السره بت عوض الكريم .... حميد

جات داخله زى مرقت غضب من جوف حليم فى زمن صعب
رمت السلام ..زى شنطة من كتف المسافر .. بى تعب
زى ردخه رب .. الله يارب
قعدت على طرف العنيقريب المحازى الواطه .. ضايرت التراب
كسر العويش الفوقو .. شالت باصبعا وشختت شخيت
الـلـــــــــــــــــــــــــه يارب
عايننا فيها نكوس سبب ..للكفرنه وفورة الزهج ..من دروة البال الوهيط
ماعودتنا تدس عوج .. تكتم فرح .. زى حالة الزول البسيط
صنقعنا فى قعدتنا .. راجعت الوشوش
دنقرنا عن رفعة وشيها المتعب .. الجاد .. الرحيم
الطيب .. السمح .. المعافى ..رهاب رهاب ينشاف وسيم
انوهطت فوق العنيقريب القديم .. من تانى ضايرت التراب
.. كسر العويش الفوقو .. شالت باصبعا وشختت شخيت
.. وقالت :.0
تصدقوا آ ولادى بقيت ابيت الليل افكر فى التميرات القدر فوق راسا ماشالت سبيط ..غلبا الجروره الفوق ضهرنا تنزلا .. 0
نطلق ضهرنا مع الجماعه
شن دهانا ؟ دى كم سنين والحال وقف جف وحلف مافيهو من نقاط بسيط
كان بوشنا فى حش التمور .. الليلى دوشنا مع اللقيط
اى لا حكت دى ولا بقت .. ما كنا قايلين فى حياتنا يجينا اقسى من المضى ؟
ساعة مروق الانقليز .. قلنا الظلم راح وانقضى
تاريهو كمتر .. وقام دقون حلفا وعشر.. معيوقه نال .. دمسيس ..ضريسا .. وشوك جمال ؟
اللـــــــــــــــــــــــــــــه يا رب العالمين
الما جحدنا نعمتو فى الشوف والسمع ..راحة الولاده ولا قلوبنا عمن ولا غييرنا دين
فى الجابو ماقصر حمد
فى الشالو ماقلنالو وين ماشيبو وين

عدلت نعال مقلوبه فى الجيهه اليمين .. حدرت شمال
زمنا مو ده .. الحيكومه كانت بت حلال
بى حالا .. بى حرب الجنوب .. بى قلة المال فى الجيوب
كانت رخيه العيشى .. الا ترا العوين الكبرو كبرو ملييسين
علمن يطير
ان كان هو ماصلح العوج
مافادنا شى ومحق القبيل لمينا هين .. فى هين
يا حليل رجالا سكتن قدرا غشاهم بالقفا .. وللليلى سيفن فى الجراب يهرج سنين
دا زمن قواسى زمن ضلاله ..اونطجيه زمن مهين
لاقين هواكم ضرو ضر ..يا عسكريا ماانتعظ ..كتل الرقاب بيودى وين
ضر .. يا جلاليبا رهاف ذمما خفاف .. ضر ياضرر .. ضر .. يادقين
متصلبتين عرق النبى ..وبالنار بتلعبو يا عوين
لى الحول قريب درب السلامه .. تخوجوبى درب الحرب ؟
غى القلب .. ولا الحرب .. بقرة حلب .. والارض صين
ماكان عمل ماكن ده دين
يا ارزقيه تخمجو دم .. والدم مو مويه .. ومانا طين
متصلطين فى الناس دحين .. لامن يجى اليوم الفصل والحق يبين
وين تمشو .. وين تنسلو ..وين
كان طال وكان قصر الزمان .. الحين بحين
كب يا رجالا سكتن قدرا غشاهن بالقفا .. ولى الليله سيفن فى الجراب يهرج سنين
وأنأوهت
حسيت باعماق الشوارع والتواريخ المجيده
اناوهت .. وادتنى عين
صنت شويتين .. كوركت .. يابت شمشنا ادهدهت
شوفيلى شافع ود فطين جا من الطحين
اللــــــــــــــــــــه .. فترنا من الطحين
وكان الوكت زالف عصر..عين الشمش مشدوهه بى دوشة سحاب
عرق المراكبيه البعاد راحل مع ريحة التساب
لاتدرى من بيوت الحله ولا من التراب
الناس تقول مدقوقه طالعه على الحقاب
مفلوقه بى حجر الصعاب المره .. نازله على البحر مشروقه بى موية السراب
الفرة .. مشروقه عقاب
يا الحره .. كيف بقت الرقاب مسيوقه بى قيد السلاب ؟
منشره من نشر الحجاب فى عروقا .. واشتد الخراب
من بعدما انبلج الفرج من ضيقا .. خدعوها بى حيلة كتاب
رفعوه فوق سن الحراب
ودهت الهزايم فرقتا
الناس بدل عن نقتا
التلقى فكة ريقتا
وبدل القصور الفى الخيال .. التبقى ماهلة كريقتا
وما جاتا راحة طلقتا .. الا التعمر طلقتا.. بى بندقيتا حقتا .. بى ها الشوارع وبقتا
تنسدا منك دقتا ..ودم فلقتا .. ومر شرقتا .. ونار شنقتا
يا دقن دينك سرقتا ..
قطعت وضوها انشرقت .. مسحت وشيها انشهقت
قالت نست .. ماتاكت العوضه التحت..عن مرقتا
دارت تقوم ..جبد العنيقريب الحنين طرقتا
رجفت بشيش عن نتقتا
رجفت بشيش .. من الغضب .. ولا التعب.. فتر السنيين واللا الكبر .. ده الماقدريمسح سماحة خلقتا
زى نيتا البيضا الشعر .. وزى موج بحر كان الجبين
مديت يمينى اساعدا .. ردت يسارا تباعدا
وقالت لى : 0
ابوى ..وفر ضراعك للبلد
وادخر مروتك آ ولد
لى يوم بحين
احفض كرامتك تحفضك .. الموت ولا العيش المهين
الموت نفاد الما نفد ..الموت حياة الميتين
اختاها جنه مع الفقر .. وادخل جحيم المتعبين
وان ماقدرت على ده ابوى ..
رب لك دقين

رب لك دقين

رب لك ديقن


( يتبع )



ديك الجن

العزيز ديك الجن
تسلم ايدك ولله انا لي زمن كنت بفتش للقصيده دي ولله