نصيحة من عضو جديد لنج ..لو عايز تتزوج عرفي..جيب أضانك قريب بس ما تكلم زول, أعمل كليك هنا بسرعة!

أيوااا !!!!! عايز تتزوج عرفي أأأأأ....لا بالله ....جاي جاري جري؟؟؟؟؟ أقرا الكلام التحت ده كويس بعدين نتفاهم.....كدي أول حاجة

رحب بي.

تحياتي وأشواقي واحترامي

الزواج العرفي هذاالموضوع الضخم والذي ظل يؤرق في المقام الأول أروقة المحاكم السودانية والأجهزة العدلية كافة ...كما يورق

وبشدة كل أفراد الشعب السوداني.

عزيزي : دعني أولا أن أقول لك ومن خلال معايشتي الشخصية أن هناك الكثير من طلاب وطالبات الجامعات السودانية بعانون من تداعبات

المشكلة...هناك قسم للافتاء بديوان النائب العام وهي الجهة الرسمية المناط بها اصدار الفتاوي ..وله اجراءات قانونيةدقيقة ...علي

أن يقدم الشخص المعني طلبا مكتوبا مشفوعا بالمسألة المرادالفتوي فيها... بعد سداد رسوم رمزية....ويستغرق الفصل في المسألةأسبوع

الي عشرة أيام.


ثانيا :

ما هو تعريف الزواج العرفي وفقا لقانون الآحوال الشخصية السوداني لسنة 1991؟؟:

لم يعرف قانون الأحوال الشخصية السوداني علي تاريخه ما يعرف بالزواج العرفي ولكنه عرف عقد الزواج وبمفهوم المخالفة يعتبر وكأنه

عرف كل عقد قد يلتبس بعقد الزواج الصحيح أو يماثله في بعض من أركانه وشروط صحته. عرفت المادة المادة 11 من القانون عقد الزواج

بأنه :

11 ـ الزواج هو عقد بين رجل وامرأة على نية التأبيد، يحل إستمتاع كل منهما بالآخر، على الوجه المشروع.

كما نصت المادة 25 منه علي شروط صحة عقد الزواج وهي شروط واردة علي سبيل الحصر:

شروط صحة العقد

25 ـ يشترط لصحة عقد الزواج:

(أ ) إشهاد شاهدين،

(ب) عدم إسقاط المهر،

(ج ) الولى بشروطه، طبقاً لأحكام هذا القانون

وعالجت المادة 32 منه مسألة الشرط التالت من شروط صحة عقد الزواج وهو شرط الولي علي النحو التالي :

الولاية في الزواج

ترتيب الأولياء.

32ـ (1) الولي في الزواج هو العاصب بنفسه , على ترتيب الإرث.

(2) إذا استوى وليان في القرب , فيصبح الزواج بولاية أيهما.

(3) إذا تولى العقد الولى ألابعد , مع وجود الولى الأقرب فينعقد موقوفاً على إجازة الأقرب.

(4) يصح العقد بإجازة الولى الخاص إذا تزوجت امرأة بالولاية العامة مع وجوده في مكان العقد أو في مكان

قريب يمكن اخذ رأيه فيه , فإن لم يجز، فيكون له الحق في طلب الفسخ ما لم تمض سنة , من تاريخ الدخول.

هذه هي شروط صحة عقد الزوج وسأبين لاحقا الحكم الشرعي حسب النصوص الواردة في القانون في حالة تخلف كل أو أحد من شروط

صحة عقد الزواج.

بعد سرد شروط صحة عقد الزواج ادناه أركان عقد الزواج وفقا للمادة 12 من القانون:

ركنا عقد الزواج

الركنان.

12 ـ ركنا عقد الزواج هما:

(أ ) الزوجان،

(ب) الايجاب والقبول.


شروط صحة الركن الأول ( الزوجان )

الزوجان

13ـ يشترط فى الزوجين أن:

(أ ) لا تكون المرأة محرمة على الرجل تحريماً مؤبداً، أو مؤقتاً،

(ب) يكونا معينين،

(ج ) يكونا طائعين،

(د ) يكون الزوج كفؤاً للزوجة، وفقاً لأحكام هذا القانون.


شروط صحة الركن الثانى

( الايجاب والقبول )

الايجاب والقبول.

14 ـ يشترط فى الايجاب والقبول أن:


(أ ) يكونا منجزين، غير دالين على التأقيت،


(ب) يوافق القبول الايجاب، صراحة، أو ضمناً،

(ج ) يكونا فى مجلس واحد،

(د ) يبقى الايجاب صحيحاً، إلى حين صدور القبول،

(هـ) يكون كل من العاقدين الحاضرين سامعاً كلام الآخر، فاهماً أن المقصود به الزواج،


(و ) يكونا بالكتابة، فى حالة الغيب، أو العجز عن النطق، ان تعذرت الكتابة فبالاشارة المفهومة.


ثم عرفت المادة 53 من القانون أنواع عقد الزواج وهما الزواج الصحيح والزواج غير الصحيح.

نوعا الزواج.

53ـ الزواج صحيح وغير صحيح.

الزواج الصحيح.

54 ـ الزواج الصحيح هو ما توفرت أركانه، وجميع شرائط صحته، وفقاًلأحكام هذا القانون.


أنواع الزواج الصحيح.

55ـ الزواج الصحيح نافذ لازم، أو نافذ غير لازم، أو غير نافذ.



تعريف أنواع الزواج الصحيح.

56ـ الزواج:

(أ ) النافذ اللازم، هو ما لا يكون موقوفاً على إجازة أحد، ولا قابلاً للفسخ، طبقاً لأحكام هذا القانون،

(ب) النافذ غير اللازم، هو الذى يقبل الفسخ، بسبب يسوغه هذا القانون،

(ج ) غير النافذ، هو ما إنعقد موقوفاً على إجازة من له حق الإجازة.

الزواج الصحيج النافذ اللازم.

57ـ الزواج الصحيح النافذ اللازم تترتب عليه، منذ إنعقاده، جميع آثاره الشرعية،



الزواج الصحيح غير النافذ.

58ـ (1) الزواج الصحيح غير النافذ لا يترتب عليه شئ من الآثار قبل الاجازة، وإذا أجيز، فيعتبر نافذاً

من وقت العقد.

(2) اذا طرأ دخول على الزواج غير النافذ، فيأخذ حكم الزواج الفاسد، بعد الدخول.



نوعا الزواج غير الصحيح.

59ـ الزواج غير الصحيح، باطل أو فاسد.



تعريف الزواج الباطل

60ـ الزواج الباطل، هو الذى إختل ركن من أركانه، أو شرط من شروط صحة الركن.


علي ذلك يتضح جليا أن عقد الزواج الذي ينعقد بدون الولي هو زواج أختل فيه شرط من شروط صحته , وبالتالي ينطبق عليه تعريف

الزواج الفاسد وقد عرفت المادة 62 ماهية الزواج الفاسد :

62ـ الزواج الفاسد، هو ما توفرت أركانه، وإختل شرط من شروط صحته.

أما آثار الزواج الفاسد فهي كما يلي:

63ـ الزواج الفاسد لا يترتب عليه أى أثر، قبل الدخول.

آثار الزواج الفاسد بعد الدخول.

64ـ يترتب على الزواج الفاسد، بعد الدخول، الآثار الآتية:

(أ ) وجوب الأقل من المهر المسمى ومهر المثل،

(ب‌) ثبوت النسب،

(ج) وجوب العدة.



ميراث ولد الزنا وولد اللعان.

406 ـ يرث ولد الزنا وولد اللعان من أمه وقرابتها، وترثه أمه وقرابتها.


أتمني أن أكون قد وفقت في توضيح الأمر والذي أعتقد أن قانون الأحوال الشخصية السوداني قد فصله بوضوح شديد , عندما لم يعترف أصلا

بماعرف بعقد الزواج العرفي , فهو أصلا ليس عقدا وفقا لهذا القانون , وهذا المصطلح هو مصطلح مجازي لا وجود له في المذهب الحنفي

وهوالمذهب المعمول به في المحاكم السودانية استنادا علي نص صريح في قانون الأحوال الشخصية السوداني لسنة 1991. هذه التسمية معروفة

في قانون الأحوال الشخصية المصري, وسبب تسميته بهذا الأسم لأنه لا يشترط توثيقه لدي الجهات الرسمية كالشهر العقاري في مصر, وسمي بهذا

الأسم فقط لأغراض التمييز بينه وبين العقد الرسمي.

والله أعلم

دمتم أحبتي ونلتقي.

أخوكم

محمد عبد المطلب

مبرووووووووووووك يا محمد
جيت بالباب عديل كده
دي دعوة ناذر الخليفة

شكرا على البوست الافتتاحي الجميل

الأخ حيدر

شكرا لك علي الترحيب ....دوما كما العهد بك .....سباق في كل شئ .....فأنت أول المرحبين .....وعبر بوستك الجميل المفتوح للقراء كانت بدايتي معكم....


تحياتي وامتناني علي عبارات التشجيع.... علي أمل أن أكون أضافة ترضي طموحاتكم.


محمد عبد المطلب

عاد يا محمد عبد المطلب يا ولدي كجتني في الدنيا كلام القانوننين الواحد فيهم يقول ليك كلام مكتوب بالعربي تقراه من اوله لاخره تمرق منه كيت يتخيل لي دا سر المهنه عشان تكون في مهنه اسمها المحاماه .
اسه قدر ما حاولت اعرف زواجي دا فاسد ولا مستوفي للشروط ما عرفت
غايتو المهر دا يعميني فيه ما شفتوا

الف مراحب بالعضو محمد عبد المطلب في دار السودانيين العامرة

اقامة طيبة....وفي انتظار عطاء متميز باذن الله.

هشام هباني

عزيزنا محمد

سلام

14

Quote: ـ يشترط فى الايجاب والقبول أن: (أ ) يكونا منجزين، غير دالين على التأقيت،

أنا غايتو في زواجي كنت غير دال على التوقيت .. جاي منطلق ساااااكت

أشرح لينا الشرط دة يا أبو حميد

تخريمة :
دوما ... غايتو لو مهرك طالبتي بيهو بأثر رجعي و بي أرباحو ... ممكن براحة تعمل ليكي عفراء مول

أخي محمد عبدالمطلب ،

لك التحية مقرونة بالترحيب الحار بدخولك
لحوش بكري العامر .. بس الظاهر جيت خاشي
تووش ونَفَسَك قايم وكأنك هربان من أولياء
أحدى الطالبات ممن ابتلين بما سمي بالزواج
العرفي .. ياربي تكون عملتها وجاي كمان
تورطنا معاك في هكذا مسألة معقدة ؟!

مرحب بيك وبي موضوعك الدسم ، لكن بس سؤال
صغيروني كده يتراقص أمام أعيني:

Quote: ما هو تعريف الزواج العرفي وفقا لقانون الآحوال الشخصية السوداني لسنة 1991؟؟:

هل التعريف الذي ورد في قانون الأحوال الشخصية مستمد أو نابع من الشريعة
الاسلامية ، أم هو من وضع المشرعين ، يعني قانون وضعي ؟
وأيهما أفضل لنا (؟!؟!؟!) - من منظورك أنت ومن وحي قراءاتك أو معايشتك
و اطلاعك لهكذا نوع من الزواج - أيهما أفضل أو أحسن .. هذا الزواج العرفي
أم زواج المسيار الذي شاع في بلدان الخليج وبالذات السعودية ، وأفتى بجوازه
كبار علماء المملكة . هذا طبعاً إذا كان لديك خلفية عن زواج المسيار .

تخريمة : أنا والحمد لله متزوج (زي أخونا وريسنا ابو جهينة) وما ناقص وجع راس تاني ، بس عاوز أتنور عشان أفيد أحبابي من حولي ممن لم يتأهلوا بعد .. لسببٍ أو آخر .

لك مودتي ، والف مرحب بيك مجدداً .



( ليمو )

دومة : أزيك

عارفة لو كنتي عرفتي زواجك فاسد ولا ما فاسد من الكلام المكتوب ده ...........تبقي هددتي مستقبلنا ............. أبدا والله ......الكلام ده واضح شديد بس انتي مزعلاكي حكاية المهر الملحوكي فيهو داك .............كدي ركزي شوية ............وأعيدي البصر كرتين ............. ... حتلقي الموضوع في منتهي البساطة ........بس حاولي تنسي الماضي .وفكري انو بكرة دايما أحلي من الليلة ...والليلة دايما أحلي من أمبارح .............والجاتك في مهرك سامحتك وهنيالك يا فاعل الخير والثواب .......... دي فرصة للمطالبة بحقوقك ......... وأن تقفي في وجه التهميش بكل أشكالو ...........ودي فرصة برضو لمناهضة التمييز ضد المرأة.

تشكر يا هباني علي الترحيب............ وعلي رأيك انشاء الله نكون أضافة قيمة للارتقاء بالمنبر ........وتقديم ما يرضي تطلعات وأشواق الجميع .......... نشوفك. وكان حيين بنتلاقي .

Quote: عاد يا محمد عبد المطلب يا ولدي كجتني في الدنيا كلام القانوننين الواحد فيهم يقول ليك كلام مكتوب بالعربي تقراه من اوله لاخره تمرق منه كيت يتخيل لي دا سر المهنه عشان تكون في مهنه اسمها المحاماه . اسه قدر ما حاولت اعرف زواجي دا فاسد ولا مستوفي للشروط ما عرفت غايتو المهر دا يعميني فيه ما شفتوا

هههههههههههههههههههههههههههههههههههههههههههههههههههههههه...


أهلا بمحمد عبدالمطلب وشرفت البيت...

لكن بي كلام القانون دا دحين ما عصرت علينا شوية...

Quote: (4) يصح العقد بإجازة الولى الخاص إذا تزوجت امرأة بالولاية العامة مع وجوده في مكان العقد أو في مكان قريب يمكن اخذ رأيه فيه , فإن لم يجز، فيكون له الحق في طلب الفسخ ما لم تمض سنة , من تاريخ الدخول.

دا لكين ما شرط نكته
يعني لو الولي الخاص دا ما وافق بعد 11 شهر من دخول الزوج وربما اكون ولدت يتم فسخ العقد لانه الولي الخاص ما وافق ؟؟؟!!! يا اخوي دا والله هضم لحق المراه في تقرير مصيرها .

مرحب بي أبو جهينة

ماقلت لي مالك جاي منطلق؟؟؟ دي أول مرة كنت تعرس ولا شنو؟؟؟؟ ما عندك خبرة ...........معليش !!!! غير منجزين وغير دالين علي التأقيت يعني ما يكون الاتفاق علي العرس لفترة مؤقته...... يعني النية تكون العلاقة الزوجية مستمرة ..........لانو في ناس مثلا ......بتزوجو فترة الدراسة بس وبعد ينتهمو من دراستو يشتتو ......والأمثلة كتيرة بنجيها بي رواقة.........
سعدت كثيرا بي مداخلتك والاهتمام. تحياتي.

Quote: ميراث ولد الزنا وولد اللعان.

يا ولد هوي النايم ليها شنو؟؟؟
تعال اسع اشرح لينا كلامك داوهدبتنا
عرفناه ولد الزنا ؟؟
ولد اللعان دا شنو ؟؟؟

يا دومة : شكرا علي سؤالك ......... فعلا سؤال في غاية الأهمية .....


موصوع الولي في عقد الزواج موصوع خطير بس الناس ما مدياه اهمية .......عشان كدة أي عقد بدون الولي مشكلتو كبيرة شديد ............ والمفروص الناس تعرف بالذات البنات عشان الأثار البترتب علي كدة بتكون هي متضررة أكثر خاصة لو حصل انجاب.....

أما ولد اللعان فهو : لما الزوج يتهم زوجتو بالزنا لا سمح الله ..... وفي نفس الوقت ما عندو دليل ...... طبعا انتي عارفة اثبات جريمة الزنا حسب الشريعة مسألة صعبة جدا... عشان كده المحكمة بتقول ليهم الاتنين يتلاعنو .... يعني كل واحد يحلف انو صادق وانو لعنة الله عليه أن كان الطرف التاني من الصادقين .......... لما يحلفو الاتينين ويتلاعنو ........ المحكمة بتفرق بيناتهم .... وكل واحد يروح لي حالو .... ولو في ولد جا بعد دالك بكون ولد لعان .... وده القصدو النص بولد اللعان ...وعندو أحكام خاصة في الميراث.


والله أعلمِ

محمد عبد المطلب

الاخ / محمد عبد المطلب
بركة الجيت
والف حمد لله على السلامة
اكيد الشئ الزكاك هو كتاباتك الرائعة جدا في بريد القراء
ونريدك ان تكون مثل ممثل القراء في الصحف الامريكية
تنظر بعين فاحصة لكل البوستات وتعلق عليها كما فعلت من قبل
وبداية موفقة جدا بهذا الموضوع المسخن جدا في السودان
الان وفي عدد من الدول العربية
وطبعا هناك الدعوة التى نادى بها شيخنا الزندانى
وهى بعنوان زواج فرند
ياريت تعرج عليها برضو بالشرح وتفيدنا
ولكم وافر الشكر والتقدير
حقية سعدنا بوجودك بيننا
ونتمنى لك اقامة سعيدة ومديدة في حوش سودانيزاون لاين
الرائع بروعة ناسو
ودمتم .ز مودتى

Quote: عشان كده المحكمة بتقول ليهم الاتنين يتلاعنو .... يعني كل واحد يحلف انو صادق وانو لعنة الله عليه أن كان الطرف التاني من الصادقين .......... لما يحلفو الاتينين ويتلاعنو ..

النبي عليك يا محمد ولدي اسه في داعي الطفل المسكين دا يخرج للحياه وهو ود لعان العلم اتقدم زينه دي ان اي تست وتثبت الابوه وبعدها كل زول ياكل نارو .

اهلا عبد الحليم

عارف الورطة بتاعة الزواج العرفي ورطة عصيبة بشكل ولا تخطر علي بالك .... الحكاية ما ممكن تتخيلها الا اذا شفت المتورطين فيها .... تعريف الزواج العرفي : قانون الأحوال الشخصية لم يعرف الزواج العرفي بل أنه ليس هناك ما يعرف بالزواج العرفي كمصطلح قانوني .... ولكن عندما قلت تعريف الزواج العرفي في القانون السوداني سيتبادر الي الذهن - وبحق - ان القانون قد نظم المسأ لة ... فسردي للأمر بهذه الطريقة . كان بغرض ان يتم شرح المسألة بتسلسل يجعل الأمر أكثر وضوحا ... وعلي الرغم من ذلك وحسب ما هو مذكور في قلب الموضوع ... وحسب مفهوم المخالفة .... فأن تعريف المشرع للزواج الصحيح ... يمكن من خلاله تعريف ما هية الزواج العرفي ...........أما عن وزاج المسيار ...أعلم أخي أن السودان به كل شئ ... حتي ما لا يمكن أن يخطر ببالك .... وعن رأي ....... فمبلغ علمي أنه في نهاية المطاف لا يصح الا الصحيح ... أما الزبد فبذهب جفاء.... وزي ما بيقولو خليك في السليم يا حليم.

تحياتي

محمد عبد المطلبِ

يا سلام يا محمد داالكلام وحجزنا قدام زواج المسيار البوي فريند موجودات بكثرة في السودان ومنزمون طويلة اي زوجة قاعدة مع اهلها يجيها راجلها من ويكند لويكند دا ياهو المسيار والبويفريند حيث بهما كل شروط الزواج الصحيحة

نذار

حبابك والجابك يجيب عقابك ............ منور والله ..........كل السعادة بالشوفة ........وحسن الاستقبال... نشوفك وأبقي قريب ... وما طول الغيبة

سيف الدين العوض


تسلم يا أمير


والله كلامك بالحيل مشجع ... ما تشوف مننا الا كل خير ............مع الحق أينما كان .............تشكر علي تشجيعك .......... طمنتنا والله. خليك جنب العراضة ما تمشي بعيد.

أهلاً بيك وحبابك عشرة.

ياخوي عرفي شنو؟ هسة ناس الخليج طلعوا لينا بي حاجة إسمها زواج المسيار. وعندنا هنا يوسف القرضاوي حلله (بالفم المليان)، وبعدين إتراجع في تحليله لما إتزنق. طبعاً الجماعة ديل بيحللو ويحرمو حسب المصلحة. طيب ما تفيدنا إنت والأخوة القانونيين في المنبر عن زواج المسيار كمان أفادكم الله.

ومرحب بيك مرة تانية

Quote: دا لكين ما شرط نكته يعني لو الولي الخاص دا ما وافق بعد 11 شهر من دخول الزوج وربما اكون ولدت يتم فسخ العقد لانه الولي الخاص ما وافق ؟؟؟!!! يا اخوي دا والله هضم لحق المراه في تقرير مصيرها

.


هذه واحده من الإنتقادات التي توجه لقانون 1991 ..
بالطبع هناك نقاط أخري..وكلا تكرث للتحكم الذكوري..
موضوع مهم وشيق أيضا..

شكرا محمد عبدالمطلب

Quote: هذه واحده من الإنتقادات التي توجه لقانون 1991 .. بالطبع هناك نقاط أخري..وكلا تكرث للتحكم الذكوري..

والله يا مني يا اختي
كان ما خايفه الكترابه تقوم كان اسه قمت بصياغه قانون مدنكل يحفظ للمراه حقوقها من غير تكريس للتحكم الذكوري دا

مني خوجلي مرة واحدة



ده ايه النور ده يا جدعان؟؟ , والله منورة , قانون الأحوال الشخصية السوداني وغيره من القوانين تمت صياغتها في فترة زمنية محددة لتخدم توجهات

وأهداف سياسية صرفة , فكان لابد له أن يكون مرآه صادقة لواضعية. هناك الكثير , فقط انتظرونا.


أسعدتني المشاركة

لا ...... يا ابنتي العزيزة ........... ما زلنا بخير.

كيف يا بيان



زواج المسيار موجود في السودان ....لكن غير منتشر .............بعدين هو زواج ما متوفرة فيه أي من أركان العقد أو شروط صحته ...........الوجه ده

من السودان الحمدلله غير مجاهر به .... أما الزواج العرفي وللحقيقة موجود في بعض الجامعات السودانية ...... ومنها قضايا وصلت أروقة المحاكم

.............. علي الرغم من ذلك حواء السودان ما زالت بخير ... رغم كل شئ ..... لسة البنات المحترمات والأولاد المحترمين يملو العين والحمد لله .

تحياتي

محمد عبد المطلب

Mohamed Abdelmotalib Hasan

جئت للترحاب بك والإشادة بالموضوع الحيوى

تحياتى

محمد ما عندي وقت عشان اكتب اسمك الطويل ده


لكن سمعت تحت تحت كده انك جايي تنضف المنبر من الطابور السادس


____

عضلات وهرشات وكده يا مان موووش

كويس



1000 مرحب

يا زول يا زول : انت وين ماشي ؟؟ أنا ماشي الديش أبقي دياشي .

جبابتين وتلاتة متلته , عساك عافيه , عقابك زين أنشاء الله , كتر خيرك , بركة الشفناك طيب.

اهلا بيك تاني , وكان حيين بنتلاقي في الرملة الدقاقة.


محمد عبد المطلب

دومة يا دومة :


لحدي ما ال دي ان ايه يجينا في السودان ............. حيكون في مليون ملاعنة .................... ولد اللعان هين .... المشكلة في الأطفال البستبدلوهم بالخطأ في غرفة الولادة ..... وده موضوع بتاع

بوست منفصل ............بجيهو قريب ........... ما تمشي بعيد ........آنستينا والله.


بمشي وبجي تاني.


محمد عبد المطلب

محمد عبد المنطلب
الف مرحب بيك .
امنياتي باقامة طيبة.
هنولولو دي قالوا السنة فيها كلها شهر عسل.
عرسان ساااااكت. عشان كدا غير سيرة العرس ما عندك شغلة.
ياكا زولي تب.
ارقد عافية.
مع ودي

معاذ وينك يا شاب ؟؟

شكريات كميات , علي قولك هونولولو دي السنة كلها شهر عسل , بس أقول ليك سر وما تكلم زول ؟ السنة هنا فيها تلتاشر شهر .
يعني لو جيت هنا حتكون سارق من عمرك شهر سلفقة ساكت , يالله ياخي !!!! كده ذكرتني نكتة ..... عارف عندي صحبي
كده كوري الجنسية قالي انو عمرو لمن يكون في كوريا عشرين سنة وفي نفس الوقت لما يكون في أمريكا بكون تسعتاشر سنة, قلت ليه كيف
الكلام ده يا كوري انت ؟؟؟ قال لي نحن بنحسب المدة البنقعده في بطن الأم , قلت لي والله حنك برضو!!! , صحي انت الفترة دي محسوبة علي
حساب منو بالله ؟؟؟

شكرا يا شاب علي الترحاب , خليك قريب , وكان حيين بنتلاقي في الرملة الدقاقة



محمد عبد المطلب

محمد أبو العزائم

تشكر يا الأمير , شرفت المكان , زواج المسيار ده موضوع طويل جدا , بجيهو علي رواقة , سعدت كثيرا بترحيبك عزيزي.

عبد المنعم سليمان ؟؟؟


وين انت يا زول , هسه عليك الله الاسم ده طويل , خلاص قمنا للكسل ؟؟؟؟ استخباراتك عجيبة والله ؟ لكن تعال النسألك ؟

انت يا تو فيهم ؟؟ شبقبق ؟ ولا قزازة ؟؟ ما تقولي ما عارف قزازة دي شنو ؟؟ مش قلت استخباراتك مية مية ؟ ولا فراخ الجمعية ؟؟

طبعا لو ما عارف قصة قزازة دي ( وده مستبعد ) امشي فتش بوست حيدر بتاع القراء.

كدي أول حاجة : بسرعة حدد لي موقعك وين انت هسة ؟؟ بعدين كدي كرري لي الكلمة دي تسعة مرات ورا بعض بسرعة : شبقبق شبقبق.

تانين بالتبادي : دخل الكلمة دي في جملة مفيدة بدون ما تستخدم حرف الشين .

والله يا عبد المنعم : أعز أصدقائي وأطول وأروع صداقاتي مع احبائي في غرب السودان , حتي أنني لا أحب مثل هذا التقسيم حسب الاتجاهات الجغرافية,

عارف راسك ضرب , عارف عارف والله , ما ملخبط بيناتكم .

لينا لقاءات أكيد ........ ما بوصيك أبقي عشرة

الاخ الحبيب / محمد

لك التحية والتقدير

ومرحبا بك اضافة ثره لهذا الموقع ..


بالمناسبة كثرت مسميات الزواج واهدافه في الاونة الاخيره ,

الزواج العرفي وزواج المتعة عند الشيعة

.وزواج الفريند في اليمن وزواج المسار .

.واخيرا زواج المسفار ...وهذا اخر الاحزان .

.ساحكي لك عنه لاحقا


كت اووت:-


مسميات كويسه كلها بتصب في مصلحة الوطن والمواطن .....الله يستر

وين يا خضر ؟؟


أحوالك والدنيا عاملة شنو معاك ؟ انشاء الله رايق ومروق ؟؟ سعدت بترحابك الشياكة , كللك ذوق يا أمير , الزواج وأنواعو الكتيرة دي
من كترة القروش ومرات من قلتها , المهم في النهاية الأمور كلها واضحة , ما في حاجة غامضة , الشروط محددة بدقة للزواج الصحيح ,
أركان وشروط صحته وكل ركن عندو شروط أوضح من الشمس , بعد ده كل زول معلق من عصبتو.

الأخ محمد لك تحياتي واحترامي
مرحبا بك في الحوش الكبير
الظاهر عليك من الشعبيه.. انا لم ادرس
الابتدائي في الشعبيه او مدرسة الخشب
ولكن اخواني الحارث ومحي الدين وشهاب محمد عثمان درسوا بها
وانا من حلة الصديق شرق سوق الشعبيه
مباشرة وشرق الجامع .. والله يا أخي انا مشتاق
شديد لاي شخص من ريحة الحبايب بالشعبيه..فقد
ترعرعنا بها ولنا فيها ذكريات وذكريات..
والتحيه ايضا للأخت دوما والتي اظنها ايضا من عندنا..اتمنى
ذلك لانها تحمل سمات ناس الشعبيه وده تحيّز عديل كده..
اعتذر لهذه المداخله..
ولكني اعتبرك بهذا البوست كنت موفقا في اختيار
الموضوع فهو من المواضيع التي تهمنا وهنالك الكثير من
الأسئله التي تدور في الأذهان وتحتاج من هو متخصص مثلك
ولكن كما قالت الأخت دومه انتو يالمحامين تقعروا في
الكلام فنرجو ان تكون بسيطا في الشروح ..
ولكم مودتي
عزالدين

يا عز الدين

والله كم فرحت بمداخلتك لأنها اعادتني الي مرتع الصبا وأيام من العمر لن تمنحي من الذاكرة , حتي الآن لم أجد مكان تسكن اليه نفسي وينسيني كل الدنيا
مثل الشعبية شمال , غريب أمر أن ترتبط سعادتك بمكان ويحيطك بالحب كأحاطة السوار بالمعصم , أذكر ان لي صديق ودرس معي بالشعبية وبحري الحكومية
اسمه خالد محمد عثمان , لكن اسمك ده لو الفي بالي تكون مبالغة ومصادفة غريبة , كدي وريني اسمك رباعي وأعمامك ومسقط الرأس وبعدين نتفاهم!!!

سعدت يالمشاركة والاشادة بالموضوع.

نلتقي

الأخ محمد صباحاتك بيض
شكرا على الرد..
انا اسمي عزالدين محمد عثمان محمد
من المحس سلنارتي وما جاورها حلة
جديد والكرمتين النزل والبلد اعمامي
عبد المجيد عثمان سواق تاكسي والدكتور
عبدالكريم عثمان اخصائي الباطنيه والقلب
والمتزوج من روسيه هي جينا وعمتي إزلال عثمان
والدة صلاح وصالح (بامريكا) ومحمد ابناء بدري صالح
الله يرحمه ووالدتي مشهوره باسم فاطمه شوّه ..
اها انشاء الله اكون زولك!! وانت من اسمك تكون من إندنا
ولكني لاني مولود بالخرطوم ولم ازور البلد إلا مره واحده
في حياتي عشان كده معرفتي بالأهل محدوده ..
ولو كنت انا ام لم اكن زولك فنحن اخوان في هذه الغربه
فانا اعيش في كندا ولم اشاهد السودان سنين وماعارف ح ارجع متين

لك تحياتي ودمت
عزالدين

محمد سلام
شوف الإيميل بتاعك
عزالدين

Quote: والتحيه ايضا للأخت دوما والتي اظنها ايضا من عندنا..اتمنى ذلك لانها تحمل سمات ناس الشعبيه وده تحيّز عديل كده..

شكرا يا عزو ولك من التحايا اجملها ومن الاماني اطيبها
ما مشيت بعيد
قضيت سنوات الطفوله بالشعبيه والصبا الباكر
لكني بكون من جيل حبوباتكم .العيال كبروا
مرحب بيك كتير يا عزو ولي عظيم الشرف بمعرفتك

دومة وعزالدين

أهلا بيكم وشرفتونا .............. أبقو قراب .

Quote: دومة وعزالدين أهلا بيكم وشرفتونا .............. أبقو قراب .

لوول ما تستهبلني اعزمني هنولولو بقطع تظكرتي وبجي انا والحاج

اها أقول ليك حاجة يا دومة؟؟؟؟ التذكرة ذاتها من عندي .... تستاهلي وأكتر.

Quote: اها أقول ليك حاجة يا دومة؟؟؟؟ التذكرة ذاتها من عندي .... تستاهلي وأكتر.

لووول امانه ما اتمقلبت ي I accept your generous offer loooooooool

Doma:

Irrevocable offer, therefor:

Contract formed

Quote: Doma: Irrevocable offer, therefor: Contract formed

اول شئ نقوم بتامين الكونتراكت د اacceptance confirmed وضمنا شهر عسل في هنولولو يا اخ معرفتك مكسب والله وتب بنجيكم بس جهزوا لينا مكان السكن الباقي علينا

محمد عبد المطلب سلام ومشكور على الطرح الخفيف للموضوع التقيل ده
كدى عليك الله عاين لم لى تعريف الزواج فى المادة 11 ده
- الزواج هو عقد بين رجل وامرأة على نية التأبيد، يحل استمتاع كل منهما بالآخر، على الوجه المشروع.

وتعال لى المواد أدناه وقول لى صحى عقد الزواج ده عقد بين رجل وامرأة واللا بين رجلين؟
الكفاءة فى الزواج
الكفاءة من جانب الزوج
20- تعتبر الكفاءة من جانب الزوج، عند ابتداء العقد.
العبرة فى الكفاءة
21- العبرة فى الكفاءة بالدين والخلق.
حق الكفاءة
22- الكفاءة حق، لكل واحد من الأولياء، فإن استوى الأولياء، فى الدرجة فيكون رضاء أحدهم كرضاء الكل.
ثبوت حق الكفاءة
23- يثبت حق الكفاءة للأقرب. إن اختلف الأولياء فى الدرجة.

زواج البالغة بغير رضاء الولى الأقرب من غير كفء
24- يجوز للولى الأقرب طلب فسخ العقد، إذا زوجته البالغة العاقلة، بغير رضائه، من غير كفء، فإن ظهر بها حمل، أو ولدت، فيسقط حقه.

شروط صحة العقد
25- يشترط لحصة عقد الزواج:
(أ) إشهاد شاهدين.
(ب) عدم إسقاط المهر.
(ج) الولى بشروطه، طبقاً لأحكام هذا القانون

الواحد لو اتمقلب برجعوا ليهو المهر ولا الجاتك فى مالك سامحتك1
جنى

Quote: وضمنا شهر عسل في هنولولو يا اخ معرفتك مكسب والله وتب بنجيكم بس جهزوا لينا مكان السكن الباقي علينا

دومة : السكن ...........لو شالتكم هونولولو نشيلكم جوي العين وجوي الخاطر............ بس متين تصلونا؟

هونو

هولن

هوهوه..

هونولولي

هونو ... شنو يا محمد

اسمك صعب ومكان اقامتك اصعب


رفقا بالباندوث يااخ


___

بالله انتو في هونولولو بتعرفوا العرفي ؟


منعم ما بتاع الشبق

بتاع الصورة

Quote: شكرا يا عزو ولك من التحايا اجملها ومن الاماني اطيبها ما مشيت بعيد قضيت سنوات الطفوله بالشعبيه والصبا الباكر لكني بكون من جيل حبوباتكم .العيال كبروا مرحب بيك كتير يا عزو ولي عظيم الشرف بمعرفتك

العزيزه دوما لكي تحيات وسلام مني والأسره
نحنا جينا الشعبيه شمال 1966 يعني انتو جيتو متين؟؟
ولكي مودتي
عزالدين

العزيزة دكتورتنا اسماء

منذ فترة ابحث عن كيف ان هناك في السودان من يعقدن بالقاضي
بعدم رضاء الولي...
وكيف يتم ذلك وعلى اي اساس؟
اتمنى اعرف الراي القانوني في هذا..

جني , أسماء عبد المنعم قزازة( الماشبق) , بيان

جني : لو أتمقلبت , تستاهل دقة وتدفع حق السوط وأجرة الجلاد ( داقس و ليك عين تتكلم؟).
عبد المنعم : في هونولولو ما بنعرف الزواج العرفي , هو البعرفنا.
أسماء : سؤالك -وبحق- أزمة متحركة , لمعضلة قانونية كبيرة : استمد قانون الأحوال الشخصية
السوداني أحكامه من المذهب الحنفي , أعلم أن السؤال ما زال قائما , لكن لابد من مصدر للتشريع
ومن ثم تبني مذهب فقهي يمكن الاستناد عليه , وقد أختار المشرع المذهب الحنفي لاعتبارات كثر,
جدير بالذكرأن المشرع عندما فعل ذلك وضع في اعتباره تكوين المجتمع السوداني وعاداته
وتقاليده وهو أمر نص عليهأيضا في نفس القانون لا يسع المجال الآن الاسهاب فيه واليكي نص
المادة 5 من القانون :
المسائل التى لا حكم فيها وسلطة إصدار القواعد.
5ـ (1) يعمل بالراجح من المذهب الحنفى فيما لا حكم فيه بهذا القانون، ويصار فى حالة
المسائل التى يوجد لأصلها حكم أو تحتاج الى تفسير، أو تأويل، الى المصدر التاريخى، الذى أخذ منه القانون.
ولعل من نافلة القول أن أحكام الولي بأعتباره أحد شروط صحة العقد, لا يغير من حقيقة هامة
تجعل من أمر اشتراط الولاية غير ذي بال أذا ماتم العقد دون موافقتها ورضاها الصريح ,
وهو أحدي الضمانات الحقيقة لها , فشرط الولاية غير ذي أثر دون موافقتها, وقد نصت
المادة 34 من علي الاتي :
تزويج الولى للبكر البالغ.
34ـ (1) يزوج البالغ وليها، بإذنها ورضـائها، بالزوج والمهر،ويقبل قولها فى بلوغها،
ما لم يكذبها الظاهر.
(2) يلزم قبول البكر البالغ، صراحة، أو دلالة، إذا عقد عليها وليها، بغير إذنها، ثم أخبرها بالعقد.

بيان : تزويج القاضي دون أذن الولي :
هناك سوابق قضائية عده في هذا الخصوص, وقد نظم القانون هذه المعضلة بدقة , وأحاط الأمر بضمانات
حتي لا يساء استخدامها , يجوز لمن رفض وليها تزوجيها من شخص ما دون مسوغ شرعيي أن تطلب
من القاضي تزوجيها بولايته هو , علي ان الأمر ليس بالبساطة التي قد تتبادر الي الأذهان , فهناك
اجراءات دقيقة حتي يزوج القاضي دون موافقة الولي , وكما هو معلوم أن تدخل القضاء حال رفض
الولي تزويج الفتاة بلا مسوغ شرعي , هو محمدة للقانون , ويتوافق مع ورد في الحديث الصحيح
عن ضرورة قبول من ترضون دينه وخلقة ... , ليس هذا فحسب , بل أن المحكمة مقيدة بأعلان الولي
ليبدئ اعتراضه علي الزواج , فاذا نجح في تقديم مسوغ شرعي يبرر عدم اجابة طلب التزويح فليس
علي القاضي الا أن يرفض الطلب , والا فتجاب الي طلبها , علي ان هذا الأمر عندما يتم نظره
أمام المحاكم ينظر اليه كأي نزاع تراعي فيه كل الأحكام الواجب مراعتها في نظر غيرها من الدعاوي ,
فلا يتبادر الي الأذهان أن القاضي هو من يمثل مصلحة مقدمة الطلب أو الولي واليكي نص المادة 37 من القانون :

تولى القاضى التزويج.
37-(1) إذا امتنع الولى عن تزويج موليته، فيجوز لها أن تطلب من القاضى تزويجها.
(2) يجوز للقاضى أن يأذن بتزويج من طلبت الزواج، إذاثبت له أن وليها ممتنع عن التزويج، بلا مسوغ
شرعى.
ولاية القاضى.
( 38) القاضى ولى من لا ولى له.

والله أعلم

من واقع حال أروقة المحاكم , يعتبر شرط الكفاءة من بين الأسباب التي أدت لمشكلة الزواج العرفي,
وهناك خلط بين الكفاءة وفقا للعادات السائدة ويبنها وفقا لمقتضيات الشرع , لاحقا بمكن القاء مزيد من
الضوء علي هذا الشرط.


محمد عبد المطلب

تسلم عزيزنا محمد عبد المطلب حسن
وإن شاء الله الدار ترحب بيك،،

((الزواج العرفي حلال حلال))
عنوان الكتاب الضجة الذي أصدره عبد الرؤوف
عون (خريج الأزهر) والذي حقق أكبر نسبة
مبيعات في مصر هذا الأسبوع،،

إليك بعض المعلومات :

Quote: الكتاب السبب! فيما ذكرت مصادر أخرى من داخل الأزهر الشريف أن سبب إثارة قضية الزواج العرفي مرة أخرى هو أن مجمع البحوث الإسلامية كان قد أجاز كتاب "الزواج العرفي.. حلال حلال" لمؤلفه عبد الرءوف عون أحد خريجي الأزهر، وأن هذا الكتاب أثار ضجة حيث يؤكد أن الزواج العرفي حلال، حتى إن تم بلا ولي، وأن الفتاة من حقها أن تتزوج بلا ولي، فإن علم وليها بأمر الزواج ورفضه سقطت ولايته عنها. كما ألمح كذلك إلى أنه من الخطأ التوسع في تحقق أمر الباءة على اعتبار أنه يجوز أن يتزوج الشاب بمصروفه الخاص الذي يأخذه من والده، بالإضافة إلى مصروف الفتاة الخاص كذلك، ويسكنا في بيت أي من أسرتيهما. ولقد لاقى هذا الكتاب اعتراضا حتى من قبل علماء الأزهر الشريف، وكان ممن اعترضوا عليه الدكتور صبري عبد الرءوف أستاذ الفقه بجامعة الأزهر، الذي أكد مخالفة كثير مما جاء في الكتاب مع الإسلام الذي أمر بتأسيس العلاقة الزوجية على الاستقرار، والإشهار، وموافقة الولي، مشيرا إلى أنه ينبغي على الأزهر أن يعيد النظر مرة أخرى في ذلك الكتاب، وأنه لو عرض عليه لأوصى بمنعه من التداول. وفيما يعد توجها بالمجمع لمنع الزواج العرفي، فقد اعترض عدد من أعضاء مجمع البحوث الإسلامية خلال اجتماع المجمع على مسألة الزواج العرفي، وكان من بين الأعضاء الذين اعترضوا على هذا الزواج الدكتور عبد المعطي بيومي، والدكتور عبد الله النجار، حيث تمت الإشارة إلى أن الشهادة في الزواج ركن أساسي، وأن الكتابة والتوثيق أصبحت في عصرنا شرطا أساسيا في الإشهاد على الزواج، وهو ما أقره القانون، وعليه فلا ينعقد الزواج العرفي لأن الشهادة سقطت فيه.

هذا الرأي المقوقل لا يمثل رأيي الخاص على فكرة،،

نتلاقى كمان في الرملة الدقاقة : هنولولو أو بارا

عزيزي عبد اللطيف بكري أحمد

الافتاء في مصر زي الكورة في السودان , طوالي بذكروني بتاعين الكورة البقعدو في ميدان
الامم المتحدة ديك , وبتناقشو بأعلي صوت , وتلقي فيهم واحدين عمرهم ما لعبو كورة!!!
كل ما علينا هو النظر لأحكام القانون وشروط الصحة وأركان العقد وشروط صحة هذه الأركان
وهي مذكورة في صدر هذا البوست.
شكرا علي الترحيب
وكان حيين بتلاقي في الرملة الدقاقة , وفي بارا ليمونها الكبارا.

أما موضوع الكفاءة في الزواج فما هو عليه الحال في أروقة المحاكم شئ يدعو للحيرة
علي الرغم من قطعية نصوص قانون الأحوال الشخصية في المسألة.

نواصل

Mohamed Abdelmotalib

مرحبا بك
وجميله البدايات الزواج
و للامام



د شهاب الفاتح - كوالالمبور

سلامات ومراحب..

يعني هس أنت الفترة الفاتت دي كلها ما همست لينأ أي همسة في أضانادي ونحن منتظرين همساتك ....قلت لينا جيب أضانك قريب ...وما تكلم زول وأتفقنا ما نكلم زول ..
بس على شنو..؟؟
جيت لينا زي المأزون وشبكتنا محاضرة في الزواج الشرعي واللعان ..

ما فهمنا منك أي حاجة ...

على العموم قلنا نرحب بيك....

وتاني ماتجيب سيرة البحر

حاتم:

Quote: يعني هس أنت الفترة الفاتت دي كلها ما همست لينأ أي همسة في أضانادي ونحن منتظرين همساتك ....قلت لينا جيب أضانك قريب ...وما تكلم زول وأتفقنا ما نكلم زول .. بس على شنو..؟؟ جيت لينا زي المأزون وشبكتنا محاضرة في الزواج الشرعي واللعان .. ما فهمنا منك أي حاجة ... على العموم قلنا نرحب بيك.... وتاني ماتجيب سيرة البحر

أكتر من كده ؟؟؟ ده كلو وما فهمت حاجة ؟؟؟؟؟ جيب أضانك عشان تعرف نهاية الطريق بودي وين ؟؟ أكيد البعرف الزواج الشرعي واللعان
ما حيفكر في الزواج العرفي ......... تفتكر ليه مكتب الافتاء بديوان النائب العام مليان عرائض استفسار؟ ما عدم عرفة, ما تنسي الفائدة العامة مهمة.
قلت لي بحر ؟؟؟ البحر ده لما جا ماشي بي جنبنا مشيناهو بي تحت خمسة كباري .... ولسه ما عاجبنا!!! باري وأنا جاري !!!!!!

شهاب :

Quote: مرحبا بك وجميله البدايات الزواج و للامام

تشكر يا ملك , تلقي كل جميل في سكتك , قول يارب ..... مرحب بيك انت برضو في هذا القفص الجميل.

ستتم مناقشة الموضوع من زاوية مختلفة , فقط كونو هنا.

تعتبر الكفاءة من جانب الزوج، عند إبتداء العقد.

العبرة فى الكفاءة.
المادة العبرة فى الكفاءة بالدين والخلق

وفقا لأحكام الماده 23 من قانون الأحوال الشخصية لسنة 1991
فحق الكفاءة والدفع به غير متاح للزوجة , فالعبرة وفقا للنص
بكفاءة الزوج فقط , وهذه احدي أهم الانتقادات التي
وجهت للقانون المعني , علي كل هناك جانب خفي يمكن أن يخفف من أثر هذا
الانتقاد.