مركز معلومات سودانيز أونلاين

سلام يا جماعة،

نحن السودانيين بقينا متفرقين في كل قارات العالم. وطبعاً كل واحد فينا مر بخبرات مختلفة وبقت عندو معلومات كتيرة. حتي الناس الفي السودان عندهم معلومات عن حاجات الناس البره ما عارفينها ..

المشكلة إنو موضوع التشارك في المعرفة ما قوي عندنا للدرجة دي. أو خلونا نقول إنو موجود، لكنه في أغلب الأحيان محصور في الناس البنعرفهم مباشرة ..

فكرة البوست ده إنو يكون عندنا مركز واحد للمعلومات الزول ممكن يرجع ليهو لو عايز يعرف أي حاجة. نعم، ممكن الواحد يفتش في الإنترنت عن العايزو. وفي أغلب الأحيان ممكن يلقاهو. لكن في ناس ما متمكنة من إستخدام الإنترنت للدرجة دي، أو ما عندهم زمن كفاية، أو المعلومات العايزينها موجودة بلغة ما بيعرفوها. وممكن جداً تكون المعلومة المطلوبة ما موجودة علي الإنترنت؛ لكن فلان أو فلانة الموجودين في البلد الفلاني عندهم معرفة كاملة بيها ..

يعني

بدل ما الواحد لما يكون عايز معلومة يضيع وقته في تفتيشها في حين إنو غيرو عارفها ومتأكد منها، يكون عندنا مكان واحد ومصدر معروف لمشاركة المعرفة

طيب ننفذ الكلام ده كيف؟

ببساطة، لو زول عايز يسأل عن حاجة ممكن يسأل عنها في البوست ده. ولو في زول عارفها، أو عارف يجيبها كيف من الإنترنت يقوم يرد بالمعلومة المطلوبة.

بس في حاجات لازم ننتبه ليها. منها إنو الزول قبل ما يسأل يقوم يدي نظرة سريعة للمعلومات الموجودة في البوست. جايز يكون في زول غيرو سأل نفس السؤال والإجابة موجودة ..

برضو الناس البترد بالمعلومة يكون أفضل لو كتبو مصدرها ومدي تأكدهم منها. ويكون أفضل لو علي الأقل إتنين ولا تلاتة ردوا علي نفس الموضوع للتأكيد. وطبعاً مهم جداً لو في زول عندو رأي مخالف يقولو ..

فاضل أهم نقطتين يا جماعة ..

الأولي إنو إختلاف الرأي لا يفسد للود قضية. يعني القصد من إننا نعمل مركز معلومات إنو الناس تستفيد من بعض. ممكن جداً تجربتي عن نفس الموضوع تكون عكس تجربتك لأنو الظروف المرينا بيها مختلفة. ده ما معناه إنو أنا صاح وإنت غلط، أو إنت صادق وأنا كذاب. عشان كده رجاء خاص إنو كلنا نوسع صدرنا وناخد الأمور ببساطة. ومين عارف، مش ممكن حاجة بسيطة زي دي تبقي أساس لتعامل جديد بيننا ...

الحاجة التانية إنو البوست ده ما بتاع الكتبو. كل واحد فينا - حتي القراء غير المشتركين - هو شريك أصيل في البوست ده. وما بالضرورة إنو الكتب البوست هو اللي لازم يرد.

يا جماعة بإختصار، لو ما كلنا شاركنا في الموضوع ده ما حينجح. خاصة ووقت معظمنا ما بيسمح ليهو بالمتابعة المستمرة لكل ما يكتب ..

كده أفتكر الموضوع بقي واضح. والكورة بقت في ملعبنا. يا إما الناس عايزة الموضوع يمشي لي قدام ..

ولا كمان .....

فكرة البوست ده جات لما إحتجت لمعلومة عن الخطوط الجوية الأفريقية ...

ما كان من السهل إنو ألقي المعلومة المطلوبة؛ خاصة وإنو عايزها تكون من مصادر موثوقة ..

الأخوان كبار وحليمة تفضلوا مشكورين بإنهم يتشاركوا تجربتهم مع الخطوط دي معاي في بوست إسمه السفر علي الخطوط الأفريقية!

ودي ممكن نعتبرها ضربة البداية لمركز معلوماتنا الجديد ...

أها يا جماعة، يلا نبدأ ...

طبعاً إضافة إسم سودانيز أونلاين لمركز المعلومات لأنو ده المكان الحيكون المركز فيهو. وده بعد إذنك يا بكري أبوبكر. ولو عندك أي مانع ممكن تعدل العنوان مباشرة ..

لو الموضوع مشي كويس، والناس إتحمست ليهو، ممكن نعمل مراكز معلومات متخصصة لمواضيع معينة ..

يعني ممكن يكون عندنا مركز معلومات لكل ما يتعلق بالسفر ووسائل النقل والمواصلات، وممكن يكون عندنا واحد تاني للمعلومات عن المدن المختلفة، وهكذا؛ عشان البحث يكون أسهل ...

لكن خلونا نبدأ هنا ونشوف تجاوبنا مع الفكرة كيف ..

لمتابعة كل مباريات الفرق السودانية لحظة بلحظة يمكن إستخدام هذا الموقع:

البوابة الرياضية

يوجد لنك في أسفل الجزء الأيسر من الصفحة الرئيسية ينقل لك المباراة التي تلعب الآن أولاً بأول ...

ممكن برضو أي زول يفتح بوست مخصوص لو ما عايز يسأل هنا ..

بس يكون كتر خيرو لو جاب لينا اللينك هنا بعد ما يلقي الإجابة عشان لو زول تاني عندو نفس السؤال يلقي الإجابة بسهولة

UP

up

up