Post: #1
Title: عمك تنقو
Author: Al-Masafaa
Date: 05-29-2002, 10:30 AM
عمك تنقو
جادى ف شغله وزول ممتاز
الكيزان فصلوه من عملو
بشتنو حالتو وحطمو املو
عمك قال احسن نرتاح
باع البيت واشترى بطاح
شبكوهو زكا وضرايب وقص
عمك باعو واشترى بص
* * *
عمك تنقو بقى سواق
يخش فى العالى وفى الدقداق
وضعو اتصلح وعال العال
الكيزان قالولو تعال
ضريبة جيش ودفاع وبلاوى
زكاة اموال واعمال وحكاوى
ضرايب فرض وسنة ونافلة
باع البص واشترى حافلة
* * *
من الشجرة وللردمية
عمك قالب مية المية
بعد ماقال خلاص ارتحنا
فجأة اتلفت وبقى فى محنة
اسبيرات وزيوت ومصايب
ونصابين ودقون وضرايب
عمك حالتو انقلبت عكس
باع الحافلة واشترى تكس
* * *
عمك تنقو سواق تكس
الثورة الكدرو او بالعكس
يوم فى الطايف ويوم فى امبدة
عمك تنقو حيلو انهدة
وناس الامن بقو يراقبوهو
ويراقبو العازة وخالتو وابوهو
قالت ليهو ماتدودر
بيع التكس واشترى موتر
* * *
عمك جاب الموتر وحام
وفى توزيع البوستة تمام
جوابات وجرايد وغيرها
عمك قال الدنيا بخيرها
الكيزان راقبوه فترات
قالو بوزع منشورات
عمك تنقو دخل فى وجلة
باع الموتر واشترى عجلة
* * *
عمك تنقو ساب السوق
وقرر يسرح بالطايوق
جوهو تلاتة من الكيزان
راح سألو من الميزان
عمك تنقو اب عقلا خافى
قال يخوانا الميزان مافى
قام ودوه بيوت الاشباح
قال اهى فرصة الزول يرتاح
* * *
عمك جوة البيت اتعلق
من رجليهو وراسو مفلق
دردرو لعبو بى ذى الكورة
عين مقدودة وايد مكسورة
قلعو اضافرو بالزردية
وكسرو كراعو بى طورية
واحد بسأل اخو يابركة
دة منو قالو عميل للحركة
* * *
عيد وسعيد لاقاهم جوة
بحفرو ف سايفون كدة بالقوة
وهاشم في العيد برضو مكتف
جسمو مجرح وشعرو منتف
والكشكول وكتاب الدين
ومنقو وريرة وآفو فى الصين
مقبوضين فى منشورات
ومتهمين فى انقلابات
* * *
عمك عرف انو العملية
لا اسلام ولا بوذية
حب فى الكرسى وشهوة حاكم
عمك تنقو قرر يلاكم
وقال لى منقو نسد الخانة
بالاضراب وبالجبخانة
ومافى مصالحة ولا حوار
ديل يستاهلو ضرب النار
|
Post: #2
Title: Re: عمك تنقو
Author: ايهاب
Date: 05-29-2002, 10:52 AM
Parent: #1
عزيزي المسافه
اشكرك جزيل الشكر على البوست المعبروالمحزن في نفس الوقت و ياهو دا الحال و السودان كلو عمك تنقو.......
لك كل الود و كل التحايا
|
Post: #3
Title: Re: عمك تنقو
Author: Al-Masafaa
Date: 05-29-2002, 10:57 AM
Parent: #2
No thanks between friends ya habeebna
الدهرانقلب شفنا الماسي عيان
الزمن الردي حكمونا فيه الكيزان
Your signature "zai alwaard"""
|
Post: #4
Title: Re: عمك تنقو
Author: قرشـــو
Date: 05-29-2002, 10:59 AM
Parent: #2
الأخ المسافة
والله ياخوى السودان كله عمك تنقو
لكن بصراحة نظم رائع جدا ومن الواقع
وكم كم كم عمك تنقوا فى الاخر جنوا
انا خايف السودان كله يبقى مجانين فى الاخر
الا الفى بالى وبالك بس
ديل فى سويسرا ومنتجعات اوروبا
|
Post: #5
Title: Re: عمك تنقو
Author: Al-Masafaa
Date: 05-29-2002, 11:17 AM
Parent: #4
Habeebna, akhoona & Aostazna Garasho,,
Fee montaj3aat aoroba wala fil sama ala7mar dail laihom yaom!!!!!!!!!!
"No power neither in earth nor in sky will protect Al-ingaz regime from the anger of sudanese people, and the judgement will come sooner or later ya man"
إذا لم يكن صفو الوداد طبيعة *** فلا خير فى ود يجىء تكلفا
|
|