Post: #1
Title: عشوشة
Author: TIME
Date: 03-18-2002, 03:52 AM
عشوشة
عشوشة : طفلة تتشابى بسنواتها الأربع من اجل قطرة ماء ، تنحني للسنابل.. تعانق الطين اعترافا ..تمنح النيل في كل صباح قبلة ..
في ليلة العيد من كل عام كانت تحلم بدمية تشاركها الهواجس ..تشهد عليها الامطار والايام والرواكيب القديمة ..ظلت تحلم بالدمية - التي لم تمتلكها ابدا - منذ فجر طفولتها وحتى انهكتها الشيخوخة ..
واليوم ..ربما تلمحها صدفة تمهد الارض بانتظار الموسم الجديد .
0 0 0 0
حجيتكم ما بجيتكم خيرا جانا وجاكم
...وكانت طفلة صغيرة شديد ..وكان الدنيا وزي بكرة العيد .. ( يابوي العيد دايرالي عروسة ) ..ركت قمرية في سقف البيت ..وكان الدنيا كمان بتنقط - تك تنتك-تك تنتك- يا عشوشة المطرة رشوشة خفيفة ..
تضحك فيك القمرية - حلاته سنونه حلاوة لبن - ، جريت ظلالك سبقنك وضفايرك شايلاها نسايم ..الطين يتطرطش حوليك ونظراتك تسبق خطواتك ..
تغرفي الموية وتملي الزير ، شان يوم تعطشي تشربي تروي ..
بس تضحك فيك القمرية : ( ياحليلك انت الزير مكسور ..ياحليلك انت الزير مكسور ..!! ) .
وصادف انو الطرفة ندية ، وكان في الجو في رشوشة خفيفة - تك تنتك - ، وحس الساعة بيعمل - تك تك تاك تك - ، وما بيناتن ( حس الساعة وحس المطرة ) كانت بت واحلامها كبيرة ..وكان الدنيا وزي بكرة العيد ..( يابوي كبرت ودايرة عريس ..!! ) ، فقدتك عينيك القمرية ، وضاع من سمعك غنواتا ، هاجت بيك الذكرى قديمة .. وبارت عينك غيمة بعيدة جاية تجرجر في خطواتا ..، قمت بكيت علي القمرية ..ومازج دمعك مطر الغيمة ..( يا عشوشة المطرة رشوشة خفيفة ) - تك تنتك - ، غافلك الزمن الملعون ، وتمشي حياتك بين المطرة وبين الساعة ..و..
وكانت أم وهموما كتيرة ، وكان الدنيا وزي بكرة العيد ( يا ولدي تعبت ودايرة ارتاح ) ،
بنو ليك راكوبة في اخر الحوش ..بي غادك ليها في زير مكسور بقالو سنين.. ركت في يوم جنبو القمرية ، حس اطفالك غاب وروح ..نزلت دمعة علي القمرية .. نزلت قطرة مطرة من الراكوبة ، اشان في الجو في رشوشة خفيفة ..وما بين المطرة وجري الساعة ..
كانت حبوبة خلاص في وداع .. وكان الدنيا وزي بكرة العيد ( ياولدي كفاي ..دايرالي كفن )..
وتمسكك عطشة .. وتمسكك عطشة ..
تتبدا لك فجأة القمرية بتضحك فيك - حلاته سنونة حلاوة لبن - .
وتمدي ايديك ..
هاجت بيك الذكرى قديمة ..، تقيفي عصايتك تتكل خطواتك .. والطين يتطرطش حوليك ..تغطسي كوزك جوة الزير - شان تشربي تروي - ، بس تضحك فيك القمرية : ( ياحليلك انت الزير مكسور .. يا حليلك انت الزير مكسور …!! ) .
|
Post: #2
Title: Re: عشوشة
Author: alsara
Date: 03-19-2002, 05:39 PM
Parent: #1
Time..
u keep amusing us.. my words really feel helpless in front of this master piece.. hats off to u
|
Post: #3
Title: Re: عشوشة
Author: TIME
Date: 03-19-2002, 06:13 PM
Parent: #2
العزيزة السارا
كلماتك دائما سارة
شكرا لتواصلك الرائع مع كل اهل البورد
كم تجعلين المكان يبدو اجمل
|
Post: #4
Title: Re: عشوشة
Author: banadieha
Date: 03-20-2002, 04:09 AM
Parent: #3
تايم
حلوة..شدتني النغمة المواولية..وكمان بساطة التعابير
|
Post: #5
Title: Re: عشوشة
Author: suna
Date: 03-20-2002, 06:20 AM
Parent: #1
ياتايم إنت مافي التايم لكن
ربنا يديك العافية
حلوة حلوة حلوة
|
Post: #6
Title: Re: عشوشة
Author: TIME
Date: 03-20-2002, 03:24 PM
Parent: #5
الله يجبر بخاطركم يا بناديها و سونا زي ما جبرتو بي خاطري
لكن والله تعبتو عدييييييييل بعد دا
يعني تاني كل يوم حنط ليكم بي شخبطة زي دي
ما خلاص اقنعتوني اني برااااااي اااا قصدي كتاااااااب
ولا شنو ..
|
|