يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!

يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!


04-09-2007, 01:37 AM


  » http://sudaneseonline.com/cgi-bin/sdb/2bb.cgi?seq=msg&board=100&msg=1176079049&rn=1


Post: #1
Title: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-09-2007, 01:37 AM
Parent: #0

عاوز أعمل لي زيارة للمتحف بتاع السودان لكل أعضاء البورد, وعشان العدد كبير
حأحتاج لي قطر , وبعد نمشي هناك كلنا حننزل , بعدين بحرفنة كده حنخلي ناس هناك
ونقول ليهم بنمشي ونجيكم راجعين , والمشية الياها...........قولي طيب ما دام حتنزل ناس
معينين سايقنا كلنا ليه ؟؟؟ الأجابة : للتمويه ورفع الحرج !!!!

كل من يأنس في نفسه الكفاءة التقدم , بالمناسبة القطر عليك , يعني تعال بي قطرك وبنتحاسب.



غرزة وطبزة: أن يجلس الرجل في متحف السودان.... خير له من نضال ألف عام في منبر بكري.

محمد عبد المطلب

Post: #2
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: حمد اسماعيل
Date: 04-09-2007, 05:46 AM

يا اخ محمد عايز قطر حمولة كم راكب ؟؟؟

لانه عندى فكره اصلى قبل كده سقته رأس قطر

صغير اسمه صعلوك المحطه ود بجهزو بيهو القطر

المسافر بكره مثلا , واتعلمته السواقه لانى كنته

بمشى مع واحد قريبى مهمته يربط عربات القطر مع بعض

وكان بدينى سحبه( يعنى فرصه)وبعرف امشى قدام وممكن ارجع

خلف كمان . وكمان ممكن ارجع خلف لقدام .

المشكله انه ناسك ديل بكونو مجمعيين فى مكان واحد ولا كمان

يلقطوهم واحد واحد من البوستات . لضمان الرحله عايز القطر ديزل ولا بخار علشان

ادبر حالى من ناحية الوقود . بتاع الكهربا ما مضمون خوفا من الجمر الخبيثه .





لضمان الرجعه بحاول ادرب واحد من الاخوان اثناء الرحله لانه احتمال انا ذاتى انزل

مع الجماعه النازلين اها وديك يا النزله الياها . واحتمال القطر يرجع

فاضى وتبقى المصيبه . وبعدين بالمناسبه الراكب داخل القطر وخارج القطر على

مسؤولية نفسه .


..........
دا كان لقينا المتحف


Post: #3
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-09-2007, 09:22 AM
Parent: #2

عذرا

Post: #4
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: أبو ساندرا
Date: 04-09-2007, 11:23 AM

غايتو أنا معرفتي بتتوقف على نوع القطر العايزني أسوقو

Post: #5
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Khalid Saeed
Date: 04-09-2007, 01:09 PM
Parent: #4

الأخ / محمد عبد المطلب
والسادة الركاب ..
تحياتي لكم جميعاً .. ويلزم التنويه ..سواق القطر براهو ماكفاية ..يلزمك عدد (2) كماسرة عشان مايكون في زوغانات من التذاكر وكده .. ويلزمكم (2) بوليس سكة حديد وده زول تمام بيكون مع الكماسرة ويمكن ترضيته بأي شئ .. متساهلين مع الجماعة .. ويلزمكم (2) عطشقي .. مامعروف الظروف ..خصوصاً الأيام دي قالوا السودان سخانــة شديدة .. بتولع الحاجات .. يمكن تولع القطر بالفيهوا .. عشان كده لو لقيتو ليكم كم بوليس بتاع مطافي وكم جردل نصهم أملوهم رمله ونصهم مويه .. يكون كويس ..
ونصيحة لوجه الله .. أوعكم من تصاريح الركوب المجانية .. دي مصيبة لأنوا الناس كلها بتعرف بعض .. الشغلة دي ماحتغطي معاكم .. وكان إتزنقتوا طلعوها بالدس بي تحت تحت .. على كيفكم .
قالـــوا والله يكفينــــا شــر قالــــوا ..
واحد إشترى تكسي .. ومسكوا لي سواق .. السواق شغال بي التكسي اليوم كله ..
في المساء السواق جاب الإيراد .. وسلموا لي صاحب التكسي ...
صاحب التكسي قال للسواق .. وقف التكسي جنب البيت هنا .. وتعال سوقوا الصباح .. السواق زعل قال ليهوا لازم التكسي يبيت معاي لزوم الشغل ..
صاحب التكسي قال ليهو .. يا إبنى أنا 20 سنة سايق قطـــر .. ماحصل يوم بيته القطر معاي في البيت .
أنا من عطبرة .. بلد الحديد والنار .. بلد القطارات ..
بعرف واحد كان سواق قطر بضاعة .. ينفع ....بس عنده شرط واحد .. لازم القطر بي بضاعته يبيت معاهو في البيت ..
الأرباب

Post: #6
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-09-2007, 07:10 PM
Parent: #5


Post: #7
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: حمد اسماعيل
Date: 04-09-2007, 07:46 PM
Parent: #5

يا ود عبد المطلب

قلته لى:الحكاية دي صعبة ولا شنو؟؟

لا صعبه ولا حاجه كلهن تعشيقتين تمشى قدام وترجع ورا و فرمله .

بعدين حكاية بعرق الجبين دى لو وصلنا وكلهم نزلو وقالو ما راجعين

واتفقو يفتحو ليهم منبر جوه المتحف انا قطرى دا اعمل ليه شنو يعنى

أأجره شقق يعنى ولا كيف ؟؟


لاكين فكره مدرسه لتعليم سواقة القطره دى اجمل حاجه لانها جامعه لكل انواع

القطره وعلى حسب الرغبه . ( قطره دى بتكون فاتت ساكت ) بفتكروها بتاعت العيون.

شايف ابو ساندرا عنده فكره ورغبه فى الشغلانه بس ما عارف عنده قطر ولا حيأجر .


بعدين حكاية كماسره وعطشقى والجماعه ديل زى ما قال اخونا خالد ما شغاله فى الرحله

دى لانه الناس كلها دافره وما تنسو انه الرحله بتعتمد على عرق الجبين . يعنى مافى عرق

معناها مافى سرعه و بالتالى وصول متأخر .



ان شاء الله يظهر سواق تانى لانى خايف اتورط فى الحكايه دى وتطلع معاى بالخساره واتلوم مع

الاخوان , اصلها معرفة منبر ويمكن الصداقه تبقى قرابه اخسر الاتنين .



..........
سواق مطوع لمهمه عسيره او كما قال صاحب البوست .



...

Post: #8
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-09-2007, 08:59 PM
Parent: #7

أبو ساندرا

Quote: غايتو أنا معرفتي بتتوقف على نوع القطر العايزني أسوق


المطلوب سواق قطر منبر وبس.
خالد سعيد

Quote: .بس عنده شرط واحد .. لازم القطر بي بضاعته يبيت معاهو في البيت .


المهم السواق في عضمو و باقي الشروط ديك ساهلة , قول ليهو الشرط بتاع البياتة كويس معاي أنا
ذاتي , بس ما يفوت عليهو انو القطر ده سايق ناس المنبر , يعني البركب تاني ما بنزل , يعني بالواضح
كده لو عايز القطر يبيت معاهو : العشاء وشاي الصباح بي لقيماتو عليهو هو !!!!! ما تنسي في ناس
ما بشربو شاي !!!! بشربو حاجات تانية حامياني !!! وما تنسي انو الناس دي ما بتنوم بالساهل
يعني ناس الحلة جاهم بلا , بعدين ده كوم وموضوع الحمام كوم تاني , عندكم ليهم مقدرة؟؟؟
أهم ما في الموضوع لحدي هسه ماشين كويس........ لقينا تلاتة سواقين , بس لسه رؤيتهم ما واضحة
عايزينكم تقدرو المنعطف التاريخي البمر بيهو المنبر وأهله وهم في طريقهم للمتحف.
في ناس عندهم رغبة للتقديم ولا نقرض علي كده؟؟؟؟؟
شكرا لتقديمك لأوراق صحبك.

Post: #9
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-14-2007, 01:15 PM
Parent: #8

لحدي هسة تلاتة سواقين بس اتقدمو , طيب المنبر ده ما فيهو سواقات ؟؟

Post: #10
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: سلمى الشيخ سلامة
Date: 04-14-2007, 02:32 PM

خلال العام الدراسي كان حلمنا الاصيل ان ينصرم العام الدراسي سريعا لاننا علي موعد مع السفر ، حتام سنسافر الي امدرمان كنت واخوتي منذ بدء العام الدراسي ، تعترينا خفة الفراشات ( علي نار الهوي ) فراشات منذورة لخريف (مفرهد) نصبغ العالم بالوان الورد ، وكل زهر العالم هو محطتنا فلم نكن لنرد طلبا لمن سال حادينا السفر بنهاية العام الدراسي ، الي وجهة نحبها وقبلة ستجمعنا بمن نحب ، تجدنا نلبي كل ما طلبوه في سرعة البرق ، ونزيد علي كل ذلك عبئا نحبه ، ذلك انه يكفينا شر السؤال ، فنقوم بزراعة المنتوجات التي ستدر علينا (ثروة ) خاصة بنا من شأنها تخفيف الأعباء علي اهلنا ، كنا نزرع الطماطم ،والبصل الاخضر ، والباذنجان ، والبامية ، الجرجير ، ونبيع ما حصدنا في (سوق اب جهل ) القريب من بيتنا ، بيتنا الزي كان محاطا( بجنينة) غير مزروع فيها سوي اشجار النيم ، وفي الحوش الخلفي كنا ايضا نزرع مستغلين المساحة الخالية ، رغم انتشار آفة(الارضة)
النمل الابيض ، كنا محل نزاع مع الاغنام التي كانت عدونا اللدود ، مستخدمين كل آليات المحاربة للابقاء علي منتوجاتنا ، كنا لذلك الغرض نستخدم ( السلك الناعم) لتغطيتها0
ينتهي موسم الإمتحانات ، فتبدأ الأعين رحلة السؤال عن السفر وامكانية تحققه، وحقيقة ذلك ، ان سفرنا كان مرتبطا بمزاج الوالد ، فإن عاد وهو مبتسم ، ( منشرح) البال ذاك الظهر ، فالسفر مؤكد ، وعدا ذلك ، فلا محالة اننا سنقضي الاجازة في الابيض ، بعض الاحيان كان لا يمنحنا حق التخمين ، فيباغتنا بالامر ، فإن كان لن يسافر معنا ، فهذا يعني اننا غير مطالبين بتقسيم العمل ، من نظافة ل(بيت الغنم ، والجداد ,والحمام ) ولا علينا ان نسدل الملاءات علي الدواليب وزجاج البترينات درءا للرعد والبرق الذي تقول أمي انه بيكسر المرايات) ولا علينا ان نضع افرع النيم داخل الدواليب ، لالهاء الصراصير والحشرات عن التكاثر في غيابنا 0
مع ذلك ففي يوم السفر علينا الصحو الباكر ، رغم اننا ( عندنا حجز لقمرتين ) واحدة للبنات وامي ، والاخري للعيال وابوي ، وبطبيعة الحال كنا نعرف متي يغادر القطار ( اولاد الناظر ) يتحتم علينا اذن إعداد الملابس ،التي سنلبسها في الصباح باتجاه المحطة ، والاخري التي (سنغير ) بها لحظة الوصول إلي الخرطوم ، القطار نفسه في تلك الفترة كان غاية الانضباط والدقة في المواعيد ،فالمشترك يغادر عند الثامنة والاكسبريس ، يغادر عند السابعة صباحا
علينا التأكد من أن كل شئ جاهز وكامل الاعداد ، ( الزوادة ) الزي سهرنا علي إعدادها منذ الليلة السابقة ، وكنا اذا ما تخلف والدي ، حفظنا له بعض الطعام ، وان كان معنا ، فإن علينا( غسيل) الثلاجة وفصل الكهرباء عنها محتفظين فيها ببعض الثلج للرحلة مستعينين به علي ماء القطار الحار ، لحظة سماعنا لهذه الكلمة ( جاهزين؟) يسري مفعولها السحري بيننا ، فسنبدأ مشوارنا الحميم من البيت باتجاه المحطة نعدو كالطيور خفافا خشية ان يجف الغدير ، كل يحمل داخله قنبلة موقوتة ، لابد لكل واحد ان ( يحجز الشباك) لان هناك ( خيانات ) تحاك من قبل الاولاد،علي وجه الدقة ، فكل واحد يحلم بالجلوس الي الكرسي المجاور للنافذة ليبدأ فاصله الغنائي ، كان والدي لذلك الغرض يحجز لنا ( قمرتين ) كان الاولاد يركضون ناحية القطار ، ركضا، بغرض الدخول اولا ، وحجز الشبابيك الزي كانت تلفزيونا خاصا بكل واحد ، وحين نصل الي تلك النقطة تنفجر القنبلة :
يا امي انا جيت قبالا
لا، انا الاول ، انا جيت قبالا
فيجئ صوت امي حاسما في تلك اللحظة :
هسي نحنا متين جينا ؟
بس هي يا امي
هي صغيرة خليها تقعد شوية ، حتنوم بعد شوية إنت اقعد محلها
أبيت ما بقوم
انت دي ذاتا ما اوضتكم ، بيتكم بي هناك
هناك كلهن قاعدين جمب الشباك لكين ، يا امي كلمي بتك دي ياخي
خلاص مرة انت ومرة هي
ويبدا الفاصل الغنائي ( البرئ )، مغموس في زيت المشاحنات
(من كتاب فصوص سودانية /اوراق شخصية )

Post: #11
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-14-2007, 08:02 PM
Parent: #10

يا سلمي

أقول الكلمة ما تاهت خلاص في الضلمة وأعاتب الليل ... ده ما ليلا طويل يا سلمي.
طمنتينا انو القطر حيكون فيهو حكاوي كتيرة ومسلية , خاصة الرحلة حتكون طويله لحدي المتحف,
يعني لحدي هسة عندي تلاتة سواقين... وحجاية , لكن ما قلتي لي ما عايزه تقدمي للمهمة بتاعة السواقة دي؟؟ فكري وقولي لينا

يلا يا شباب : تلاتة سواقين وحجاية .... حدي يزود؟؟؟؟ اغتنم الفرصة.... الأماكن محدوده لرحلة العمر !!!!

Post: #12
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mamoun Ahmed
Date: 04-14-2007, 08:24 PM

هل تعلم؟

فنان تشكيلي رهيب ومعروف
التحق معنا بكليه الفنون


كان فنانا عصاميا
عمل منذ صباه في السكة حديد
وكان في المحطات المتنوعه
ينزل ويطلع اوراقو
وعلبة الالوان المائيه
ويرسم من الطبيعه مباشرة

وحينما حلت اعياد العلم
بمدينه كسلا
كلفته البلديه والسكة حديد
بتزيين البلد والمسرح
بي لوحات جميله وجداريات كبيره
ونجح فيها نجاحا مذهلا

ولتكريمه منحوه بعثة دراسيه لكلية الفنون
وانضم لقسم التلوين
وكنا في رحلات كليه الفنون لاقاليم السودان الجميله
مكلفين برسم لوحه واحدة من الطبيعه مباشره يوميا
ولكن صاحبنا كان ينجز ثلاث او اربع لوحات
ساحره

اكمل سنتي الانتداب في كليه الفنون
ولتفوقه مددت بعثته
ليكمل الاربع سنوات
وينال درجة البكالريوس بتفوق

وكان في بعض الرحلات التي تتم بالقطار
يشرح لنا اسرار القطارات
وفي بعض الاحيان يسوق عديل كدا!


احي صديقي المبدع العصامي
حمزة النميري

Post: #13
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-14-2007, 08:42 PM
Parent: #12

مامون أحمد
خليتني أسرح وارجع لي أيام قطر حلفا والنمر , والتسطيح , والبياته علي حلفا في الرمال,
ما أسعد الركاب هنا بي صحبك حمزة النميري , يعني بسوق قطر وفنان , والله الرحلة دي شكلها
حتكون رآبة , ومعانا حمد اسماعيل وخالد سعيد وأبو ساندرا , وسلمي بت الشيخ الحجاية والنميري الرسام والسواق
في نفس الوقت, بس لازم تكلمو بالرحلة دي من بدري عشان يرتب حالو , ما تنسي انو القطر عليهو , يعني يجي بي قطرو
وعلبة ألوانو!!!
يلا يا شباب ماشين كويس.

Post: #14
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Sosan Abdullah
Date: 04-14-2007, 10:08 PM
Parent: #13

السلام عليكم ورحمة الله وبركاته
أخوى محمد كيفنك قبل ما أديك راى ألقطر ده (stickshift ولاautomatic


سليمان عشان مايحصل لبس لأنو أناوزوجتى عضويتناواحده

Post: #15
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-14-2007, 10:26 PM
Parent: #14

سلمون

والله فرصة سعيدة انو القطر جابك لينا , يا ناس المنبر هووووي , سليمان ده وزوجتو مشتركين باسم واحد
يعني بالألماني كده ( جوين أكاونت).
Quote: أخوى محمد كيفنك قبل ما أديك راى ألقطر ده (stickshift ولاautomatic

كلو عندنا( احنا بتوعين كلو ) بس انت يكون عندك فكرة في السواقة , بعدين القطر ده بيمشي بي عرق الجبين ... يعني ما حتفرق كتير , يعني الركاب وعرقهم , بعدين ما تنسي انو القطر عليك !!!!! يعني تجي بي قطرك , ولو عايز القطر يبيت عندك ... موافقين ....... بس في الحالة دي الركاب حيبيتو معاك .......... وما تنسي القطر ده ماشي وين !!!! بعني ما توصلو لينا بربر وتزوغ ......... وخت في بالك الرحلة كسبانة كسبانة ... لانو الرحلة لو طرشقت البوست ده حنقلبو مدرسة لتعليم سواقة القطره ( خلي بالك من قطره دي كويس ).

اها يا جماعة ....جانا سواق زيادة ........ نقرض علي كده ولا في زول عندو راي؟؟. لسه محتاجين سواقات , سلمي بت الشيخ ما ورتنا بتسوق ولا حتحجي بس ؟؟؟؟؟

Post: #16
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Sosan Abdullah
Date: 04-15-2007, 05:37 PM
Parent: #15

مافي داعي يامحمد للتنبيه يقوم الجماعة ينقشووبعدين القطر لناس مبدعين زى سلمى ـزي فرس إمرؤ القيس وناقة عنتر ومازال عمي وكيل سنتور في قطار الهم وجاىك بي قطري ما(كويتي)
سليمان

Post: #17
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Mohamed Abdelmotalib Hassan
Date: 04-21-2007, 09:58 AM
Parent: #16

سلمون والأعزاء المتقدمين للوظيفةهذا البوست فتح منذ فترة ,
اليوم رأيت أن الحوجة اليه تجددت وبالحاح , ما زلنا في انتظار
من يأنس في نفسه الكفاءة.

Post: #18
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: Nazar Yousif
Date: 05-27-2007, 03:45 PM
Parent: #17

يا أخوانا في زول في المنبر ده بعرف يسوق قطر؟؟
الراتب مغرى وللحوجة الماسة يمكن يكون تعلمجى
ويفضل قطر عجيب...حيث لا يشترط العودة بالقطار سالما.

Post: #19
Title: Re: يا أخوانا في زول في المنبر ده بعرف يسوق قطر؟؟ عايزو في خدمة مهمة شديد!
Author: bayan
Date: 05-27-2007, 05:06 PM
Parent: #18

مشتاقين لمحمد
القطر الشالك انت يتكسر حتة حتة...