جدار الماضى دمة خد

جدار الماضى دمعة خد هذه العبارة التى رددها استازنا ومبدعنا الراحل المقيم مصطفى سيد أحمد والتى رددها من البداية بنغمة حزينة وهانحن اليوم حاضرنا صار دمعة خد بعد ما ابتعد منا ابو سامر تاركا خلفه حزنا لا تقدر الأيام ان تنسيه او حتى تقلل منه بل العكس تماما كل يوم الحزن بزداد كمان وكمان وبقدر ماهو تارك خلفه هذا الحزن الكبير فبالمقابل ترك وراءه عشقا كبيرا لايضاهى ومكانة سامية بسمو مقامه وتاريخا خالدا مخلدا فينا زكراه العظيمة وحافظا له كل عطائه للوطن داخله وخارجه نسأل الله بضراوة أن يغفر له ويرحمه ويحسن مسواه وياريت الأيام توعدنا بخليفة بس اردد حتى انشاء الله كلماته فقط نحن ندرى ان مبدعنا الراحل لا يعوض بمثله وهذا ما استخفاف بمبدعينا الآخرين فهم ايضا التحية ليهم جميعا ولكن لحفظ مكانة ابو سامر



ومن عبر البورد بحى كل اسرة الراحل المقيم مصطفى سيد أحمد


شجن

انا ماعندي كلام اقول غير اني اهديك هذه الابيات

السفر الأبيد.....
صلاح حاج سعيد
ماكنت قايل نفسى يوم
أرثيك يا أصدق خليل
أنا كنت بتخيّل أكون قبلك
أسافر غنوة فى الوتر الجميل
زى ما عبرت معاك صروف زمن المسافة
وجينا للى الحزن النبيل
أنا كنت داير الدنيا تمهلنا
ونغنى الفرحة لى الزمن الخرافى .. المستحيل
********
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
*********
كل المطارات والموانى
وشفع البلد الفتارى
... لسة بارين القطارى
يسألوا الناس عن خبر زولاً
مسطّر إسمو فى قلوب العذارى
وفى عيون كل المساكين ... الحيارى
زول بيطلع من نفس طورية ضامة الطين
تكابد طول نهارا
زول بيسكن فى عيون أطفال
تأمّل ديمة يديها البشارة
ياخى والله الفرقة حارة
وفقدك أكبر من محيط الدنيا
وأكوانها ... ومدارا
*********
طليتنا زى حلماً جميل
فجأة فى غفلة أنسرق
أسطورة تحكى أمانى جيل
فى حب غناك كان ليهو حق
أديتو فى الدنيا الأمل
وريتو كيف فى الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح كما شمس النهار
صدقك ملاهو حماس .. يقين
بالخير وبالحق .. والنضار والإفتخار
إنو الحبيبة هى الأرض
والتضحيات عشان عيونا هو الفرض
والدنيا ورّاثا الصغار
*********
وعرفنا يازول قسوة الضنا والتعب
والإرتحال فى غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك كل الشوارع فى المدينة
ناحت عليك كل الفواصل
... فى الغنيوات الرصينة
وإنكتم نبض الغنا
جلل سواد حزنك سنا
وإتوشح المنا بالضياع
وكان بدرى يازول الوداع
لا سكة لى درب الرجوع
بعدك أغ######## إلتياع
مسكونة بالأسى .. والخشوع
لكن بريقك ما خبا
أبداً بريقك ماهو ضاع
ساطع كما نور الشعاع
**********
منو قال هو فات
زولاً وهب كل الحياة للأغنيات
منو قال هو فات
ما أظنو زيّك يقولوا فات
يامن وهب كل الحياة للأغنيات
يا من ترك فى قلوبنا أنبل ذكريات
يا من ترك أحلامو فى كل الجهات
وخلّد معانى الروعة بى كل الصفات
ما أظنو زيّك يقولوا فات
يامن وهب كل الحياة للأغنيات
***********
ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول حروف الشنشنة

ياسلام عليك

واحشنى ومصعب التحية ليكم موصولة عبر البورد والتحية لصلاح حاج سعيد ولكل من تغنى له استاذنا الراحل المقيم مصطفى سيد أحمد نسأل الله احسن مسواه
ونتمنى ان لا يرينا الله الماضى ودمعاته المنهمرة بل يعود علينا ويبشرنا بمستقبل مشرف ومبتهج وان كان دة نوع من احلام اليقظة ولا يتماشى مع الحال الحرن والأيام الضنكة والليالى العجاف مسيطرة تماما على الاوضاع



شجن