|
Re: 24 أكتوبر في مثل هذا اليوم رحل الدوش (Re: mohammed alfadla)
|
طلال عفيفي:
الكتابه عن الدوش هاويه كبرى فيها ما فيها من احتمالات السقوط والاصابه بحزن حاد على مآالات الناس في البلاد(والناس في مقصودنا هم الكائنات المحتشده بمثل ما احتشد الدوش ..). كان الدوش رحمه الله نصا مغايرا في كتاب المدينه , مثله مثل الفتى عمر خيري ..اختار الشاعرين عزلتهما عن السياق المجحف والممل,وخلق كل منهماأسطورته ودراماه الخاصه .. وهناك,على الهامش,بعيدا عن الضوء العام تكونت اثنتين من أهم التجارب : تجربه شعريه تنضح بالكثافه والجمال ولها قدره عاليه على مخاطبة الناس الطيبين من غير المثقفين . ومشروع تشكيلي لا يخلو من شعر ,فيه ما فيه من اختراق وتجريب .. كان الرجلين من أنضر أزهار البلاد . وكانا على قدر من المقدره والعذوبه.. سوى انها البلاد , ذات القلب الحجر .. فماتا وحيدان بليل ..
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
المسألة دي شكلها قديمة،الدوش مات بي نفس الأعراض شيلوا شيلتكم!
وطـــــــــن
حأسأل عن بلد رايح
وافتِّش عن بلد سايح
واسأل عن امانينا
الِّي ما بتدِّينا
صوت صايِح
وأسأل وين مخابينا
إذا جانا الزمن...
لا فِح
واسأل عن بلد مجروح
وعارف الجارحو ليه جارِح
وابكى على بلد ممدوح
وعارف المادحو
ما مادِح
واحْلم بي حلم مسروق
لا هو الليَلهْ
لا امْبارِح
أعلِّق في جناح سَفَري
خطابات لي زمن فجْري
وادْخُل من درِب سرِّي
لِكُلِّ مضاجع الأحزان
واضفِّر من شجر بلدي
بروقاً مارْقَهْ من صدري
حأسأل عن بلد غاطٍ
لحدِّ الليلهْ في الوجْعَهْ
أَنُط فوق سرْجي واتْحزَّم
أقوم من وقْعَةْ
لي وقعًهْ
أخُتْ ايدي البتوجِعْني
على السأم البِراجِعْني
واسأل..
يا وطن يا بيتنا
ليه شوقك مواجِهْني
ليه حُبّك مُجهْجِهني
وليه تاريخ زمن خسران
موكّر لسَّه في شجني؟
حأكْتب لي شجر مقطوع
مسادير
يمْكِن يتْحرك
خطابات لي طِفِل مجْدوع
يقُوم
يجرى
يَقَع
يبْرُك
رسالَهْ لكلِّ قُمْريّه
إذا دم الشقا اتوزّع
على كل البيوت
ما تْرِك
واسأل..
عن وطن رايِح
وادّيكم خبر جارح:
بأنّو جميع جُموع الناس
حيفْضَلوا لا كُراع
لا راس
ونشترى في الدكاكين يوم
مسابِح من دموع الناس
مساحيق من هموم الناس
زَهَج
يتْعَبّا في الأكياس
ونعْلن في المزاد علناً
وترْغي الجوقَهْ والأجراس:
"!نبيع الطِفلَهْ والكرّاس"
واصْرَخ
! ياوطن! يا بيتنا
ليه ما تبقى لينا الساس
قَدُر ما تجري فيك
أفكار...
يزيدوا الحَبْس والحُرّاس
قَدُر ما تجري فيكْ الخيل
تَدُوس الهيبَهْ
والإحساس
واسأل
يا وطن رايح
اذا كل القبور دَخَلت
بيوت الناس
بلا اسئذان
بلا صلوات
بلا أكفان
جريمَهْ اسائل الدّفَان؟
حريمَهْ طَلَب تَمَن قبري
من البايع في أيِّ مكان؟
واقولكَ يا وطن
رايح
واقولك يا وطن
آمر
سلام النّفْسِ ما كافر
ولا كافر
ولا كافر
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
خضر حسين خليل:
اقبلك في زمن ماشي وزمن جاي وزمن لسه اشوف الماضي فيك باكر اريت باكر يكون هسي تاللم ترارارالم تاررم
لاشيئ غير هذا واخرون يبثون في دوالخنا ان غدنا سيأتي وسنكون نحن اولاد البلد كما قالو (نقعد نقوم علي كيفنا) متين هذذا مايؤرقني ويوكسني ويذهب عني النوم واحيانا مافي الراس
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
أي خذلان أكبر من هذا،كيف يمكننا أن نقول حزننا بطريقة أحزن من هذه... سحابات الهموم يا ليل بَكَن بين السُكات والقول وباقات النجوم الجَّن يعزَّن فى المطر فاتِن عزاكْ رَجعَن وشوق رؤياكْ زمان مشدود على أكتاف خيول هَجَعَنَ وصت ذكراكْ مكان يجرى يلاقِى السيل وسِر مدفون بصدْر النيل ولوا الذكرى مافى أسف ولا كان التجنِّي وقَف وصوت ذكراكْ رذاذ صفّق على خطوَة بنات سَجَعَن وشوق رؤياكْ حنين لى غيبَهْ فى المجهول ولولا الذكرى مافى وصول ولولا الذكرى مافى أصول ولوا الذكرى مافى شجن سحابات الهموم ياليل.. بَكَن.. بَكَن..بَكَن
كان سيدي العارف بالحزن والحنين الدوش،يبحث عن زمان ما مات دونه،وان كان كثيرا ما يحن آناء شعره لزمن مضى لم يكن فيه حزينا لهذه الدرجة زمان كُنّا بنَشيل الوُّد
ونَدِّى الوُّد
وفى عينينا كان يكْبَر
حناناً زاد
وفات الحدَ
زمان ما عِشْنَا فى غُرْبَهْ
ولا قاسينا نِتْوحّد
عمر الطيب الدوش كان فريدا في وحشته،كان يحكي عنها حين يحزن وحين يحب وحين يشتاق وكان
طويل الألم
على الصبر الّى عِشْنَاهو
مع طُول الألم والليل
ولكنه كان قادرا على أن يحافظ على أنسانيته دائما،كان قادرا على الحب رغما عن هذا الزمن الذي يؤلمه
أحبَّك
لا الزمن حوّلْنى عن حُبّك
ولا الحسرَهْ
وخوفى عليكَ يمْنَعْنى
وطول الإلفَهْ والعُشْرَهْ
وشوقى الليك من طوَّل
لسّه معاي
ولى بُكْرَهْ
أقول أنه كان في عزلته هذه طويلا ،كان ما تلتقطه بصيرته وبصره الحزن..في كل أشكاله، حزن الوحدة بتَطْلَعى إنتِ من صوت طِفلَهْ
وسط اللمَّهْ منْسيَّهْ وحزن الجمال ومن شهقَة زهور عطشانَهْ
فوق أحزانهْا..
متْكَّيهْ..
وحزن الفرح وساحات لى فرح نَوّر
وجمّل للحُزن..ممْشى
والحزن القديم
ولا الحزن القديم ..إنتِ
كان الرجل حزينا هكذا دائما،وكان يعلم أن الحزن لن ينتهي لهذا أحبه وأرتضاه،اذ لا مفر
الساقيَهْ لسّه مدوِّرَهْ
صوت القواديس والمياه
طلَعَتْ
مَشَتْ
متْحدِّرَهْ
مدَ البصر
لفَّ الظلام
حَوْل الجدوال أسْوِرَهْ
نعْسَان خضارهْا الا نْتَكَى
ورمى الغُصون
متْكسِّرَةْ
مَدّ الخيال
غنّت مُدُن
والساقيَهْ طاحونة الأنين
طُول الليالى
مدوِّرَهْ
تحت الهجير
تحت الظلام
تحت المطر
الساقيَهْ لا زِم تستمر
الساقيَهْ لسَّهْ مدوِّرَهْ
أن الحزن عنده ليس آنيا فقط ولا ممتد من الماضي فقط بل هو حتى أمر مقدر مستقبليا
فحين يوصي أحمدا أبوه أن لا يتوقف عن الكفاح وأن لا تتوقف ساقيته عن البكاء لأنها بوقوفها ستحدث ألما أكبر من ألم أن يعمل الرجل للأبد الساقيَهْ ثانيَهْ تقيف تكون
آمال عريضَهْ مُشَتّتَهْ
وأكباد صغيرَهْ مفتّتَهْ
تحت الظلام عِز الشِتَا وليس على أحمد أن يرتضي قدره المؤلم هذا فقط بل عليه أن يتوقع دائما ما يجعل الأمر أصعب ،فالمستقبل ليس بهذا الأشراق اذ أن الظلم دائما هناك،الظلم الواقع على أحمد الآن سينتظره دائما
أحمد حكى
وسّد الراس الضُراع
والشوف
نواحى النيل تَكَا:
وصّانِى أبُوى
الموج بيهْدِم كُل رخوَهْ
على الجروف
شِد الضُراع
زى المراكبى مع الشراع
لازِم تعرفو الظلم جاي
من وين عليكْ
لهذا عليه أن يواصل فقط وأن يرتضي حاله مخففا على نفسه ادراكه أنه انسان..و الأنسان يشغله الجمال عن الألم
وافتَح عينيكْ
على زهور الغابَهْ والأدغال
على الاطفال
والخلاص من هذه الحال هو أن يصحبها معه ،أن يصادقها ويصدقها ويجعلها خياره ،علما بأن أحمد لم يخترها ولكنها فعلت لهذا بأختياره لها يهزمها
وعشان يكون الحقِّ ليكْ
تَعْبُر بحور
تَهْدِم جبال
الحق هو هو النضال
والحق فى ساحة مجْزرَهْ
والنصر للفاس
والرجال
ولى سواقى مدوِّورَهْ
يذكرني هذا بقول خالد عباس معللا دفن قبيلة التبوسا لموتاها في قبور رأسية
قال التبوسي ادفنوني واقفا فأنا محارب حتى أواجه سطوة الموت باحساس المغير
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
طلال عفيفي:
ومن جهةٍأخرى .. فهو عمر عبد الله خيري ,أو: جورج ادوارد سكنككر . من مواليد السودان الشقيق :أمدرمان 1939. يلهج لسانه بأربع لغات : الألمانيه والفرنسيه والانجليزيه والعربيه .(ما خلى للصادق المهدي حاجه ) . أول فنان متفرغ للرسم . أقام أكثر من تسعين معرض ( ما بين فردي وجماعي) . شاعر وناقد . تقدر رسوماته ولوحاته بأكثر من عشرة ألاف عمل .
مات .
... طلال
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
كان أكثر ما يشدني في رسومات صاحبي عمر خيري ،عيون مخلوقاته ..الناس والأطفال(باعتبار أنهم لم يحبطوا بالقدر الكافي ليصيروا ناس،فالناس براهم والأطفال براهم) والحمام والأغنام والقطط والكائنات الأخرى..! عيونها كلها تحمل سمة مشتركة لست قادرا الى الآن أن أكتشفها أهي حزن يا ربي أم شخوص أم عشق لا أدري للآن..
كان يرسم عينيه هو شخصيا في تقديري..ففيهما هذا الشئ اليصعب تصنيفه.. عندما رسمنا ولونا سويا يوما ما في المركز الفرنسي.كان علينا أن نرسم شيئا ما عن كرة القدم ..أمر مضحك أليس كذلك؟ فعلاقتي بها كانت ولا زالت ضعيفة.. لكن لما الموضوع يكون فيه معرض وعمر خيري وألوان ببلاش،يلا ماحدش حوش .. نرسم على كيف الأحوال أستغرقت وقتا طويلا لأفكر .. حاولت أن لا أنظر لما يرسمه عمر خيري فأنا أحب الرجل ورسمه وعلي أن أرسم شيئا ما يخصني.. وبدأت بدلق حبر الطباعه على الورقة المسكينة ،وهاك يا عواسة بالسكين.. وقتها لم أكن أخاف من الألوان .. كنت أكتشفها،أتذكرني الآن ،كنت كمن رأى نارا لأول مرة وبهره ضؤها وجمالها .. فانخطف بها ومسها فلسعته ... وتعلم بعدها أن يخاف من الجمال.. المهم مر وقت الرسم و جاء وقت المكاشفة .. فعرضنا أعمالنا على بعضنا البعض ............... ............... ............... ............... ...............
صعقني الرجل
............... ............... ............... ............... ...............
كانت لوحته لحارس مرمى ، يحاول في خيبة أليمة الأمساك بالكرة ،التي كبنت تحبها ويتزوجها من لا تحب فلتت منه لتستقر في الشبكة والتي هي بدورها واحدة من صنائع عمر خيري بالورقة وبنا.. كان قادرا على أن يرسم الخطوط المستقيمة كمن يستخدم مسطرة.. يملأ كل ركن في اللوحة كأنه سيرسم أبدا ان لم توقفه حدودها ، وجسده المنهك بالرسم والتدخين(كان يدخن تاج) وروحه التي خذلته قبل أعوام ورحلت عنه.. فمات!
الفاضلابي
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
who is the child now i don't belive in abdalaziz khalid i don't belive in elmerghany and i don't wan't you in my post can you have some dignity and leave please let them eat each other and burn all together i don't give a #### please don't come here again this post is about eldosh if you have any thing about him welcome if not don't put that guy near by my holy eldosh please
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
يا تلاميذى العُزاز
بسم الله
بسم المجد فى أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجهْ لى صدر الشراع
اكتبوا
ارتفاع الموج إلى صدر الشراع
يا تلاميذى العُزاز
خلِّى بينك وبين زميلك
زى مسافَهْ
قَدْر أيه؟
قَدْر المسافَهْ البين عيونى وبين سُعاد
قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد
اكتبوا
.........
...
ودَيَّه أيه يا اْستاذ يكون؟
دا المُجنن طه اسألأوا ودْ سكِينَهْ
اسألوا الريح المسافر فى تجاعيد السكينَهْ
شاوِرِوا الموج اللِّى ساكِن فى مسافات السفينَهْ
تسألونى عن سُعاد
اكتبوا العنوان بخط ممشوق وواضح
احذروا اللحظ البيضحك وهو جارِح
مُرْكَب على الله ويلأّ نجتاز الحدود
اكتبوا العنوان بِخَط مستور وفاضح
(رقصة الموج الأخيرَهْ جُموح نُهودِك يا سُعاد)
عنوان طويل
يا تلاميذى العزاز
كِلمَهْ..كِلمَهْ على مهلْكُم واكتبوا
والصيف طويل لمْلَم العُشاق مواعين الرحيل
نجمَهْ شاردَهْ
وغيمَهْ هاجدَهْ
ضَمَّهْ ضَمَّهْ ضَموا شرف المستحيل
جَوهَرُوا الحزن الكحيل
مُركَب على الله ويلأّ نجتاز العويل
بانت سُعاد
غامت ملامح السكَّهْ وانكتم المكان
رَقَصتْ سُعاد
فى خانَة الأصفار وميلاد الزمان
جمّعتْ من كل زهرَهْ مواجع الحُب المُهان
مُركب على الله ويلأّ نجتاز الدّثخان
يا تلاميذى العزاز
خلّوا بينكم وبين رنين الضحكة صرخَهْ
حُب مُهان والصبر أولىَ
خلُّوا بينى وبين جنون الخيبَهْ شَوْلَهْ
واكتبوا
(عاشَ فى زمن المذلًهْ المدعو طه ودْ خدوم
باع تفاصيل الكآبَهْ عشان يفرِّغ وتانى يمْلاَ
جاع وخيرِك يا سُعاد مرْدُوم رَدوم
عاش المدرِّس ود خدوم
كأنو نكْبَهْ -كأنو شُوم
عاش المدرِّس ود خدوم
تسْقُط حكايات الهموم
الأزاهِر
والدفاتِر
والمتاجِر
والمقابِر
والخافر والمشاعر والنجوم
عاش المدرِّس ود خدوم
يا تلاميذى العُزاز
من كانَ حاضِر أو تَوَلَى
يقفِل الكرّاس ويلأّ
نشوف بداية المهزلَهْ
***
يا تلاميذى العُزاز
فى صيف طويل مبطوح على صدر الزمن
منظُلمَة الشوق ابتدا
فى حضرَة الحُب اندَفن
والنيل مدامِع للنجوم
والصبر مُفتاح للشجن
والحِلَّهْ مبتورَهْ وكسيحَهْ ومُهْملَهْ
بانت بداية المهزلًهْ
بانت سعاد بانت تفاصيل الشجون
والجنون والمقصلَهْ
بانت سُعاد
وقفتْ على خِصر الجبل
فتَحت مشارع للظنون والأسئلَهْ
رقدَت على شَعَر السهل
ضفَرت ملايين القُبل
"والجو صفا والنيل هَدَا
وغاب الأتر"
وأنا يا سُعاد
فى الحِلَّهْ معجون من رماد من حسرَهْ
مقطوع من شَدَر
يا تلاميذى العُزاز
لا زوايَهْ لا قوس لا وتَر
وأنا يا سُعاد
فتّشتَ ساحات الأمانى
ناصيهْ ناصيهْ
حجر حجر ، ما لقيتْ إلاّك زمن
مالقيت إلا بِلاد
وأنا يا سُعاد
يا شهوَة الحُب للعِناد
يا شهقَة الفرح المُعَاد
خلِّينى فى بالك نغم
وأنا يا تلاميذى العُزاز
مخلوق بسيط من شوق وغَم
وأنا يا سُعاد مخلوق بسيط من شوق وغم
قامت سُعاد من رقدتهْا
الكون جميع كان انحصر مابين
قيامَهْا ووقفتَهْا
النخلَهْ والهجليجَه والسيّالَهْ
والشوق والمطر
الغابَهْ والهم القديم
الفرحَهْ والذُّل والخطر
كلُّو انْجَمَع فى كفّتهْا
قامت سُعاد من رقدتهْا
قامت قيامة العُمْدهْ مليون اتجاه
اشتَّتتْ كل الجموع
من كلِّ أنَّهْ وكلِّ آه
ومشيتْ عليكْ أنا يا سُعاد
حتَّة مُعلَّم مُبتدىء
غاوِى وبسيط
ولو ما خَدوم
كان من زمان محْسوب لقيط
ما آصلى مولود لللَقِيط
أو مُغفّل
أو مبهدَل
أو عبيط
يا زعيطاً يا معيط
ومشيت عليك أنا يا سُعاد
شُبّاك على النار انفتَح
درويش نحيل
فى صُرَّهْ شال حزنو وسَرَح
سيلاً تقيل
وسَّع خطاويهو وكَسَخ
ومشيت عليك أنا يا سُعاد
مربوطهْ عينى على خُطاك
فى عيونك اتجمّع كلام
فى صوِتك اتجمّع ظلام
حسيتو فى الحَشَا والعِظام
وقريتو فى سعف النخيل
ولمحتو فى طوق الحمام
فى العفهْ والخُصْلهْ الحنِينَهْ
اللفْتهْ والتوب والحِزام
بارَت مواعيد الغرام
ونزرْتُو حُبِّك للزنازين
والمساجين والهوام
والعُمدهْ فوق راس الفرح
جمّع جريوْاتو ونبح
(مسئول كبير زاير البلد)
قُتْ ليهو يا عمدهْ اختشى
مسئولك الزاير الكبير
يا ريتو بس لو شاف سُعاد
كان رسم للعفَّهْ
أوصافا وتقاطيعا ومقاسا
كان دخل للحِلَهْ من بابا وشبابيكا وأساسا
كان اتْوَلد برَّهْ المُتاجرهْ
والمحاورَهْ والمصاهرَهْ والخساسَهْ
كان تاب
وباع للصدقِ مجدو وذمّتو
يمرُق جديد
من حَر دهاليز النِخاسَهْ
من هدومِك يا مرازِل
يا مزابِل
يا مباخر للتعاسَهْ
يا مناكر
يا عساكر
يا ، سُعـــــاد
......
فِك علَى كلب الحراسَهْ
.....
يا تلاميذى العُزاز
فى يوم طويل مبطوح على صدر الزمن
اتلمّت الحِلَهْ
الحنينْه عشان وداعَك يا غروب
حُزن فارس
وكيف يصير فى لحظَهْ مولَى
كيف يجوز
يا عمدَهْ كيف؟
الذُّل مُصان
والحّثب مُهان
والسجن أولى؟
كيف لقيت يا عُمدهْ كيف
للمجازر
والخنازير
والخناجر
فى رموش الغيم مَحَلَّهْ؟
كيف بنيت يا عُمدهْ كيف
من رماد حزن المآتم
من تُراب غضب المآتم
ليكْ ولى ضيفَك مَظلَّهْ
حِلَّهّ حادَّه
وإنتَ تزْرع فوق ضُوع الوادي حفْلَهْ؟
كيف يجوز؟
قد يجوز وقد يجوز
يا تلاميذى العُزاز
ضَلّض مَن قَد لا يحوز
من تبتّلْ أو تيَمَمْ
أو تيتَم أو ترمّل
يا تلاميذى العُزاز
اكتبوا التاريخ
خمِستاشر سُعاد أوّل
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
بنـــــــــــــــاديها
بناديها
وبعْزِم كُلّ زول يرتاح
على ضحكَة عيون فيهَا
وأحْلم اني في أكوان
بتْرحَل من مراسيها
عصافير
نبّتَت جِنْحات
وطارت
للغيوم بيهَا
مسافرِ من فرح لس شوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيه
بنادِيــــــهَا
ولمّا تغيب عن الميعاد
بفتِّش ليهَا في التاريخ
واسأل عنَّها الاجداد
واسأل عنّها المستقبل
اللسّع سنينو بُعاد
بفتِّش ليها في اللوحات
مَحَل الخاطر الما عاد
في شهقَة لون وتكيَة خط
وفي أحزان عيون الناس
وفي الضُّل الوقَف ما زاد
بناديــــــهَـا
والاقيـــــهَــا
واحِس بالُلقيا زي أحلام
حتصْدِق يوم
والاقيــــــهَــا
واحْلًم في ليالي الصيف
بَسَاهر الليل
واحجِّيـــهَــا
ادوبي ليهَا ماضيهَا
واطنْبِر ليها جاييــهَا
وارسِّل ليها غنوَة شوق
واقيف مرات واْلُوليهَا
بنادِيـــــــــهَــا
وبناديــــــــهــا
وبناديـــــهــا
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
حـكــــــــــــــاية
في الزمن الموشّح بي سكين
وحربَهْ
والغيم المسافر
لَمّ دموعي خَبَّ
طلَّ الخوف ملفّح
بى حُزن الغلابَهْ
خلَّى الشوق مهاجِر
بين صمتي و
عذابْها
اتْلاشَت مسافَهْ
مابين سيل وغابَهْ
مابين ضُل سحابَهْ
وبين وتر الربابَهْ
اتلاشت مسافَهْ
بين صمتي و
عذابْها
فوق ايام حنيِنَهْ
مالتْ بي ضفيرَهْ
صَحّتْ موجَهْ نايمَهْ
زاد النيل دميرَهْ
مالت نخلَهْ
تهمس
لي موجات حسيرَهْ
عن أشواق أسيرَه
مامعروف مصيرهْا
يا غيـــم وين مسافــر؟
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
خطـــــــــــابات فى حمى الوطن
فتَحتَ جوابك الأوّل
لقيتَك لسَّه يا وطني
بتكتب بالعَمار والدم
ولسَّه بتسْكَر أمدرمان
على الشارع...
وتتْكوّم
وتمْرُق من صَدُر مسلْول
نهودهْا
تَدُوسن العربات
ترضِّع فى الكلاب
مشنوقَهْ من عينيهَا
في الساحات
وتضْحَك في زمن مسموم
ولسَّه بترقُد الخرطوم
تبيع أوراكْها للماشين
تَطِل من فوق عماراتهْا
وتَلِز اطفالهْا في النيلين
وترجع للرُقاد تاني
اشوفك في جواب تاني
مشيتْ اتمشَّى فوق همكََ
وصلْني جوابك التاني
يحيض الغيم على سطوركَ
يقطِّر من سماكْ دمّك
بشوف في جوابك التانى
مُدُن مبنيّةْ متكيّهْ
بتمْرُق من شبابيكا
عيون برموشَهْ مطفيَّهْ
شَرَك لي كُلِّ قُمريَّهْ
وأماني كتيرَهْ مخصيَّهْ
شوارع بالنهار والليل
مدبّسَهْ بالحراميَّهْ
معلّقَهْ في صدور الناس
كلاب اسنانْها
مبريّهْ
على مرِّ السنين تحْسب
شهور أيامها عِبريّهْ
مشيتْ اتمشَّى فوق همّك
وصلْني جوابك
الدمّك
رقدتَ على البحر غنيتْ
مليت احزاني بالأمواج
جرحْتَ الدنيا بالدوبيت
جريت لي ساحَة الشُهداء
لقيتُم لا وطن لا بيت
دخلتَ منازِل الأُمّات
وطلّيتْ لي شقاء الاخوات
مرقتَ كأني زولاً مات
لقيتْ أطفالي في الشارع
بيجروا على أمل واقِع
رقدْتَ على البحر غنّيت
واتذكرت َاهَلَن لي
ساكنين في سجن كوبر
مليتْ أفراحي بالأمواج
وشدّيت الرحال قُمْتَ
لحدِّ الليلَهْ
ما عُدْتَ
شبابيك فتَّحَتْ أبواب
وأبواب فتَّحَت حارات
وكنتَ معاكَ يا وطني
على حُمّى الجواب الفات
صحيتْ ولقيتَك الشارع
وكِتْ تِتْمايل النخلات
ضُلّك
على أيامك الجايات
وفي جوابك الرابع
لقيت الناس على الشارع
وصوتَك من كهفوف طالِع
كَوارِيك للسماء السابع
كواريك للسماء السابع
!كواريك للسماء السابع
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
اتخـــيلي
إتخيّلي
إتخيّلي الأنهار
ماصابْها أيّ مَرَض
وإتخيلي الأكون
في مهرجان مسْحور
هَدَتْ النجوم للأرْض
واتخيليني وحيد
و أنا فاتني يوم العَرْض
يا نيل صبي وممْشوق
من بهجَة الأمواج
في زفّهْ مُنْسابَهْ
طارت سحابات شوق
لِمْسَت حَشَا الغابَهْ
طارت طيور بِ الكوم
طافت على الاشجار
لِقَتْ النخيل محْموم
غنّت مع الساهرين
غنّت غُنا العاشقين
" يا ماشي فوق النيل
هاكْ الجمال منديل
يا جايي من النيل
هاكْ النخيل اكليل"
واتْخيّليني وحيــــد
أنا والجروف
والسيــــل
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
مرســـــــــــــى النجـــــــــوم
وجيتْ يا حِلوَهْ
زي زولاً قَضَى الايام
بُكا ومنفَى
وجيتِك من بلاد باتت
على نار زيفهْا
تِتْدَفا
أنا المسجون زمن يا حلوَهْ
فيها مداين الكُلْفَهْ
ولا قيتِك
سلام عينيك
رماني على سلام وصفَا
أماناً فيكي فتَّح ليْ
على مرسى النجوم ، شُرفَهْ
ولا قيتِك
هموك من هموم الغير
وفي حال البلد
والريف
وفي النايمين على الأحزان
وفي الصاحين
مآسي وخوف
في التاهين مع الأشواق
متين تنْزَاح سموم الصيف
ولاقيتِك
غصناً مال على الأمواج
وهفْهَف
فوق خُضُرْة القيف
أحبِّك بى مشاعر جيل
رفَع للشمس رايَهْ وسيف
وثبّت في الأرِض أقداموا
في أعماق تُراب الريف
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
الحبيب الغالي محمد الفاضلابي سلام ورمضان كريم وتصوم وتفطر على خير
كان الدوش استاذي وصديقي القريب جداً كنا بنطلع من المعهد في قصر الشباب والأطفال عشان نمشي بيت ثريا شقيقتة في (السرحة) ولا أدري إسمها الآن قدام مدينة النيل وكانت جيوبنا خاوية من حق المواصلات فكنا بنركب يا عم وكان دائما بقول لي خليك يا بدرالدين إنت ظاهر عشان إنت مشهور والناس بعرفوك من التلفزيون وممكن يقيفوا لينا "تخيلوا فنان بقامة الدوش" لا يعرفه الجمهور العادي ... ليه يا بلد؟؟؟ وهو الذي نظم فيك أجمل حروف كان دائماً بحكي لي حكاوي ونكات وأذكر من نكاته قال في منطقة ممعنة في القروية قرر مجموعة من الأهل أن يزوجوا إبنهم طالب الجامعة من بنت عمه حسب التقاليد والموروثات علماً بأن الطالب له حبيبه في الجامعة وينتظر زواجهما التخرج وبضع سنين المهم الجماعة زروا ليك الشاب وطالبوهو بالزواج من بنت عمه وزولك بدا يبطبط ويفتش في الأعذار قال ليهم ياخي الزولة دي أنا بعتبرها زي أختي قالوا ليهو أها أبوك دا مو ماخد بت عمه بتعيب علي أبوك ولا على أمك المهم وبعد كمية من الحجج الواهية قال ليهم ياجماعة الزولة دي أنا ما بحبها قالوا ليهو : نان نحن قلنالك حبها؟؟؟ قالناك عرسها
الدوش آآآآآآآآآآآآآآآه اللهم ربي ارحمه وأغفر له وأسكنه فسيح جناتك يارب العالمين
هذه بعض الدموع زرفتها بعد أنباء وفاته التي جاءتني وأنا في غربتي
وتر نائح ****
وَتَرْ الْكَمَانْ نَائِحْ بَكَى وَالْعَبْرَة خَانْقَاهُ ومَاَسِكَا وَعَالْقَة ِفي حَلْقِهِ ومُمْسِكَا أَصْلُهْ الْكَلامْ الّلِي تحَكَى لِلْجُرْحِ الْقَدِيِمِ مَسَّ ونَكَأ وَخُطْوَاتْ حَزِيِنَةٌ وَمُنْهَكَا وَكَلِمَاتْ قَدِيِمَة مُعَتّقَا سَطَّرْ حُرُوفَهَا ورَوْنَقَا خَطَّاهَا دُوشْنَا ونمّقَا وَفِيِهَا خَتَّ آهَاتُهُ وشَقَا وَالْسَاقِيَةُ لِسَّه مُدَوِّرَه وَالْوُدْ ثُرَيَا مُعَلَّقَةٌ إتْغَنَّى بِيِهَا عَمَالِقَةُ وَرَحَلْتَ يَا عُمَرَ اَلْفَتَى رَحَلْتَ ِلي دَارْ اَلْبَقَاءِ مَا قِدِرْتَ أوْفِيِكَ اَلْرَثَاءِ رَحَلَتْ مَعَاَكْ اَلْمُفْرَدَةُ كِيِفْ اَقْدَرْ أوْفِيِكْ اَلْرَثَاء وَالْكِلْمَةُ صِبْحَتْ مُقْعَدَةٌ كِيِفْ اَقْدَرْ أوْفِيِكْ اَلْرَثَاء وَالْكِلْمَةُ صِبْحَتْ مُقْعَدَةٌ
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
شكرا محمد على إحياء ذكرى الشاعر المرهف، عمر الطيب الدوش،الذي عاش بالشعر، وللشعر، ومات بالشعر. والتشابه بين الدوش وعمر خيري، تشابه كبير، فعمر خيري قد عاش بالفن، وللفن، ومات بالفن أيضا. وسيجئ اليوم الذي يعرف فيه الجميع قدر هذين الرجلين العظيمين. وقد وجد عمر الدوش شهرة واسعة مقارنة بما وجده عمر خيري، وذلك لأن شعبية الغناء تفوق شعبية الفن التشكيلي، اضعافا مضاعفة.
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: mohammed alfadla)
|
محمد صاحبى00 يازميل وحاتك انا مبسوط منك لدرجة (من الحب ماقتل)00 انا كنت اساسا عاقد لؤاء عدم الرجعه للمشغوليات وحاجات تانيه حاميانى00 لكن انت فجرته صمام الامان على الاقل لازم اسجل ليك حضور 00 بوستاتك اخيره تعبر عن وجة نظرى بصوره عنيفة00 وردودك ريحتنى فى دينى رغم انو ما عندى00 لكن من الليله وغادى انت دينى وبعدك000 ايوه ياهو ده الفكر اللازم يكون فيهو جيلنا بدل من ترهلات الجلاكين ديل0000 كلامى وقع ليك ياخدر حسين000 احبكم كلكم000 وقرمبوز كمان 000والليندى000ودرميله000 وماشين فى السكة نمد00 عليك دينك ابوحميد واصل اوكى وكان لقيت اى فرقه فى الويك اند00 بجيك اكمل طقوس العباده صاح000 داير من الحزن الفرح00 اسوى ليك ياحماده صاحبى000
21 أكتوبر يوم الخذلان العظيم! رسائل الي أبراهيم وطلال وأصدقائي]
| |
|
|
|
|
|
|
Re: 24 أكتوبر في مثل هذا اليوم رحل الدوش (Re: abuguta)
|
شاعر مات بوطن
الحلم فيه مجهض يموت فى كل يوم
الحلم فيه زى الجمرة
الحلم مرهق ومندفن فى كوم رماد ..
جمرة دافناها الفصول الما بتجى ...
فى كوم رماد...لمن تجى
مدفونة والناس تترعش ...
كان بيأشر زى طفل ما بعرف يتكلم
عليها ويبكى ما فاهمنو
منشغلين
وببكى وبياشر
وعير سعاد
مافى زول كان عندو "ماشة" يسل بيها الجمرة من كوم الرماد
يبكى ويغنى ويوجه الناس للجمرة دى ....ويحب سعاد
لما ادى الروح
حليلو
| |
|
|
|
|
|
|
|