وداعاً .... هل من راغب

وداعاً



هل من راغب

http://img.villagephotos.com/p/2006-1/1134066/Jumpers.gif
الناس الجارية دي وما عارفة تصل لي وين ولا أنا عارفة واصلة لي وين كان أفضل تعبير لصعوبة هذا الزمن وتسارعه وصراعه الحاد وآلامه. أرتبطت بهم كثيرا وظلوا معي لسنتين مضين ... لقيت في الدقيقة إنو زي خمسين كده بمشوا وما برجعو
50× 360×12×30×24×2×60 = 000 400 662 18 ديل مشو وما جو
عموما أحببته ومضطر لمفارقته لذا ارغب في منحه لمن يرغب وإليك يا شعار صورتي:

 

نـادى صــوت مــن بعـيـد

يقول إنـا نستجديـك ألا  تغيـب

و أن يبقى صدى شذاك منا  قريب

ليس أمرا و لا تخويفا و لا ترهيب

بـل هـو رجـاء مـنـي لــك

ربما يخطئ سهمه أو لربما يصيب

شكرا

انا بشيلو لانه بيشبه لي مناضلين الكيبورد
خاصة فلول اليسار,,,

طالعة نازلة ماشة جارية

وما عندها الحبة

اي واحد متقندف عامل مسقف وخطير
وهو عبارة عن قدح في فضية..

خلاس ندفع؟

قمة السمو .. هو حضورك هنا أختي العزيز ,
وحينما تنثرين إبداعك في جنبات هذا المنبر الحر الشامخ ..
قمة العلو .. أن نتمعن كلمات لها الوقع القوي في حياتنا ..
قمة العلو .. في حسن حظي لاختيارك لما وهبته
بطيب خاطر لراغب ومن حسن حظه أنه سيرتبط بمواضيعك التي تنم عن نضوج الفكر ,
وروعة الأسلوب .. يا أخت صديقي
دُمتَ هنا , موفقة أنت بإذن الله وموفق هو
ووصيتي أبطأوا من السير بسرعة أيها الفارون ...
فلذات الأكباد والوطن في إنتظاركم

Quote: خلاس ندفع؟

لا فحضورك هنا لا يقاس بملايين ولو حضر شخص آخر لفتحت المزاد
من لديه إعتراض أو رغبة إمتلاك فليفاوض أختنا د. بيان
ودمت

تسلم يا جميل...

خلاص نرفعو؟
آخر كلام

Quote: تسلم يا جميل... خلاص نرفعو؟ آخر كلام

هنيئأً لك أختنا الفاضلة،،،،
مع وافر الشكر والتقدير،،،،

عثمان كيفنك
ياخ خوفتنا بالعنوان دا
أصلو نحن ما بنحمل كلمة وداعا دى
لن تبور بضاعة أنت مروجها.
والسلام عليكم ورحمة الله .

Quote: لقيت في الدقيقة إنو زي خمسين كده بمشوا وما برجعو 50× 360×12×30×24×2×60 = 000 400 662 18 ديل مشو وما جو

يا عمك نتلايق عليك شوية
القاليك منو الناس ديل بمشو و ما بيجوا راجعين
ما يمكن في الجزء الماواضح من الصورة يكونوا برجعوا الصف تاني
و هم نفسهم السبعة ولا تمانية ديل البيظهروا كل مرة
يعني حسابك غلط
و لا يمت للعلمية و المنهجية الإحصائية بصلة
لأنوا مبني على فرضية خاطئة
ميتاخورميكس ....بلا بلا بلا
و عاشت المملكة

لقيتني كيف ؟أنفع أشتغل حبشي

Quote: يا عمك نتلايق عليك شوية

البشرى تحدونا أن لا تطلق علينا عبارة يا عمك فنحن لم نزل في رعيان الشباب بضاعة كاسدة ونعيش حالة من العزوبية المستدامة،،،

طيب نقول ميخائيل حسب الحساب غلط وبس
هذا مثل مصري ويضرب حينما تعود كل حساباتك بالخسارة - ما عليك إلا أن تقول للواحد ميخائيل حسب الحساب غلط،،،،،،
ميخائيل هذا قدم من اليونان "أغريقي" يعني - المهم هو وزوجته وعاشوا في القاهرة بعدين يا ست الأمانتي ليك- عملوا قروش كتييييييييييييييرة - وكمان ما جابو الجنا
المهم بنوا عمارة في عمارة بس ما ناطحة سحاب بتاعة موسى - قامت كده والمرة ماتت - ميخائيل قال والله لو مت الأموال دي بتأخذها الأوقاف ومافي وريث ولا وجيع
ضرب كده إنه بعد سنين حيتلحس
باع الوراء والقدام - وعمل حجوزات في افخم الفنادق على مستوى العالم كله وتذكرته كانت كراس أبو 64 ورقة
وهاك يا سفر وسكر وشبع وهناء وبذخ ولافي كم سنة كده
بعدين تحذوه البشرى أن يموت أو يكون على شفير الموت حين رجوعه
لكن ما مات رجع القاهرة بعد أن طاف بالعالم
ومقشط
جاء للمصري الباع ليه العمارة
وفي واحد كده وزع ليه البطاطين
مشى حنسو أداه بطانية
وأستأذن من صاحب عمارته القديمة أن يعطيه أسفل السلم لينام عليه لأنه بحب العمارة دي وفعلا أعطاه - كان ينام تحت السلم
وحينما يشتد البرد عليه يخرج في الشمش جالساً بجوار العمارة ويردد بأنين
ميخائيك حسب الحساب غلط - فيجود عليه المارة بصدقات
دحين يا أخوي الخمسة وستون مليار ديل تطلعهم لي ثمانية
خلاص:
عثمان حسب الحساب غلط - بث رسل لي البطانية أنا ما عندي عمارة

عثمان سلام

Quote: البشرى تحدونا أن لا تطلق علينا عبارة يا عمك فنحن لم نزل في رعيان الشباب بضاعة كاسدة ونعيش حالة من العزوبية المستدامة،،،

بدْاية أبشرك أن يا عمك دي لا علاقة لها بالسن , شايف حتوت الفي البروفايل دا انا بناديه يا "عمك"
و هي و غيرها علقت عندي من ايام المنطقة الصناعية ,بعدين ياخي سنك كبيرة و لا شباب ما فرقت معانا المهم مقامك كبير عندنا و دا البخلينا نقوليك يا عمك .
نجي لي (عمك) ميخائيل الحسابه طلع أشتر من معتز, يا خي كلامي ما أظنوا وقع ليك ؟ أنا قلت ليك يمكن , يعني إحتمال يكونوا تمانية و إحتمال يكونوا الخرتمية مليار ديل
يعني ما اجزمنا بغلط حساب عثمان
ثم قوووول حسابك غلط , انا أرسل البطانية ليه إنت بعت لي العمارة؟
يا خي احمد الله الغالطتك انا , الليلة كان جاك الحبشي كان لي الليلة يغالط فيك و يخليك تجيب ليه أسامي المليار ديل واحد واحد لا من تآمن
لقيتني كيف؟

Quote: عثمان كيفنك ياخ خوفتنا بالعنوان دا أصلو نحن ما بنحمل كلمة وداعا دى لن تبور بضاعة أنت مروجها. والسلام عليكم ورحمة الله .

وهل يأتي ترويج البضاعة من تلقاء نفسها لا ولن تاتي من تلقاء نفسها , يجب ان نساهم لكي نوجدها , وما راجت بضاعة إلا وأنت ..... تدرين لماذا صمت وهل تدرين أن تحت هذا الصمت تقدير لك ويكفي أنك لم تبخلين بعملك او معرفتك , ساعية جاهدة في تطوير مجتمعك , ومحاولة ان ترتقي بهم الى مستوى تفكير مثالي .. وكلنا نستشعر وجودك معنا وقربك من مجتمعنا إلا من أجل ترويج بضاعة المعرفة والنماء والخير للآخر ... فلقد راجت بضاعتك وكسدت بضاعتنا يا أختي الفاضلة .

وأنا في حالة وداع دائم
فلقد قال أحدهم:
في الماضي كنت أرى المستقبل ضباب يخفي الكثير تحته
وكنت أضع آمالا طوالا باكتشاف المستقبل
بروح يملؤها التفاؤل والشوق والحماس

وعندما كشف لي الزمن الواقع
وبدت لي صورة الحياة
وجدت سوادا وبياضا
ألغاز و متاهات
وجدت قوى أمواج عاتية
ألقت بكل قوتها علي بتساؤلات و استفهامات
لتحوّر أيامي الى فقدان هوية
و تحوّل أملي الى حيرة
(وكان شعاري السابق رمز هذه الحيرة فليبقي بهذا البورد ولأختنا نجاة حرية مآله .. ولديكما التقدير أختيا)

ميخائيل حسب الحساب غلط
هل هم مليارات أم 8 فقط

لا حول بس حتوت ده نحن بنقول ليه يا "فردة"
الظاهر عليك كنت في منطقة العمارات .. كلهم مثقفين ... ناس ياعمك ديل ويا خالك
ومنطقة لي منطقة بتختلف
وسجن في المنشية ولا منطقة في أم بدة.
ولتكبير المقام الله يكبر مقامك يا محمد ويحفظ ليك حتوت ده "بالمناسبة حتوت ده قوشرتوا منو".... قوشرتوا دي بلغة منطقتنا يعني سميته منو !!!!!!! إنتوا بتقولو شنو
- والله حيرت ميخائيل ذاتو أنا فعلاً ما بعت ليك العمارة.
والله أنا مافي طريقة اتخارج منك إلا كما إتخارج صاحبناالهندي ده خوفا من إغلاق مخبزه:

رجل كل يجي يشتري من هندي في الخليج كل يوم خبز وفي قطعة الرغيفة الأولى شاف فيها جناح صرصور وفي الثانيه شاف رجل صرصور والثالثه شاف راس صرصور فسأله الرجال:ليه كل مره اجي اشتري منك خبز اشوف عضو من اعضاء الصرصور أنا بشتكي بك للصحة والبلدية ,قال الهندي:بابا انت في جمع كل لين يصير صرصور كامل بعدين يربح سياره معانا .......

كمان العايز يكتبنا الأسامي ده الله لا جابو لينا،،،،،وما مستحيلة طالماالجماعة المفسرين طلعوا إسم النملة القالت "أدخلوا مساكنكم حتى لا ..." إسمها الشيصبان وكمان قالوا عرجاء


ولم يزل ميخائيل حاسبا للحساب غلط

ياخي إنت و ميخائيل نعيمة دا جننتونا جن
حيرتني طبعا في قصة "فردة" و شنو ماعارف
و اول مرة اعرف إنو المنطقة الصناعية في العمارات و المنشية
يا زول إنت مالك كتابتك عاملة كيف كيف؟
كدي قول "كه"

Quote: "بالمناسبة حتوت ده قوشرتوا منو".... قوشرتوا دي بلغة منطقتنا يعني سميته منو

يابوي منطقتكم دي وين؟
شيراز ولا قم
ما علينا, حتوت دا "قوشرناه" احمد المجتبى

و اقول ليك حاجة
حسابك إنت و ميخائيل صاح
و معتز ما أشتر
و الحبشي ما لايوق
و انا ما براي وما قاعد بضيع في الباندودث
و البورد دا من شدة ما مؤدب التقول معهد شروني

اها لقيتني كيف؟