الطمباره و الغناي

الطمباره و الغناي
محمد طه القدال


نحن أهل الفرحه جينا
لا المدامع وقفتنا ولا الحكايات الحزينه
لما درب الرايحه جابنا في هذي المدينه
يا ولدي الدروب شقاقه بحر التيه

ليك درب و لا دربين
مساك الدروب ضهاب
ليك قلب و لا بالين
سواي القلوب كضاب
ليك ضهر و لا سرجين
هدام السروج وقاع

شق يا ولدي بحر التيه
بتدردر
و تتودر
و لامن يوم علي تاياتنا ديك ترسى
نعزك بالقبيل ذاخرنه ليك
الشوق بحر يا ولدي
بحر التيه

قتليك العليك أدرابه
لا تنغش و لا ترضابه
في الزمن الزميم
و الكي يسوقه خلاف عشان الني
عليك الدور و تصريف الليالي بدور
تشيل ما شلنا من الهم
و لامن دمعه ترمي الدمعه فوق دربك
روح يابا
و أبقى قفاك لا تعاين
و لا تعاين على موطاك
و لا تندم على خطوا تملي مشيته ليقدام
و ابقى العاتي زي سنطتنا
زي صبرا نلوك فوق مره زي الزاد
لا شيتا نزل في الجوف
و لا برجع و لا بنزاف
و اركز للبجيبها الريح
تقيف أنت و يشيلها الريح
و ابقي العاتي و الدرب الوراك مسدود
و شيل شيلتك
بقيت للنص
لا حلما يجيب البر و لا حدود
أن بليتا أخد الرمله ماتقع المكان الهش
هي الممطوره ما بتبالي من الرش
النعمه بتعرف عاطيها و الجمره بتحرق واطيها
بالكيله عطانا و ما لقينا
فوق جمر خطانا وما لقينا

يوم الوعد يا حليوه في الدنيا ما كانت شروق
الا الأرض متكشفه و متبلمه
مع أنو من خير الخريف لافحالا شال
يوم الوعد يا ام طرحه خضرا
الفرحه دوم تتشابى ليك
و عين الشمس يا يوم الوعد
و البت حليوه اللابسه بيضا
بيضا كذا الحليب
و الروح مشحتفه في البلود الفيها ريحتك
للبعود من فزعة الغربه البساسق فوق كومو راجع
و لا بالحيل قريب
و الروح مشحتفه في الحبيب القلب يبق
الدنيا ما شافت جديدو
و لا الحزن دقالو باب
لو شفتي كيف يوم الوعد
كيف أنو مترامي الغمام
و القمري زغرد للبلوم
و النسمه هبت مرتين
يا حليوه يوم دقيت بأرضك فاس خصيب
و التانيه في يوم الوعد
و الأيد تسالم في ألأيدين
و الأم تقالد فوق جناها
تشمو زين
يا حليوه صاحيه
حليوه ضاحيه
كذا النسيم
و الدنيا غيم
و حليوه جد جد يا ولد
قول للبلد
قايل غناوي الحزن ليش
شايل مساديرك مجامر دمع ليش
ليش يا بلد
و الناس تريد
و الدنيا كل ما نريد تزيد
تفرح تهش
تملا الأيدين
لو صحيح غنينا للدمعه الحميمه
كان دموع الفرحه ما لاقت غنانا
بكره نرجع تاني للكلمه الرحيمه
شان هنانا
شان منانا
شان عيون أطفالنا ما تضوق الهزيمه





القصيده لحنها الأستاذ عثمان النو و ضمنتها عقد الجلاد ألبومها الأخير " فاجأني النهار" .تحياتي