|
عسل شنو يا ولد يا ممسوخ
|
يا تامر ... تااامر ... ايوة يا حبوبة ... اختك عسجد ويتى ؟ اهو ... اهون دى انا يا ماما وحبوبة ... تعالى يا حشاى .. جيبى لى الركوة اتوضأ بيها .. ركوة ؟ يعنى شنو حبوبة ؟... يا بت الركوة ما بتعرفيها ؟ .. لا .. دى بالانجليزى ؟ ... يا بتى كلامى دة عربى .... والله انتو اولاد الزمن ديل الركوة ما بتعرفوها ... ما بنعرفا يا ماما عشان انتى مرات كتيرة بتتكلمى معانا بالانجليزى ... يا بتى الركوة دى معناها الابريق ... ادينى ليها اقوم اصلى ... وكمّا عرفتى الابريق جيبى لى كوز الوضاى .. لكن يا حبوبة انا سمعت بابا بيقول انو الكوز ما يدخل بيتنا ليه انتى جبتيهو هنا ؟ ... يا عسجد الكوز دة هو علبة الفاصوليا وبنقوم نقطعا وبنسويها كوز يعنى الكوز القالو ابوك داك كوز تانى وانا زاتى متيمنة ما يدخل علينا هنا يدخل فيهو الساحق والماحق بركة شخيى المتحزم بالسفاريق .... اها كدة انا عرفتا واحدة من كلماتك الغريبة ... عرفتى شنو ؟ ريق ... مش دة برضو بيغنو بيهو ناس الهاندباك ؟ ... شنو يا بت ؟ .. السامسونايت ... يانى انا البينكلم انجليزى هسى ولا انت يا بت الحنابيك ؟ ... ماما انا قاصدة الناس البيغنو زماااان ديلاك ... عرفتهم يا بتى ديل ناس الحقيبة ... بس .. اسمها الحقيبة ... وبعدين ريق متين انا قلتها ؟ ... ومال سفاريق دى شنو ؟ السفاريق ديل يا بتى عود من شجرة وعامل شكل قوس بيصطادوا بيهو الناس الارانب والطيور ... وبيكتلوهم يا ماما ؟ آآآآآى وكمان عليهم جنس حلاة .... لكن الناس البيكتلو الطيور ديل ما عندهم احساس ... آآآآآآه ...آآآآآه يا ماما ليه يكتلوهم ؟ ! ديل ناس ما بيحافظوا على توازن البيئة يا حبوبة ... شنو يا بتى ؟ بيعة كيفن يعنى ؟ ... يا تامر تعال اشرح لى ماما بيئة يعنى شنو .... شوفى يا ماما توازن البيئة يعنى الحفاظ على الحياة بطريقة مدروسة وغير عشوائية ... وكدة بيخليها مستدامة .. وكلمة استدامة ما بتعنى الدوام بل هى مجاز للتطويل على اكبر قدر ممكن من الفترات .... والله يا ولدى كلامك دة كان وقع لى اقع على رقبتى دى ... يا اولاد انتو بتجيبوا الكلام دة من وين ؟ وبعدين نحن وكت زمان الناس قالوا لينا الصيد حلال ما كضبناهم ومن ديك وعيك يا عسجد وتامر ... برضو قبيل انا سمعت منك كلمة اولاد الحنابيك ... يا ماما اسمها اطفال الانابيب ... ما كلو بالونات يا اولادى ... هسى انتى ليك عشرة سنة بس كيفن عرفتى الكلام دة كلو يا عسجد ؟ ... يا ماما دى بسيطة جدا ... عن طريق النت او الديجتال كلو شئ بيبقى فى متناول ايدى .... والبيقى تل دة شنو ؟ اسمو ديجيتال ... يعنى البرمجة الرقمية او البرنامج الرقمى الفضائي .... وااا فليلى على الفضايح ... يا كافى البلا منكم متين بقيتو تتكلموا عن الفضايح ؟ والله انتو اولاد الفضايح ... نحن اولاد الفضاااائيى يا ماما مش فضايح ... وبلاش فضائح بأأ ... وبعدين تامر دة ما شفتيهو هادى كيفن ما بسأل زيك يا يمة ... يا تامر انت مالك شايفاك تعبان خلاص فى القراية ... لا ما تعبان لكن فى كلمة بفتش عليها ما لاقيها ممكن اسألك منها ؟ ... اها ... ادينى كلمة بمعنى يكره ... يكجن يا ولدى ... كدة خلاص فضيت ليكى ... ممكن بعد دة ابقى ليك نكيييير .... اول حاجة انتى يا ماما ولدوك متين ؟ والله يا ولدى ولدونى سنة الهبوب الحمرة ... شنو ؟ كيف يعنى دة تاريخ هيرغلوفى ولا شنو ؟ هير هير شنو ؟ هيرغلوفى يعنى زمان فى تواريخ ومخطوطات بلغات قديمة انقرضت ... لا يا ولدى الهبوب الحمرة دى وكت جاتنا زى ما حكو لى جدك الله يرحمو ( الله يرحمو كنت عاوز اشوفو ) ربط حمارو وتعالى يا الهبوب شيلى جدك وحمارو وديهم البحر ... الناس كلها مرقت نكوس فوقو لحدى ما لقوهو غمران والحمار بقى اعور .... اها الوكت داك جابونى للدنيا الفانية دى ... يعنى ما عارفة تاريخ شهادتك وميلادك ؟.. يا ولدى اشهد الا اله الا الله محمد رسول الله ... يا سارة ... سارة ... ايوة يمة ... تعالى شوفى اولادك ديل محنونى فى رقبتى دى الليلة فوتوا على الصلاة خلاص يمة قومى صلى وتعالى ليهم الله يخليك لينا ... شوفى يا ماما نحنا راجينك بعد الصلاة مش الليلة اجازة ؟ قوموا صلوا معاى ... طيب نتوضأ كلنا مع بعض .... لكن انا الراجل لازم اصلى بيكن ... يا ولدى انت الراجل آآآى لكن لسة ما عرفتا الصلاة يعنى شنو زاتا ... خلاص المرة الجاية صلى بينا الله يديك العافية ويديك بقرة حليبية تحلب وتدينى فى ملعقة صينى يا طالع الشجرة ... بس كنت منتظر منك النشيد دة من قبييييل انا .. تعالى يا انتى يا يمة .... الصلاة قائمة .
يلا يا تامر اسأل ... اها انتى عرسوكى كيف ؟ ... عرسونى ... يا حليل زمان ... زمن الجرتق والمشاط السودان قفل ... هو يعنى السودان فاتح هسى ؟ ... لا السودان قفل دى مشاط ...ويا حليل زمن الكوفات والمسيرة الطوييييلة ويا حليل زمن القرمصيص ... الزمن داك انا كان عمرى زى اربعطاشر سنة .. جبت الموية ودخلت البيت ابوى قال لى انتى تانى ما تطلعى برة .. قلت ليهو لشنو يابا ؟ ... قال لى ود ناس تيراب دة قال دايرك بالحلال ... يعنى دفعوكى يا حبوبة ؟ ... لا يا المسخوت ... دايرين يعرسونى .. وتعال شوف اطناشر يوم انا جوة البيت ما طلعت والناس كملو الرقيص كلو برة ... اطناشر يوم انا ما شفت جدك دة .. اتاريهم بيجلدوا فوقو الليل والنهار ... لشنو لكن جلدوهو يا ماما ؟ هو جدى كان بتاع مشاكل ؟ لا جدك ما بتاع مشاكل حشاهو يا يمة جدك بس عشان كمّا جلدو ما يشوفنى ويشمنى قدحة ....يا حرااااام لكن ... ليه كدة ؟ مسكين جدى ما كان يجلدوهو ... لكن يا حبوبة انتى كنتى بتحبيهوا ؟ سجمى يا تامر يا ولدى دة كلام شنو دة ... اتحشم شوية اختك دى قاعدة .. ما فيهو حاجة الحب انا قلت شئ ما كويس يعنى ؟ لا بس حكاية الحب دى انحنا ما كنا بنعرفا زمان ... يعنى بينى وبينك كدة ما كان تحت تحت كدة بتتلاقو ؟ اقول ليك شنو جدك دة مرة شافنى فى مكان الموية وبقى طوالى يجى فى طريقى لحدى مرة جانا عيد كدى وقام جاب لى جلابيتو عشان اكويها ليهو ... تعرف يا تامر كويت مصارين الجلابية وجدك صبح يوم العيد فى الخلا عشان ما عندو هدم جديد مع الناس ... وابوى حلف الا اعرسو .. لكن انا كنت اجمل بت فى الحلة وبينى وبينك الريدة موجودة الا الواحدة كان قالت لى ولد انا بريدك دى بت مطلوقة وكلنا تانى بنخاصما لله كدى ... اها وتمت العرسة بعدما جرست ليك جدك دة وعرف الله واحد ... ومشيتو شهر العسل وين .... عسل شنو يا ولد يا ممسوخ ... حبسونا جوة الاوضة اربعين يوم ما نمرق منها ... لحدى ما عملوا لينا حفلة تانية حتن طلعنا ... والله يا تامر كرعينى ديل من الحبسة ما قادرة امشى بيهن ... الا طلقوهن لى بزيت نعام حبوبة عاوز اشوف مباراة فى التلفزيون بين بولفيا واليابان ... يا ولدى ام ضوأ بان متين بيقوا يلعبوا كورة ؟ خلو المشيخة خلاص .
|
|
|
|
|
|
|
|
Re: عسل شنو يا ولد يا ممسوخ (Re: alfatih)
|
حبيب نورة وكتين يضيع عرق الجباه الشم شمارفى مرقة...... اااه يا نورة اه
ياخ معقولة تعتر هنا ? اوعك تكون اتكسرتا
حياك الله يا امير .... وبراحة اقوم اصدق اكسر كراعى كمان
| |
|
|
|
|
|
|
Re: عسل شنو يا ولد يا ممسوخ (Re: alfatih)
|
العزيز الملا عمر شخصيا ? غايتوالليلة بضبح لى خواجة واقف لط عشان ما يكون فى ذمة الواعى تانى وبعدين كبرت كراعى لحدى الجزمة ضاقت من الفرح ... كونك تشبهنى بدكتور سجيمان ... لا دى بالغتا فيها... زولا خبرة وكمان رئيس دولة ربيط الربيطانية وكتب لملكة بريطانيا ... دة زولا مو ساهل
لك الحب كله يامبدع
| |
|
|
|
|
|
|
Re: عسل شنو يا ولد يا ممسوخ (Re: alfatih)
|
والله ابداع يا حبيب وانا بقرا في كلامك اتذكرت دكتور سي جي
كدي نمشي نفتشو تقول لي امتقشو
بجيك صادي الصباح لاح والشغل صباح
سلام وفوتك بعافية واعمل حسابك من ابان عيون خضر ديل يسمعو كلامك يقولو ارهابي
وينطبق عليك المثل لا نصراني راضي بيك ولا بن لادن داري بيك طبعا المثل بتصرف
| |
|
|
|
|
|
|
Re: عسل شنو يا ولد يا ممسوخ (Re: alfatih)
|
الحبيب ود العمدة الشوق الكتل الورل مالك والملاعمر دايرين تورطونى مع حبيبنا سى جى ... طبعا ابان عيون خدر زى الكدايس ديل كلمة اهابى دى قبال ما تتمها بيكونوا رقدوا سلطة ... بعدين عندنا بوليس خواف خوف يا كافى البلا
تعال وجيب معاك ام تكشوا ...الجماعة هرشوا تسلم يا اصيل
| |
|
|
|
|
|
|
|