طاير طيب وصيادين لحميد / الليندي

توطئه

في احدى الجزاير والعيش مو ضنين
صياد من شمال ، وصياد عن يمين
ما شايفين بعض ، في ذات قرصنة
نشنو نحو طاير غرقان في غنا
وطلقة داك في دا جنضلوا ميتين
والطاير نفد عشو الأنقرض
عشو الراح فداهبي عرق الجبين
في فد يوم بنا وعاود لي غنا
على مر السنين فالك يا بلد بالوضع المهين
اتمايل شمال اترنح يمين اترايم هبد
والشعب الحزين يفرح للابد

التفاصيل

يا أم طيراً يكاجر بستانو ويهاجر
من دبش الطفيلي ولي د شش العساكر
في زمن الدرادر ياتو الفينا وادر
ليلك ولا ليلي المو لاقي باكر
ولا الشوق مو خابر كيف القلب صابر
عود الشعب تابر عز الريح مكابر
ناهيك عن هبيب وكشاشة عساكر
جوك بالليل يا طية وديمة يجونا ليل
وشك فال وهيبة ويبقى وبال وويل
نصرخ يا بلادي وترغى الصرخة سيل
يتلافها وادي وما بين ديك وديل
الا الجوف ينادي جوة الجوف شليل
الاشجار ايادي شدّي الغيمة خيل
يا أم غيماً يكاجر وديانو ويهاجر
من بحر الطفيلي لتيه العساكر
ظنك في ولادك في الفيك في الف ميل
بالباب القصادك بالدرب الطويل
جاينك ضمامك للنزف الطويل
لا ناسين ميعادك لا ناقصين دليل
زادن عشق زادك والدم سلسبيل
على بكرة اعتمادك والصبر الجميل
يستعدل مرادك والمايل يميل
ما وقفت مهيرة ولا سبت دخيل
لو ما كان معاها عشقك من قبيل
بين الماظ رجيتك وبين عبد الفضيل
اندهدهتي جيتك فوق شوق الخليل
في اكتوبر غشيتك جيلاً بعد جيل
اسأل عن مبيتك عن مصالحك واطيل
ضاعت مني موجة بين موجك يا نيل
هز الشعب ما رزة الوادي ريل
ماريل الثبات وكت الشيل تقيل
خانت .. خونتني وكان الليل عميل
وياها الكون تنى والا المستحيل
يا أم عشقاً يكاجر بستانو ويهاجر
من صدر الطفيلي ولي احضان العساكر
يا الفي القلب بيتك يا عُشرة زميل
غمغمت وحويتك في الزمن القليل
ارتحت وبكيتك عاشقك مو بخيل
في الشدر المراهق ضمة ازيار سبيل
عز الصيف لقيتك ماليه الضل مقيل
وكانوا الناس سبيطك والتاريخ نخيل
في ذات وضع جائر في الكف رك طاير
دور كم دوائر قال بقلب حائر
وطار من غير يشاور وفضل قولو ساير
العمال تعافر في الأحوال تدافر
الزراع تبادر تكدح في البيادر
كل الامة تشقى زي الريح تظاهر
الطالقو تلقى واسمك فيهو ظاهر
منفى وسجن طلقة والمن موتو ساخر
واليهجع في شنقة ويفضلبك يساهر
مليون ألف زنقة تلقى الشعب صابر
وكل ما الفجر بقة وضوء الدنيا باهر
تلبت العساكر والجايين اواخر
تأخدك دون مشقة تأخدك دون تشاور
ويبقى الموت ملقى للبأسمك يجاهر
وقف قولو طاير وطار خلّف دوائر
قلت الناس تباصر لمن تلقى أخر
الشوم العساكر والجايين أواخر
يسقط كل فاجر ينحاز للدياجر
شان لاتضوي نجمة لا يلقانا باكر
تسقط يا اضينة يا مكري ومكاجر
تسقطلك سقوطاً لا لي اول لا أخر
تسقط بينا حي والدم فينا فاير
يا خالقنا يوم ما شفناك جاير
نصاح القلوب فتاح البصائر
علام لغيوب سلآّم السرائر
حقان الدموم يوم الدم خسائر
في الضاضوك حوم زي ما أنت داير
فجّ الدنيا عوم صفها من ضمائر
تشدهنا وتقوم ترخي الدين ستائر
في المنكر تنوم تشهدبو السراير
سهرك ماهو نوم كم يشهدلو باكر
وتشهدبو النجوم والصبحان مسافر
للخرطوم عموم والخرطوم تظاهر
دفان الحياة وحفار المقابر
للجالب الحياة والباسمك يتاجر
ضوى الضوء مياة وانشرت بشاير
سوى الدايرو سو ساوى الفي الهجاير
والفي قصرو أو خلى الناس تضاير
الشالخين الملوك فوق كتفاً يباصر
من هنا لي هنوك حق العيش لي باكر
قول ما فضّ فوك ايش أم الكبائر
غير بيع الصكوك كدا جابوك دك
وفك فيك يلوك وانت تلوك ايديك
يا خسران ابوك
لو ما غضب غضبتك
لو ما جب ضربتك
ما انسديت لاخوك
من كل المسافر
والجايين أواخر
الفي الليل غشوك
حوانة عساكر البي غفلة جوك
قالوا وطمنوك لامن حننوك
ولامن حننوك باكر زنزنوك
حياً كفنوك
خربوا داسوا مجدك شمتو فيك عدوك
وما بضلوهو حدك يا البجد بنوك
كضاب البهدك يا الساسك بنوك
ما اتراخيت اشدّك وانت البفزعوك
لا قصرت امدك يا ما بترجى عووك
وماك الحرشوك
جلداً ماهو جلدك ولع فيهو شوك
ما مساك مس كتم للنفس
من تال اليمين أو تال العسس
ولا من اليسار انفخ للقبس
دودي الدنيا نار ضواً ما انحبس
ضد الانهيار صفك رصو رص
واكمن في الديار العصيان وبس
زرع الأنتصار تلقاهو انغرس
متشابك غزار ماهو تبس تبس
طاير الثورة طار طيفو الفي القفص
صوتك طقّ حارالمدفع خنس
بيتك من غبار من دوشه اتنكس
والوضع البوار انداس واندرش



...........................................................

غداً نكتب عن الجزء الذى غناه الفنان عاطف أنيس من هذه القصيدة
............................................................

الاخ الليندي
لك التحايا والشكر لما تبثه وللغالي حميد كل المعزة
وأشهد لك بأنك قد اتحفتنا بقصائد فقدت تسجيلاتها منذ مدة بعيدة جدا،
وأتمنى ان اجد عندك نص مرثية محمود محمد طه والتي كتبها حميد ومازالت دماء الشهيد ساخنة
وكذلك نص يستهله

كونفدراليتك خارم بارم

شكراً كثيراً صديقي أبنوسه
بالنسبة للنص البرثي فيهو محمود محمد طه واليبدو انه في قصيدة ماريل
دي حانزلها بعد فترة لانها فيها تنقيح من حميد والقصيدة الثانية كوكادام
حاحاول انزلها بكرة
ولك خالص التحايا