|
|
 قصيدة ساهلة سهولية جد
|
عندي حلم
جميل زي مقرن النيلين
نتماسك شمال ويمين
ونبني ونبني نتقدم
ويغنوا غنانا ناس جايين
عندي حلم
لما الليل يليل
ما أهم لي بكرة أو لليل
أرقد مطمئن وأمين
أحكي حكاية لولدي
و أمسد راسو لامن ينوم
ويسووا سواتي ناس جايين
عندي حلم
أقول يا أخويا
يفزعني
ويقول يا أخويا
يلقاني
ونتشايل
كأننا زول
ما زولين
عندي حلم
أفتح نشرة الأخبار
يقولوا علينا سوينا
بنينا
علينا
أدينا
مش يمكن غدا يتصالحوا الخصمين
عندي حلم
أمشي شوارع الخرطوم
يوم بالليل
بدون تفتيش ولا ثابت
أمش ساكت
عندي حلم
يكون في بلدي فنانين
ونجارين
أطبا وعلما
ورجال دين
مسيحي وزنجي واسلامي
صيادلة و أدبا
صحفيين
وبنايين
مزارعية
مكانيكية
طيارين
حرفا شديد
لا بيغشوا لا بيطشوا مغتربين
عندي حلم
جميل زي مقرن النيلين
أذا سألوني ناس تانيين
بلادك وين
أقول الجنة وأتبسم
ويسووا سواتي ناس جايين
|
|
 
|
|
|
|
|
|
|
|
Re: قصيدة ساهلة سهولية جد (Re: mohammed alfadla)
|
انت شوقك دا مالو الفاظو تعبانة كدة.
كان مشتاق ما تضرب تلفون .. محل الكروت ما وروك ليهو؟
اها اسهل القصيدة الفوق دي ولا دي
نفسي ف بلد
لامن تفوتا تحنسك
وتجيها مشتاق تدخلا تقعد معاك و تونسك
تديك من اللقمة الحلال
في ضلها تقعد قصاد بت الحلال
تسهر عليها وتغلبا بالمال
تغلبك بالعيال
نفسي ف ولد أسهر عليه وأعلمو
عشق البلد
نفسي ف بلد
نفسي ف ولد
| |
|
|
|
|
|
|
|
|
|
Re: قصيدة ساهلة سهولية جد (Re: mohammed alfadla)
|
والله يا صاحبي
دا شعر ساهل جنس صعوبية
أتذكرت وأنا بقرا الشعر دا إنو الخط المستقيم
أقرب وأسهل الطرق للوصول
لكن لا يمكن رسمه باليد مباشرة إلا بعد الإستعانة بمسطرة
أرجو أن لا تكون أحلامنا محتاجة مننا لي نومه طويله
وجوزوا فيه الغفوة كدا لزوم التخفيف مع شئ من الكراهة المغلظة
انتبهوا أو قال استووا .. لم أسمع جيداً
كنت غارقاً في حلمك يا صاحبي
حلمك أن تبني بيتاً
من لبنٍ
وتعيش سلاماً ووئامْ
ضدك يستأجر أضغاثاً
تهدم تلك الأحلامْ
نَمْ في نومك
واحلم
ما أقسى أن تشتجر الأحلامْ
هوووووووووي مشتاقين
| |
|
|
|
|
|
|
|
|
|
Re: قصيدة ساهلة سهولية جد (Re: الطيب برير يوسف)
|
ألأخ / محمد الفاضل
لك التحية و التقدير
ذكرتنى بقصيدتك الساااااااااهلة دى واحد صاحبى
عايذ يقول داير احكى ليك نكتة جديدة لنج قال :
هاك النكتة دى قديمة لنج أهااا ولله قصيدتك دى
سهلـــة صعـــوبية , عموما القصيدة رائعة و ألأجمل
ما فيها التلقائية لذا جائت الكلمات منداحة على سجيتها
| |
|
|
|
|
|
|
|
|
|
Re: قصيدة ساهلة سهولية جد (Re: mohammed alfadla)
|
ألأخ / محمد الفاضل
لك التحية على هذه القطعة الجميلة
اسمح لي أن أهديك قطعة أخرى جميله
اسكندرية .. زمن بعيد ... لكنه جميل ... ليتنى استطيع ان اعيد البعض منه
ليتنى استطيع ان اسمعه يلقى للرائع ايوب مصطفى (وانجا) مرة اخرى
ليتنى استطيع ان اسمعه و (شهيق)
لك الود محمد صالح
كتب محمد صالح
غناوى بسيطه للحرية
بيقول .....................
تعالوا نغنى غناوى بسيطه تعلن حبنا للحرية
نقيف فى صف
صفنا واحد
مافى واحد فينا يكون الاول .. وواحد فينا يكون الطيش
كل واحد فينا .. يقول كلماته .. يعبر عنها دون تعقيد
خلوا الطفله..
تجرى
تلعب
تكب الوانا فوق فستانا
اخر الكره حترسم لوحه جميله شديد
نزرع شتله
جنب النيل
تبدا تشيل
نمسح بصمه
وبصمه
وبصمه
عشان الكل يعرف يقرا
نتناقش وتطلع فكره
عشان الحب يكون فى الكل
عشان الخبز يكون للكل
عشان السلم يكوون للكل
عشان الفرح يكوون للكل
لك كل الود محمد الفاضل
| |
|
|
|
|
|
|
|
|
 Re: قصيدة ساهلة سهولية جد (Re: mohammed alfadla)
|
رائـــــــــــــــــــع يا محمد
عزيزي اريد ان اسالك سؤالا قبل عدد من السنين اتى لى بعض الاصدقاء بقصيدة يقول مطلعها يا ساكن الفجر البعيد قول للأسى يمسح مساحات المساء ويسكن مسامات الجليد وقد قمت بتلحينها فى ذلك الوقت( النصف الاول من التسعينات هل هى لك ؟ وإن كانت كذلك هل استطيع ان توافينى بالنص كاملا؟ خالص التحية.
| |
|
|
|
|
|
|
|
|
|
Re: قصيدة ساهلة سهولية جد (Re: altahir_2)
|
يا ضيااااااء
ياخ معقولة
هولندا كيف
وأخبارك شنو
هو أنا ذااااتي يا ضياء
لكن القصيدة غطاهاالزمن بغباره ،نسيتها يا صاحبي
البركة في الجزء الأول الذي تم تلحينه
وافينا بأخبارك
أنا أفتقد ذلك الزمن الجميل
| |
|
|
|
|
|
|
| |
mohammed alfadla
shawgi badri
Rawia
Walid Safwat
الطيب برير يوسف
عوض الله الفولانى
altahir_2
فيس بوك
تويتر
انستقرام
يوتيوب
بنتيريست