|
|
 جبال مأساة .. سهول أحزان : مقاطع للوطن..
|
على مد البصر شايف
مخازي بلدنا بالكيمان
جبالن شايلة مأساتنا
سهول ممتدة من أحزان
مآسي على البلد تنهال
باسم السنة والقران
لا زولن سعيد فرحان
ولا بتشوف حقوق انسان
وعلى مد البصر يابا
وحاتك يا عظيم الشان
جبالن شايلة مأساتنا
سهول ممتدة كوم أحزان
ونيلك يابلد شقيان
موجو عديل وقف حردان
يبكي على شدر ضبلان
ويطرا زمانو كيفن كان ..
# # # # # #
حليلك يا بلدنا الكان
تكية ومرسى للضيفان
حزين الليلة ياأهلي
فاقد فرحو وين ما كان
غارق في الدموع يبكي
وفاقد أمنو ليهو زمان
صدى صوتو الملا الوديان
بسأل : ويـــــــن
وين الليلة يا ايمان
سوداني البعرفو زمان
وينو الليلة يا عثمان ؟؟؟؟؟؟؟؟؟؟؟؟؟؟ .
##########################
توضيح بسيط فقط :
# (ايمان) و(عثمان ) هما رمزان الى (زول) و (زولة).
وللجميع مودتي ..
خضر عطا المنان
|
|
 
|
|
|
|
|
|
|
|
Re: جبال مأساة .. سهول أحزان : مقاطع للوطن.. (Re: Tarig Sidahmed)
|
خضر ياشفيف
مادام الكلام للوطن
القومة ليه معاك
بلدا فيها نيل
للموية دافر...
وارضه مسطحة
زى اوراق الدفاتر..
تزرع تفتح فى الجداول
والخضرة زى ابتسامات
البشائر...
الحقول جابت ثمار
ما عرفنا الجوع والدمار..
وصدرنا للبلد البعيد
والقطر والمجاور...
بس الليلة جاءتنا المشاكل
بيها الغيوم صارت تسافر...
حتى الطيور هجرت وكور
عند المغارب والبواكر...
ولو ولد طفلا جديد يسال
امه وين الجواز عاوز يسافر...
عشان الزواج كا بالرسائل
وابوه لسع مهاجر...
كايس الضمان ..عاوز الامان
عاوز ما يسمع دبابات العساكر...
حتى الجماعة صارت تهاجر...
عشان تجمع من المغتربين الضرائب
وتكدس فى بنوك الوطن المجاور...
عشان السودان عاوز يهاجر
حتى النيل داير يسافر
وغير مجراه القديم
عشان حكومة العساكر..
انا ذاتى عاوز اسافر
حتى للظلمات والدياجر...
بس لمنو نترك المساكين
الحيارى
المكافحين الضوامر...
المابعرف وين ينوم
غير رواكيب فى الهواجر...
الما بملك رسوم الجواز
ولا بعرف حجوزات التذاكر...
ابقوتة_ قبل الاغتراب
| |
|
|
|
|
|
|
|
|
|
Re: جبال مأساة .. سهول أحزان : مقاطع للوطن.. (Re: abuguta)
|
(( **انا ذاتى عاوز اسافر
حتى للظلمات والدياجر...
بس لمنو نترك المساكين
الحيارى
المكافحين الضوامر...
المابعرف وين ينوم
غير رواكيب فى الهواجر...
الما بملك رسوم الجواز
ولا بعرف حجوزات التذاكر** )) >
ابقوتة_ قبل الاغتراب
*************************
الحبيب : أبوقوتا
روعة بجد ..
لكن دا كان ابوقوتا قبل الاغتراب !!!
ثم ماذا بعد الاغتراب ؟؟؟؟؟؟
هل أتحفتنا ياسيدي بما عندك من بيت الكلاوي ديك ؟؟؟.
لك المحبة .
خضر عطا المنان
| |
|
|
|
|
|
|
|
|
|
Re: جبال مأساة .. سهول أحزان : مقاطع للوطن.. (Re: Dr. Moiz Bakhiet)
|
(( ** الحزن يعصر مهجتي كالبرتقالة
الآن أعرف مأزق الكلمات
أعرف ورطة اللغة المُحالة
وأنا الذي اخترع الرسائل
لست أدري
كيف أبتدي الرسالة **))>
******************************
زولنا السمح : معز
هكذا حالنا معك دوما .. تتسلل الينا خلسة من حيث ندري ولا ندري
فتحيلنا حقلا من البرتقال والقرنفل .. والياسمين واليانسون .
فأي برتقالة تلك التي عصرت مهجتك يا سيدي ؟؟..
أنها اكثر البرتقالات حظا في دنياالبرتقال .
لك شوق لا ينضب .
خضر عطا المنان
| |
|
|
|
|
|
|
|
|
|
Re: جبال مأساة .. سهول أحزان : مقاطع للوطن.. (Re: خضر عطا المنان)
|
الحبيب ورفيق الصبا الجميل خضر الاجمل
التحية لك عزيزى وانت تحمل هم الوطن فى احداقك حيثما حللتواينما رحلت رغم يقينى انك تنعم بالحياة الرغدة ولكن يقينى اكثر انك لن تهنأ بها والوطن تقطع اوصاله بواسطة فئة باغية استحلت كل حرام وعاثت فسادا فى ربوعه الجميل ..
احى وطنيتك اخى واحى حبك الازلى لاهلنا الاكارم ..
| |
|
|
|
|
|
|
|
|
|
Re: جبال مأساة .. سهول أحزان : مقاطع للوطن.. (Re: قرشـــو)
|
(( ** احى وطنيتك اخى واحى حبك الازلى لاهلنا الاكارم **)) .
******************************************************
كم أنت رائع يا عمدتنا يا قرشو .. فأنا ـ بدوري ـ أحييك
وأكبر فيك هذا الشعور الطيب نحوي .. وما حبي لذلكم البلد
العظيم وشعبها الكريم الا بعض من حبكم يا سيدي ..
وان كان لي ما ازيد هنا فهو :
يا بلد يا باقي همي
أنتي اللقمة والجقمة
وساري هواكي في دمي
أناالساويكي ليا دليل
وأعزك أنتي زي أمي
بلاقي دوام حروف اسمك
تراقص في حروف اسمي
عايشك يومي في الغربة
وكاسي هواك مسام جسمي .
**********************
وتسلم يا عمدتنا ياعظيم .
ولك محبتي .
خضر عطا المنان
| |
|
|
|
|
|
|
| |
خضر عطا المنان
samwal ebrahiem
osly2
abuguta
Dr. Moiz Bakhiet
قرشـــو
فيس بوك
تويتر
انستقرام
يوتيوب
بنتيريست