Post: #1
Title: مداخلة
Author: abzahana
Date: 03-11-2002, 00:50 AM
ناس البورد الحلوين
سلامات كده
مستمتع بيكم حد المتعة ما تقيف .. وانشا الله لا فض فوكم
من زمان متابعكم وحماسي بانكم كلم اصحابي .. ونسجت ليكم في خيالي صور حلوة
ما عارف من وين ابتدي ومع منو ؟
عليكم الله داير منكم كدا كلمة ترحيب حلوة علشان تتفك عقدة لساني وكان قلتوا ايوة !!! الله قال بقوللكم معى .
مدوا بساط الزهر واحتطبوا النخيل
وانحروا للقلدمين ذبائح البهج الحفي وفرقوا
العيد والبشرى وأمجاد القطاف وموسم الخصب الوريف
|
Post: #2
Title: Re: مداخلة
Author: 3mak Hasabo
Date: 03-11-2002, 01:23 AM
Parent: #1
مرحب بيك وخش لاغادى واتكى فوق العنقريب داك والنجيب ليك كوباية شربات ومعاها قهوة والنصقر جمك اها قولتا ليك ايوه...
عمك حسبو...
|
Post: #3
Title: Re: مداخلة
Author: yasiko
Date: 03-11-2002, 03:13 AM
Parent: #2
مرحب حبابك عشرة بلا كشرة
|
Post: #4
Title: Re: مداخلة
Author: ودحبيب
Date: 03-11-2002, 03:14 AM
Parent: #3
مرحب بيك يا زول
|
Post: #5
Title: Re: مداخلة
Author: BitAlhana
Date: 03-11-2002, 03:40 AM
Parent: #4
مرحبتين والف
البيت بيتك
|
Post: #16
Title: Re: مداخلة
Author: EMU إيمو
Date: 03-11-2002, 05:01 PM
Parent: #4
حبابك يا ود حبيب
علي الطلاق عشرين دقيقة وأنا بتأمل
في صورتك
صدقني انت تستاهل مسئول أمني
عشان وليد ما يرفع قرنو
عمنمزح يا وليد
|
Post: #6
Title: جانا ونور منتدانا
Author: Elsadiq
Date: 03-11-2002, 04:13 AM
Parent: #1
اهلا وسهلا فيك يا اخوي بيننا وان شاء الله تعجبك الساحه
|
Post: #7
Title: Re: جانا ونور منتدانا
Author: alsara
Date: 03-11-2002, 04:46 AM
Parent: #6
يا ماشي فوق النيل
هاك الجمال منديل
يا جايي من النيل
هاك النخيل اكليل
أبزهانة...1000 مرحبا بمقدمك
|
Post: #8
Title: Re: جانا ونور منتدانا
Author: suna
Date: 03-11-2002, 07:12 AM
Parent: #7
ألف مرحب يالحبيب
ألف مرحب وماك غريب
------------------
بكري البركة في الشوفة وبالله طمنا عنك
-------------------
واقعدوا عافية
|
Post: #9
Title: Re: جانا ونور منتدانا
Author: رومانسي
Date: 03-11-2002, 07:18 AM
Parent: #8
بزيارتك بيتنا نور
ابقي لا جوة وصباحات الله بي خيرن
|
Post: #10
Title: Re: جانا ونور منتدانا
Author: قرشـــو
Date: 03-11-2002, 09:40 AM
Parent: #9
اخونا ابب زهانة
يعنى ما ود اب زهانة
الف اهلا بيك بين ناسك واهلك وقبيلتك وبين اولاد وبنات العز..
يا زول كلامك ده يختك فوق الراس ويخلينا نعتبر صديق واخ وعزيز علينا
ان شاء الله يطيب ليك المقام يا سيدى
وبالمناسبة انت اخترك اسم حركى له مدلولات كبيرة فى عالم الفكاهة والطرفة والدعابة فنرجو ان تكون كذلك ..
وحبابك عشرة بلا كشرة
|
Post: #11
Title: بأسلم عليكم تاني
Author: abzahana
Date: 03-11-2002, 03:24 PM
Parent: #1
ناس البورد الحلوين
سلامات كده
الحلوين .. عم حسيو . ياسيكو . ام الهنا . ودحبيب . الصادق . السارا . رومانسي . قرشو . سنا ( بالمناسبة هي سناء ولا سنة يا الحيطة )
سعدت بترحيبكم كتير ، وعليكم امان الله لما عيوني رقرقن .. رقرقن شنو كملت صندوق المناديل الجنبي .
ذكرتوني الاحباء الخليتهم وراي في البلد ( بالنسبة لي بأفتكر اسم البلد اكثر حنية والتصاقاً من اسم السودان ) بالرغم اني ما من أهل العوض .
طبعاً ما غريب من اهل بلدي الشوامخ هذا الترحاب
والناس في بلدي يزرعون الحب
ويا ناس هوووووي نحن اصحاب طب (بفتح الطاء وسكون الباء )
وحمدت الله كثير لقيت لي ناس اتونس معاهم في زمن كتر فيه الزيف وقل الونس
واخوكم متغرب من زمن ما طويل ولسن حاله يقول :ـ
سأعود لا إبلاً وسقت ولا بكفيَّّّ الحصيد روائعا
مدوا بساط الحب وأغتفروا الذنوب ،
وباركوا هذي السنين الضائعة
مازال سقف أبي يظل ، ولم تزل أحضان أمي
رحبة المثوى مطيبة الجناب
بأشتغل 16 ساعة في اليوم .. ولكن ما أجمل أن نرتاح وسط الدفأ
بينكم وكل هذا الحب والود .. الله يخفظكم
ـــــــــــــــــــــــــ
هذا بلدي والناس لهم ريح طيب
بسمات وتحايا ووداع ملتهب
ـــــــــــــــــــــــــــ
|
Post: #12
Title: Re: بأسلم عليكم تاني
Author: suna
Date: 03-11-2002, 03:41 PM
Parent: #11
قلتها وهّذت فيني عصب مشدود مشدود مشدود | Quote: مازال سقف أبي يظل ، ولم تزل أحضان أمي
رحبة المثوى مطيبة الجناب |
والله انت مكسب
|
Post: #13
Title: Re: بأسلم عليكم تاني
Author: تغريـــد
Date: 03-11-2002, 03:41 PM
Parent: #11
abzahana الاخ العزيز
آآآآآآسفه حتى ينتهي الاسف من الوجود لتأخري في الترحيب بكم
ولكن سأهديك أجمل ما قرأت بعد القرآن الكريم
عسى أن يجد القبول لديكم ويغفر لي تقصيري في حقكم
في خلق الانسان بشكله الآدمي المعروف فكرة أصيلة
هي الحاجة إلى الفقد. فإذا هو فرد يديه أحدث فراغا
وكذلك رجليه. أنظر إلى أصابع كفه المتفرقه ، وفمه الفاغر بالنداء
كل ما فيه يدعو للإلتحام . كل تلك الجهات وغيرها من الجسد
يقطنها الحنــان كما يقطن الليل في الليل
~عاطف خيري~
والف سهلا والفين مرحب
|
Post: #14
Title: Re: بأسلم عليكم تاني
Author: ديامي
Date: 03-11-2002, 04:00 PM
Parent: #13
اب زهانة ، يعني ما ود اب زهانة ، وزمان وكت الزمن زين كنا بنسمع من حبوبة الله يرحمها حينما نقع في مفارقة مقولتها ( ود اب زهانة الاكلو في اللكوندة ونومو في الجامع ) باعتبار ان اغلى مكان للأكل هو اللكوندة ( الفندق ) والنوم في الجامع ملح لا يحتاج لفلوس ، أين انت من كل هذا ، هل انت ابو صاحب المفارقات ، مع العلم بان المفارقات هي رحم النكات والطرف ، مرحب بيك بين اهلك وحبايبك
|
Post: #15
Title: Re: بأسلم عليكم تاني
Author: waleed500
Date: 03-11-2002, 04:16 PM
Parent: #14
اهلا بيك اخ اب زهانه
انا بقول الشاشه دى نورت فجاه كده ليه
|
Post: #17
Title: ردود
Author: abzahana
Date: 03-11-2002, 06:01 PM
Parent: #1
الريس تغريد
سلامات كده
قصدت ما اذكر اسمك بين الاسماء عسى أن اعزف لك على وتر أعرف انه مشدود ( لمن قرب يتقطع ) وإحساسي طلع في محله . ولو كنت فاكر اني حأكلفك كل الاسف القلتيه دا كنت اتراجعت .
انا برضو آسف فانتي الريس والخير والبركة وكان من باب اولى استأذنك في الدخول وأسلم عليك .. المهم في الموضوع المودة الموجودة ولك تقديري على كلمات عاطف خيري الرائعات .
كلما ناس البورد يقولوا عليك فنانة .. تطلعي فنانة اكتر
... دا شنو دا ؟
ــــــــــــــــــــــــــ
مازال سقف أبي يظلًُ ، ولم تزل أحضان امي
رحبة المثوى مطيبة الجناب
ــــــــــــــــــــــــــــ
|
Post: #18
Title: Re: ردود
Author: abzahana
Date: 03-11-2002, 06:07 PM
Parent: #17
الاصدقاء قرشو والديامي
سلامات كده
سؤال :ـ
هل تدري ما هو الفرق بين ود أبزهانة والنعيم أب قحاف ؟
ـــــــــــــــــــــــــــــــــ
ما زال سقف لبي يظلُّ ، ولم تزل أحضان امي
رحبة المثوى مطيبة الجناب
ـــــــــــــــــــــــــــــــــ
|
Post: #19
Title: Re: ردود
Author: KOSTA
Date: 03-11-2002, 08:09 PM
Parent: #18
اب زهانة
السافر و خلانا
وطول الغيبة و ما جانا
يا ربى طارينا
ام نسانا؟؟؟
مرات نقول مننا
و مرات نقول ياهو عشانا
نقول عيون المها.....قتلننا
ثم لم يحيين قتلانا؟؟
ام نقول نحن فى جمعية اصدقاء البشاشة بنقول ليك اهلين ...و خليك معانا
( ملحوظة : معانا و ليس معانة مثل المدارس المعانة )
وابقى بشاشا
|
Post: #20
Title: Re: ردود
Author: تغريـــد
Date: 03-16-2002, 07:53 PM
Parent: #19
يا اب زهانة
إيه الحكاية!!؟
مشيت وقلتوا عدوا لي
عدينا ... ونسينا العدد؟؟
|
Post: #21
Title: Re: ردود
Author: kabbashi
Date: 03-16-2002, 08:29 PM
Parent: #20
الأعزاء الطيبون الرائعون
كل من اختط كلمة تنضح بهجة ويضوع منها العبير في هذا المنبر الجميل
كنت قبيل أن ألج إلى د########م الجميلة قبل دقائق أو قل ثوان أعيش مزاجا معكرا وكان يدور بخلدي تساؤل ملح سببه أنني سمعت حكاية غير سارة أبطالها سودانيون في واحد من هذه المنافي الواسعة. وحتى لا أطيل فقد كان السؤوال الملح هو: هل نحن حقا شعب متميز ؟ وهل حقا أننا محسودون على ما نتمتع به من صفات يندر جدا أن تتوفر لدى آخرين؟ هذا إلى جانب كثير جدا من الأسئلة المشابهة. وقد أجبت في حوار داخلي مع نفسي أن ذلك الذي يقال لا يعدو أن يكون محاولة لنحميل خيباتنا وأسبابها إلى آخرين.
لقد نسيت أن أقول لكم إن الكتابة الجميلة التي جاءت ترحيبا بأخينا أب زهانة وكلماتها التي لا أستطيع أن أجد ما أعبر به عن غير أنها ممتلئة بالمعاني النبيلة، تلك الكتابة أخرجتني مما أنا فيه من مزاج عكر إلى رحاب مغايرة.
أكرر لكم يا أهل البورد الرائعين حبي وسلامي ومودتي وتحية خاصة لود أب زهانة
والختام
يا طير يا ماشي لي أهلنا
بسراع وصل رسايلنا
والشوق ما تنسى يا طائر لكل البسألك عنا
وقول ليهم على عهد ما زلنا وما زلنا
ذكراهم زادنا ومشاعرنا
|
Post: #22
Title: Re: ردود
Author: Elkhawad
Date: 05-19-2002, 04:33 PM
Parent: #21
اب زهانة
السافر و خلانا
وطول الغيبة و ما جانا
يا ربى طارينا
ام نسانا؟؟؟
مرات نقول مننا
و مرات نقول ياهو عشانا
نقول عيون المها.....قتلننا
ثم لم يحيين قتلانا؟؟
اخونا ود ابوزهانه
لقد استلفت كلمات اخونا كوستا
وبقول ليك وين انتا
|
|