Post: #1
Title: الشماشة - بارت تو
Author: shammashi
Date: 03-24-2002, 10:48 AM
هذه القصيدة وجدتها في موقع النافذة بس إسم الشماشي النجرا ما مكتوب
وأرجو أن لا يرفع علينا قضية
وسماح يا فردة
تعالوا شوفوا عجاجنا غطى القوز
تعالوا أم بدة شوفوا سبيل الحاجة مبروكة
ثلاثة أزيار وجمبها كـــــــــــــــــوز
وموية الطين بتطفي النار تبرد جوف حلق مسكين
و صف شماشة واقف بانتظام يشرب
بيتمضمض ويتوضى وصلوا جماعة متماسكين
عيون مهمومة غير المولى تسأل مين
مصير شماشي واقف عمرو عشرة سنين
بشم الجاز مع البنزين وتحت الزنكي قال نايم و لاملين
وجيه من جوع مطفق ذي جلد يابس ممسح طين
بيسمع بالإغاثة كلام بدون تموين
وبي لجنة حقوق إنسان سماحة اللجنة جمل الطين
نست في عصرنا الحجري حقوق شماشي في السودان
بيسأل الله متوكل ويقرأ في ياسين
وبيسأل ناس قدر الله لو عرفوا المويلح وين
تواريخنا وحكاياتنا الفي سفينة نوح مع مهاجرين
حمرة الوز حمرة الشيخ وأم روابة والجبلين
محل مادون التاريخ أقاويلكم ما بجهلا المسكين
نميري هو العطشنا والجوعنا كان حاكمنا بالسكين
وجا الصادق شبعنا كلام وجات الجبهة زادت الطين
ومافي إجابة غيركم إنتو يا الحلوين
مع هجراتكم الحلوة .... خليج النفط والتكييف
وفي أمريكا تاكلوا رغيف ومحشي البيف
نسيتونا ونسيتوا الفول وموية الفول
نسيتوا أم بدة نص الليل
وأنة موت طفل برضع وأم عطشانة
خلاها الجوع هدم مرقوع وحفيانة
تقولو اشتقنا للسودان وفي البال توك كلام ولهان
وسوسو تغني للحبان
قصايد باسمة طيف فنان رسم بالريشة والتحنان
حلم بعروسة وداير يرجع السودان
والسودان عايز فلوس
والفلوس عند السلطان
والسلطان جبهة إنقاذ ... حكم شايب مع العكاز
دقن وعباية واستفزاز ..... مراجع في رقيص الجاز
وتجار سوق بأموال الخليج وعاظ
|
Post: #2
Title: Re: الشماشة - بارت تو
Author: ALZOLZATOO
Date: 03-24-2002, 10:58 AM
Parent: #1
شماشي
نحن اولاد امبده بنفطر ما بنتغدا بنتيمم ما بنتوضا وبنتشطف بي موية العدا
والتوفيق لك في الجزء التاني
زاتو
__________
خليني زي زيك شماشي عكليتا شماشي تفتيحه عرف الدقن لوث في شالك اب ريحه
|
Post: #3
Title: Re: الشماشة - بارت تو
Author: قرشـــو
Date: 03-24-2002, 11:03 AM
Parent: #2
هوى يا فردة
انت عاوز تدقس منو
فى شماشه بصلوا كمان؟؟؟
|
Post: #4
Title: شكرا شماسى على فتح باب الشمس
Author: gazalalmasalma
Date: 03-24-2002, 11:11 AM
Parent: #1
هملتك يابلد يوم يحكموك زى ديل
دقنة وسبحه للتسبيح صباح ونهار
وللتضبيح أواخر الليل
حسناتم بنوك ورصيد
بى قوة عين وقلع الايد
ماسلم أى شى من جور
حتى عشيشة العصفور
وموج النيل
آه من ...ديل
قبورنا القاعدة فوق كرسى
وتلقط مننا الأرواح
تختها فى الجيوب منديل
( الشاعر/طارق أحمد الحاج
شكرا شماسى ...على فتح باب الشمس
ملاذا للداخلين والعابرين
تحياتى
|
Post: #5
Title: Re: شكرا شماسى على فتح باب الشمس
Author: قرشـــو
Date: 03-24-2002, 11:25 AM
Parent: #4
غزال
آآآى ده الشغل ده الشغل
نحن من زمان بنكورك ونقول يا جماعة ادونا من المخبى من المدسوس جوه هناك..
يا سلام عليك بالله لو عندك من زى ده اتحفينا بيه
انا ما عارف انتى رائعة واملى فيك ما خاب اصله
تسلمى ويسلم ود عازة
|
Post: #6
Title: بعد الفطور
Author: gazalalmasalma
Date: 03-24-2002, 11:40 AM
Parent: #1
العزيز قرشو
عاد المخبا ده ما وقتو...بعد المغرب بعد الفطور أحسن مش كده ؟؟؟
وبعدين اقوليك ..مقطع القصيدة المنشور فوق ده ده انا لقيتو فى المفكرة عشان ما تقولو على سياسية
انا جنى وجن السياسة لكن ما جنى وجن ناسها!!!!!!!
تقول لى كيف الكلام ده ؟ أقو ليك الكلام ده كيف ..كيييييف كده
ودى الشدددددددددددددديد
تحياتى
غزال المسالمة
|
Post: #7
Title: الشماشة - بارت تو
Author: shammashi
Date: 03-24-2002, 11:46 AM
Parent: #1
عزيزي الزول ذاتو
هو ما كتر خير الله الخلاكم تقدروا تفطروا
آل غدا آل
|
Post: #8
Title: شمش
Author: shammashi
Date: 03-24-2002, 11:51 AM
Parent: #1
مع هجراتكم الحلوة .... خليج النفط والتكييف
قرشــــــــــــو
الكلام ليك يالمقلع عينيك
|
Post: #9
Title: شماشة
Author: Ahlalawad
Date: 03-24-2002, 11:53 AM
Parent: #1
الاعزاء الشماشي – الزول زاتو - قرشو – غازل المسالمة لكم التحية وشكرا على هذا الكم الهائل من الامتاع ، فعلا استمتعنا . بالنسبة للعنوان يا الشماشي والله انا قريت (بارت) من البورة ، وعفوا يا السوقكم حار
|
Post: #10
Title: Re: الشماشة - بارت تو
Author: 3mak Hasabo
Date: 03-24-2002, 02:52 PM
Parent: #1
طبعا ياشماشى زمان انا كان فوزت فى الدورة المدرسية بجايزة كانت الوقت داك حاجة كتيرة والمسرحية الفوزت بيها حتى الان علقة بذهنى وكانت تحمل هموم وقضايا الشماشة والمتشردين..رجعتنى سنين لوراء.
لكن شماشة بصلوا ديل الا شماشة كيزان
عمك حسبو...
|
Post: #11
Title: عملتها الحكومة
Author: رومانسي
Date: 03-24-2002, 02:56 PM
Parent: #10
اسم الشماسة الحكومة
دخلتو التاصيل
صار
شماسي = شمس الدين
عشان كدا ما غريبة كان لقيناهم صايمين الليلة
عشوراء
لووول
|
Post: #12
Title: Re: عملتها الحكومة
Author: قرشـــو
Date: 03-24-2002, 03:36 PM
Parent: #11
لكن دى بالغت فيها عديل
شماسه صايمين عاشوراء
وقال شماسه يقروا ياسين
صحى ديل شماسه كيزان
يا شمس
لكن اكان ده من رأسك تبقى انتى تقعدى بى جنب وخلينا نفصل ليك قعدة عدييييل كده
نحن ما بيناتنا شاعرة يا ناس
هوى انا ما قلت معارضة ولا قلت حمراء
لكن بصراحة يا بت انت فلتة هنا
ياخوى ان شاء الله وبركة المغارب دى اكان فى السودان تغترب فى دول الخليج
واشوف فيك يوم فى بلدنا دى تضاير من العساكر وانت كل اوراقك سليمة
قال مكيف قال
يا سلام عليك يا رزين يا جميل
تسلم لينا انت وتسلم كلماتك الحلوة
واتاريه
بالله شوف البوست الحلو ده طلع لينا حاجات كيف..
اها الحاجات المخبية يا غزال تمرقيها لينا متين بس؟؟
نحن ما دايرين جنس ده
اسعفينا والله نحن لينا زمن من الروائع ديك ياخى
يعنى انت شماسى مؤصل
مؤصل مش من التأصيل لكن من التمثيل
هاااااااى يكا
|
Post: #13
Title: الشماشة
Author: shammashi
Date: 03-30-2002, 08:21 AM
Parent: #1
شكرا لكل من شارك
والله يا جماعة أنا موضوع الشماسة دا يعين من زمان عامل لي منخوليا لأنو باعتبرهم أطفال سرقت منهم أحلى سنين عمرهم.
ولكن ألا تتفقون معي أن كل الشعب السوداني - كبيرهم علي صغيرهم- بقوا شماشة.
|
|