|
|
 سمعة السحلية
|
حسناً أوصموني بالمسطولة،، لأني (عن جد)،، وفي خضم إنفعالات البعض لاثبات الرجولة والنبوة والنسب،، أنوي التحدث عن السحلية.
اكتشفت أن للسحلية سمعة جيدة (في المجتمع السوداني) ربما لا تستحقها مقارنة مع الضب
فالطفل السوداني (والكبير العندو تخلف) مقتنع بأن السحلية (في بطنها مفتاح الجنة ما تكتلها) عكس الضب الذي في الروايات السودانية الإسلامية (سوى بلسانه كده للكفار شان يشوفوا الرسول صلى الله عليه وسلم وهو مدسي في غار حراء)
آمنت بهذه النظرية حتى عمري الماهو صغير خالص ،،أي حتى اللحظة التي رمت بها بنت ناس جيرانناالقادمة من أوروبا قناعاتي الطفولية والروايات السودانية المؤسلمة أوالعكس (يعني الروايات الإسلامية المسودنة) عرض الحائط إذ أن بنت الجيران هذه هجين ما بين الجنس السامي الآري والجنس السوداني النامي
أتت بعلبة محترمة زاهية اللون،، ولما أمعنت النظر فيها وجدت أنها ليست ترتارة ولا هي علبة صلصة،، اسفلها كتب (صنعت في الولايات المتحدة الامريكية )،، يا بركات السماء،، سألتها بعربية تكسرت بفعل مرض التأثر السريع باللهجات العربية لغير الناطقين بها (دي بتاءت سنو؟؟!)
فردت أنها علبة صنعت خصيصاً (لحفظ الزواحف) وقد كانت هذه هي المرة الأولى التي أدرك فيها أن (الضب) هذا كائن زاحف سبحان الله وسبحان الله كثيراً كمان إذ أنني لما رأيت (بيت الضب) المحترم،، قارن عقلي (طوالي) بينه وبين (علبة النيدو المصدية) والتي كثيراً ما جعلناها (جحيماً سعيراً) لل(كدندار) تلك الحشرة البريئة التي سمعنا أنها هاجرت وتركت البلاد السودانية بسبب الأطفال أحباب الله الأطفال السودانيين.
(من غير ما اقصد والله) حدثت مقارنة سريعة جداً (أيضاً) بين حيطة بيتنا المواجهة للشارع والتي صنعت (بمزاااااج) من (جالوص لايوق) وبين غرفة جلوس الضب أعني بيته بالإنجليزي ولله الحمد من قبل وبعد.
نهاية الأمر ما اطول عليكم هذه الفتاة السووأجنبية (أو أجن سودانية)،، أتت بهذه العلبة (خصيصاً) لتمسك (ضب) لتسفره معها (خلو بالكم) لبلاد المغول والإفرنج فهي (Is very) معجبة بما لديه من إمكانات ضخمة حول صيد الحشرات عكس الكائن اللايوق (الضفدع) فهو (ديسقستين) واحمدوا الله اني عرفت أكتب هذه الكلمة بالعربي ما تحلموا أني اكتبها بالإنجليزي. وهي (Is very) ممنونة لي إذا ساعدتها (توكاتش زيز) ضب.
أسقط في يدي،، ( ما الضب أهو ود ناس أهو) لماذا إذن سمعته مشوهة عندنا نحن السودانيين؟!
وإذ في هذه السانحة لا أنسى أن اشيل الفاتحة (خمس مرات) على المرحوم ضب ناس سكينة والذي وافته المنية تحت (سفنجة سكينة زاتها) إذ لم يتسنى له أن يتهنى بباعوض الخريف حيث مات في شتاء قارص،وذلك بعد أن ضربته بت سكينة ذات الأربع عشر ربيعاً ضرباً مبرحاً يشابه (إذا لم يزد) ضرب شجرة الدر لزوجها الخائن ب(قبقابها) في (دورة المياه) ضرباً أرسله مباشرة لأبواب الجحيم وربما الجنة مين يدري؟!
والرحمة تجوز على الحي والميت سواء ، إذ أنه (تحت تحت) ظهرت شائعات مفادها أن (ضب ناس سكينة حي يرزق) وأنه (ود اللذين) تحايل على ضرب قبقاب سكينة (ونعني بذلك البرطوش) بأن ترك (ضنبه) ومسك طرف جيبه وقال (ده طرفي منك يا سكينة اللئيمة كان اكلت ليكم باعوضكم تاني).
ليس هذا فحسب بل تزيد الشائعات إنه ربما ضب ناس سكينة كان (ضبة) وليس (ضب) إذ أن البعض سمع أثناء حادثة الشبشب (سكليب رسمي) ومن غير المتوقع أن ضب سوداني راجل (يسكلب) كما الولايا خسئ لعنة الله عليه.
هذه السوأجنبية أو كما يحلو لكم تسميتها أًصرت بلياقة سودانية لم يتخطاها علم الأجنة والوراثة (إذ صعب يتجاوز هذا العلم مهما تطور الويكة اللخاها أبوها الجعلي طوال خمسين عاماً ويزيد) ،أصرت على فكرة تبني الضب وكمان تسفره بلاد أوربا بالطائرة الما لقاها جدي السمح وزين.
ولكي أريح ضميري تجاه إسلامياتنا السودانية، حاولت إقناعها بفكرة التخلي عن تبني الضب والإستعاضة عنها بأختنا السحلية مؤكده لها أن في بطنها (كي أوووف ذا جنة)، لكنها لم تفهم ما المقصود بال(سحلية) لأن لغتي الإنجليزية بالكاد تميز بين ال(كات) كديسة وال(دووك) ود لذين من أين لي أن اعرف ما السحلية بالخواجاتي!!
انتظرت ظهور سحلية (عليم الله) ثلاثة أيام لأريها لهذه السووأجنبية،، وبعد انتظار ممل (ذي قصتي دي) أتت السحلية مسرعة زائغة العينين متخبطة متخفية مما أحرجني أمام الخواجات حيث بدت السحلية (مهزوزة الشخصية فعلاً) مقارنة مع الضب الذي ينظر للواحد فينا بقوة عين وحضور رائع لا تخطئه عين.
وبعد كللللللللللل التعب ده،، تقول لي هذه الهجين ما بين (الويكة وماكدونالدز) – ولا يفوتكم هذا الانسجام الموسيقي (ويكة وماكدونالدز) تقول لي (أووووه زيز!!) (نو نو نو،، زيز إذ إيتين نبات) (زيز إذ نووت يوزفل) (دب وتعني ضب إذ Very يوزفل أهسن صيد دب)
فاقول لها كارهة نظريات الخواجات (السحلية الفي بطنها مفتاح الجنة نوووت يوزفل !!! هأأأأ ، بالله عاين دي، قال السحلية ما كويسة بالله قدي كده،، ،، سحلية تاكل نبات قال، بالله شوف،، هي سحلية واللا غنماية بالله قومي كده كافرة دي)
|
|
 
|
|
|
|
|
|
|
|
Re: سمعة السحلية (Re: بت قضيم)
|
بت قضيم
كل سنة و انت طيبة
و الجابك يجيب عقابك
مسطولة؟
ابدا ما مسطولة لكن حيرتي الضب و السحلية و الخواجوسودانية لووووول
و في الاخر فقدتي المنطق معاها انتصارا للاسلام الشعبي
ابدااااااااااااااع
| |
|
|
|
|
|
|
|
|
|
Re: سمعة السحلية (Re: بت قضيم)
|
مما يدل على أن أغلب السودانيين عندهم مواقف ضد الضب ، وإلا لماذا لم يردوا على هذه الترهات الضبية؟!
كتر خيرك يا التوما وانا برضو مشتااااااااااااااااااااااقين لكن حقت نفيسة دي نسيتها كدي قوليها لينا تاني
العزيز نصار
يا رافع معنويات الأمة ومنادي بحقوق الضب والسحلية
يخليك
وعلى فكرة انا عندي وجهة نظر ليست مجرد سطلة ساي
اعود كان الله ادى عافية
| |
|
|
|
|
|
|
|
|
|
Re: سمعة السحلية (Re: بت قضيم)
|
بت قضيم والله مشتاقين لهذه الطله منك...خلينا نقراك ونتنفس زي الماكلين حلاوه نعناع....الكلمه منك تنزل بااااااااااااارده في الجوف...وكل سنه وانت بالف خير....
اما نحن فقد فهّمونا ان الضب خصّيم الرب....والسحليه بتزيد السعيه...يعني بتجلب الخير...وخليناها طول عمرنا الزماااان تتسحب بين سعف النخل ونشيلها معانا في الخرج...وما زادتنا الا غربه...
| |
|
|
|
|
|
|
|
|
|
Re: سمعة السحلية (Re: بت قضيم)
|
سلام عليكم
نزار الصديق
كتر خيرك على التعليق
أما بخصوص فلسفة الضب والسحلية،، فانا أقول أن الفكرة جات بسبب بوست معين كاتبته واحدة (شفتها قبل كده وهي لم تشوفني) وهو بوست محمد نبي؟!
وربما صعب إيجاد العلاقة في خضم هذا الكم الهائل من الضببا والسحالي، مع ذاك الموضوع الكبير المحتوي على كلام كبير
لكني ربطت بين تفكير السوداني البسيط،، وبين شطحات المثقفاتية وارجو أن كلامي ده ما يزعل حد هي مجرد وجهات نظر قابلة للضحض تماما كقابليتها للصحة
السوداني البسيط المقتنع (جداً) بفكرة الضب القوال والسحلية الطيبة (وانا اعترف اني شخصياً من زمرة الناس البسطاء ديل حتى وإن تمردت قليلاً على بعض الأفكار الغريبة)
هذا السوداني البسيط صعب يستوعب تلك الأفكار المشوشة،، وحقاً اعتبرها افكار مشوشة لأنها لم تستند على تحليل مقنع
لم اقتنع أن معرفة بضع آيات من القرآن الكريم والأحاديث النبوية كفيل بأن يجعل الواحد متفقه ومتسائل ومفكر إسلامي، فمعرفة البعض لا تنفي الجهل بالبقية
ولا ادري لماذا يصر البعض على طرح أفكار مشوشة كفيلة بأن تشوش واحدة بسيطة مسكينة زي ليس لها في الدين سوى الصلوات الخمس والحرام والحلال وحب الرسول والإيمان المطلق بل والجهاد من أجل تأدية فريضة متعبة كالحج
هذا البوست إنما هو (النكتة) الفاصلة بين طبقة مثقفي السودان،، وأهل المرعى نحن البسطاء
الناس العايزة تعيش على البسيطة ويكفيها السترة وممارسة الحياة والضحكة الصافية ساعة المغربية بلا تعقيد ولا تفسير ولا تحليل
على فكرة الذ حاجة وبعد مرور سريع على عموم البوستات في واحد كمان كاتب ليك (صور إعدام عمر المختار) بلا أي سابق مناسبة والله يعين
يا سامو ياخي بالغت ياخي ياخ
كل سنة وانت طيب زاتك ياخي لكن (من جد) خجلتني وعليا الطلائع على طلاقك انت اول زول يقول عليا دمي خفيف ولا يثنيها بصفة المساخة
حييت وعشت وعرس الله لك بدل الماشي تطلقها دي
يخليك يا كريم
| |
|
|
|
|
|
|
|
|
|
Re: سمعة السحلية (Re: بت قضيم)
|
بت قضيم: والله ليك وشحة
وكل سنة وانت طيبة وبركة بالشوفة
بالمناسبة لحم الضب شهي جداً وغالي كمان
إذا المعلومة دي وصلت السودان ريحة الشيات حتصل السماء
| |
|
|
|
|
|
|
|
|
|
Re: سمعة السحلية (Re: بت قضيم)
|
بت قضيم و الله مشتاقه ليك شوقا ازيد و افضل ...
كل سنة و انت طيبه و القابله كدا اجي واحد اقشك من كرعيك و علي بيت العدل بشد الدال.. بيت يا يمه كدا يناهز في اناقته و جودة صنعته ذلك للضب الامو داعيه ليهو...
اما قبل...
يا بت انا اطرشني و اعمي جيراني.. من تبيت و قمته زول قال السحليه دي في بطنه مفتاح الجنه/نار ..مافي.. حبوبتي عيوش كانت دايما تنهال عليها ضرب بي الدكتور شول و بين كلو رزعه و رزعه تنعل سلسفيل اجداده.. و بما انك حسي نورتينا في احتمالين لي انفعال حبوبتي ده.. الاول انو كانت دايره تضمن لي روحه مفتاح.. ولا بس دار تتفشي و خلاس.. الله يعلم...
| |
|
|
|
|
|
|
|
|
 Re: سمعة السحلية (Re: ShiningStar)
|
ضـــب محظوظ .. جـــدا
لا قرعة لوتري ولا زرزرة في السفارة ..
بس اوعه يكونوا طلبو منو ( فيـــش )؟؟
بالمناسبة ..
عندو ايميل ؟؟
أو
ممكن تخدميني في الحته دي ..
الظروف ما معروفه .. مش احتمال الواحد يسالوهو عن الضب ده؟؟
بعدين يا بت قضيم ما تهزي قناعاتنا في ( الضبس ) مالاقاني لحدي الآن ضب قوووال..الضبوب واضحين دايما بس بيحاجو لي زول يفهمم .
| |
|
|
|
|
|
|
|
|
 Re: سمعة السحلية (Re: tmbis)
|
Quote: (سوى بلسانه كده للكفار شان يشوفوا الرسول صلى الله عليه وسلم وهو مدسي في غار حراء)
|
حقد اهله
| |
|
|
|
|
|
|
|
|
|
Re: سمعة السحلية (Re: بت قضيم)
|
تحية طيبة للجميع
Quote:
والرحمة تجوز على الحي والميت سواء ، إذ أنه (تحت تحت) ظهرت شائعات مفادها أن (ضب ناس سكينة حي يرزق) وأنه (ود اللذين) تحايل على ضرب قبقاب سكينة (ونعني بذلك البرطوش) بأن ترك (ضنبه) ومسك طرف جيبه وقال (ده طرفي منك يا سكينة اللئيمة كان اكلت ليكم باعوضكم تاني).
|
انا كنت متخصص ازنق الضب فى ضلفه باب الحمام
Quote:
(السحلية الفي بطنها مفتاح الجنة نوووت يوزفل !!! هأأأأ ، بالله عاين دي، قال السحلية ما كويسة بالله قدي كده،، ،، سحلية تاكل نبات قال، بالله شوف،، هي سحلية واللا غنماية بالله قومي كده كافرة دي)
|
هنا ده تعبير (بليغ) لمرحلة ما بعد النقاش (السودانى)،،،، و اتذكر واقعة (حقيقية)
الام: يا بت قومى امشى شوفى قرايتك
البت: يا ماما انا تعبانة ، خلنى ارتاح شوية
الام: يا بت قومى امشى راجعى قصة سيدنا نوح بكره عندك امتحان
الحبوبة: هى ها سيبى البت ترتاح، نوح يطير فى السما
الام (مذهولة) : يمه هوى انت عارفه نوح ده منو ؟؟
الحبوبة: ايوه ، موش بتاع المركب داك ، سيبى البت ترتاح !
بت قضيم ، لك الشكر على هذه الروعة ، و اجمل ما فيها (البساطة)
| |
|
|
|
|
|
|
|
|
|
Re: سمعة السحلية (Re: Abdel Aati)
|
بت قضيم
| Quote: مقارنة مع الضب الذي ينظر للواحد فينا بقوة عين وحضور رائع لا تخطئه عين. |
الحضور الرائع في كتابتك الجميلة دي والله
اللهم اكثر من الضببة(بضم الضاض وما بعدها) والسحالي وما دب دبها
| |
|
|
|
|
|
|
|
|
|
Re: سمعة السحلية (Re: بت قضيم)
|
بت قضيم ألف حمد لله على السلامة..
تصدقي انا كنتا قايلة البوست ده قديم رفعوهو الحبايب عشان يتبنوك.. ولما جيت اتبن انا زاتي لقيتو جديد لنج..
ودي..
| |
|
|
|
|
|
|
|
|
|
Re: سمعة السحلية (Re: بت قضيم)
|
بت قضيم.. بغير من سودانيتك في تفاصيلك... انا زي بت جيرانكم دي.. مسطحه ولا لامه سودان ولا لامه غيره... استعمته بالقصة الجميلة و(التلميحات)... وكل سنة وإنت طيبة
بنت الحسين
| |
|
|
|
|
|
|
|
|
|
Re: سمعة السحلية (Re: بت قضيم)
|
سلامو عليكو
حسين ملاسي تحياتي الطيبة
قال نابليون بونابرت
لا يأس مع الحياة ولا حياة مع اليأس
المناسبة شنو نص الليل هسه لا أدري
سلمت يا ذوق
نعم كبسيبة
الضب ده في الدول الخليجية كائن محترم له وزنه يخرجون لليالي وأيام لصيده ، يسمونه (الورل) وهو من فصيلة الضببة لكنه ماكن أي كبير جداً،، واحتمال الواحد يفكر يعمل مشروع في السودان بدل محلات الشاورما والبيتزا المنتشرة اليومين ديل في السودان زي الرز، نفتتح مطاعم وشاورمات الضببة،، ويا سلام على الثروة التي سنجمع،، ولا صلاح ادريس ياخي
انتم ايضا واحشننا وبالصحة والسلامة يا رب
تماضر
لووووووووول
لغة الضاب والأسحلة
زاته جاتني لوز بعد ما قلت (ضحض)
على فكرة
طلبت من أحد الزملاء في البورد إيميلك وقام اتعزز قال ايه (ما عارف ترضى واللا لأ)
عندي ليك كلام خاص لو في إمكانية
سلمتي
شايننج استار
في احتمالية أكبر أن حبوبتك صغيرة من جيل (ماما عيوشة) وليس حبوبة عيوشة حاكم الزمن ده الحبوبات زاتهن بقن مودرن
وفي احتمالية رابعة أن حبوبتك عيوشة كانت تعز الضب بالتالي أخدت موقف من السحلية
والله اعلم
سلمتي يا حنكش
تمبس
أحس في كلامك ريحة غيرة
ياخي ده نصيب ومعليش للشاكوش الضببي
وعن إيميل الضب حاسألوا برضو الواحد يكون عندو خصوصيات والله اعلم يكون عايز معاك علاقة واللا لأ انا غايتو حاعمل العليا لكن القلب ومايريد برضو
بعدين انا ما قلت في الضب حاجة مجرد نقلت وجهة نظر الشعب السوداني حول الضب
ما قلت لي رأيك شنو في البوست الحكيت ليك عليه
يا شين ما تقول قسماً احرقها ليكم
من الواضح يا راوية ان علاقتك بالضب ليست على ما يرام
على كيفك
حاولت اصلح بينكم لكن يبدو انك راكبة راسك لسة
ازيك بالمناسبة
ويخليك للطلة
| |
|
|
|
|
|
|
|
|
|
Re: سمعة السحلية (Re: ABUHUSSEIN)
|
والله انتى قلتى العارفنو كتااار وما قادرين
يعبروا عنو
لكن عنوان البوست مضحك جدا انا غايتو
ضحكت جدا...
حمدالله ع السلامة
وكل سنة وانتى طيبة
مزيدا من الابداع
| |
|
|
|
|
|
|
|
|
|
Re: سمعة السحلية (Re: بت قضيم)
|
كمال عباس
شكرا للحضور والمشاركة
والحمد لله كمان مرة لعودة راوية
سلمت
محمد الأمين أحمد تحياتي
يعني نفهم من كده انك من اصحاب السوابق الضببية؟!
ما لا افهمه لماذا يصر الشخص على قتل مخلوق لا يضره بشئ
يعني كاتله مالك ما تخليه يسترزق طالما ان علبة البف باف في السودان تجاوز سعرها الخيال بل وفي أنواع الخيال الخيال العلمي كمان
إنهم يقتلونه في السودان لأنه جرت العادة أن تصرخ سيدات الدار فيما يعني الرقة(ووووووووووووب عليا سجمي يا اخواني الدب - وهو في الأصل ضب لكن تم تغيير مخارجه لزوم الحبكة الدرامية - يا ود ،، يا علي،، يا عمر،، تعالوا اكتلوا الدب ده ،، ثم وااااااااااااي)
مع إنها ممكن تلخ كمونية ومصارين وكبود (جمع كبدة) وريسين نيفة (جمع الباسم) وهلم ضبايح
هسه البخوف شنو،، ضب بشوف أكل عيشه واللا راس خروف ميت مقلع عيونه ذي البعاتي؟!
أما فيما يخص النقاشات السودانية فهذه كوم لحاله
واقترح عليك فتح بوست يدرس هذا الأمر المعقد واستدل ببعض النقاشات هنا ما حتغلب أبدا
سلمت
عادل
الله يسلمك
الفستان الأحمر رجعناه لبت الجيران بعد أن (شديناه) منها شهرين ثلاتة
كل عام وانت بألف خير ،، يعود علينا وعليكم بالصحة والسلامة
سلمت
آآآآآآآمين أخي نيوباي
أنا حقيقي اثني واثلث واربع هذه الدعوة
بيني وبينك اكتر شي المفروض تسعى الأسر لتوفيره في المنازل الضببة وتخلي الحنكشة والكلام الفاضي ده،، بما أن الباعوض أثبت أنه ازكي من كل حكومات السودان التي لم تستطع حتى اللحظة إيجاد طريقة للتخلص منه ومن ملاريته ، فواصل مسيرة حياة عظيمة منفذاَ فيها العديد من الإنجازات الضخمة كأن يخدع أهل الطب أنفسهم فتمشي للدكتور بمرض حمى نفاس ليشخصه لك أنه أكيد ملاريا
ماله الضب يعني مش أحسن من البف باف بالله؟!
يخليك للكلمات الطيبات
| |
|
|
|
|
|
|
|
|
|
Re: سمعة السحلية (Re: بت قضيم)
|
رجاء الحبيبة
الله يسلمك ويحفظك يا رب
البوست جديد بعد توقف فترة نسبة لمشاغل الحياة والتفكير العميق في مشاكل الضببة والسحالي السودانية مقارنة مع مشاكل مثقفي السودان التفكيرية
ودي وشكرا للمشاركة والسؤال
يخليك إن شاء الله
زولا 123
مبالغة
ضحكت لااااامن دمعت
دي ذي قلم الرصاص بالإنجليزي 3H
أنا غايتو حامسكها طوالي
شكرا (جدا) للمشاركة والحضور
مريم
كل سنة وانت طيبة يعود علينا وعليكم بالصحة والسلامة إن شاء الله
غريبة، من خلال قراءتي لمشاركتك لم ينتابني إحساس (إطلاقاً) أنك ناقصة (سودنة) أو (لا لامة ما سودانية لا سودانية) يمكن العكس صحيح تماما، مرات كمان بتخيلك حبوبة يعني ست كبيرة بالجد والله.
عني أنا فالموضوع قد لا يستدعى الغيرة، لأني مرات كثيرة اتمنى إني أخرج من الإطار السوداني لإطارات أوسع لأن مشكلة الواحد السوداني المتربي في حواري سودانية وشوارع وأزقة ضيقة لكن حميمة، صعب يستوعب شوارع أخرى بالتالي يعاني أكثر خصوصاً لو تغرب، لا أصدقاء، لا تعايش، لا حياة حقيقية مجرد نتعشى للننوم لنصحى تاني يوم في انتظار العشاء حتى ننوم لنصحى وهكذا دواليك
اعتقد الإنسان يجب أن يكون أكثر مرونة والله اعلم
سلمتي للمشاركة
يا هوبفل ياخ انا ما غيابة
والله لو ما الظروف كنت حاعمل ليكم وجع وش رسمي
نعمل ايه نحن أهل مكة وجدة مع ناس العمرة والعمرة بضم الأولى وفتح الثانية
يسافر فوج لنستقبل الفوج الذي يليه
المشكلة ناس حجت وعمرت وحجت وعمرت مليون مرة ،،بعدين ناس كبرت لما صغرت تاني ، تعمر ليه تاني تحج ليه ما تعرف
استغفر الله وربنا يعظم الأجر
شكراً للكلمات الطيبات خجلتونا ياخ
سلمت
| |
|
|
|
|
|
|
|
|
|
Re: سمعة السحلية (Re: بت قضيم)
|
Quote: ووووووووووووب عليا سجمي يا اخواني الدب - وهو في الأصل ضب لكن تم تغيير مخارجه لزوم الحبكة الدرامية - يا ود ،، يا علي،، يا عمر،، تعالوا اكتلوا الدب ده ،، ثم وااااااااااااي)
مع إنها ممكن تلخ كمونية ومصارين وكبود (جمع كبدة) وريسين نيفة (جمع الباسم) وهلم ضبايح
هسه البخوف شنو،، ضب بشوف أكل عيشه واللا راس خروف ميت مقلع عيونه ذي البعاتي؟! |
| |
|
|
|
|
|
|
|
|
|
Re: سمعة السحلية (Re: محمد الامين احمد)
|
بت قضيم
دخلت الى هنا ، فتذكرت مواء ذلك الكديس وصوت الكمان المنتحر
وقد كنت صائم صيام الضب ، اذاً فهو جائز وجارح لصيام السحلية
من أي لك كل هذا السرد المبدع ،،، ما طولي الغيبة
| |
|
|
|
|
|
|
| |
بت قضيم
توما
نصار
nazar hussien
samo
Hussein Mallasi
Tumadir
tmbis
Rawia
kamalabas
محمد الامين احمد
Abdel Aati
Raja
zola123
مريم بنت الحسين
HOPEFUL
ABUHUSSEIN
بارعة
ياسر مكاوي
tariq
Sidig Rahama Elnour
فيس بوك
تويتر
انستقرام
يوتيوب
بنتيريست