ثم قهقه صلاح قوش وقال ....

لم أتصفح المنبر لأيام وفوجئت عند عودتي – كالعادة – بفورانات وثورات وانتفاضات

انتشيت قليلا لفكرة طرد الأمنجية من البورد ...

لكن بعد لحظات انتابني هذا الضيق الشديد ...

لا بد أن صلاح قوش يتابع سودانيز أونلاين الآن ويقهقه ...

لكم سودانكم الأونلاين ولنا سوداننا الأوفلاين

لكم سودانكم الفيرتوال ولنا سوداننا الرياليتي

لكم فضاءكم السايبري ولنا الهواء الذي تتنفسوه

........................

فكرت ...

السكراتش الداخل بيهو النت ده من شركة أمنجية ...

والجهاز الشغال بيهو اشتريته من شركة أمنجية ...

والشركة الاستلمت بيها التحويل بتاع القروش بتاعة الجهاز الاشتريتو شركة أمنجية ...

والشغل المعروض علي في شركة أمنجية ...

وبتاع الهدف الحيدخلني الشركة أمنجي ...

والحيعمل لي انتيرفيو أمنجي ...

ومديري المباشر – لو وافقت – أمنجي ...

ولو رفضت برضو الشركة الأنا فيها لازم تتعامل مع أمنجية ...

ولو قررت أسافر وأهج ... الحيطلعني من المطار برضو أمنجي !!!!!

........................

فكرت أكتر .... وقررت ...

خلينا في الفيرتوال أحسن.

العزيز كبروس

كل الذي ذكرته يثبت سلامة موقف من طالبوا بالقطيعة مع مؤسسة الامن الاعلامية
و العافية درجات

عارف يا جيل

الواضح انو الشعب السودان كله متسلط

وانه كل الشعارات الرنانة شعارات جوفا

مافي حاجة اسمها الحرية لنا ولسوانا
ولا في حاجة اسمها حرية الصحافة وحرية النشر وطبعا حرية الاعلان


مافي حجة ومنطق قصاد حجة ومنطق

في ناس عاملين لينا مثاليين ومقطعين المثالية مواقف زي بتكشفهم وبتورينا انهم ما بفرقوا عن محمد حامد كتير
بس عشان محمد حامد عنده السلطة ظهرت لينا عيوبة
اها هم اول ما لقوا فرقة لي سلطة تسلطوا

هشام هباني سحبوا جنسيته ارغى وازبد وطبعا من حقه
وهو هسع بدعوا لسحب جنسية محمد جمعة الاسفيرية من اون لاين ضمنيا وده طبعا ما من حقه

عادل عاطي لبرالي فرحان عشان حجبو اعلان حق مركز صحفي

رجاء العباسي صحفية فرحان عشان حرموا جهة صحفية من الاعلان واعتبرت ده انتصار للنضال
ونست انو ده هزيمة للمهنة البتعمل فيها


لو الكلام بالمنطق ده
ما كان لقينا معلومات عن ايران في القوقل
ولا حتى معلومات عن السودان

ولا اي موقع لدول محور الشر حسب التصنيف الامريكي

المشكلة الكبيرة الناس بتنبح وتكورك

الحريات الحريات الحريات
حرية النشر حرية الاعلان
الحجة المنطق

واول حاجة عملها انهم تكالبوا عشان يشيلوا اعلان المركز الصحفي التابع للحكومة

طيب حا تسمعوا راي الحكومة كيف وانتو عاوزين تقطعوا لسانها ؟؟؟؟؟

طيب حا تحاربوها كيف وانتو ما عارفين بتسوي في شنو عشان ما عارفين بتقول في شنو ؟

العيب الكبير يا جيل

الناس في مساحة اسفيرية تنكرت لكل مبادئها الكانت بتنادي ليها من ما سوا البورد ده وانتشوا بالانتصار وذغردوا

يا الف خسارة
وكت تعرف انو الناس مبادئها الكانت قادانا بيها مناورة لي ظرف معين

صدقني مافي فرق بين محمد جمعة والبقيت

كلهم جمعة
وكل وكالاتهم المركز الصحفي بتاع الامن

Quote: >مليون مبروك يا شباب التحالف بجامعة الخرطوم

العزيز نصار .. أكيد العافية درجات ولازم يكون فيه أمل رغم الجو الخانق

Quote: مليون مبروك يا شباب التحالف بجامعة الخرطوم

صديقي وليد

أنا لا أتفق معك في موضوع الإعلان ..

الموضوع مختلف هنا فالإعلان هو وسيلة للي ذراع وسائل الإعلام في الدنيا كلها ...

في السودان شفت مثلا كيف سوداتل وموبيتل وقفوا إعلاناتهم من "الصحافة" عندما تم نشر مواضيع لم تعجبهم .. وفي أمريكا شفت كيف هددوا بسحب عقودات مارلون براندو التجارية عندما تحدث عن جماعات الضغط اليهودية حتى تراجع

ومن هذه النقطة ... أتمنى لو بكري يحسم الشغلة ويكون فيه قاعدة لعدم لإعلان إلا للجهات التجارية والمواقع الشخصية مثلا .. يعني زي ما رفض إعلان سي إم سي، يرفض إعلان لصحيفة "الميدان" لو حصل ... يكون مبدأ ثابت للحفاظ على الموقع والتأكيد على استقلاليته وعلى كونه منبر حر لكل السودانيين ..

ده من ناحية

من ناحية تانية ... بكري عنده ويبسايت ... الويبسايت راس مالو الزوار والإعلانات ... وأعتقد أننا نتفق - سواء أعجبنا الحال أو لم يعجبنا - أن أغلبية زوار الموقع هم من المعارضين الممكونين من هذا النظام .. وخسارة الزوار تعني ضياع الإعلان والويبسايت

فقرار نشر الإعلان كان لصالح سودانيز أونلاين ... وقرار رفعه كان لصالحها ... من منظور بيزنس بحت

Quote: كلهم جمعة وكل وكالاتهم المركز الصحفي بتاع الامن

زمان قلنا وقت الجد كلنا كيزان .. قالوا شفع


المهم البوست ده كان الغرض منو التنفيس عن حالة غضب من المجموعة البقت متحكمة في أكل عيشنا وحياتنا وآمالنا وأحلامنا ..

لكن برضو فيه أمل فينا بس نلعبها بطريقتنا يا وليد ...


ومرة تانية مبروك لشباب جامعة الخرطوم ...