع اضافة بضع حضارمة واتنين سوداني وكم عقال طاير ويكون طبق الروتين جاهز للتقديم . تجلس علي مقعدك وكأنك نازل من جبل رغم انه بداية الصباح .. تتلفت للوراق المبعثرة علي الطاولة تطالع بعضها نفس الارقام والجمل المكرورة المملة والتي فقد اي نكهة لها .. تمد يدك تسحب احدي الوريقات التي تنبأك بتاريخ روتين يوم جديد .. تسحب سماعة الهاتف وتضغط علي التحويلة 3015 فيجئك صوت النادل وكأنه تحت اجعص بطانية ناعسا متثائبا فحاله ليس بافضل منك وتطلب منه شاي الصباح او قهوته حسبما اتفق .. بعدها تبدأ في يومك المكرور تراجع ارقامك وتحاول النزول من شخصك والوقوف ورائك لمساعدة نفسك بالدفرة فقط لاكمال بعض القيود وتسجيل بعض الارقام ومحاولة اعداد بعض التقارير يتقطع هذا بضع هواتف فاترة من اشخاص انتهي يومهم صباح يومك يسالون عن بعض شيكاتهم او حال اوراقهم وهكذا .. تكمل ما عليك صباحا تلتقط الفرصة فقد هدأ الروتين وبالكاد الاشياء تتحرك امامك وتحول المكتب الي لوحة رخيصة بيد فنان (علامي ) معلقة في جدار فندق رخيص ..
تسحب الماوس تفتح متصفحك ينقلك الي الهوم بيج سريعا تختار من المفضلة لديك (المنبر العام لسودانيز اون لاين ) في بالك ان تتابع بضع مشاركات قدمتها بالامس اول ما تنزل الصفحة امامك وقبل ان تبحث عن مشاركاتك ومداخلاتك في البوستات التي تعجبك وتريد معرفة حال الردود عليها والاضافات التي تمت يطالعك عنوان في بداية الصفحة عدد زواره فاق الالف والمشاركون علي اهداب المائة وهم سائرون ... يحركك الشمار تتململ في مقعدك الادرناليين بدأ يحث دقات قلبك تدخل الي البوست تبدا المداخلات يشدك الموضوع تحاول التهام المداخلات سريعا املا في الوصول الي اخر المداخلات لتكون رايا عاما عما يحدث ها قد بدأت دقات قلبك في المسارع تاتي بعض المداخلات السريعة الغاضبة تتفاعل معها يطالعك فجأة احد الاخوان الذين يصلون ذات البين يهبط بمعدلات دقات قلبك فتلعنه في سرك وانت تتمتم ( انت المدخلك شنو لو ما عاجبك اقطع وشك) الجميع كانهم يرددون نفس جملتك تستمر المداخلات كان لم يكون ترتفع الوتيرة سريعا يبدا الموضوع يتحول الي الشخصي يتفاقم الشتم ويزداد وانت مشدوه من الالفاظ التي امامك لكن لا تستطيع التوقف الان الموضوع اصبح حاميا جدا تقرض المداخلات المتبقية في لحظات سريعا تعمل رفرش وتحدث الصفحة املا في متابعة الاضافات الجديد الصاخبة فجأة تطالعك الرسالة انا لموضوع غير موجود فقد تم نقله الي مكتبة العضو .. تجر نفس طويل في سرك وانت تتنهد اااااح . قطعتوا قلبنا الله يقطع قلبك ... تعود مرة اخري الي الصفحة الرئيسية للمنتدي تحاول ايجاد موضوعاتك التي كنت مشاركا فيها تجد اول موضوعاتك وقد تركت المداخلات بالامس بضع وعشرين مداخلة منها ثمانية مداخلات لك تحتار ما هذا وانت تطالع مجموع المداخلات فاق الثمانية وسبعون مداخلة يحدشد داخلك الشمار كله لمعرفة ما حدث خلفك .. سريعا تضغط كلك ويبدأ المتصفح في انزال المداخلات لا تبدأ من اخر مداخلة تركتها ولكن تبدا من بداية موضوعك تقرأ كلماتك التي كتبتها ( تعيد الاشادة بنفسك في سرك ) وانت تطالع كلماتك المكتوبة والتي قامت بفعل كل هذه الجلبة وتبدا بقرأءة المداخلات سريعا تلتهم المداخلات البايتة تفط بعضها الي ان تصل الي اخر مداخلة تركتها بالامس الشمار يحتشد علي اشده .. تتحكر في كرسيك فجأة يرن هاتفك الداخلي تسمع المدير (الاهبل) يطلب منك تقرير شركة منو كدا ام تعرف اسم نجدي كالحجر ترد عليه بالايجاب وانت في سرك تلعن سلسفيله وانت تتمتم ببضع شتائم وتقول (دا وقته ؟؟)

قسما بالله اللحظة دي بالذات رن الهاتف وطلبني نفس الاهبل اعلاه

ألأخ/أساسى

أمشى للأهبل وتعال راجع لينا.


ما تنسى.

إسماعيل محمد أحمد عباس...........أم درمان

سلام يا سمعة

ياخي الاهبل دا الله يفكنا منه

لم اظلمه ابدا حينما قلت اهبل ( تخيل ان مدير عام يطبك للرد علي احد المتصلين عليه في عمل هو من صميم وظيفته ولكنه لا يعلم شيئا عنه غايتو البلد دي ماشة حظوظ وعقالات الله يدينا خيرها ) ما علينا نرجع لي بوستنا
تعود الي بوستك المفتوح وقد وصل شمارك ذروته تطالع اول تعليق وتلتهم البعده سريعا ياتي احد الموتورين ويردمك بكلام لا في السماء لا في الارض ويعود بك الي بوستات قديمة لا علاقة لها بما كتبت الان لحظتها يرتسم الغضب علي محياك ويتدفق الدم حار في عروقك تريد ان ترد له قبل الاخرين ولكن الشمار ما يزال عالي فتواصل القراءة يأتي احد الحالمين يكتب كلاما جميلا يعيدك الي مربع الابتسام مرة اخري وفجاة وبدون سابق انذار يدخل الي البوست احد الذين كانوا في بوست الشكلة التي حولت الي مكتبته فيرد علي كلامك ودون سوابق انذار تجد المداخلة التي بعده من الشخص الذي كان معه في نفس الشكلة يرد عليه ويأتي له بكود الشكلة من المكتبة ويبدا الجدال يتركون موضوعك الذي كتبته ويتفرغون لاكمال شكلتهم في بوستك (تنطط عيونك) يعود اليك شمار الشكلة وتستحضرها وتتحول سريعا معهم ناسيا بوستك ومداخلاته يواصلوا في شتائمهم يتمرغون في الاسفاف وانت الان بدات تتفاعل يلتهب البوست بشكلتهم ياتي بعض المؤيدون من كل الطرفين يحمسون النار ويرمون الحطب كل هذا وبستك لا علاقة له بما يحدث لا تهتم كثيرا تواصل قراءة النار الملتهبة او المداخلات الساخنة تتفاعل معها اكثر يتدفق الادرانلين الي دمائك مرة اخري تلتهم كل المداخلات سريعا وروحك المعنوية في اعلي مستوياتها ...تقسم ساعتها في انك لو توفر لك المكان لخرجت من هذا البوست الي الشارع وانت تهتف وانفعالاتك في ابهي حللها تفكر في ان تحرك لستك وتكسر بعض الواجهات الزجاجية وتقود مظاهرات ضخمة بعد هذ البوست ينتهي الدوام تعود الي المنزل قبل ان تبدا في تغير ملابسك تفتح الجهاز
ونواصل

ما بواصل ولا حاجة

Quote: ما بواصل ولا حاجة

القال ليك واصل منو؟
______
إن شاء الله الأهبل ده تاني يكون ناداك

Quote: ياتي احد الموتورين ويردمك بكلام لا في السماء لا في الارض

قصة حياتي...

يا بيان عليك الله البنية العسولة دي ما تداوسي بيها..
خليها للأيام الرايقة..
_____
البورد بحتاج لصورة زي (أم تفتي دي) للمشاكل

Quote: إن شاء الله الأهبل ده تاني يكون ناداك

تعرف يا طيفور اهبلنا دا عينة صدق ما ناداني لكن جا قعد معاي هنا تصدق داير يصرف اجازته السنوية وما عارف يسوي شنو جا يسألني اعمل شنو
مع انه ليهو سنتين معانا .!! قال مدير قال ؟؟ والله بيدي العقال للماعندو فاخورة

بعدين نعيما ياخي زمان كانت تفتك شكلها (.....) اول ما جيت البورد

اسمع مرة قريت ليك زنقة مع ابو الباكستانية بالله ما اتعلمت الاردو لاسع؟

بيان
ما عندك الا تسمعي الاغنية... قصة حلوة وقالوا مـــرّة عايز اعيشها تاني مرّة ألف مرّة

Quote: لم اظلمه ابدا حينما قلت اهبل ( تخيل ان مدير عام يطبك للرد علي احد المتصلين عليه في عمل هو من صميم وظيفته ولكنه لا يعلم شيئا عنه غايتو البلد دي ماشة حظوظ وعقالات الله يدينا خيرها )

ابو اساسية سلام يا اخينا بلد الدعوة بالخير ليها و لاهلها فى القرأن مذكورة مستكتر على ناسها يكونوا على رأس مؤسساتها ده برضو من خير ربك عليهم ما تملك على تفضيل ربنا ليهم الحق فى اى اعتراض !

و انت ذاااااتك الوداك ليهم شنو ما دام مغبوووووون على رويحتك كده ما تقعد فى بلدك بالكفاف ايوة لكن تغيان و معزز و مكرم الكرب اليك شنو !




نادية السر

Quote: انت ذاااااتك الوداك ليهم شنو ما دام مغبوووووون على رويحتك كده ما تقعد فى بلدك بالكفاف ايوة لكن تغيان و معزز و مكرم الكرب اليك شنو !

والله انا ما طلعت ليهم الا في شان زي فلفستك دي

والله انا ما طلعت ليهم الا في شان زي فلفستك دي

دى ما فلسفة ده كلام رزق و كرامة


و اى زول بسيط ساكن فى ضل راكوبة فى بلدنا بعرفو يا ابو اساسية
و ده من رحمة ربنا على ناسنا التعابة الراضين بالمقسوم لانو فى ذاتو لربهم عبادة !






نادية السر

يعني يا نادية دايراني عشان بوست اقطع عيشي وامشي السودان اخلف رجلي في نص الظلط واقول ليهم تغيان؟

Quote: اسمع مرة قريت ليك زنقة مع ابو الباكستانية بالله ما اتعلمت الاردو لاسع؟

لووووووووول
تصدق يا أساسي البت عرسوها لواحد (بتاني) أمريكي، طلقتو وجات راجعة..
لأنها مولودة في كندا، ما قدرت تتعايش مع البتان الأمريكان..
ما عارف لو كان العريس بتاني خليجي، البت كانت عملت شنو..
الزنقة ديك الله لا عادها..
_____
بالمناسبة يا أساسي، ذكرتني أيامي الجديد.. وحقارتك ديك ما ناسيها ليك..
بس خليني أخلص من ناس بتاعين سودان جديد ديل

Quote: تعيد الاشادة بنفسك في سرك

يا عمك جننتها جن
لكن إنت كويس بتشيد في سرك
كعب القاديننا بالإشادة في جهرنا عديل
الواحد يكتب ليه حرفين يشيل اللنك و لا الكوت يحوم بيه البوستات من طرف

تصدق يا عمك ياسر طيفور ايامك الجيت فيها كرتونة ديك كنت كاتلني بالضحك ..صورتك ام شعيرات ديك وانت قاعد في الواطـة(ارنب نط) ومنفعل بالمعارضة كانه الحكومة طردتك قبل شوية من القصر الجمهوري وشبكتنا ارتريا وحرب مليشيات وما تعرف كلمتين انجليزي من حقات اهل العوض بتاعين كندا وعامل فيها شفت ومقطعها والله في بوست شفتك قربت تعمل كدا

Quote: يا عمك جننتها جن لكن إنت كويس بتشيد في سرك كعب القاديننا بالإشادة في جهرنا عديل الواحد يكتب ليه حرفين يشيل اللنك و لا الكوت يحوم بيه البوستات من طرف

تعرف المنبر دا فيهو ناس معسلين ( المعسل هو الشخص الفرحان بي بدلة العيد الجديدة وتراهو يتبسم من غير سبب وما عنده مبرر كافي يقنعك انه ليه بيضحك) الناس ديل كتبوا كلمتين ولقوا ليهم ردين اها ومسكتهم ام فريحانة وشوف الكلام الجاي دا ( فطفقوا في الارض فرحين فقد رؤا في انفسهم طه حسين جديد واخرون ما يزالوا يحسبون انهم سيعيدون سيرة الطيب صالح من جديد )

منبرنا وللا الهلال



_______

اخوك ما بتاع كورة بس بالفطرة كده بشجع الهلال وبكره عمرو موسي واسرائيل والمريخ







والدبابين والدفاع الشعبي ودفار الالزامية

اي زول يشتغل محاسب اكتر من خمسة سنة لا تقبل شهادته

وحاجات تانية







يا عمك قصتك شنو؟

Quote: يا عمك قصتك شنو؟

عمك اسعد

صباح الخير بتوقيتكم ومساء النور بتوقيتنا

والله المحاسب في زمة الواعي من اول سنة .

ياخي بديت موضوع cpa ومشيت كويس وما عارف وقفت ليه؟

عليك الله اقنعني بس وقفت ليه؟

بالله طلعت رشاشة يا منعم ؟

شيوعي ورشاشة ؟



ما فاضل ليك بعد كدا الا تكتب في الصحافة السودانية

Quote: فطفقوا في الارض فرحين فقد رؤا في انفسهم طه حسين جديد واخرون ما يزالوا يحسبون انهم سيعيدون سيرة الطيب صالح من جديد

فماذا ترى فيمن رأى في نفسه جيفارا, و من اراد إحياء سيرة نكروما و مانديلا؟

Quote: فماذا ترى فيمن رأى في نفسه جيفارا, و من اراد إحياء سيرة نكروما و مانديلا؟

ما برى فيهو اي حاجة

Quote: شيوعي ورشاشة ؟

عرفتني كيف يا اساسي ؟



انت كنت شغال دباب في كتيبة الامن العام وللا شنو



_______


حكمة اليوم :


اي دباب ما مركب اطراف صناعية يبقي هباب

Quote: اي دباب ما مركب اطراف صناعية يبقي هباب

واي مناضل كيبوردي ما قاعد مع الخواجات يبقي بتاع جاكات

Quote: Quote: اي دباب ما مركب اطراف صناعية يبقي هباب واي مناضل كيبوردي ما قاعد مع الخواجات يبقي بتاع جاكات

وجـــع..