رد الرساله

رد الرساله


04-25-2002, 01:24 AM


  » http://sudaneseonline.com/cgi-bin/sdb/2bb.cgi?seq=msg&board=1&msg=1019694251&rn=0


Post: #1
Title: رد الرساله
Author: moram
Date: 04-25-2002, 01:24 AM

رد الرسالة



تَانى كاتب لىَّ خبارك

انتَ قَايْل انّهُ لِسَّه

قَلبىِ تايهُ في مَدَارَكْ

دِىِ الدِيَارُ خَلْيتَها ذَاتَها

لَمَّاَ ضَاقت بَىْ ديارك

والبعاد الشايفو قاسى

ما زمان كان باختيارك

انت فاكر بنسى جُرحك

جيت تنمق فى اعتذارك

لما رحت تجور عليا

ورحت ابعد عن مسارك

تانى كاتب لى خبارك

***

الجواب الجاى منك

عندى صار ماليهو قيمه

والهوى الكان بينى بينك

عدى بالشوق والهزيمة

وهسَّه لمّا طريت هوايا

وقصة الذكرى الأليمه

جاى تانى عشان تعاود

للحكايات القديمة

***

ويبقى ردى على جوابك

يا جميل الرجعه لا...لا..

كونى ارجع ليك تانى

ألف مليون استحاله

ما الفراق انت البديته

يوم حرمت الروّح وصالا

وانت عارف البادىء أظلم

وايه لُزوم يعنى الرساله

***

والكلام الفى جوابك

كان بيعدِّى على زمان

قبلما تغدر عيونك

وقبلما يخونى الزمان

انت قايل قلبى بنسى

فترة الذّل والهوان

لا..لا..لا..لا

دىِ الكرامه العِندى أغلى

من عيونك والحنان

***

انت قايل انى ممكن

ليك أرجع تانى مرة

لا..لا..لا..لا

دَا الجرح ممّا استمر

لو حصل طيفك غشانى

ومرة في ذاكرتى مره

ببدا ينزف تانى مره

وتانى مرة وتانى مّره

يا حليل أيام عيونك

كان بتلهمنى المسره

***

أصْلُو كان خادعنى لونك

والبريق الفى عيونك

والكلام القلتو ليّا

كان بيخدع فينى زيفو

والجُرح في قلبي نوسر

وديمه زايد في نزيفو

.... وكنت برضو....!!

ممكن أهديك نور عيونى

شان عيونك منّى يرضو...!!

وأصلى حاسس طول سنينى

إنو أشواقى وحنينى

نقطة الضُعف الى فينى

***

الاّ هَسّه

إنت أنسى..

وحقو تنسى

إنو كان بيناتنا قصه

واصلو ماتعشم عيونك

انى بهواك انت لسَّه

***

انت لو فاكرنى بحزن

شان فراقك او جفاك

تبقى موهوم في عواطفك

اصلو قلبى زمان نساك



وابتديت انساهُ ليلكْ

والسنين الرّاحو ديلك

وانسى جور كُل الاماسى

الفيها كم قاسيتو ويلك

وانت لو فاكرنى بحزن

شان فراقك يا حليلك

يا حليلك..يا حليلك



.......


Post: #2
Title: Re: رد الرساله
Author: wadazza
Date: 04-25-2002, 10:32 AM
Parent: #1

مرام

شكرا على القصيدة الرائعة ونتمنى أن تتواصل مشاركاتك
بس من هو الشاعر ؟؟؟
تحياتى
ودعزة

Post: #3
Title: Re: رد الرساله
Author: omarmahdi
Date: 04-25-2002, 11:49 AM
Parent: #1


Post: #4
Title: Re: رد الرساله
Author: waleed500
Date: 04-25-2002, 04:34 PM
Parent: #3

لكى الشكر سيدتى على رد الرساله
ويا ود عزه شاعر ردالرساله هو شاعرنا المخضرم //مختار دفع الله

Post: #5
Title: Re: رد الرساله
Author: MXB6N
Date: 04-25-2002, 04:58 PM
Parent: #4

شكراً أختنا مرام على القصيدة الرائعة وياريت تكملى المعلومة عن المغنى لانى قرأت عن تلحينها من قبل المبدع النور الجيلانى هل يغنيها الان ام فنان أخر
تحياتى

Post: #6
Title: Re: رد الرساله
Author: moram
Date: 04-25-2002, 09:22 PM
Parent: #1

سلامات ود عزه ...شكرا ليك والقصيدة ذي ما اتكرم الاخ وليد
للاستاز.مختار دفع الله ..
تحياتي اخ وليد ..ويسال منك الخير انشاء الله..

عمر رجب سلام ..الشاكوش كان حايقع لكن ربك ستر....

mxb6n..انشاء الله طيب..للاسف اخي لادري من هو مغنيها
لكني فقط اهتم لذلك الرائع مختار دفع الله..واتمني لو عرفت ما
تبخل علينا وممكن نسال الاخ الخواض لو ما عندو مانع..
احترامي..
لكم كل الحب ..

Post: #7
Title: Re: رد الرساله
Author: moram
Date: 04-25-2002, 09:55 PM
Parent: #1

تانى جيتك
تانى جيتك

شايل معاى ندى الحروف

بهجة عصافير الجروف

تانى جيتك كان اشوف

كل الامانى الفى الفؤاد

يا غالى بى قربك تطوف

***

تانى جيتك

بعد الضياع بعد المحن..بعد الودار

بعد السنين الخاليه من لون الخدار

انا تانى جيتك وفى الفؤاد

احساس بحن لكل دار

حنينو مرسوم فى العيون

فى كل ضحكات الصغار

***

تانى جيتك

شايل معاى طيبة الصباح

شايل معاى أمل السنين

ناسى القبيل من عمرى راح

ناسى الضياع الكان زمن

مدسوس بتاور فى الجراح

والليلة جيت بى كل ود

طالب الرضا وطالب السماح.


********

الاخ عمر مهدي ...

تاني برضو في شاكوش....
تحياتي..
moram

Post: #8
Title: Re: رد الرساله
Author: waleed500
Date: 04-26-2002, 06:30 PM
Parent: #7

ومن كلمات الاخ الصديق / مختار دفع
اهديك يا مرام

الزهور الشايله منك

روعة اللون والاثاره

والقمارى الراجعه بسراع

لى دياره ولى صغاره

والجروف المن عيونك

كان خداره وازدهاره

وصونى ليك وقالوا لىَّ

ابقى عشره على الاميره

خلى بالك لى عيونها

وابتساماته المثيره

ولو سرح خاطر صباحك

وعدى فى ليل الضفيره

ابقى اكتب للوسامه

ولى حلاوة الابتسامه

وادعو يا الله السلامه

تبقى ما الرحله الاخيره

ويوم تهوم فى عيونا

فى ضجيجا وفى سكونا

يستحيل يخطر فى بالك

يوم تخونا

ويبقى فى عينيك سكونا

وكل احلاما الكبيره

وصونى ليك

البنفسج فى ربيعو

لا اخون فى يوم هواكى

لا زهر ريدك ابيعو

والامانى الفى عيونك

يستحيل فى يوم يضيعو

حتى لو راحت سنينى

وعمرى ما صادف ربيعو

وصونى ليك

وقالوا فى عز الزصية

خلى بالك للبنيه

الكلاما رقيق وحانى

زى نسايماً موسميه

**

وهى الوقت تضحك بتضحك

رعشة الشوق النديه

وهى اللى بيها عمرنا اصبح

دنيا حالمة وسرمديه

وهى اللى ساكنه مع الخواطر

وبرضو نشتاق ليها هى

***

وصونى ليك

الفراشات الانيقه

واحرف الشوق الرقيقه

والزهور الفى الحديقة

وصتنى ليك

وهى بتسلم عليك

والوصيه المنى ليك

خلى بالك لى عينيك

اصلى مشتاق ليها جداً

والغريبه معاى عيونك

يوم يشيلن

ويوم يودن

Post: #9
Title: Re: رد الرساله
Author: 7abib_alkul
Date: 04-26-2002, 06:49 PM
Parent: #8

شايف القيصده اصابتك في مقتل يا عمر مهدي
الحاصل عليك شنو اليومين ديل يا فرده؟