|
اهل العوض فى لندن...نقلا عن موقع ..طابت
|
حافظ اهل العوض دي ذكرتني بي نوادر اهلنا ناس الجزيره الانا منهم ,عشان مايزعلو واجرو لينا عدد فكاك,قبل سنين جانا واحد هنا من عربنا ناس ريفي المناقل,وقمنا بالواجب,الواجب ده يعني تمسكوا درب الورق بمرقو من وين وكيف ,لذلك بقولو فلان عايزين نورقو,المهم بعد فتره جاني في البيت شايل باقة لبن,وانا والله كانت فايته علي حكاية الباقه البرجعوها لي اهل العوض,قال لي والله قلتا مابجي يدي ناشفه,والله ياحافظ الراجل طبق لي حكاية العوض بالكربون,انا مازول لئيم ولا قافل بيتي من الضيوف لكن انت مجرد انك اجرت بيت لوحدك اكيد بتحب بعض الاحيان ترتاح لوحدك,بالله العظيم بيتي اتقلب لي لكونده,انا بشتغل من الصباح وبرجع الساعه سبعه بالليل,وزول شويه انطوائي ومرت كتيره بساهر لحدي اتنين صباحا وبنوم نومه واحده بعد ذلك,احكي ليك,اول حاجه والله سته صباحا القاهو ادق في الباب مش الجرس,ادق لحدي الجيران اصحو وتاني يوم القاهم مهددني انو العمليه دي تاني ما تتكرر,وكان بيت معاي وده بحصل والله امكن خمسه مرات في الاسبوع,اها يمومو الابيت ده الليل كلو انقنق كيف ما اعلمو الكمبيوتر وهو كان الحيطه بتتعلم هو بتعلم,وعاوز اتكلم في التلفون مع اصحابو في الموبايل وانا جني وجن تضرب لي موبايل لانو الدقيقه الواحده بي 35 قرش وهو عاوز ا نق بالساعات,وكان صريت وشك ساي من التعب اقول ليك يازول انت كان متضايق مني قول لي,وهو زول فيه طيبة ناس الجزيره لكن لايوق ,مره جاني يوم سبت من الصباح قال عمو جابو ليه ولد سموهو عليه اها جاب كرت تلفون قال داير اضرب ليه اها عمو ده لحدى مانادهو في مكان التلفون الكرت مشا نصو وبدل اخت السماعه قال الخط امكن ما اجى,ودخلو في السلام والمباركه البعيدوها بعد كل جمله والكرت انتهي اها طلع من جيبو خمسه جنيه ختاها في الطربيزه قال ده حق الكرت وانو مابحب اكلف زول ورفع السماعه وضرب بالمباشر,قلت ليه ياخي الدقيقه بي اكتر من جنيه قال لي انا عشان عارفك مابترضي هدي الخمسه في الطربيزه,في الفتره دي الخط جا معاه ودخل في غيبوبة امكن ساعه علي قول برنامج صورة مقلوبه انو الواحد لما القي اهلو بالتلفون بدخل في غيبوبه,والله ده الحصل بالظبط,اها قريبو دا قال ليه اديني الزول المعاك اسلم عليه,وبعد ما خلصت المكالمه قلب علي,انت زول كعب,تتكلم مع الزول وصاري وشك,كان علي تلفونك انا دافع حقو,المهم دخلني في مضافرى ورجعت انا اعتذر,وفي الفترات الاخيره بقي اجي بي اصحابو .فلان من المعيلق وفلان ده اخوه معرس مننا,وده الظروف ساي خانتو في البلد دي ,المهم بقيت انا انوم في الواطه والبيت زي نادي الشرطه التلفزيون شغال والكشتينه مدوره حريق وهو عندوا ضومنا ما بلعب معاهم كشتينه,ارص الضومنا والعب مع نفسو واتكلم والله براهو ,كدي اديني الدش ده,البلاطه دي نزولها حسي حار ,المهم المواقف كانت كتيره والحكايه كترت علي لكن والله كانت فايته علي انو ارجع ليه باقة اللبن,وفي الاخر والله رحلت وغيرت تلفوناتي واخر مره شفتو في محطة القطر مملح جريده من الراجل الببيع الجرايد قدام اكسفورد سيركس لكن زغته منو وغيرت الاتجاه,واكيد بتاع الجرايد المسكين ما عارف نكتة باقة العسل لكن مادام اهل العوض دخلو لندن بكره الصحافه بترجم الحكايه وبتاع الجرايد ارحل اخلي اكل عيشوا.ولكم العتبي.
ولكم ودى http://www.tabatpeople.com/
|
|
|
|
|
|