Post: #1
Title: كتبت ليك لا بينى بينك ريدة .. لا قصة غرام
Author: omarmahdi
Date: 03-21-2002, 11:25 AM
كتبت ليك
لا بينى بينك ريدة .. لا قصة غرام
إخترت ليك
أجمل حروف .. وأصدق فواصل نادرة
فى لغة الكلام
لا قصدى ألهو معاكى بى كلمات غنا
لا شعرى ليك مرجيحة من شعر الغمام
كتبت ليك والله يا قمر الزمان
شان جيتى بى زمن المحنة
وشفت فى عينيكى .. حس أهلى القُدام
......................
كتبت ليك وأنا جايى من زمن الشقا
الممدود على وش الثوانى .. مظللا
تتمدد الساعات سنين
تتفتح الأحزان غريبة .. ومذهلة
وأشتاق أفتش نسمة .. فى الزمن العذاب
وأيامى من كتر الأسى
وكتر العزوف .. والإغتراب
صارت حروف مترهلة
لحظات أسيفة .. ومهملة
........................
كتبت ليك
ووقفت ليك .. لامن لقيتك جايه من قلب الطريق
ولمحت فيك راحة المشاوير البعيدة
ونفحة النسمة الحنينة
الجاية من قلب الطريق
حسيت عجايب الدنيا .. إتلمـّت .. بقت
جايـّانى من عصراً سحيق
عينيكى حس أطفال بنادوا القمرة لى الغايب .. يعود
وجبينك الضوّاى
حجا الحبـّوبة فى الزمن السعيد
..........................
وأنا فى قساوة الموحش
الزمن المكهرب .. بى الحريق
أنا حيلتى أيه
قوليلى يا قمر الزمان
غير أتـّكى .. وأحلم معاك
وأحضن أماسى الصحو ..
والأمل البريق
|
Post: #2
Title: Re: كتبت ليك لا بينى بينك ريدة .. لا قصة غرام
Author: banadieha
Date: 03-23-2002, 06:05 AM
Parent: #1
حلوة..وكمان حلوة المريخية
لكن ياعمر بتخيل لي القصيدة دي مجاراة لقصيدة زيها ليحيى فضل الله أو شاعر تاني
|
Post: #3
Title: Re: كتبت ليك لا بينى بينك ريدة .. لا قصة غرام
Author: omarmahdi
Date: 03-23-2002, 08:36 AM
Parent: #2
عمرعلي بالطلاق القصيدة دي حقتي انا بس الاستاذ استلفها مني
|
Post: #4
Title: نصيحة
Author: wadazza
Date: 03-23-2002, 10:54 AM
Parent: #1
حبيبنا عمر مهدى
مسئول من الخير ...رد أجمل خطاب رسلتو ...وصل واللا لسه..
بعدين مالك تحلف بالطلاق ما خلاص الطلاق تم غصبا عنك...تانى تحلف ليه؟؟
واسمع نصيحتى ياعمر لما تحب تانى ...ما تحاول ترسل جوابات ...ولا فاكسات ولا ايميلات ولا حتى تتكلم فى التلفون...خليها بعيد وانت بعيدولو حصل بينكم الحلال وعقدتو ما تمشى شهر العسل معاها..
اسمع نصيحتى وعنوانها كيف تبعد الشواكيش عن أم رأسك...
اتفقنا يا فردة
تحياتى
ود عزة
|
Post: #5
Title: Re: نصيحة
Author: omarmahdi
Date: 03-23-2002, 02:36 PM
Parent: #4
يا ود عزة
انت بتعرف العشق من وين لسع الكلام ده بدري عليك والشواكيش جايك جايك
عمر
|
Post: #6
Title: Re: نصيحة
Author: sama7
Date: 03-23-2002, 02:38 PM
Parent: #4
الاعزاء عمر بناديها و ود عزة
صباحاتكم خير
وليكم وحشة
والله يا عمر مالى الا ان اقول مبدع كعادتك
والليلة رجعت لى ايام حلوة شديد
الله يجعل ايامكم كلها سعادة
اها يا عمر دى نربطها بديك ولا لا
لووووووووول
|
Post: #7
Title: Re: نصيحة
Author: omarmahdi
Date: 03-23-2002, 02:43 PM
Parent: #6
ده يا سماح من الوجع الخرافي
|
|