مرفوعة للنضال..شد الدراع..اهو دا أبمنة يا أهل العوض
Abu Amna
Intermediate Contributor
Joined: Mar 18, 2002
Posts: 117 Topic: أما لهذا الليل في د######## آخر يا سودان
Posted: Apr 28, 2002 9:42am GMT <<>> [ Profile ] <<>> Report post to moderator
--------------------------------------------------------------------------------
أهل الوجعة
أهلى
وجميع من يريد البلد وأهل البلد
نفتش فى عيون الليل
ونلقاك نجمة ضوايه
ونسأل عنك الأيام
تقول لينا الحروف جايه
يا بلد
لى هسه لا لقيناك ولا فتناك ولا فتنا، وما بنقدر ولا بتقدر، ولى هسه شايلين مصباح ديوجين ونكوس ليك، لغاية خشم البقرة فتحناهو، والبقرة اعتذرت بى دهشه وتعاطف، وقالت لينا، السودان؟ والله ما شفته بى جاى، عاطس ليهو زمن فى الوجع
اها خلينا البقرة واخواتها، وبقينا بس على دعوات الله، يا الله هوى تلمنا فى سوداننا ده، السودان يا جماعة، بتعرفوهو مش كده؟؟؟ ياخى الزمان كان مليان، الزمان كان تريان، الزمان كان طربان، مافى زول آ جماعة صادفه ؟؟؟
ووكت غلبنا حيله، جربنا نسأل الطير، وقال آى، بالحيل ياهو ده ترا، وهاكن العنوان حقه
ركام الآهات، صندوق بريد 1989، شارع النيل، شنو؟ قلت شارع شنو؟
النيل النيل، يا حلاوه عليك يا جميل
الزول ده جنا ولا شنو، جنا ساى ، ده جنا وفقد المحنه
وهسه تأبطنا الشوق وامتشقنا حسام الريد وقلنا نجيك ونشوفك ونطايبك، وباختصار كده، الشوق بحر، وآفاق وشطئان لا محدودة، لكين كيف الطريقه فى الجية دى، الدنيا ليل ونحن نعانى ما نعانى من ضيق ذات القلب، وذات الروح وذات اليد
يا أخوانا عليكم الله البصله النضمى ده، يوصل سلامى للخرطوم، ويقول ليها عوافى يا خرطوم وكفارة وسلامتك، ,ابو آمنة كرامتك
حين رأيت عيونك يا خرطوم
هومت وقلت، العشق عليك
وعليك العشق، قالت، واللوعة والأشواق
يا حيتك الروح، وسقاك الزهر
رحيقا من وهج الإشراق
باسم العشق أسائلك
كيف بهاؤك فاق الشمس، وكيف العينان
أسودها بحر، والأبيض آفاق
يا توجك الحب وعمدك النهران
حديقة فرح يسكنها الايراق.
باسم الفرح أسميك
انحاز الى عينيك
ابايع وجهك شمسا لى
وقمرا للعشاق
أنكر كل نسـاء الكون سواك
أتوسل أن ضمينى، طفلا يشتاق
لحدائق عينيك، لحقول الأحلام
ضمينى، أطفئ ظمأ الزمن المالح
وتسكن جذوة وله حراق
___
كل طائر مرتحل عبر البحر قاصد الأهل حملته أشواقى الدفيقة