|
|
 البنسلين يا تمرجي .....
|
اتساءل دوما عن اصل كلمة تمرجي – تومرجي – و هل هي من الكلمات التركية
التي وجدت طريقها الى عاميتنا....
و اتساءل ايضا عن صحة كتابتها؛ و هل الاصح ان تكتب تمرجي ام تومرجي ؟
المهم ......
عمنا رآشد كان طبيبا نابها – رحمه الله – و عوض شبابه الجنة – فقد كان
من اميز الاطباء في زمانه.
حكى لنا يوما عن موقف مر به؛ و ترك في نفسه و شخصيته اثرا لا يمحى ...
فقد ذكر لنا انه و في اثناء تأديته فترة الشدة بأحد اقاليم السودان النائية – لا اذكرها
تحديدا – أن اتى اليه من يعاني من كسر مركب في ساقه الشمال. لم يكن بالمستشفى – حينها – غيره
و غير عم التوم الباشتمرجي.
بدأ عم التوم كعادته في مثل هذه الحالات في احضار الجبس و الشاش و خلط الجبس
بالماء لاجراء اللازم....
اسرع د. رآشد – رحمه الله – بايقاف عم التوم قائلا له بأن هذه مهمته و انه سوف
يقوم بها شخصيا ؛ شاكرا له مبادرته.
ظن د. راشد – رحمه الله – ان الامر بسيطا كما يبدو ..... و ان ما درسه في كلية الطب
كافيا ليصنع خلطة جبسية تفي بأكثر من اللازم ...
ترك عم التوم صحن الجبس – لعله قدح – لدكتور رآشد – رحمه الله – الذي شمر عن
ساعديه و بدأ في الخلط و اضافة الماء و العجن .... و المريض يتأوه !!
بعدما فرغ مما ظنه خلطة مناسبة؛ بدأ في وضعها على ساق المريض محاولا تثبيتها؛
فإذا بها تنزلق من الجهتين.
فأعاد الخلط مرة اخرى باضافة المزيد من الجبس سعيا وراء المزيد من التماسك؛
و عند محاولة التثبيت الثانية بدت الخلطة كقالب طوب من شدة صلابتها.... لذا اضطر
لاضافة الماء مرة اخرى ..... و هكذا بين اضافة ماء و زيادة جبس انقضي نصف اليوم
..... و المريض ما زال يتأوه .... و د. رآشد – رحمه الله – لا يريد الاقرار بفشله
في صنع الخلطة و الجبيرة المناسبة.
اخيراً و بعدما تصبب منه العرق و اتسخ قميصه الابيض و تلطخ بنطلونه بالجبس؛
نظر لعم التوم نظرة رجاء دون ان ينبس ببنت شفة.
تحرك عم التوم من كنبته – متثاقلا – اذ كان يراقب ما يحدث متعجبا؛ و بدأ في عمله
الذي يحذق؛ و في خلال دقيقتين كان قد صنع الخلطة المناسبة و ثبتها في ساق المريض
الشمال؛ الذي تنفس الصعداء هو و د. راشد – رحمه الله-
من يومها تغيرت نظرة د. راشد – رحمه الله – لعم التوم و كل التمرجية؛ و كثيرا
ما سمعناه يدندن بالاغنية الدكاكينية – التي راجت حين من الدهر –
البنسلين يا تمرجي خلو الحكيم يا تمورجي .... الخ ...
اضافة لابد منها :
لعل كلمة حكيم اجمل و اشمل و اوقع من دكتور او طبيب ....
و ليت استخدامها يعود و يطغى مرة اخرى ....
|
|
 
|
|
|
|
|
|
|
|
Re: البنسلين يا تمرجي ..... (Re: Hussein Mallasi)
|
و الله البوست دا مزعلني زعل ...
اجتهدتا فيهو اجتهاد ... الا انه لم ليأت لي بزائر واحد ....
شنو يا جماعة ... الاحباط عندكم و الله ....
و لو الاسم ما ناسبكم نغيرو للانسيولين يا تمرجي ....
مشكلة مفتعلة لله يا محسنين .. عسى ان تاتي لنا بزوار و مشاركين
| |
|
|
|
|
|
|
|
|
|
Re: البنسلين يا تمرجي ..... (Re: Elkalakla_sanga3at)
|
العزيز إبن العزيز
حسين ملاسي
سلام كبير أوي
كلمة تمرجي كلمة تركية
( تمر ) مشتقة من تتمير .. و هو ترتيب الشيء و تنظيمه و تنظيفه و العناية به
و الحرفين (جي) هما حرفين للدلالة للإنتساب كما في كلمة ( عربجي ) ( جزمجي ) ( بوهيجي ) ( أجزجي و هو الصيدلي ) و هلم جرا ..
هناك كلمات تركية كثيرة دخلت قاموسنا السوداني مثال :
شفخانة ( شفاء خانة )
أدبخانة ( أدب خانة )
جبخانة
سلخانة
كرخانة
في مصر بقيت كلمات تركية مثل :
سلاحدار
كتبخانة
خانكة
و شكرا على الموضوع الجميل
تسلم
حاشية : هل لا زلت تزور عطبرة أم إنقطعت عنها كما فعلت أنا بفعل ( قصر مدة الإجازات ؟ )
| |
|
|
|
|
|
|
|
|
|
Re: البنسلين يا تمرجي ..... (Re: ابو جهينة)
|
الخال ابو جهينة
تحياتي و احترامي ياخي
و الله الله جابك لي ياخي ....لانو مشتاقين جدا و عشان اسألك كرخانة دي بالضبط معناها شنو ...
يعني كلمة كعبة و لا كويسة و لا شنو بالضبط .. لانو في زول كدا قادينا بيها ...
عطبرة لي منها عشرات السنين – كدت اقول مئات - انقطعت منها تماما؛ و من غيرها ....
اصبحت اسيراً ما بين بحري و امدرمان .. و في الاجازة اكتر مكان ممكن تلقاني فيهو هو كوبري شمبات؛
اما ذاهباً او قادما من امدرمان ... بكون شغال بالطريقة دي اليوم كلو ... التقول سايق لي امجاد .....
و اتمنى ان نلتقي قريبا ..
| |
|
|
|
|
|
|
|
|
|
Re: البنسلين يا تمرجي ..... (Re: Elkalakla_sanga3at)
|
اخونا صنقعت
جبر الله بخاطرك .. تعرف البوست الذي يسقط في غياهب النسيان دون أي مشاركة ؛
يشبة ذلك الذي يرفت بعد ان يسقط في جميع المواد ........ اخير مشاركة مشاركتين كدا ...
و احتال الزول يباصي في الملاحق ...
| |
|
|
|
|
|
|
|
|
|
Re: البنسلين يا تمرجي ..... (Re: Munir)
|
تحياتي يا منير
المشكلة كلا الضابطين – الكلية و الجربندية – شايفين نفسهم احسن مننا
و يخيل لي؛ و بعد ان اعملت تفكرى؛ ان كلمية ملكية التي يُوصف بها المدنيون
يقصِد بها العسكريون تحقيرهم و الله اعلم ....
بس فعلا الجربندية احسن من الكلية في معظم الحالات
| |
|
|
|
|
|
|
|
|
 Re: البنسلين يا تمرجي ..... (Re: Hussein Mallasi)
|
يا ملاسي هاك القصة دي عن أغنية البنسلين
قالوا في بيت مأتم جاء واحد مولانا دقنو طويلة وجلابيتو قصيرة وبعد ما أدي الواجب شبك ليك الشباب القاعدين في بيت البكا وعظ وإرشاد.....ولما جاء وقت صلاة المغرب طبعا ما كان ممكن يقدموا غيرو للصلاة بالجماعة....لكن بعد الصلاة مباشرة مولانا موبايلو ضرب...تعرف النغمة كانت شنو؟ البنسلين يا تمرجي.. جيبو الحكيم يا تمرجي.....................الرجل شعر بالإحراج وختف تلفونو و..عظم الله أجركم يا جماعة...و فللي
| |
|
|
|
|
|
|
|
|
|
Re: البنسلين يا تمرجي ..... (Re: Osama Mirghani)
|
سلام يا اسامة
تصدق الاسبوع الفات؛ و في احد المجمعات التجارية الكبيرة ؛ كان يصلي بجانبي احد اعمامنا السودانيين، راجل محترم تمام و مالي مركزو .. المهم اثناء الصلاة برضو بدأ موبايلو يرسل في نغمات اغنية سودانية خفيفة باصرار عجيب ؛ فقد نسيه مفتوحاً... كاد عمنا هذا ان يقطع الصلاة من الاحراج .... المهم بعد الصلاة مباشرة التقينا في المصعد و كان يتحدث مع ابنه / ابنته في البيت و هو يرتجف من الغضب:
انا مش قلت ليكم 100 مرة موبايلي دا مافي زول يشيلو ... و يفتحو ...
و كمان ما لقيتو غير الاغنية السخيفة دي تنزلوها و تبرمجوهو عليها ؟؟
و مش قلت ليكم مافي زول فيكم يضرب لي وقت الصلاه ... اها دايرن شنو ؟
ثم التفت الىّ قائلا: بالله شوف جنس الاولاد ديل
فرردت عليه بصوت خافت لا يكاد يسمع : ديل اولاد مخترمين فعلا .....
| |
|
|
|
|
|
|
|
|
|
Re: البنسلين يا تمرجي ..... (Re: Hussein Mallasi)
|
العسل فى العتاقى
شوفتا كيف يا ود الخالة بوستك حتل ورجع منور قوى
حكاية التلفون والاغانى الهابطة
بالمناسبة دى فاصل غنائى
ابوى قال لى ما تغنى غنى هابط اغنى غنى هابط عشان اشاغل الضابط
جد الضباط ديل عندهم هيبة وجد كلمة فلان دا مدنى دا للاحتقار والتصغير ما شايف امريكا كلو ما يقبضو رهينة تقول دا مدنى ساكت وتخليهم يضبحوه...
عارف قصة الاطفال البيغيرو النغمات دى طوالى حاصلة عندنا وطوالى بتحرج الزول و كان فى جمع غفير محترم..
فاصل آخر
البنسلين يا تمرجى نادو الحكيم
| |
|
|
|
|
|
|
|
|
|
Re: البنسلين يا تمرجي ..... (Re: bayan)
|
عزيزي حسين
تحية كبيرة
كرخانة تعني مكان يجمع الساقطات ( مع الإعتذار للقراء و القارئات ) .
و في تفسير آخر .. يقال أنه مكان يختبيء فيه المرابون لتسليف المحتاجين بالربا أو بإستباحة النساء.
و الله أعلم.
أرقد عافية و لي قدام
| |
|
|
|
|
|
|
| |
Hussein Mallasi
Munir
Elkalakla_sanga3at
ابو جهينة
Osama Mirghani
bayan
أبوالزفت
فيس بوك
تويتر
انستقرام
يوتيوب
بنتيريست