إدفقي

قاسم ابوزيد



إدفقي.....

ما تكوني رقراق

أبقى يا ضل يا شموس

غطي المساحات بالوضوح

استنهضي الشوق الجلوس

إدفقي....

وهجك شوارع ذاتي....

في ليل اليباب

ما تشفقي العطش الرحيل

النيل ركيزه...

ودمعة الأحباب سحاب

ما تخافي من دم الغروب....

لو رَتّشْ اللوحه الضباب

ما دام ضميرنا الفينا حي

ما دام عريق العشق حي

ملحوقة يا مدن السراب

نديانه بي فرح التساب

إدفقي....

فيضان عمار

اتربعي وفجي الوجع

دمع الألم ما يهددك

ما خاب غناك فارسك رجع

اتوهجي....

إنتِ الشمس إتلهجي

نجمك سطع

نوّر بوادينا الفساح

رقصت مزامير الصباح

متكيه قرية وقنبله

مبكيه دمعه وسنبله

الليله في ايدنا السلاح

ريشه..

وكدنكه ومطرقه

نبنيك أحسن يا ظروف

محضره دانيه القطوف

نطوى المسافات نسبقا

إدفقي....

بلدك فداك إتوهطي

وري البنيات العَزِيق

محميه بي عرق الترابله ونغمتك

مسقيه بالريد العتيق

أنغام رباباتك تشيل

معزوفة الليل والرفيق

ما تضغري...

تكبر أماني السنبله

هيا اكبري....

تصغر معاني القنبله

ما ترجعي الصد للمداين والقري

شيلي الشحوب والاصفرار

أدي البويتات منظره

إدفقي......

في كل شارع وكل زول

في روابينا المحنه

في ضاميرنا السهول

إدفقي.....

في أي حته وكل بيت

أبقي شان تحيا الفصول