زاوية الشعر الحلمنتيشي

التحية لفرقة حلمنتيش التي طال غيابها ولم نسمع لهم بجديد والتحية للاستاذ المتجهجه الاممي على هذه القصيدة والتحية ليكم واتمني ان تكون هنالك ردود بقصائد حلمنتيشيه واسف ان كانت نظره بعض الاخوة فى المنتدي الحر غير ماتنميت ولكن لحبي لهذا الشعر اجبرتني ان اجد هذه الفرصة من جمعكم الكريم بتجميع اكبر قدر ممكن من الشعر الحلمنتيشي ولكم خالص شكري واحترامي.........واحشني
TOO LATE
آه..على قلبي الرهيف
على املا حملتوا دهور
قطعت بحور سواد الليل على ليلين
صبرت كتير وراجي النور
ياقطعت البلور وياست بنات الحور
عليك اسم الله ياحلم على مابجور
شفتك يوم عجبتيني
وقلت اقول انا البرلوم بدور اخطبها لامعقول
وبديت احدث زول وادس من زول
لكن صحيح الدنيا مابتصفا وتدوم للزول
وآه.. يالينه ياشتلت فريع البان
وياحلم بنيتو عليك وعشتا زمان
أفكر فيك لمن بان
بقيت فى الحيره والآهات يادرت بنات شمبات
وياطفلى الرضيع المااات
واتحسرتا واتبهدلتا ماخليت ودمع العين نزل وقت قال لى
TOO LATE
ضيعني الدكتور عشا البايتات
وعاد خطبوك لى زولا طويل وعريض لابس ليهو نظارات
حافظ الكيمياء في راسوا حاكي اشنابوا نصوا رباط
وعاد شغال وحالتوا كويسه باني البيت ورضيتي بيهو طوالي ماقلتي
TOO LATE
بعد الحصل قالت لى مولانا ادعو لينا معاااااك
اجيب ابريقي واتوضاء وافرش الفروه واتمسك وادعوا ليك بالدعوات
زمااان ماكنت بدعو ليك وبفكر فيك
لكن الليلة بدعو عليك
بركة البغدادي ود جابر وكيتن فيك يافلانه ابوك لايرضي لايخاطر
كل ماتجيبي سيرة الخطبة فى خشمك اعاين ليك
احمر فيك يجرك من طرف توبك
وطرفوا طويل واصل العرقوب
وامك برا تصرخ حي ووووب
سجمنا الليلة يابو فلان
لا لا ماك براك زعلان
ويقول ليها كان عرضتي على طلقانه
ويجرك على الديوان وتصرخي جاااك بلا خجله تقول شيطان
ولمن يسمعوا الجيران يدقوا الباب ويطانش تقول طرشان
ينطوا الحوش يكسروا الباب يدخلواعليك
وابوك يقول حلفت يمين البصلني قريب هدي السكين
يزحوا بعيد يختوا الخمسة في الاتنين
وتسمع جيت وتسمع جااك وتسمع جاي يابا كفاك عليك الله
وتسمع وحي وتسمع وي وتسمع رو وتسمع كو وامك برا تنبح هو
دميعاتك يصبن جو وقتين ينقطع صوتك وتفتري تب
يمسكك كب ويخنقك خنقة بت الكلب

برمودا

هو زى طالع

وما طالع

وزى واسع

وما واسع

وزي واقع

وما .. لا اظن واقع

إكون دا بنطلون شافع !!؟؟

إكون دا شنو؟؟

إكون لابساه بالمقلوب؟

إكون نص توب؟

هه يا المتخرجين يا دوب..!

إكون دا الروب؟

إكون دا شنو ..؟

كيف يا شاب

إكون شراب..؟

الشراب تحت ما فوق

إكون دا بنطلون مشنوق؟

حاجة عجيبة مالية السوق

إكون طاقية ممطوطة؟

إكون فوطة ...؟

غايتو عمل جنس جوطة!

إكون دا شنو...؟

إكون ماكسي ..؟

إكون عراقي بالعكسي؟

غايتو يا ناس جنس لبسه

تخلى الزول اموت هسي

إكون دا شنو..؟؟

ناس قالوا إكون فركه!

وناس قالوا

إكون باقيهو

واقع منو في السكه!!!

وواحد قال:

إكون سروال بدون تكه!!!

دي ما شبكه

إكون دا شنو؟؟؟

إكون دا بنطلون نص كم

إكون دا ردا وعندو جضم

إكون بى كم ؟؟

إكون دى بلوزة مجروره؟

إكون دي ملايه مفروره؟

ولا اكون لبس كوره!؟

دخلو موضه كندوره

دا برمودا .. دا برمودا

امانه وقعتك سودا

لبستي الليله برموادا؟؟

بكره تجينا بالشراب

وبرضو تقولي لي موضه...

برمودا...

مثلث فقري جنب امريكا

قالوا برمي هيلوكوبتر

تخشي الجامعه بي برمودا

جاكسون ابقي زي عنتر

تخشي الكوره بي برمودا

خايف آناس

اخش القون من السنتر

برمودا..امانه وقعتك سودا

حليل التوب

حليلنا نفخنا في الفاضي

وكانت قربة مقدوده