أقراك مرّة صاح

أقراك مرّة صاح

عكس إحتشادك فى الحضور

هل غاب معاك وعى الطريق

.. أم بيكى زكـّانى الزمن

ماشيك .. وعارفك يا حريق ..

فى يوم غماماتك .. بجن

فرهد غيابك .. أغنيات

ظلت أراضى اللقيا بور

بلقاكى يا كل الطيور ..

مسجونة والحرية .. سور

وبلقاكى بيناتنا الثبات

وبيناتنا شمس البكرة فى لحظة .. مخاض

*******

طول الوجع رشـّح مواطن العافية .. فيك

خلانى أرجع وأبتديك

وأقراكى من كل الجهات

ومابين أقابلك .. ومشتهيك .. كان حلمك الأول

.. ترفْ

وكنتى الصبية الغايبة

فى زحمة حجا .. وكلمة شرف

كنتى الزوايا الميتة .. فى متحف خزف

كنتى الوصايا العشرة .. واللون الشحيح

*********

سميت مساحاتتك حكر

.. كل البيحلمو ا بى الشمس

هجـّرت من واقعك .. عبث

سكـّنت فيك ..ضد السكون

كل اللى كان ممكن .. يكون

وطارت ضفيرتك ليل غنا

جدلة صبُر .. وطولة نفس

*******

ومابين أقابلك وجيت عليك

كان عندى ليك بس نحنّ .. والجرح الثرى

وخيبة أمل أم الشهيد

فى الكلمة .. والوجه الجديد

وكان إحتقان نبض الزمن

نومة طفل .. فوق الدّمن

... يا صاحية بى الحاصل علىْ

يا نايمة عن فقرى البليد

سميت منافيك الوطن

.. صبحت مناحاتك ..

... نشيد

المسافة ... صباح النور أو مساء الخير
كلماتك رائعة ولكن إحساسي معها بالضياع
ضاعت كل المعالم في طريقنا
أنت تكتب من مكان ولا أدري المسافة قريبة أم بعيدة بيننا
جيت أسلم ولا أدري إن كنت مصبحاً تستقبل يوم جديد
أم كنت ممسياً تودع يوماً مضى ولم يعود
لدي سؤال واحد
متى نعود لأواطننا وتصبح أمسياتنا وصباحاتنا ولغة التخاطب بيننا موحدة
والمسافة جدعة حجر
لك تحياتي وتقديري
وليد

Thanks a lot brother Walid,
and I am also waiting the day we all be together
under one homeland country , The Sudan!!