والله عيب تفجير مخزن الاسلحة !!!

انفجارات عنيفة بمخزن أسلحة في الخرطوم

خبر .. وصوره مرعبه .. دخان ونار ... وعلي بعد رمية حجر من جامعة الخرطوم .. في منطقه استراتيجيه .. وتجاريه هامه ... يا ربي باكر حا نشوف شنو في ارض مخزن الاسلحة ... عماره تجاريه ضخمه ؟؟؟ ام مركز تجاري عالمي ؟؟؟؟ او اسواق الكترونيه ؟؟؟؟؟؟

الموضوع ما موضوع سياسي ولا موضوع حرب قبليه او خلافات محليه ..... الموضوع انو حتي الرأسماليه والمافيا التجاريه بدأت تلجأ الي نفس الاسلوب الرخيص والطريق الوعر الذي تسكله الحركات المسلحة .




والله عيب ....

ارجوزات يرقصون باسم السودان علي مسرح العرائس الدولي ... قتل ... ونهب ... وسلب ... وتشريد ... وابواق تدق لاعلان الحرب علي السودان ... ابواق تنادي بحروب مدمره .. وابواق اخري تنادي بحروب اقتصاديه ... وابواق نادت في الماضي باعلان حروب فرض عقوبات علي السودان ...

والله انه المضحك المبكي ... الابواق دي بتحارب في السودان ؟؟؟؟ ام في المواطن السوداني ؟؟؟

السؤال ... هل دخلت مافيا المشاريع الي هذه اللعبه القذره ؟؟؟؟؟؟؟

نعم المنطقه التي يقع فيها مخزن الاسلحه .... قد يصل سعر المتر الملايين من الدولارات ...

اذا لماذا لا تتم المشاريع بدون تفجيرات او دخان ؟؟؟ او دمار ؟؟؟ وبكل هدوء ...

وقال الشاعر السوداني ...

ابدا ما هنت يا سوداننا يوما علينا ..

تخريمه ..

المصيبه هان علي الهوان والارجوزات .....

رساله خاصه ..

يا اهلنا الفي المقرن .... من اول بيت ...اهلنا آل العظيمي ... ومرورا بالجابراب ... وانتهاءا بآل عبيد ..

الكلام ليكم ... خاصة انكم ما زلتم متمسكين باراضيكم ....

سمير.

أنت عينك في الفيل وبتطعن في ضلوا؟

دينق.

الاخ دينق ...

البلد بلدنا كلنا .... وما عايزين ليها الدمار ... ونقول كلمة الحق ... ده شغل بتاع مافيا تجاريه .. وناس ما خايفين الله .. لا في البلد ولا في الشعب ...

الحاجه الغريبه ... ناس بتتكلم عن الله والرسول وما خايفه من الموت ... البني ادم ممكن يموت في ثانيه ويخلي وراه الملايين ... لكن الجشع ..والشيطان اعمي !!!! الناس عايزه قروش بي طريقه ... ودي حاجه غريبه علينا نحن كسودانيين .... والحصل ده ما شغل ذكي .... اسع دي بدأ الكلام عن نقل مخازن الاسلحه ... وبعدها حا ينقلوا القيادة العامه ... وبعدها المطار ...

التغيير والعمار والتقدم ما بطال ... لكن لي صالح منو ؟؟؟؟ والمواطن حا يستفيد منو شنو ؟؟؟؟

يخوانا سعر متر الارض في الخرطوم اغلي ثلاثه مرات من متر الارض في نيويورك .... يا ربي ده من شنو ؟؟؟؟

بعد شويه العصابات دي حا تزحف شويه شويه ..... واسع سمعنا انو في مشروع اسمو بحيرة ابو عنجه الدوليه ... والمرورده والعباسيه وبانت راحوا في حق الله ....

انا غايتو شخصيا ... لو اقعد في ظل شجره ما حا اسيب البيت الاتولدت فيهو .... عشان يبنوا محلوا عماره او مركز تجاري ...

سمير ..

Quote: الموضوع انو حتي الرأسماليه والمافيا التجاريه بدأت تلجأ الي نفس الاسلوب الرخيص والطريق الوعر الذي تسكله الحركات المسلحة .

الكلام دا خطير جداً !!

لكن منطقي جداً ..

الاخ الحبيب نزار ...

التحليل مشي شمال ومشي يمين .... وما في تحليل منطقي غير التحليل الكتبتو ده ...


في ناس حاولت تقول القصه دي ثوره وانتفاضه .... هو اصلا الزول البيقدر يفجر ليهو مخزن ذخيره مفروض علي الاقل يكون قادر يطلع ليهو في مظاهره ....

يا خوي القصه باينه من عنوانها ...

حاجات زي البتحصل دي كنا بنشوفها في المسلسلات المصرية .. ...

الاخ سمير.

كما سميتها أنت "عصابات مافيا تجارية"
طيب من هم الذين يمثلون هذه العصابات وما هي الجهات التي تدعمهم داخل الحكومة؟
كما تعلم يا عزيزي سمير, لا يمكن لأي شخص أن يمارس أي عمل من غير مساعدة حكومية أو أفراد داخل الحكومة.

دينق.

الحبيب دينق ...

تحياتي .. وتقديري ..

احترنا واحتار دليلنا .. الحكومه ما حاجه منزله من السماء .... لكن البديل وينو ؟؟؟؟

نحن في السودان كمواطن بسيط ورجل شارع عادي ... دايرين شنو من ناس السياسه والاقتصاد والتجار؟؟؟؟ انا يخيل لي حتي الآن .. لا ناس سياسه ولا ناس اقتصاد طرحوا في اجندتهم الاجابه علي السؤال ده !!!!

انا محتار انو نص المعارضه داخل الحكومه ... وديل اكثر ناس ممكن يجاوبوك ويجاوبوني علي سؤالك ده .. انا بره السودان اكثر من خمستاشر سنه .... وزياراتنا محدوده ...

الحكومه والمعارضه داخل السودان ... فزروه والله ... خاصة لمن اقرا الاعمده في الصحف السودانية .. ناس الحكومة عاملين فيها معارضه وناس المعارضه قاعدين مع الحكومه !!!! دي يحلوها كيف ؟؟؟؟؟؟

وكان حكومه وكان معارضه ... بنقول ليهم ... بسم الله الرحمن الرحيم ..

(((فأما الزبد فيذهب جفاء وأما ما ينفع الناس فيمكث في الأرض كذلك يضرب الله الأمثال)))