Post: #1
Title: عندى سؤالين 000
Author: OmDur
Date: 05-19-2002, 06:52 AM
لو سمعت عن واحد زار طبيب نفسانى ، هل دة
يستحق غربلة ( الشمار ) فى الحلة ؟؟؟
هل لو زرت طبيب نفسى 00 معناها انا مجنون او فى مرحلة ماقبل الجنون؟
ــــــــ
لو سمعت واحد فى حلتكم ولا الحلة الوراكم ، اصابه الايدذ
هل اول شئ على بالك ، تورطه فى علاقة اثمــة ؟؟؟
الايدذ ، طرق انتقاله كتيرة ، ليه اخترنا منها طريق الجنس فقط ؟؟؟
ـــــــ
وبعييييد عنكم 00 الاتنين
|
Post: #2
Title: يا مان انت ما اتلحست عديل كدا
Author: sunrisess123
Date: 05-19-2002, 06:57 AM
Parent: #1
كان فعلا مشيت زرت الطبيب
تتربط بس بعد دا
|
Post: #9
Title: Re: يا مان انت ما اتلحست عديل كدا
Author: OmDur
Date: 05-19-2002, 07:47 AM
Parent: #2
الأخ الكريم ايوب
يعنى ختيتها لى واضحة ؟؟
طيب ماكان تحليها لى حبة ، زى هدايا اكياس
الحنة وبدلة العريس ، ولا السمح بتختوه للكلام السمح
والشين لمتل كلامنا الشين
|
Post: #3
Title: Re: عندى سؤالين 000
Author: banadieha
Date: 05-19-2002, 07:05 AM
Parent: #1
من زمن الفكي أبي نافورة..وكتابة الأحجبة وتقطير المحايات..والجنزرة والتغذية بالرغيف المملح..وزيارة الأضرحة..وفكوة الكورة..إلى زمن الرقية الشرعية والمعالجة بقراءة القرآن..بعد كل هذا فإن الذهاب إلى الطبيب النفساني أو عيادة الصحة النفسية أصبح الآن مثل الذهاب إلى إي طبيب أو عيادة آخرى..بل أن هناك أدوية لمعالجة الدبرسة والأرق أصبحت الآن تباع في الصيدليات كما يباع الباندول..يعني مافيها حاجة لو الواحد مشى عديل لعيادة الصحة النفسية..ما أكثر الأطباء النفسيين الآن..زمان ياهو التيجاني الماحي وبعشر وأبوحسبو..وهسع بالهبل
الموضوع التاني دا ما بنطري يام در
|
Post: #4
Title: Re: عندى سؤالين 000
Author: Wad Aljaili
Date: 05-19-2002, 07:10 AM
Parent: #3
كلام بناديها زاتو بضبانته
|
Post: #10
Title: Re: عندى سؤالين 000
Author: OmDur
Date: 05-19-2002, 08:04 AM
Parent: #3
ابونا بناديها
انا كايسة لرأى يوافق رائى
وفكرة طرح السؤال دة جاءت من واقع
زارنا واحد من قرايبنا ، وهو شاب فى اواخر العشرينات
تربى تربية دلال حتى البنات خلوه ، ومن رائى تربيته كانت
غلط فى غلط
المهم عند زيارته ، شرد مسافة لاحظت فيها انه بيهذى بكلمات
مامفهومة ، بعدها انتبه وسألنى : انا بكلم نفسى كتير ، صح؟
انا رديت عليه ان دى حاجة بتتعالج بمراجعة الطبيب النفسى
قال لى : والله افضل كدة طول ماحى ولا امشى لدكتور
انتى عايزة تعملى لى فضيحة والناس تقول على مجنون؟
ورده دة ألمنى جدا 000 طيب المرض النفسى دة
زيه وزى اى مرض عضوى اخر
ـــــــــــــ
ود الجيلى 00 كدة واكتفيت ؟؟
برضو كتر خيرك
|
Post: #5
Title: شنو الحكايه
Author: willeim andrea
Date: 05-19-2002, 07:13 AM
Parent: #1
حبيبنا الله يسلم الجميع من الاثنين واصبحنا بالله ,,,النفيسات مسببتها كتيره في الزمن الصعب ده بس ارجو من الجميع الابتعاد من التركيز في الابواب المقفوله حتي مرحلة الطبيب النفسي يعني نغير جو وانشاء الله ما نصل مرحلة الطبيب النفسي واذا وصلنا اهو برضو طبيب وبيعالج,,,,,,,, اما موضوع الايدز طبعا الموضوع خطير كميات ومطلوب منا الكتير من الوعي صدقني في كل المراحل وزي ما قلته طرق انتقاله مختلفه ونرجع لموضوع الوعي واظن الغالب عارف يبتعد من شنو وشنو بس الحقيقه المؤلمه بان هذا الفيروس منتشر لدرجه تخوف في عموما الاقطار الافريقيه وزي ما دار في نقاش بيني وواحد اوربي انا كنته بنقاش نظرية انو افريقيا قادمه لانها بكر بكل ثرواتها وخيراتها تعرفوا رده كان شنو ابدا انهم يموتون كالذباب من الامراض الفتاكه ومنها الايدز ولنعرف خطورة الموضوع ارجو من الجميع مناقشة اصحاب المعامل لمعرفة كميات البشر المصابه بهذا المرض ونرجع ونقول العفاف العفاف كمسبب رئيس وما عاوز اخوض في ضحايا المرض كزوجات انتقلة اليهم العدوه من ازواجهم وكم تيتموا اطفال نتاج الجهل وعدم الوعي بمخاطر المرض هي امانه امانة مجتمع طبيب الاسنان , الحلاق, الممرض والتعقيم الخ ,,,وارجو من الجميع ان يوعي كل قريب وبعيد من مخاطر المرض وطرق انتقله اللهمه نسالك الصحه والعافيه ودمتو احبتي
|
Post: #6
Title: Re: شنو الحكايه
Author: قرشـــو
Date: 05-19-2002, 07:28 AM
Parent: #5
الأخت أم در
لك التحية وكل الود
والطرح جميل وجرىء جدا وقد تعودنا الزوغان منه ليس لشىء الا لتربيتنا المتزمتة والتى اكثرت النواهى ....
الأستاذ بناديها تحدث بروعة عن حكاية الطبيب النفسى وازيد ان المسلسلات ضخمت المسالة وصورت لنا ان المرض النفسى جنون وهو غير ذلك تماما بل علىما اعتقد اننا كسودانيين احوج الناس للذهاب للطبيب النفسى لسبب بسيط جدا الا وهو اننا لا نتحدث عن مشاكلنا وهمومنا ونعتقد ان ذلك ينتقص من رجولتنا ولذا تتراكم الأحزان بدواخلنا ولكن بزيارة الطبيب النفسى ننفض ذلك الغبار عن الحنايا ونعود اكثر اشراقا وحيوية مثل المرايا بعد مسحها من ذرات الغبار وليتنا نفعل..
والموضوع لا يستحق الشمار والله وبعدين الناس مالهم اكان الزول مشى لى دكتور نفسى ولا بتاع مسالك .. يا ساتر من الناس ..
احد الفلاسفة قديما قال "الجحيم هو الآخرين" والله الراجل صادق ياخى فالناس يحشروا انوفهم دوما فى ما لا يخصهم..
أما الأيدز
فده كلامه كلام
وكما تفضلت فانه يخطر على بالنا مع ذكر اسمه الجنس الخاطىء.. بينما هنالك العديد من طرق العدوى اجارنا الله جميعا وقد تكون كما ذكر الحبيب اندرية غلطة ممرض او طبيب أسنان وتقع الكارثة ..
من منظور متأصل فالسودان أحبتى وحسب احصائيات وزارات الصحة الاتحادية والاقليمية والتى ترد فى الصحف فان نسبة الايدز والله مخيفة بكل معنى الكلمة يا جماعة وكما قال الاوروبى الخبيث للأخ اندرية فاننا هنالك نموت كالذباب واظن ان النتائج تصلكم والله المستعان
اما الوقاية فهى معلومة للكل من ناحية الجنس ولا شىء غير العفاف وتسهيل امر الزواج او الصوم فلا خيار آخر واى لف ودوران النتيجة فتاكة والاعاذة بالله..
أهنئك على الطرح الشجاع وارجو من كل من يملك معلومات عن الايدز ان يزودنا بها فكلنا محتاج لآى معلومة حتى نفيد من حولنا معنا ولتكن حملة ضد الايدز فى كل المجالات لانه اقوى عدو جماعى حتى الان يواجه الكل بلا استثناء ولا تمييز..
|
Post: #12
Title: Re: شنو الحكايه
Author: OmDur
Date: 05-19-2002, 08:43 AM
Parent: #6
العزيز قرشــو
بس ياريت الكل يسمع ، امشى لطبيب نفسى ولا طبيب بيطرى
شفت ، دة حال الناس تفتش ليك المعووج ومابتنساه ليك
ونجى لنقطة تانية ، الرجل يعتبر بث همومه ومشاكله انتقاص من رجولته
ومش الرجل بس ، كلنا عامة فى اشياء بنتخوف منها عشان همنا كله من كلام الناس
المحزن فى الامر ، ان الواحد يضيع نفسه بتفكيره فى الناس تقول على شنو ؟؟؟
ــــــــ
حكت جارتنا بتقول انها كانت على علاقة بابن خالتها
وعمها جاب ليها عريس واتفق معاه على كل شئ ، رسلت لى خالها
وهو بدوره جاب ود اخته وقال ليهم الحل الوحيد اعقد ليكم
وفعلا تم العقد ، وحصلت مشاكل بين اهل ابوها واهل امها
طبعا هو الان ابو اولادها والكلام دة مر عليه اكتر من 15 سنة
قالت انا لو كنت راعيت للناس تقول شنو ، كنت اتسببت فى تعاسة نفسى
ودى كانت لحظة قرار وانا قررت فيها اعيش حياتى لان العمر مرة
ودة زواج على سنة الله ورسوله ، يعنى ماعيب يخجل منه زول
وقالت ان الاسرتين حاليا وكأن شئ لم يحدث
|
Post: #11
Title: Re: شنو الحكايه
Author: OmDur
Date: 05-19-2002, 08:22 AM
Parent: #5
الله لايوصلنا للطبيب النفسى
لكن يا أخ وليام ، فى ضغوط نفسية كتيرة بتمر على الواحد
واساليب خطأ فى التربية فى البيت او المدرسة
ودى كلها بتأثر فى نفسية الفرد منا
مثال : فى اطفال بيصوروا نفسهم فى ادوار بطولية وقصص غريبة
الطفل دة لو فى اختصاصى شاف حالته
حيعرف هو ليه اتصرف كدة ، وهنا انا زرت بيه طبيب نفسى
هل المعنى انه مجنون ؟؟
واديك مثال قريب اخوى الصغير فى فترة كان بيتمتم
بس الحمد لله مافى زول شافنا داخلين عيادة نفسية
لان الطبيب جارنا ، وكنا فى زيارة عندهم وأمى ورته الحالة
اول شئ سأل امى اذا كان فى زول بيتمتم بيتردد علينا كتير والولد متعلق بيه
ولما كانت اجابتها بالنفى ، ناداه وسأله عن بتاع الدكان
ودة فعلا زول بيتمتم ،واخد وادى معاه فى الكلام
بعدها قال لامى تبعديه عن الزول دة ، وفعلا صاحب الدكان دة زول مرح
والعيال بيحبوه ، والحمد لله اهو حاليا يناطق الجن
اخوى طبعا ، داك خلاص فاتت عليه
ــــــــــ
اما عن الايدذ فانت اوردت امثلة لطرق انتقاله
لكن يؤسفنى اقول ليك ان الاغلبية العظمى تفكيرها لايحيد عن ان الايدذ
وراه علاقة غلط
|
Post: #7
Title: عندي سؤالين Re.
Author: brakat
Date: 05-19-2002, 07:29 AM
Parent: #1
حمانا الله وإياكم
إختلفت نظرت الناس عما كانت عليه في السابق وإنتشر الوعي ولو قليلاً بالنسبة لمراجعة العيادات النفسية والعصبية أما بالنسبة لموضوع الإيدزأجارنا الله وإياكم فلا يزال الناس ينظرون إلى المصاب به بكثير من الريبة والشك والخوف وبزيادة التثقيف والإرشادات والتوعيةالصحية أكيد سيكون هناك مردود إيجابي
مبارك
|
Post: #8
Title: ميزه تانيه للبورد
Author: willeim andrea
Date: 05-19-2002, 07:45 AM
Parent: #7
تعقيب علي كلام الاخ الحبيب قرشو وقبل التعقيب مدخلي مقابله اجرتها احدي الفضائيات مع النجم نور الشريف وملخص الحكاية انو النجم نور الشريف ذو طبيعه هادئه ولكن بيعيش الادوار التي يمثلها في الافلام مختلف الشخصيات المتناقضه وفي النهايه يشعر بالسعاده لانه عايش تلك الادوار وعالج رغباته وتخلص من الكبت الخ ,,, والذي اريد ان اقوله للاخوه.... البورد التشات المسنجر بالاضافه للفوائده العديده , اري فيها راحه نفسيه لتفريغ افكار ورغبات الخ مما تكون بمثابة علاج نفسي وربما روحي يعني زي الدكتور النفسي البيسمع ويسمع كل عقد المصابين بالكبت اذا كان فكري او روحي او مادي او او نجد ذلك في الاسماء نجد ذلك في الحوارات قلما تناقش في مجتمعاتنا بحكم التربيه والعاداة والتقاليد الخ كما نجد التعقيب من الاخوه الاعزاء كجرعات دواء وشفته الحاجه دي في نقاشات مختلفه دارت في مواقع مختلفه في النت والناس وصلوا لقناعات وحلول ... رايكم شنو يكون عندنا هنا في البورد صراحه ونقاش جاد لكل المشاكل الاجتماعيه ونساعد بعض ونخصم من فاتورة الطبيب النفسي ودمتم احبتي
|
Post: #13
Title: Re: عندي سؤالين
Author: OmDur
Date: 05-19-2002, 09:07 AM
Parent: #7
الأخ المحترم مبارك
اشكرك على افادتك لى برائك مرة اخرى
أما بالنسبة لموضوع الإيدزأجارنا الله وإياكم فلا يزال الناس
ينظرون إلى المصاب به بكثير من الريبة والشك والخوف
دى نقطة النقاش هنا ، فى ناس مصابة، وحرام والله ، زيادة على البلى العليها
نحيطها بنظرات الريبة والخوف ، وانا قريت عن موضوع الايدز دة كتير
وكل دة فى محاولة لمعرفة سبب الربط بين الاصابة بالمرض والاوضاع المريبة؟؟
واذكر لما الجرايد السودانية كان شغلها وشاغلها الموضوع دة
وكنت فى قعدة معانا جاراتنا ، وجابوا سيرة الجرايد وكتاباتها
واحدة من جاراتنا كان ردها : اليسوى العيب كله يستاهل !! وانتقدوها
الجارات صغيرات السن ان الايدذ لايأتى نتيجة الخطأ والعيب فقط
قالت ليهم : اسمعن يابتاعات المدارس ، من يوم ماسمعنا
بالمرض دة ، ياهوسببه طريق واحد !! وعلى كدة قفلوا على الموضوع
احتراما لسن المرأة ومكانتها كأم بين السودانيات الموجودات
لكن دة مثال انا اجد ليه العذر
لكن فى بتاعات مدارس وبتاعين مدارس ، عقولهم تحمل نفس التفكير
ونحن فى انتظار ثمرة التثقيف والتوعية
لكن على مايبدو ، فى زمن بعيد
ــــــــــــــ
تحياتى أخ وليام وشكرا على الاضافة الثرة
|
Post: #15
Title: Re: عندي سؤالين
Author: sama7
Date: 05-19-2002, 11:14 AM
Parent: #14
الغالية ام در
والله لو عاوزة تودى قريبكم دا الدكتور عشان بكلم نفسه
احسن ما تلاقينى
لوووووووووووول
انا عندى العادة دى كتير جدا
لكن حسب علمى وما عشان انا بمر بنفس الشئ
دى حاجة طبيعية جدا و بالعكس انا احسن لى كدا
اكلم نفسى واتناقش معاها من ما اقعد ساكتة ساى
فكرت فى زيارة الطبيب النفسى لكن اقتنعت باراء من حولى
فهو ربما يعيشنى فى وهم حالة نفسية تانى ما اقدر امرق منها
ودا كله نتيجة لضغوط الواحد بمر بيها
واول ما الحال يستقر والواحد يلاقى ناس كتير حوله وكلام كتير
صدقينى حتخف كبير
بس ربما هو انطوائى شوية
وانا عن ان زيارة الطبيب النفسى معناها الواحد مجنون
دى زاتا فكرة غريبة اول مرة اسمع بيها
وان نتجت عن شئ ربما لعدم فهم الناس ما هو المرض النفسى
اى قلة ادراكهم يالامر
|
Post: #16
Title: Re: عندي سؤالين
Author: waleed500
Date: 05-19-2002, 05:38 PM
Parent: #15
الاخت ام در
مساء الورود
زيارة الطبيب النفسى هنا فى السودان صعبه جدا جدا
مع انها حاجه عاديه
وصدقينى لو زرتى الطبيب النفسى ولو ما كنتى بتعانى من شى من
اصلو الناس ساى بجننوك وبقول عليك فاطه سطرين
ونتمنا ان تزول النظره دى من مجتمعنا
الاخت سمووووووووووحه
كيف حالك
انا من زمان بقول عليك فاطه 3 سطور
لكن اليوم اتاكدت انك فاطه عدة اسطر
ده انا بمزح ساى يا جماعه ما تقومو تطلعهو لينا مجنونه رسمى
|
Post: #17
Title: Re: عندي سؤالين
Author: رومانسي
Date: 05-19-2002, 05:41 PM
Parent: #16
يا حليله سماح كانت عاقلة ورزينة بالله بقت تتكلم براها يا وليدغايتو الله ياجزي الكان السبب
وانا اقول البت مالها بقت ترد علي بوستاتها براها
لووووووووووووووووووووول
شفت جنس القلبنة دي يا وليد
|
Post: #18
Title: Re: عندي سؤالين
Author: Pearl
Date: 05-20-2002, 01:57 AM
Parent: #17
I think inoo al sha3b al sudani fiho noo3 mn al jahl
y3ni mathlan, al zool ma ymshi doctor al asnan ila iza
dorso waj3oo, m3 inoo be al 3ax mafrood al wa7ed ymshi
kol fatra 7ata lo mn gair ay 7aja..
oo men na7yat al AIDS, i think inoo al media daymn
betnaweh le al AIDS be ***, oo mn hena jat al fekra.
|
|