Post: #1
Title: قاموس سوداني
Author: رومانسي
Date: 03-14-2002, 12:55 PM
الاخوة البورداب مثلما نجح اخونا شماسي في اخراج مخزونكم من المصطلحات المتداولة بين قطاع الشماسة اقترح ان نواصل في اخراج مخزوننا من الكلمات السودانية الغريبة التي لا يلم بها هذا الجيل المام جيدفهناك بعض المفردات ظهرت لي بالامس في بوست الاخ ايمو كلمات مثل التركاش والعكش والكوكاب وطبعا يوجد الكثير من المفردات المتداولة في بعض مناطق السودان يكون لها مرادفات في مناطق اخري لذلك اقترح لكل من له مخزون من هذه الكلمات ان يمدا بها في هذا البوست
ومثال لذلك :-
السعن
الواسوق
السلوكة
ام جنقر
والخ...
وهذه ضربة البداية
|
Post: #2
Title: Re: قاموس سوداني
Author: yasiko
Date: 03-14-2002, 01:09 PM
Parent: #1
فكر جميلة ولكن نريد ان يكتب المعنى معها لو وافق حبيبنا صاحب الفكرة
كودنشبر =فقة صغيرة يستخدمها المزارع في نقل التراب لسد الماء السائل وقد وردت في شعر حميد
التكم =قفل الباب وكان يسمى الكبد قبل ان يصبح الباب اليوم
الحنقوقة =شريحة من عرجون النخل الناشف
الدانقة =البرندة
|
Post: #3
Title: Re: قاموس سوداني
Author: رومانسي
Date: 03-14-2002, 01:25 PM
Parent: #2
عفوا اخواني انا قصدت الكلمة والمعني لكن نسيت اكتب المعني في الكلمات النزلتها ان شاء الله برجع ليها
|
Post: #4
Title: Re: قاموس سوداني
Author: 7abib_alkul
Date: 03-14-2002, 02:51 PM
Parent: #2
ولله الفكره جميله وخاصه مع عيال المغتربين والمهاجرين
1/ الدوكه***مكان لوقد النار علي الارض
2/القفوزه*** تلقيح انثي النخيل
3/التيوه*** نواه ثمره الدوم
4/ود الاحد*** المكان الذي يوضع فيه الجثمان اخل القبر
5/الدافوري*** لعب كره القدم في شوارع او ميدان وسط الحله
6/الككر*** مقعد صغير الارتفاع من الارض
7/الللس*** عود من الخشب يدخل في تكوين الساقيه
8/الطاقه*** فتحه في الجدار تتطل علي الجار الملاصق
9/التايه*** صندوق من الخشب يستعمل لحفظ الاقراض
10/القرقريبه*** تصنع من السعف وتستخدم في العواسه
وللحديث بقيه
|
Post: #5
Title: قاموس سوداني
Author: seventy
Date: 03-14-2002, 03:53 PM
Parent: #1
كيفك يا صديقي
والله يا حبيب فكرة في السلك
وأحييك على الأفكار النيرة دائما
ومبرووووووووووووووووووووووووووك
أكيد عرفتها
وانا جاييك وحأقدك في البوست بتاعك دة
والله إلا تقول كفى
|
Post: #6
Title: قاموس سوداني
Author: seventy
Date: 03-14-2002, 03:53 PM
Parent: #1
كيفك يا صديقي
والله يا حبيب فكرة في السلك
وأحييك على الأفكار النيرة دائما
ومبرووووووووووووووووووووووووووك
أكيد عرفتها
وانا جاييك وحأقدك في البوست بتاعك دة
والله إلا تقول كفى
|
Post: #7
Title: Re: قاموس سوداني
Author: رومانسي
Date: 03-16-2002, 09:16 AM
Parent: #6
بارك الله فيك اخي سفنتي
طبعا عرفتها لاني بقيت متوسط
نتوقع الكتير منك لنثري معرفتنا بتراثنا
اما بالنسبة للمفردات
السعن = جلد يستخدم في حمل الماء او اللبن
السلوكةو الواسوق = ادوات زراعية
|
Post: #8
Title: Re: قاموس سوداني
Author: miss_sudan
Date: 03-16-2002, 09:28 AM
Parent: #7
اي عليكم الله عاوزين حاجة من الشكل دة علشان على الاقل نتواكب مع اللهجة
ونفهم المسلسلات
مش زي مسلسل الدهباية وكنا مسطحات منها
وبالمنسابة احكي ليكم نكتة عن بنت خالتي والقبلوها شهادة عربية بطب الخرطوم
وسالوها عن اسبتالية ام درمان
فقالت ليهمانا عارفة ام درمان بس الاسبتالية دي ما عارفاها شنو
|
Post: #9
Title: Re: قاموس سوداني
Author: yasiko
Date: 03-16-2002, 10:45 AM
Parent: #8
يا مس سودان سلام
انت من زمن زمن الدهباية وما بتفهمي المفردات دي
الله يكون في عون بت خالتك
|
Post: #10
Title: Re: قاموس سوداني
Author: miss_sudan
Date: 03-16-2002, 10:54 AM
Parent: #9
انا بت متين
|
Post: #11
Title: Re: قاموس سوداني
Author: yasiko
Date: 03-16-2002, 10:59 AM
Parent: #10
الدهباية دي ما زمن نميري
والله انت ولدوك يوم الانتفاضة معليش
|
Post: #12
Title: Re: قاموس سوداني
Author: رومانسي
Date: 03-16-2002, 11:09 AM
Parent: #11
ياسيكو معليش بتنا قصدها الدهباية في المسلسل السوداني الاخير العرض في رمضان قبل الماضي اخد طرادتك وانزل هنا لوووووووووووووووووووووووول
|
Post: #13
Title: Re: قاموس سوداني
Author: yasiko
Date: 03-16-2002, 11:33 AM
Parent: #12
شكرا رومانسي لاعادة الحقوق لذويها
مع الاعتزار للركاب ومس سودان
والله لا علم لي بالجديد هذا
|
Post: #14
Title: Re: قاموس سوداني
Author: قرشـــو
Date: 03-16-2002, 11:53 AM
Parent: #13
رومانسى
سلام يا حبيب ووين سلوكك ياخى
فكرة حلوة اكيد وحاتخلى بناتنا واولادنا المولودين فى المهجر يعرفوا شىء عن بلدهم برضو وما يقعدوا يطهموا بين الناس ساكت..
اول حاجة اصحح اخونا حبيب الكل فى مسألة الدوكة..
الدوكة هى صنو الصاج يا حلو
والصاج قطعة مربعة من الحديد الصاح توضع على اربع حجارة ويوضع الحطب من اسفله وتعاس عليه الكسرة او القراصة وقد جاء الان صاج كهربائى والكل يعرفه..
اما الدوكة فهى تصنع من الفخار وتكون ناعمة الملمس وتعاس عليها الكسرة ايضا وكسرتها شرط يا شباب واقطع ضراعى اكان فيكم واحد اكل كسرته الدوكة..
|
Post: #15
Title: Re: قاموس سوداني
Author: ebrahim_ali
Date: 03-16-2002, 04:26 PM
Parent: #14
والله ياجماعة عقدتونا عديل كده يعني ما نطلع من البورت دا ولا شنو فرغم الواحد عازف عن الكتابة ويقراء فقط ما تكتبه اناملكم المرهفة الحس والمبدعة والمبعدة عن ديارها ايضاً اجد نفسي مرغما في الكتابة لبراعة الموضوع المطروح واهميته فشكرا لك الاعزاء والاصدقاء الذين تعرفنا عليهم من خلال هذا البورت الفلتة والشرط لمن غلط ويخلي الواحد مكسر فيهو حتة حتة وبمناسبة القاموس السوداني هذه بعض الكلمات التي خطرت في بالي الآن ولعلها تفيدكم العنقريب وهو السرير ويكون عادة مجلد او مسور بالحبل او البلاستيك والبنبر وهو المقعد الصغير الذي تجلس فيه الحاجة في التكل والتكل هو المطبخ والتبروقة وهي المصلاية ودي بنصلي فيها وكذلك بتقعد فيها المراة العايزين يمشطوها ويمشطوها معناها يعلموا ليها الكوفير وللمزيد لمعرفة هذه اللغة الفريدة والمتيزة اللهجة السودانية هنالك بعض الكتب تحدثت عن هذا الموضوع امثال د. عون الشريف قاسم والطيب محمد الطيب وغيرهم
ويلا ياشباب ورونا المزيد وكدي قبلوا جاي على ناس البطانة ديل وشوفو عندهم شنو
|
|