لماذا نعرف باسماء ازواجنا في كندا سهير النصري بدلا عن سهير سعد الشيخ

من الاشياء الملاحظة في مجتمع السودانيين عموما في كندا وخاصة في
سانت كاثرينز معرفة النساء باسامي ازواجهم يعني لو جيت او ضربت
تلفون تسال عن اي واحدة متزوجة صعب جدا تلقي زول بعرفها باسم
والده او اسرتها لكن لو جبت اسم زوجها طوالي ينقشوها ماعارفة السر في كده شنو وخل القصة دي في كندا بس ولاكل مجتمعات المغتربين افيدوني

الأخت سهير (النصرى)

فى أمريكا نفس الشىَء تعرف الزوجه بزوجها. وأعتقد أن ذلك يرجع لطبيعة العلاقات الإحتماعيه هنا فالزيارات والمناسبات عائليه يحضرها الزوجان معاً والمجتمع يعرفهما معا وبالتالى يسهل تعريف المرأة بإسم زوجها.
خلاف السودان فهنالك إجتماعيات رجاليه وأخرى نسائيه. كما أن السودان الأهل يعرفون الشخص حسب القرابه. فأنت مثلاً أهلك لوالدك ينادونك سهير بنت سعد الشيخ، وأهلك لوالدتك ينسبونك لوالدتك : سهير بنت فلانه. يعنى بإختصار أهلك فى الغربه الذى بنادونك به هو زوجك.
وربما من أسباب أن عندالغربيين رسمياً تغير الزوجة أسم عائلتها لإسم عائلة زوجها، لنوعيه العلاقه بالمجتمع المحصورة فى العائله الصغيرة (الزوج والزوجه). ولا إمكن عشان الرجال قوامين على النساء!

مع تحياتى

نادر الفضلى

الاخت سهـير الشـيخ

يبدو ان الامــر يتعلق ب(البرسـتيدج)الذي تعسـر علي

ام العيـال اسـتيعابه والتعامل معـه في بادئ الامــر.

اما الرجـال فتقـع عليهـم نفس المـسـالة التعريفية هـذه

(فلان راجــل فلانة)وغالبا اذا لم يرتبط اسـم فلانة هـذه بفلان

يكون التعـريف ناقص وربما احـدث بعض اللبس.

اهـا يا سـهير رايك شـنو نغير العنوان ونعمـلوا

لماذا نعـرف باسـماء زوجـاتنا

لك كامل الود ولي عـودة.

الامر ليس فى كندا فقط بل لاحظت هذه المسألة منتشرة بين السودانيات فى الخليج خصوصا فى حالة تكرار اسم السيده فتعرف باسم زوجها

نقدر نقول ( حداثه ) مستجلبه ربما لا تصلح لنا ولكنها ضمن قائمة الضرائب التى ندفعها ثمنا للغربه والبعد عن الوطن ..

عموما ليس فيها من الضرر الكثير و لكن عيبها الوحدي انها تشبه بالغير الذين نتمنى ان نتشبه بهم فيما هو مفيد فى العلم والمعرفه والبحث العلمى وصدق التعامل وحسن النوايا وغيرها من الصفات الطيبه الت يتمتعون بها .

سلامات يا كندا

الحكاية دي في داخل السودان موجودة خاصة في المجمعات السكنية الكبيرة

زي السكن بالجامعة اوالمستشفيات او الشركات الكبيرة وتعرف النساء بالازواج لان الامر

النساء غالبا فيها ربات بيوت و السكن للزوج بمعني المعرفة داخل المجمع

تكون للزوج الذي غالبا ما يكون شخصية اعتبارية وتنسب اليه الزوجة

لزوم التبعية بس هنا اتلخبطت الامور لمن بقي في زوجتين بذات المجمع السكني لذات الزوج

انتي زعلانة من الحكاية دي مالك؟؟ بس ماتبقي النصري ون والنصري تو

الاخ نادر سلامات
ايوة برضه لاحظت في امريكا نفس الشئ واعجبني تفسيرك واسبابك الا قصة الرجال قوامون لول واضيف ليها يمكن عشان الراجل غالبا بجي اول والعزابة
والعائلات بتابعوا معاه خطوات واجراءات جية مرتو واولاده من تاشيرة وكشف طبي اخره لد ماتوصل وتعرف به تحياتي واحترامي

اعتقد سبب نسب الزوجة لزوجها من حيث الاسم هو تقليد اوروبي معروف وتشريع قانوني باعتبار ان المجتمعات الاوروبية هي مجتمعات مسيحية والامر بشكل او باخر له علاقة بطقوس الكنيسة اكثر منه برتسيج لكن المؤسف هو ان العديد من العائلات السودانية انخرطن في هذه الموضة هكذا... وانتفت بذلك الخصوصية السودانية او بمعنى اخر انتفت السمات الاساسية للتقليد السوداني باعتبار ان المراة السودانية التي تحمل جواز سفر كندي او امريكي او اوروبي ترى نفسها تتماهى اجتماعيا مع البلد والمجتمع الجديد من حيث الكثير من العادات والتقاليد طبعا الخطاب ليس عاما ولكن

ما عندنا فى كندا بس يا سهير النصرى

كنا اطفال نعيش فى بخت الرضاء وكان هذا التقليد

موجود فـلانة مرت فلان ومرات بالوظيفــة

يعنى مرة الباشكاتب ومرة الحكيم ومــرت

العميد ومرة الناظر بتذكر اختى مرة قابلت

جارنا المساعد الطبى راجع من سفر جات

قالت لاقيت راجل مرة الحكـيم

عندنا فى هاملتون بتتقال لى بعض النساء

ما كلهم بس ما عارفة السبب شنو .

Quote: اعتقد سبب نسب الزوجة لزوجها من حيث الاسم هو تقليد اوروبي معروف وتشريع قانوني

ده الكلام الصحيح......الزوجة تغير الاسم بعد الزواج لاسم زوجها و نادرا ما تترك اسمها يكون لها اسم مركب

الاخت سهير

تحياتي

كما ذكر الاخوة الكرام المسالة دي منتشرة في كل المجتمعات السودانية سواء داخل السودان او خارجه
مش تقليل من قيمة ذكر اسم والد الزوجة
لكن يمكن بحكم انه الواحدة بعد الزواج زوجها هو البيكون محور حياتهاوشكل حياتها بيتعرف بشكل اساسي على انها زوجة فلان ، يعني تلقائيا تعريفها باسم والدها بيتلاشى فمسالة مناداتها باسم زوجها بتجي في الاطار ده
غايتو عندنا في منطقتنا في الشمالية عبري ، الزوجة اول ما تتزوج بينادوها باسم راجلها طوالي بدون تردد

لاحظت الخواجات مشوا ابعد من كدا ، وبيضاف اسم الزوج في جواز السفر الزوجة

Quote: واعجبني تفسيرك واسبابك الا قصة الرجال قوامون لول

الأخت سهير
طبعاً يا مؤمنات يا موحدات مسلمات بكلو إلا (1) الرجال قوامون، (2) و .. مثنى و ثلاث ورباع
أنا فى مداخلتى كنت أقصد الغربين بقوامه الرجال، وهذا ما أكدته الأخت maia :

Quote: لاحظت الخواجات مشوا ابعد من كدا ، وبيضاف اسم الزوج في جواز السفر الزوجة

أيضاً شوفوا فراسه اهلنا من زمان بيقولوا الولد بيشيل الإسم وأهو إنطبق حتى فى المجتمعات الغربيه

الاخ الخير سلامات وشكرا لمرورك موضوع البرستيدج انا ماعندي عليه اعتراض
لكن المزعلني حتي صاحباتي بقولو سهير النصري يعني قصة زي القدر معزتي

اما قصة يعرفوكم باسم زوجاتكم لازم تكونوا فخورين وفرحانين بيها من دون اعتراض وساعود

سلام اخي ناجي
مناداة المراة باسم زوجها في الخليج ربما ظهرت في السنين الاخيرة
فلقد عشت في الكويت منتصف الثمانينات وكان الخليجيين ينادون امي باسم اي الاكبر0ام فيصل والسودايي غالبا باسمها الاول سعيدة بمرورك هنا

الامريكيات اليومين دى قالعات إيدن تب ورجعن لإسم الأب
اليومين دى فى أزواج رضوا باتخاذ إسم الزوجة لكن لقوا المسالة دى قانونيا صعبة
البعض الآخر ارتضى التقليد اللاتين أمريكان وهو وضع اسم عائلة الزوجة يعقبه إسم االعائلة للزوج
الباكستانيات المسلمات متمسكات لحد ما بالتقليد الأوربى ناسيات القانون الإسلامى "أدعوهم لآبائهم"
أفتكر المسألة ما حتستعدل إلا بعد التاريخ ياخددورته ونرجع للمجتمعات الأموية والتى مازالت تمارس لدى بعض النوبيين وهى أن تكون الواحدة مننا هانم سكينة أو الواحدمننا أحمد عائشة.
مش قالوا الناس يوم القيامة بنادوهم بأسما أمهاتهم؟

الأخت سهير
كا ذكر بعض المتداخلين، فإن هذه الظاهرة ليست حكراً على كندا وأمريكا فقط. ولكن عندنا هنا (في الخليج العربي) المسألة دي ملاحظة، والسبب أن أصل الإغتراب هو الرجل، وغالباً هو الذي يعمل، وتأتي الزوجة، فتجد أن له علاقات ومعارف، وطبيعي أن يعرفونها به.

وأيضاً هناك المثال الذي ذكرته الأخت هادية:

Quote: كنا اطفال نعيش فى بخت الرضاء وكان هذا التقليد موجود فـلانة مرت فلان ومرات بالوظيفــة

هذا المثال يعرفنه زوجات الموظفين في السودان، خاصة في الماضي حين لم تكن الزوجات يعملن، أو أن العمل يكون في مناطق لا تتوفر فيها وظائف للزوجات، فيكون المجتمع هو مجتمع الموظفين وعائلاتهم تتبع لهم.

ملاحظتك سليمة والنسوان هن السبب. مثلا لاحظت انو زوجتي لها صديقات لاكثر من 10 سنوات ويوميا يتكلمن في التلفونات بالساعات الطويلة ومافي واحدة فيهن بتعرف اسم ابو صديقتها منو؟
في الايام الاولى زعلتني الحكاية دي وحاولتها ان تعرف الاسم كامل ولكن قالت لي واجهتها مشكلة تتكلم مع فلانة تقول ليها مثلا جاتنا سهير سعد. تقوم فلانة تسألها سهير سعد دي مين، انا ما بعرفها؟ تضطر زوجتي تقول ليها: دي ما سهير مرت النصري.

Quote: الحكاية دي في داخل السودان موجودة خاصة في المجمعات السكنية الكبيرة

وحتي المجتمعات الصغيرة مثلا جارتنا في الحلة بتبيع بالقسط بتكتب اسم المراة بزوجها حتي تستطيع تفرز بسهولة وتقدر تحصل القسط من زوج المراة

تعرفى كمان نحن فى كالقرى ما بنقول إلا النصرى سهير وقبلان تمام التمام

تحياتى ليك وللأولاد



والله النصرى لو ما إنتى كان قطع النور الأحمر




منصور

Quote: اعتقد سبب نسب الزوجة لزوجها من حيث الاسم هو تقليد اوروبي معروف وتشريع قانوني

وتنتقل لتصير عادة
ودائمآ النسب الى إسم العائلة وليس الإسم للزوج

مثلآ هنا فى سويسرا حصلن النساء على حق الإحتفاظ بأسمائهن بعد الزواج
وذلك لنسبة الطلاق العالية وإجراءات للرجوع للإسم الأصلى صعبة بعد أن يكون الإسم القديم
إرتبط بكل المعاملات المادية والإجتماعية

ورغم ذلك فى الحياة العامة يتعاملون بإسم عائلة الزوج .

أنا أجده تقليد غير سيئ وإرتباط إسم المرأة بإبنائها
يعنى تكونى إسمك سهير الشيخ وولدك إسمه عادل النصرى مثلآ


وبعدين العادة دى غير مستحدثة فى كندا وأمريكا . فى السودان منتشرة ومن قديم . خاصة فى المناطق العمالية التى يأتى لها العوائل من أجل عمل رب العائلة .

إضافة لتداولها فى العلاقات الإجتماعية الرسمية ( الدعوة للزواج مثلآ - فلان الفلانى وحرمه) . قد يكون كاتب الدعوة شقيق زوجة صاحب الدعوة أوحتى والدها

تحياتى يا سهير النصرى

تخريمة
أحيانآ الزوجة تحصل على الإسم بشهرتها . كان عندنا سيدة نشطة بجانب نشاطها الإجتماعى والسياسى تعمل (مساعدة حكيم المنطقة) ومعروفة لدى الكل عرف زوجها بدون إستخفاف به أو تقليل ( صلاح قسمة)

التحايا النديات لكل الزوار الكرام
يا هادية فلانة مرة فلان سواء كان اسمه او وظيفته عادية ومالوفة
انا المحيراني فلانة فلان طوالي كده يعني سهير النصري بدلا من سهير
مرة النصري وافتكر موجودة عنكم برضه مثلا نحن بنعرف هدي مختار
ورغم اني بعرفها زمن طويل جدا نهائي ما عارفة اسم ابوها لوول
لك تحياتي ومودتي واتمني تشريفك يوم افتتاح دار الجالية راجعي
بوست الاخ الفاتح يس

اخي محمود تحياتي
نعم زي ماقلت هو تقليد اوروبي او بالادق مسيحي لانه عندنا دكتورة
مصرية قبطية لاحظت عندها اسمين قلادة وابتسام لما سالتها قالت واحد اسم الزواج يعني حتي الاسم الاول بغيروهو
وياهادية احتمال واحد من الاسباب بكون لغرابة اسم الزوج زي كلم وكردمان

مجتمع الافندية في الاقاليم يمنحكم الاجابة على هذا التساؤل حيث يعرف الرجل بمكان عمله ، حسن سجن ، سليمان بطري ، عوض مجلس ، ابراهيم صحة ، عثمان تعليم و هلمجرا

يا سهير المسألةدي فعلا مزعجة اول ما جيت دايرين يشبكوني سناء ناظم
بقيت لمن اخت مسج لاي واحدة بقول ليها معاك سناء مرسي لمن اغلبهم عرفوا اسمي بالكامل بالمناسبة انحنا الحلفاويين بينادونا باسم امهاتنا كان بت ولا ولد. غايتوا حاولي اعملي بنصيحتي دي في المسيجات

يا سهير هناك سبب رئيسى لهذه "المعضله" فات على جميع المتداخلين ..

هو اننا فى السودان تقليديين جدا فى مسالة تسمية المواليد فاغلبيه جيلكم
من الاناث "يلف ويدور" فى بضعة اسماء متكرره (الا ما ندر)
ناديه وساميه وماجده ومنى والهام وايمان

والجيل الذى يسبقه تسيطر عليه اسماء مثل علويه وفوزيه وزينب ومريم وصفيه

اما جيل الحبوبات عائشه خديجه وامنه وستنا و التومه و اسماء و الرضيه

خلاصه الحديث اذا كنت تسكنى فى حى وهناك 30 سهير و70 ماجده 400 ناديه

ماذا تتوقعى من الناس عشان يفرزوا بينكم ؟

طيب يا سهير في كم سهير في عمارة النصري

تعرفي يا سهير
دي في اي مكان
اضحكك مرة طلبت من الجامعة رسالة لمن يهمهم الامر
اني ادرس في الجامعة.ز مشيت شلت الجواب
ومشيت المكان المحتاجة ليهو فيه
عشان تكون المفاجأة

مكتوب دكتورة نجاة ابراهيم..
طبعا رجعت تاني عشان يتصلح الجواب
وقالو دا خطأ بتاع كاتب واعتذرو

هنا كلنا نعرف باسماء ازواجنا لما يكون في كشف
بنتعب جنس تعب عشان الاسماء الحقيقية
الغريبة المتعلمات اكثر الناس احتجاجا
لكن انا سجلت في زوجي اصابة
قوية بمساعدة الجندرية وتراث
عندما ذهب زوجي الى اليمن قام تراث والجندرية بعمل لمة
ليه جمعوا بورداب اليمن..
سمعتو بتكلم مع صاحبو التونسي شاكيا
قاليه تعرف في اليمن
طلعت زوج بيان..
شكرا يا بورداب اليمن على تسجيل هذه الاصابة..

سلام ياشباب
الاخ الكريم رافت نعم هو تقليد اوروبي مسيحي لكن زي ماقلت
النسوان الايام دي بتمردوا عليه عشان مايصطكوا بعد الطلاق
وانا في الاوراق الرسمية ماندي اعتراض عليه بالعكس احسن كتير
من سهير الشيخ وابني احمد النصري بتلخبط الخواجات في الاوراق
الرسمية لكن محيرني تداوله بين السودانيين شديد
اختي سودانيى سهير تو دي في كندا جريمة بودو بيها الرجال
السجن بي المزيكا لانو تعدد الزوجات ممنوع قانونيا تحياتي
الاخ الكريم منصور
تواجدك هنا يعطي المربد القا ذو نكهة خاصة
النصري عنده اسم تاني بنفس معني النصري سهير
لكن لو كتبته هنا بزعل مني خليه باقولو ليك لمن نتلاقي في
القريب العاجل انشاءالله

الاخت سهير

تحياتي


زمان لامن كنا في مجتمع السكة حديد ايام كانت سكه حديد يعرف الزوج بزوجته والزوجه بزوجها يعني لامن يكون الحديث عن رجل يقال مثلا النصري سهير ولامن يكون عن امراة يقال مثلا سهير النصري

قد تكون تقليدا اوربيا كمال قال بعض الاخوة لكن مجتمع السكة حديد فيه من لا عن اوربا شيئا ونشا التقليد محليا صرفا

سلام لكل الضيوف الكرام
والله ياسناء طلعتي شاطرة شديد وحسمتيهم تب بس صعب شديد
اعمل زيك وتنجح معاي قصة المسجات دي لأني طولت شديد هنا
وسهير النصري خلاص بقت في العضم صعب تطلع من لسانه مودتي
وكامل سعادتي بتواجدك هنا
دكتورة بيان والله عفيت منك وعفيت من ناس اليمن اخدتوا
لينا حقنا منهم كامل المرة الجاية رسليه لينا بي
جاي وانا باتسد فيه سهير النصري بي ابراهيم نجاة سلمتي

اوروبا شنو يا جماعة ؟؟؟؟؟؟؟؟؟
امشوا الامارات مبااالغة عدييل كدة
مافى اسماء اباء نهائى
طبعا ده تقليد غربى ومحرم مناداة المرأة باسم زوجها شرعا
وانا سألت الدكتور عبد الحى يوسف لما كان معانا فى ابوطبى
واثبت لى بالدلائل والبراهين على ذلك .وبايدى وشديدى سميت نفسى
باسم والدى غصبا عنهم يعنى اى شخص ينادينى امال عصام الدين لا التفت
اليه اطلاقاولو وصلتنى اى دعوة بهذا الاسم لا اذهب مهما حصل وكدة اجبرت كل
من حولى من اصدقاء وزملاء على مناداتى باسم والدى وامكن النساء الوحيدات
على سبيل المثال لا الحصر انا وعواطف ادريس الادينا ابواتنا حقهم .
ولا شنو يا عواطف ؟؟؟
تحياتى يا بت الشيخ وابقى عشرة على اسم ابوك
ام وضاح

سلامات ياشباب
الفاتح يازميل الاعمال الشاقة كيفك عمارة النصري دي علي
وزن سانت كاثرينز يوسف امين اي تسمية المكان علي اوائل
من سكنوه من السودانيين لك التحايا
اخ محمد حسن سلامات ولم نلتقي منذ بوست الشعر والمطارحة
اتاري كان عندي جدي ساكن وشغال في السكة حديد مرتو كل
الناس بنادوها سلوي عبدالله انا كنت قايلاها عنصرية اهلي
المحس هسع فهمت اصل الاسم لك المعزة ونواصل

سلام اختي الحبيبة ام وضاح وبي وجودك بيتنا نور
وزي ماقلت القصة دى ظهرت جديدة في الخليج ودايرة
وقفة قوية وعزيمة زيك انتي وعواطف عشان نتخلص منها
ونتمسك باسامي اباءنا واجدادنا ولي قدام حبي لك امتناني

Salam Sisiter Asma
Yes American Women are fighting for their names after marriage
and so do I so let us keep the effort till we regain that
rights regards