Post: #1
Title: أنا في السودان
Author: cola
Date: 03-11-2002, 10:14 AM
Parent: #0
اولا اهنئكم جميعا بعيد الاضحى المبارك وكل عام وانتم بخير وصدقوني واحشني جدا جدا جدا
بحمد الله وصلت السودان لقضاء اجازة مع الاهل والاحباء ووجدت الاهل بخير ... بس بكل اسف الاوضاع متردية وحالة البلد زي الزفت حتقولوا زي شنو حاقول ليكم من كل النواحي والمغترب هنا يعتبر بئر فلوس الكل بدءا من اصغر موظف ضرائب وحتى ....... يغرف منو، وانا على استعداد لتنويركم فادلوا بدلوكم
|
Post: #2
Title: Re: أنا في السودان
Author: قرشـــو
Date: 03-11-2002, 10:20 AM
Parent: #1
كولا
ازيك ياخوى والحمد لله على سلامة وصولك وان شاء الله الاهل كلهم بخير
ياخوى قول بسم الله وخت الرحمن فى قلبك
الحكاية بسيطة وهى انك بتصرف من غير ما تدخل وده سبب المشكلة
يعنى الناس القاعدين فى السودان وبصرفوا زيك ما حاسين بالمشكلة دى
ببساطة لانهم بدخلوا ويصرفوا
اقعد ياخوى واعمل مقارنة بين صرفك فى الغربة وصرفك فى السودان حتى الايجار ما تنساه وحاتلقى انك ما غيرت حاجة والحكاية هى هى ..
دى مناسبة حلوة
بالله قول لينا لينا اى حاجة هناك بالتفصيل
نحن شايفين فى التلفزيون ابهار عديل كده
يلا ورينا الحقيقة كيف وبالتفصيل الممل جدا
وفى انتظارك
وما تنسى تورينا اخر الاعمال الادبية شنو حتى الاغانى الاكثر رواجا..
|
Post: #3
Title: Re: أنا في السودان
Author: يازولyazoalيازول
Date: 03-11-2002, 10:30 AM
Parent: #1
مرحب حباب كولا
والله ليك وحشة كبيرة
ياخ السودان ظريف ولذيذ
بى سجمو ورمادو
just enjoy it man.
|
Post: #4
Title: حباب أهلي .....
Author: cola
Date: 03-11-2002, 10:48 AM
Parent: #1
حباب الحلوين قرشو ويازول ؛؛؛ لكم وحشة والله
فعلا السودان حلو بسجمو ورمادو لكن الواحد بيغيب عن البلد وبيرجع وهو بتمنى يلقاها تحسنت
بالنسبة للصرف يا قرشو انا وصلت السودان عن طريق بورتسودان ومعي عربيتي ومن ما وصلت انا بدفع فلوس على طول الطريق ما معروفة بيعملوا بيها شنوتخيل في كل 100 كيلو تجد كشك وعسكري ودفتر وعليك ان تدفع بدون نقاش ولاحظ كما قلت التلفزيون ابهار وسمعت شخصيا من مسئول حكومي انه تلاشت الاكشاك والدفع في الطرق فوجدت العكس
نجي لشوارع الخرطوم المتلاشية من تراكم الاتربة والاسفلت المحفر وكمية من الغبار ... اين البترول السوداني الذي يملأون بخباره العالم؟؟؟؟ واين يذهب الزفت؟؟؟ الى هنا اتوقف
الحاجة الجميلة في البلد ان الناس لسة محتفظة بروحها الحلوة
لكن بالنسبة للاخبار الفنية الموجودين في الساحة فرفور ومحمود عبد العزيز وتجد في كل بيت صوت وصورة للرائع مصطفى سيد احمد وهذا شيء ملفت واسعدني جدا
|
Post: #5
Title: انا في السودان
Author: shammashi
Date: 03-11-2002, 11:10 AM
Parent: #1
كولا
الله يعينك وتقدر على حلاوة قطن
حلاوة قطن طبعاً ياها القروش السودانية تتلحس في دقيقة
غايتو كان اتقطعت أعمل لي Missed Call عشان نلحقك بحاجة
بعدين أوعك تقوم تمرض والله واحد من أهلم يمرض لأنو 500 ألف مابخارجوك
وأوعك من العوازيم الكتيرة والقعدات
وأوعك من عساكر المرور . وأوعك من ناس بسط الأمن الشامل
وأوعك من النشالين. وأوعم ما تهوب ناحية المغتربين لو ما جيبك مليان دولارات أو عندك واسطة مكربة ، يعني يكون عضو مؤتمر وطني مكرب
|
Post: #6
Title: Re: انا في السودان
Author: shammashi
Date: 03-11-2002, 01:22 PM
Parent: #5
وكمان أوعك تكون مجكس ليك واحدة في الجامعة وتمشي ليها ساعة الفطور لأنها حتعزم صاحباتها كلهن عشان توريهن إنو الجكسوية حقتها مغترب .
,اوعك يكون في عزاء في بيت بكا وتقوم تمسك الكشف لأنو أي واحد حيجي يقول ليك سجلي خمسة ألف جنيه وأدفعن لي لمن أديك ليهن. وطبعاً تاني لمن تجي مسافر ما حتشوفن. وأوعك الجماعة يكونوا دايرين يأجروا ليهم بوكس عشان ماشين البلد لمناسبة تقوم تركب معاهم لأنك إنت الحتدفع أجرة البوكس كلها حتى لو مليون.
وأوعك تمشي لزيارة مريض في المستشفى ساعة الزيارة لأنو حتلقى كل معارفك في خشم الباب وحتدفع إنت حق الدخول - طبعا مستشفى الخرطوم الدخول ليهو بألف وخمسمية. وأوعك تمشي الملحمة بتاعة الحلة الصباح.
وأوعك تحضر ليك نقطة لعريس لأنو الجماعة بقوا يقولو اسم الزول ويقولو معاهو مبلغ خرافي وكلو كضب في كضب. وإنت تقوم تشيلك الهاشمية تدفع العندك كلها.
وأوعك ناس البيت كان قالو ليك ناس الكهرابا جابو إنزار بالقطع تصدقهم لأنها الكهراب مدفوعة من القروش الكنت قاعد ترسلن لكن دايرين يملصوك ساكت.
وأوعك تاني تمشي السودان
|
Post: #7
Title: Re: انا في السودان
Author: Elsadiq
Date: 03-11-2002, 09:36 PM
Parent: #6
الاخ كولا
مرحب بالعودة والحمد لله علي سلامة الاهل اما كيفية تقييم المغترب او المهاجر للسودان في اجازته القصيرة جديرة بالمناقشة فعلا ساعود لاحقا للتعقيب
|
|