استقلينا ، وبقينا ( احرار ) 00يعنى شنو ؟؟ اها وبعدين ؟؟

السودان مستقل منذ عام 1956 ياتو حكومة جات ومشت ندمنا عليها ؟؟؟

مشاكل ومطاحانات و ( مطاعانات ) وايجاد مشاكل لا حلول لها00وانا سودانى؟؟

عارضوا 00تمردوا00هددوا وتوعدوا ، طولوا لسانهم ، وجوا راجعين كأنهم ماسوا شئ ، طيب ليه؟؟ اول مالكم؟؟

هل انت على استعداد للتواجد فى قلب الاحداث ، والرجوع للسودان ، يعنى بفكرك النير تمشى السودان وتجيب الجماعة الفكرهم من فكرك ، وتلموا معاكم أهل العلم والدراية بماهية السياسة ، يعنى تنظيم واعى مدرك وتجددوا لينا ذكرى جمعية اللواء الابيض وتجمعات على عبد اللطيف وعبد الفضيل ألماظ؟ وطالما دة حق تفضل عليه لكن فى ارض الواقع وساحة المعركة ، وتبدأ تشاكل وتتطاحن عشان تجئ الاوضاع المثالية والحكومة الرشيدة تتربع لينا على عرش واسوداناه!!!

مفكر تخدم السودان بشنو؟؟ دة لو ماكان تفكيرك منحصر فى بناء بيت بيت فخم وشراء سيارة راقية وعرس ماحصل ، وطبعا دة لو كنت اصلا اصلا مفكر ترجع احضان بلدك ، وما عاجبك الحال مكان عايش؟؟ وبعيدا عن الانا ، همك تزويج اخواتك وترفع من حالة اسرتك المعيشية ، ولو فيك الخير ترسل فيزا عمل لود جيرانكم عشرة العمر؟؟؟

ما تعترض على اوضاع الحكومة وتشيل هموم الوطن فى اطار البورد ، واول ماتقفل جهازك تمشى تنوم ولا تسهر برة !! وانا مالى حامد شاكر وضارب الراحات سودان شنو ، ومرمطة شنو ؟؟
تناقش قضايا السودان وانت قاعد مع لمة شباب فى قعدة جبنة ؟ ولا تتشاكلوا وتتخاصموا فى مجموعات طلابية فى وضح النهار ، وفى الليل فى الديسكو رقيص وخمر وبنات!!؟ فى المرحلة دى السياسات واوضاع البلد انت ماقدرها ، بس قدر كتبك وثقة اهلك وانتظار بلدك ، وانتظار بلدك دى بقولها لو ما كنت مبيت النية لبلدا طيرها عجمى ؟؟

طالبة سودانية تخرجت من طب الاسنان ، قررت الرجوع للعمل فى مستشفيات السودان
ولما ناقشوها الطلبة عن الوضع وصعوبة الحصول على وظيفة ، قالت يا جماعة انا ماجربت!! وقعدت تضحك وقالت ادعوا لى ، وقالت حامشى اشوف لو قدرت لى وظيفة حأرضى بمرتبها ، لانو لما اقدر اقدم خدمة لسودانى ابن بلدى ، أو اقدم خدمتى لاجنبى باسم السودان هو دة المكسب؟؟ ولو ما اتوفقت بعدها اخلى شهاداتى لزول فى السودان يتابع لى فرص التوظيف وابقى اشوف وظيفة فى مكان غير السودان ، لانو فى ناس ليها واجب على ومابقدر اكون عاطلة !!؟
زولة مثالية!!ً؟ صح؟؟ بس ماتقول لى انها زولة واصلة ولا ما محتاجة للوظيفة
واهو دى زولة بسيطة ماعايزة تغير الوضع فى السودان ولا عايزة تجيب حكومة جديدة ، قدر قدرتها عايزة تمسك وظيفة وتخلص فيها

الاتعلموا واتخرجوا وبقوا بفخامة حملة الشهادات العالية فى مجالات التصال والهندسات والطب وغيرها ، يحلمون بالهجرة الى استراليا أو حمل جوازات سفر امريكية أو انجليزية ، والله كتيرة على السودان وهويتى وجوازى الاخضر أبو صقر دهبى لونه باهت ومعالمه مطموسة يتهنأبالرجل الذى يشار اليه بالبنان ، كمجرد حامل للجواز لا غير

الســــودان ، الوطن الشامخ ، ارض المليون ميل ، شرقه وجنوبه وشماله وغربه
نهر النيل ، شمسنا الحارة ودرجات الحرارة تجاوزت الاربعين درجة، كتاحة وهبوب
خريفنا ومطرنا و ( همبريبنا ) ، فيضان قاشنا ، لو زرت مرة جبل مرة
داير روحك تفرحها سافر جوبا ، بدائع وروائع

السودان دة حقنا كلنا والما دايرنا ( عددنا خلاص بلاك كمل ، حسبنا ومانا حاسبين )
، لكن خت فى بالك ( الناس هناك درجات وكل انسان حسب لونه)00
حتى لو نلت أعلى شهاداتهم ، وصرفت أعلى مرتباتهم ، وتزوجت اجمل جميلاتهم
وبقيتوا نسايب عديل وبينكم ( بيبى اور بابوية ) فانت ذلك
الرجل الأغبش؟؟؟؟

البلد دى ماحقت زول براه ، ما حقت الصادق ولا نميرى ولا الترابى
ولا عمر البشير ولا ( زفت الطين ) 00


والحائرون بلا دليل يصرخون حتى متى ؟؟؟؟

والله يا امدر صدقتي... لانو انا واحد من ملايين عشتا القصة دي...وهيهات هيهات...استقلينا و حسي بكينا؟ لكن... برضو سودانا...فوق...و المشكلة فبنا .. اها الحل شنو؟....ربنا كريم