|
|
 سيرة مدينة:...البركس.........1985..(اشباح7-up)
|
بحثت عليك في عيون الناس الحياري
حافية القدمين فتارا
من شمس الظهيرة تتضارا
كل ساعات نهارا
بحثت عليك في عيون الناس وعيوني
رحت
الازقة ..الحواري ..المدارس
الطرق ..الساحات
المدن القديمة
بحثت عليك
جوة احساس الزمن الناس
اخر الليل مع بسمة النجوم
وكت تتلاقي الانفاس
شابيت ... لي قدام
هاتيت ...ناجيت
عشان القاك
اواي شيء يوصلني اليك
بتمناك
عانيت ..ما مليت
في محطات القطر
الوجوه الشاحبة
اعياها السفر
مريت
فتشت عليك
ما خليت
القاعات
النشاط
اي شيء يهديني اليك
اخر شيء ما فكرت فيهو
دواخلي ..لقيتك جوة .
جوة في اعماقي سويتلك
بيت
مشيت
الطرقات الحنينة .. الاركان الحزينة
سألت عليك بحر الجبل
لضفاف النيل رحت اسأل
ما خليت جريد النخل
ولا نجوم الليل
كل الشاهدين للحكاوي
حتي حبات المطر
كان عندي امل القاك
او حتي عنوان عشان ليك اصل
قلبت في الدفاتر القديمة
الزكريات الدفينة
لم اجد
عنوان
تلفون
صندوق بريد
اي حد سألتو عليك
ما اداني اجابة وافية
ولا حقيقة وين مشيت
مريت بالمحطات . المدرجات . البنشات
الميدان الشرقي . الغربي
في كل ساحة الوجوه اتغيرت
والابنية اتحولت
والاسامي اتأسلمت
ترهاقا العظيم صار ابو دجانة
الفرع ملتقي الحلوين
صارت النيلين
ما لينا كلام في النيل
رغم نكران الجميل
عفواً يا اولاد النيل
في لحظة الزكريات اتحولت
النشاط
الكان عامر بالاخوان
غشاه الخراب
السمبر.الغراب
الوجوه تعبانة .. حيرانة
ارهقها الترغب والانتظار
الكل في احتضار
حتي الحدائق
جار عليها الزمن صارت يباب
كساها الاصفرار
المساء مشيت سينما ءالنيل
الازرق زمان
الاسم تغير
لا يوجد عنوان ولا مكان
المكان الكان زمان يعج بالنشاط
نام في سبات
سالت واحد رد علي باختصار قال انت من اهل الكهف
ما سمعت بالمشروع الحضاري الكشة والطواري
لدهشتي ما قدرت اداري
سالت دمعة من عيني
تذكرت الجلسات .. الامسيات
الحسان .. الغيد
رايحات جايات الاخوة والضحكات
حتي الاركان
البنشات
الجلسات
قالو من سكات
دي فيها خدش للحياء العام
عملو نظام عام
احياناً عام نظام
نحنا واقفين
في انتظام
مر عام وراه عام
حتي وصلنا خمسة عشرة عام
وما فقنا من الدهشة
كلو تمام حاجة تمام
اه من الالام
والسلام عليك يا بلدي السلام
جكو*
***********
*شاعر مجهول من شعراء7-up....الغرفة سبعة الطابق الرابع فى داخلية القاش..او(مغارة الاشباح)
|
|
 
|
|
|
|
adil amin
فيس بوك
تويتر
انستقرام
يوتيوب
بنتيريست