Post: #1
Title: العندو قصيدة حليوة للقدال
Author: miss_sudan
Date: 03-18-2002, 08:45 AM
Parent: #0
بالامس استمعت لقصيدة حيلوة في التلفزيون السوداني من القدال وكانت رائعة وياريت يكون واحد مسجلها عنده او مكتوبة عنده
ويسرلها لي وجزاكم الله خيرا
|
Post: #2
Title: حليوة
Author: Ahlalawad
Date: 03-18-2002, 08:50 AM
Parent: #1
الاخت مس سودان
والله انا سجلتها (فيديو) ونسخها على الورق ثم طباعتها بيحتاج لشوية وقت _ لكن اتوقع انها موجودة في كبروس دت كوم - خلينا نحاول
|
Post: #3
Title: Re: العندو قصيدة حليوة للقدال
Author: suna
Date: 03-18-2002, 08:52 AM
Parent: #1
حليوة .. فى ليلة المولد
بقول غنوات
فى البلد البسير جنياتها لى قدّام
ولى الولد البتل ضرعاتو فى العرضة
ويطير فى الدارة ... صقريّة
ولو السمحة تلت إيد .. ومدّت جيد
يقوم شايلاهو هاشمية
يشيل شبّالو ختفة ريد .. وريدة روح ..
وحمرة عين .. وإيدية
ولى الولد البشيل مدقاقو ..
قولة خير على القمرة
كلام فاسك على أرضك
بيبقى عديلة .. يا بيضة
وببقى زفاف تزغرد ليهو .. قمرية
************
وقبّال حول تغيم غيمة .. قبلية
ترش الدّارة .. والحدبة الصعيد الحلة
يافرحة نصارة الصفقة ...
بى النسمة الصعيدية
ويا جهرة نهار الليلة ... بدرية
رحيح جنياتنا فى الحدبة .. الصعيد الحلّة
... يا سمحاتنا هولب ــ لب
ويا اللـّوز الفتق فى الوادى
... هولب لب
ويا البحر الطمح مدّادى ...هولب لب
يا غنواتنا ياصلواتنا ... هولب لب
سألتك بى الذى ركز الأرض معبد ...
وسوّى الناس عليها مقام
سألتك بى حشا الأمّات ... ودمعاتنا
سألتك بى كبيداتن ... ودعواتنا
شليل وين راح
يكون ضلّ الخريف ... فاتنا
وشليل وين راح
************
وزى برق السماك الجابها .. دغشية
وزى زغرودة البطن الكبارية
مرق من شامة القمرة
مليتك بى وداعة الله
ومقدّم بى العديل .... يبرا
تعالوا أبشروا ياجنيات
شليل ما راح ... شليل ما فات
شليل عند المسورو حرق ... بقالو حصاد
شليل فوق التقانت قام ... خدار وبلاد
شليل مسدار ... شليل مشوار
شليلنا أرضنا يا جنيات
شليل قايم نصايص الليل ...
يتمتم ليلو وردية
حرازنا شليل ... شليلنا دليب
شليلنا دليل على البلدات
... بعد درب التبلدية
شليل ما راح ... شليل مافات
شليلنا ونحنا همباتة ومهاجرية
مزارع بات على عشقين .. تراب بلدو
.... وسماح فوق بت مزارعية
|
Post: #5
Title: شكرا
Author: Ahlalawad
Date: 03-18-2002, 09:07 AM
Parent: #1
والله اوضعتم تخاجلنا يا شباب - شكرا رومانسي - شكرا للجميع
|
Post: #6
Title: Re: شكرا
Author: miss_sudan
Date: 03-18-2002, 09:19 AM
الشكر للجميع على سرعة الاستجابة
اهل العوض
انا في انتظار القيدة على الايميل بتاعي
واعتقد ان القصيدة كانت اطول من كدة اعتقد ذلك
|
|