الجزء الثانى من الجابرية...حميد

إلا فى ستة من الجابرية قالو تعبكم خارم بارم

يذهب حاكم خلف الحاكم

والجابرية تظل فى حالا..حلة حياتها تسر الظالم

صدفة تموت ونحيا اطفالا

لا جلكوز لا تقرا رسالة

لا راح يطلع منها عالم

مابنصفكن الاّ ضراعكن عبّو ضراعكن يارجالة

وخلو بصركم دغرى وسالم

حكم العسكر ما بنشكر

كلة درادر كلو مظالم

ماهو قدركم تحيو همالة

مقصودين والقاصد فاهم
وقاطعناهن حاربناهن
تمينا البينا شتايم
حالتن احسن ناس فى الحلة
ايدا نزيهه..عقولا نبيهه
وقلنا يفرزو قلنا فواهم
يطلعو فالصو وقطاع رحمة
عينة شماتة وخارم بارم
ونحن القصًًر واثقين فيها
وقطعناها معاهم جملة وقاطعناهم
وصارو فى جيهه ونحن فى جيهه
مرً اليوم الشهر الحول
والجابرية بلد فى حالا
قواسى شيوخا مآسى اطفالا
عذابات ناسا حلة تعافر ومقطوع راسا
من القراصة لى قراصا حلة تعافر ومقطوع راسا
عشرين كيلو من الجابرية صبية تساسق بى كراسا
الجابرية عذابك فينا لاكى قرية ولاكى مدينة
وفد فى وفد يقوم ويجينا
عايزة دراسة واجراءات
عون امريكى قرض المانى وحاحاءات
وحد ما نشوف مسعولين مسعولين او خواجات
نجرىنلم قدحاتنا عليها ترطن ترجع زى ما جات
الشفخانة وعايزة دراسة
ومدرسة وسطى واجراءات
لما الطوحة طالت بينا اتذكرنا العون الذاتى
اتحزمنا وقلنا برانا نبنى نقوم للشفخانة
طوبة فى طوبة وقومناها
ويوما التمت جات السلطة عربى وعجمى ومرة رطانة
الشفخانة دة ماهو بكانا
هاك يا تلتلة هاك يا ورطة
وغصبا عنك ياالجابرية غصبا عنك يا احوالا
وحمياتا وموت اطفالا
وعمرة عينكم يا رجالة
قوة انشكت بينا النقطة
وفى الجابرية تحوم الشرطة
هووا كلاب الحلة وصنوا
ومن يوم داك ما شفنا الستة
وفد الحلة السافر جانا
قال اتاكد شاف الخرطة
ونحن بدل نبنى الشفخانة انسرعنا بنينا النقطة
الشفخانة دة ماهو بكانا
وكانت غلطة انقلبت ورطة
اتفاهمتو مع المسعول؟؟؟؟
انفاهمنا مع المسعول
وقال حيقوم للشفخانة او يدفع لنا حق الطين
مع انو النقطة وقت بنيانا قومتوها بدون زنزانة
فى تقديرنا كلام معقول
كونو يقوم للشفخانة
حاجة تضحك محرقة هانة
انتو تقيفو مع المسعول واللا كنتو تقيفو معانا؟؟
وقلنا وخفنا نصد الجاى خفنا نفشل باقى الخطة
فضلت جاى هى فضلت خطة
واتفرقنا على الجابرية واتعلقنا تجينا البوسطة
ومدرسة وسطى والشفخانة قصاد النقطة
تجينا تجينا تجيناوما اتيقنا
ناس انولدو وواحدين ماتو
لما الريس ودوشتو فاتو
فاتو العسكر وجو الاحزاب
ونفس الحلم انجدد تانى
نفس الوجع الراح تحتانى
حتلناهو جمعنا رفاتو
نفس اليافطة فى نفس الحتة
الجابرية تحيى الشعب
دايرين بوسطة ومدرسة وسطى
والشفخانة بديل النقطة
فينا اتكلم شيخ الحلة
صنقع دنقر سلم وصلى
وكانو كلاب الحلة يهووا
وقال كلمتنا تكون فد واحدى
شان ننقوى ما ننذلا
شان مشهادنا وعدل الحلة نحن نفوز حاج البلة
وزاد هوهيو كلوب الحلة
وبعضنا عارض رد وفاوض
شيخ الحلة القام حمسنا
بلة الحمش الزول ما دلة
اول فاهم وقبلو ولدنا
وراح يحكمنا بى شرع الله
هو هو هووا كلاب الحلة
لما استغرب شيخ الحلة
وانفرقنا على الجابرية
انفرقنا ويوم الليلة انجمعنا عموم الحلة
شيخ الحلة قرا القرآن
صنوا كلاب الحلة وهووا
وبلة اتقدم سم وصلى
صنوا شوية وهو هو هووا
وقام اتكلم وعند اتكلم كان ينقسم
النسوان الجاى تتهامز
الصبيان الجاى تتغامز
وكان يتبسم وكانو كلاب الحلة يهووا
شكر وشتم هو هو هووا
حلل وحرم هو هو هووا
هود سابنا وفات ودانا الآخرة وجابنا
قاطعناهو وصوتوا انوطأ
اصلاً واطى وتانى انوطأ
دايرين بوسطة ومدرسة وسطى
والشفخانة بديل النقطة
التموين وزيادة الحصة
كهربا موية وسوق منضبطة
بلة اتبرع قال يبنيهن
هو هو هوواكلابنا واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا
وبى اذن الله يضوى الحلة
هتف الشيخ وهتفنا وراهو
لاتبديل لشرع الله هو هو هو
لا ولاء لغير الله طاء طاء طاء
عاش الفارس امل الحلة
بلة الطاهر على حسب الله
كبر وقام اتدلى
ولسة كلاب الحلة بهووا وزاد هوهيون
كبشا ضاع من مرحاتو وفاقع باع
بله الطاهر على بلاع

نواصــــــــــل

للمبدع حميد تحياتناولكل اهالى الجابريات السودانية
بفعل الادب الثورى المتواصل من مبدعنا حميد انضم الى ستة الجابرية
كم هائل من شعبنا الصابر
انا املك مجموعة لا باس بها من اعمال المبدع حميد منها نادوس...عيوشة...السرة بت عوض الكريم...جوابات...آه يا غبش...زمان الضر..وغيرها وغيرها اتمنى ان اتبادل مع رواد المنتدى ما لديهم من اعمال المبدع حميد

تسلم يا ابو يسرا
وفي انتظار وعدك

عبد الله لك الود
توجد اعمال متفرقة للمبدع حميد في صفحات اخرى من البورد
ويسرنّي ان اخبرك و جماهير حميد بان الاخ ابو يسرا يعكف الان على تصميم موقع يضم الاعمال الكاملة لحميد مكتوبة وبصوت الشاعر

ننتظر منك مع الشكر المقدم نص عيوشة بفتش ليهو من سنوات

انا ما بتحيّر بين الفوق وبين الناس التحتانية
الا مغيّر ولآّ عقوق ولاّ كفيف الانسانية