نعم اليوم اول ايام الشهر المبارك وصاحبنا سيد جرسة كانت الساعات الاولى لاستقبال رمضان تؤرقه وهو قبل بوم منكب على الرموت كنترول يغازل القنوات الفضائية مع العلم بأن الشهر قد اكمل 30 يوما واصبح يوم الجمعه اول ايام رمضان الا ان سيد جرسة تفائل ان يجد قناة تقول ان رمضان يوم السبت وما كان منه الا ان قفل الرموت بعد ان تأكد من صحة رمضان وخرج الى الشارع وبادره الجميع بمباركة رمضان وهم يعلمون ان سيد جرسة فى حالة صعبة خصوصا قبل الصيام وكعادته تحرك نحو فرن العيش ولم يحد شىء وكانت اول بروفة محطاته فى الجرسة وعندما زهج صبى الفرن من كلامه وفلسفته التى تقول ان الرغيف والعيش هما اسم لشىء واحد فلماذا تقول الحكومة(مادايرن قبمح فينا عيشنا براه بكفينا) وطبعا الكلام ده اصبح فى اضابير الانقاذ وسيد جرسة يخاطب العمال اللذين تهاتفوا عليه ليستمتعوا بقفشاته واحد من العمال قال ليه يا سيد جرسة انت البلد ده راس منو ماعارفين البشير والله مبارك الفاضل سيد جرسة استغرب من سؤاله وقال ليه شوف يا زول انا ما بهمنى الريس منو لو البشير والله برانكنيرو البحلنى من صيام رمضان ده شنو وضحك الجميع سأل عن مواعيد خروج العيش من الفرن لانو باكر رمضان واحد من العمال قال ليه يا سيد جرسة نحن باكر ما بنصوم يعنى الا نشوف الشهر عديل لكن حكاية ثبتوه ده ما معانا والله انت رايك شنو سيد جرسة الكلام ده عجبه وداير يلقى ليه فتوه علشان يجوز الكلام ده ودخل ليك مع الزول فى جدل بيزنطى واخر الموضوع حضر صبى الفرن وعرف بالحاصل وقبل على سيد جرسة وقال ليه تعرق يا جرسة اصلو الذى ولدنا الشغالين معانا فى الفرن ديل لو ما شافوا الشهر مابصومه وديل طبعا قبيلة معروفة فى السودان وانته يا جرسة لو داير تأخر صيامك ابقى مع الناس ديل لكن من باكر بد ما تقول عليك سيد جرسة بنغير اسمك الى (حاجو جرسة) ابتسم سيد جرسة والتفت الى صبى الفرن قائلا رمضان وعرفناه باكر وكمان داير تغير لى اسمى وكمان بدل تقول (دادى جرسة ) داير تمرر على الحاجو جرسة . ده العب غيره حرم فى جماعه وكمان مسئولين زمان تلقاهم الا يشفواالشهر ويصوموا لكن حسه وقالوا من يوم عيونهم بقوا لمن يشفوا ابوعلوه ينوا على الصيام لا يا اخوى خلينى مع سيد جرسة وشوف لينا العيش كمان نقوم نتكلم اكتر من كده ناس امريكا يقول عليى جنجويد وناس الحكومة يلحقونا قطر التفجيرات وصاح سيد جرسة يا اولاد اهم شىء العيش يكون مقمر وسخن علشان ساندوش السحور بتاع المربة يكون تمام وتحرك سيد جرسة الى دكان الحى وهاك يا مربة وجبنة ومكرونه وشعيرية وطبق بيض اصلو الزول ده انته عارفنه بيأكل بعيونه وما تنسوا ده البروفات لسه ما دخلنا معاه فى نهار الصيام نواصل
10-15-2004, 09:56 AM
Dr. Moiz Bakhiet Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: وعندما زهج صبى الفرن من كلامه وفلسفته التى تقول ان الرغيف والعيش هما اسم لشىء واحد،
اتنين اتغالطو في إسم الرغيف.. الأول قال إسمو «رقيف».. أما الثاني فقال: ليس إسمه «رقيف» بل اسمه «رخيف».. ولما اشتد الغلاط بينهم قررا الإحتكام لدى صاحب الفرن فقالو له: ما هذا الذي تبيعه.. هل هو «رقيف» أم «رخيف».. قال لهم: ده؟ قالو نعم.. فقال لهم بعجب: ده اييس..
10-15-2004, 04:02 PM
Raja Raja
تاريخ التسجيل: 05-19-2002
مجموع المشاركات: 16054
صحى سيد جرسة من النوم على انعكاس اشعة الشمس على صنيته التى لم يتناول منها شىء ولم يجد غير ان يجر رجيله ليستلقى على المحطة الثانية داخل الغرفة وهى عنقريب هبابى ذو تكيف مركزى ماركة (دومة)وهاك يا نومه حتى لسعته اشعة الشمس النافذه الى الباب وحينها تحرك وفى باله الكثير وما وقع نظره على الصينية وهو خارج من الغرفه طاح بها فى الهواء واتى من كان فى البيت مسرعا لسماعه اصوات تكسر الاوانى الزجاجية ولسوء حظه كانت حبوبته احد الحضور واخذت تلومه فى فعلته التى لا يمكن ان تحصل من صايم وما ان سمع كلمة صايم بدا فى الصياح وارقى وازبد وحبوبته تتندر على ضياع الكورة التى شربت منها اول جرعة لبن لترشها على زوجها على حسب عادة ذالك الزمان واستقل سيد جرسة موضوع ذكرى زواج حبوبته ليضمن عودة الصفاء وتذكر ان الصباح اول ايام رمضان واكراميات حبويته كم يتنظرها بترقب شديد وانتهى الامر باندياح الحبوبة فى ذكريات زواجها وقبولها اعتزار سيد جرسة ونظر الى الساعة وتذكر اجتماع لجنة افطار الحى وهو سكرتيرها فتحرك صوب الاجتماع وفى باله الكبابى المرصوصة على الترابيز وتراميس الشاى والقهوة ولكن ما ان وصل وجد اغلبية اعضاء اللجنة او لنقل مجلس الحكماء يقضون فى نوم عميق وبادره واحد منهم (رمضان كريم ) وانتهى حلمه لحظتها وبدأ الاجتماع والجميع يتفاكرون فى كيفية جمع اهل الحى فى مائدة واحدة واستمر الاجتماع على نهج نوعية مثل هذه الاجتماعات وما ان فتح باب النقاش تقدم سيد جرسة وكان حديثه ينصب فى نوعية الاكل والشراب الذى سوف يقدم فى الافطارات وقسم اهل الحى الى لجان وكل لجنة مهمتها احضار نوع معين من الاكل او الشراب ولاحظ الحضور ان سيد جرسة يتفنن فى الحديث مما جعل ريقهم يسيل مع كلماته التى تخرج لتدخل فى البلعوم وتخرج عن طريق الامعاء الغليظة اى ان نظريته مبنية على (رب صائم ليس من صيامه الا الجوع والعطش )وتفرق المجلس . اول محطات سيد جرسة كانت الفرن ووجد العمال نائمون على طاولات العيش الخشبية وبعضهم يلعب الكوشتينة وحين نظر الى الفرن الحديدى وهو يعض فى نوم عميق تذكر سخانته التى كانت تلفحه وهو منكب على الصوانى ليختار العيش المقمر ولكن هيهات وجرر رجليه ليجلس بالقرب من الكوشتينة وهو فى صمت تام الى ان بدأ احد العمال فى مداعبته وليته لم يفعلها صاح سيد جرسة بصوت عالى (انته ما بتحرتموا رمضان انته مفتكرين انو رمضان معناه تخلوا شغلكم وتلعبوا لى فى الكوشتينة انا عارفكم لمن نجى نقول دايرين عيش بعد شوية (ويقصد زمن الافطار) نضيع وقتنا معاكم وتخلونا نطلع من هدومنا .عالم ما بتحس عالم عقولها ذى دقيق الفينى ومجموعة العمال تتفرج على جرسة وهو يؤدى ادواره ببطولة مستحقة. محطته الثانية كانت فى منتصف النهار وهى كشك الجرائد وحينها وجد ضالته المنشودة وما ان تناول اول صحيفة وجد بالخط العريض
Quote: مشاريع لمنظمة اغنام من أجل الاطفال بدارفور
Quote: اعلنت السيدة / باتريشيا رئيسة منظمة أغنام من أجل الأطفال عن اقامة مشاريع مستدامة للمجتمعات الأكثر حوجة في شمال دارفور والتي تشمل تقديم اكثر من الف رأس من الماعز وتركيب 20 مضخة يدوية لتوفير مياه صالحة للشرب للأطفال وناشدت لدى حديثها في منبر سونا اليوم الأفراد والمنظمات والمؤسسات للمساهمة في برامج المنظمة وذكرت باتريشيا أن المنظمة اقامت شراكة جديدة مع جمعية اسبانا ( spana ) وهي جمعية لحماية الحيوان وتهدف الشراكة إلى حماية الحيوانات داخل المعسكرات بدارفور وتقديم خدمات بيطرية في القرى مستقبلاً للحفاظ على صحة الحيوان. واضافت أنها خلال زيارتها إلى دارفور قدمت أكثر من مائة رأس ماعز للأسر في قرية جوقو جوقو موضحة أن جملة المبالغ التي جمعتها المنظمة العام السابق ومولت بها المشاريع بلغت 100 ألف جنيه
وثار سيد جرسه وهو يرمى بالجريده على الكشك وهو يقول بالله شوف الناس ديل طلعوا القمر انا ماعارف كيف حسه عليك الله ذى الخواجيه ده بدل ما تجيب معاه من فرنسا علب لبن فورمست على الاقل تساعد اهل الاطفال ديل فى السحور تقوم تجيب ليهم غنم وكمان تعالوا شفوا الغنم ده اصلو ما سمعنا بيها جابوها بالمطار الا تكون لمتها من غنم المحلية ومساكين غنم المقرن من شوارع الزلط ونجلية 6 ابريل الى ضريسة الرمال وموية الحفير عليكم الله حسه الفرنساوية ده بصحها وكمان قالت جاية تعمل حماية للحيوانات فى دارفور والله ده كلام عجيب عرفنا البشر بعملوا ليهم حماية وعمنا كولينا باول ما قصر حرم ومعاه حاج كوفتى عنان خلوا ليك الحكومة تتجرس وفات جرستى فى رمضان لكن بالله الخواجات ديل قصدنا معاهم شنو لكن ما قلتوا لى ياجماعة الغنم ده اوعه تكون ما طعموها من الجنون لانو خايف بعد ايام تقوم اذاعة لندن تقول (ظهور حالات جنون الغنم فى دارفور ) وتعال يا حظر على اللحوم السودانية بينى وبينكم احسن على الاقل فى رمضان ده نقدر نستمتع بلحوم غنمنا شوية وطبعا الجماعة الواقفين فى الكشك واحد قدر افتح خشمه مافى بس استماع وسيد جرسة ذى استاذ الرياضيات يحلل فى نظرية فيثاغروس وقبل سيد جرسه على الجزارين واسعار اللحوم المرتفعة والتى اصبح المواطنين يتعاملون معها بنظرية دكان اليمانية زمان والتى تقوم على (يوم واحد يأكل اللحمة والاخر يشرب الشوربة ) وارتاح الجماعة من سيد جرسة حين وقفت عربة احد اصدقائه ليطلب منه الذهاب معه الى السوق الشعبى لشراء بعض الاشياء وطبعا هنا فيلم اخر نواصل -----
دكتور معز استاذى رجاء حضوركم يعطينى مزيدا من الاندياح مع سيد جرسة لكم كثير الشكر وقبول الصيام وشكرا يا بروف على على النكته الرمضانية على منوال الزميلة زوله 123 ما تنسى انو فيها رغيف وده واحد من دوافع سيد جرسة فى رمضان لفقده اثناء النهار
تحياتى
10-17-2004, 02:08 PM
Raja Raja
تاريخ التسجيل: 05-19-2002
مجموع المشاركات: 16054
سيد جرسة مع احداث دارفور تأثر كثيرا واصبح بدون عمل بعد ان كان احد رواد شوارع الخرطوم وصاحب اشهر خرتايه(مفرش للبضاعه) تفنن تجار الفرش فى تصميمه وهو عباره عن قطعة من الدموريةأو المشمع يتم تفصيلها على شكل هندسى (معين) على ان تكون دائرية فى حالة حضور الكشه لتحتفظ بكل البضاعه فى بطنها ومعلوم ان احداث دارفور كانت وابل من نار على عدد كبير من تجار الخرتيات وسيد جرسة يتذكر تلك الايام ويحكى لصاحبه بتاع عربة امجاد الذى يجلس معه على كرسى الشهيد وكما نعرف كان فى طريقها الى السوق الشعبى ومعروف انه من اكثر الناس خوفا من امجاد ولكن مع رمضان لا يبالى بشىء وكل همه ان ينتهى النهار سريعا وانتهز صاحبه الفرصى ليحكى له عن عمله الذى اصبح ينصب فى نظرية الجنجويد لكن طبعا جنجويد حناكيش حملوا الخرتايات بديلا للكلاشات وتجولوا فى شوارع السوق العربى وما ذنب لهم الا ان لعنة الجنجويد قد اصابتهم فأصبحوا يبحثون عن ترويج بضاعتهم فى اسواق الاطراف مثل سوق سته بالحاج يوسف وسوق اطلع بره بمحلية الكلالكة وسوق عرب مافى نيفاشا بامدرمان وسوق ام دفسوا بالثورات وسوق العزبة ببحرى وبينى وبينكم بعد ذهاب هؤلاء التجار الى هذه الاسواق اصبحوا جنجويد عديل طبعا الكلام ده ما جبته انا ده كلام الامم المتحدة والرواية لسيد جرسة . وتذكر مرة انه كان يفرش بالقرب من الجامع الكبير وكانت البضاعه عباره عن فرش معجون وصابون يعنى من نوع البضاعه الممكن تقع بسبب الكشه وبينما هو ينادى (كل حاجة بالف ) داهمتهم الكشه واصبح غاب قوسين او ادنى من الوقوع فى الشرك وحاول كغيره ان يجعل من خرتايته برشود لتساعده على الهروب ولكن بقت عليه حكاية (الشقى يلقى فى الفشفاش عضم) فعلقت بضاعته فى مصرف المياه وما كان منه الا ان دفع بالبضاعه الى المصرف ونثر الخرتاية كالشراع ومد يديه وبحركات معلم ( كل شىء لله الحسنه ده لله ) وعند وقوف البوليس امامه دنكل الشحده وبصوت عالى ( الجكه لله الكشه ده لله الجريه ده لله ) واحتار العسكرى فى امره وتركه ضاحكا طبعا كان محظوظ لانو زوله كان من جماعة الماركة المسجلة كاكى ابودقن كان حقه راح اصلو ذى ديل اهمه شىء تجيهم على هواهم وبعد هدوء الاحوال اصبحت البروشتات تهبط بالرجال على ساحة شارع الاسلفت وسارت الامور وسيد جرسه كان قد تفنن فى اختيار مكان ديلوكس وهو بالقرب من حمامات الجامع الكبير الاستثمارية والتى كتب عليها بالخط العريض (الحمام للرجال 500 جنيه الحمام النسائى 500 جنيه جلسة 300 جنيه على الماشى 200 جنيه يا جماعه ما تقول الكلام ده انا الفته لكن ممكن تقولى لى اجر المجتهد فى تفسير ما يكتب على حمامات الحكومة المنشره فى السوق العربى واجمل مافيها وجود المساويك للاهل العوض والمعجون للفرد واذا كان الداخل الى الحمام شركه قابض من ميدان ابوجنزير يمكن له ان يشترى ما يريد من جميع الملابس بالقرب من الحمام يعنى ممكن نقول عليه (حمام سياحى) وبرضو الناس تقول علينا نحنا ما دخلنا العولمة بالله فى عولمة اكتر من كده .
سيد جرسة شعر بلسانه يكاد ان يصل الى جيب الساعه من العطش وطلب من صاحبه الوقوف على اقرب مزيرة فى الشارع وما ان رأى مزيرة فى شارع الصناعات ضرب على باب العربة وقبل ان تقف العربة نطه من الشباك محتضنا المزيره وادخل يديه فى جيبه ليخرج منديله وقد تعجب صاحبه من ذالك فالمنديل اصبح يتسلسل بين يديه حتى انقلب الى ملاية وما كان من صاحبه الا ان قال له ده شنو يا سيد جرسة كمان جاى بملايتك على بالحرام ده هندى ما عملها وكمان بقيت حاوى. تحركت العربه وسيد جرسه يلف الملايه حول راسه وفى صمت تام حتى السواق الشعبى ووكانت هنالك فى العربة صحيفة يومية وفى حركة حلزونية تناولها ووجد بالخط العريض نواصل ---
تخريمه رمضانية رجاء
رمضان الدور ده فى الخرطوم جنس جرسة مع تحياتى
10-21-2004, 01:07 AM
brakat brakat
تاريخ التسجيل: 02-04-2002
مجموع المشاركات: 247
سيد جرسة لم يكن خلال الايام التى اختفى فيها فى وعيه انتابته حالة من جنون الجرسة الحردرديه وتفسيرها كما جاء فى مؤلف رمضان بين الحرمر والدرد كما نعلم ان الحلومر مفعول بواسطة كان واخواتها والحلومر من اسمه نجد ان يجمع مابين الحلاوة والمرارة والحلاوة كناية عن استشراق شهر رمضان وهو ما يدل على قدومة والدليل اختفاء جوالات الخيش لاتمام عملية وقد يسأل احدهم بما ان الزريعه تدخل فى مكونات المريسة والبغنية فعليه يجب امتناع الصايم عن تناول الحلومر بغية اتقاء الشبهات وطبعا الحديث مازال لسيد جرسة وعندما تدخل احدهم وطلب من سيد جرسة عدم الخلط بين الزريعة الرمضانية وغيرها ولحسن فال السائل كان جرسة قد وصل الى زروة التعب فما كان منه الا ان رد عليه والله انته انا ماعارف حكايتكم شنو كل شىء اصبح من ضمن مشروعكم الحضارى وكمان حسه داير تتكلم عن اسملة الزريعة بالله شوف الناس ديل وعاد سيد جرسة الى فلسفته التى تتملكه خلال رمضان ليقول حتى لا نطلع بره الموضوع تعالوا اتم ليكم باقى (الحلو- مر) والحلو يتمثل فى لون الزرية والذى كم غنى لها الشعراء ومثال لذالك كما يقول شاعرنا الحرعريان فى قصيدته توالى المتوالى =
اخضر انت فى قدومك للاوطان ومصفر ان تواليت مع الاخوان وكالزريعة لونا ان خاطبت الكيمان
وهذا مثال قصد منه الافاضة فى الشرح اما بالنسبة للشق الثانى وهو (مر) وعندما وصل سيد جرسة الى كلمة الشق التانى تذكر اللحمة بشقيها ومع الجوعة التى نزلت عليه خرج عن النص واصبح يتكلم عن اللحمة واسعارها التى اصبحت تختلف باختلاف المكان والزمان وكمان اخيرا جابوا لنا مصطلح اخر الا وهو الاتفاقية الحصرية وقبل يومين لزوم عيون اولاد بمبا الغيت الاتفاقية الحصرية واعيد التصدير مرة اخرى وانا بصراحة ما زعلان من اولاد بمبا علشان يصدروا ليهم اللحمه لكن الممجننى الناس الواقفين امام القنصلية المصرية المجاورة لزنك الخرطوم للخضار والفاكهه سابقا لزوم التاشيره ووالغريب اولاد بمبة يدخلوا السودان برا وجوا زى ما دايرن ما انته كلكلم عارفين الحريات الاربعة لكن علينا نحن السودانيين سفر مافى الا اذا اطلت الوقوف امام المساطب واستسلمت الى الشمس وانت واقف ومن ثم يتم ادخالك فى راكوبة خضراء بالمشع الليبى معروشه وبالعساكر محروسه وطبعا الحواجز الحديدة مرصوصة واهم شىء تتحمل مضايقات رجال الشرطة وهم يشاركوك ضل الراكوبة وفى حالة استلام جواز السفر عليك الحضور بعد خمس ايام والانتظار بالقرب من القنصلية وووووووو ويا جماعة ليه بس كده المصريين ديل ادخلوا بلدنا ويتاجروا ويتمتلكوا ويقيموا وكمان حسه عليكم الله فى الجوعه ده لو كان خلوا لينا بطون خرفان التصدير ما كان الناس عملوا بيها كمونية لزوم الفطور لكن حرم الخروف قالوا فاقد الصوف بسفروه والبقر بلبيسه كعب لزوم المحافظة على كوارعه و الناس ديل بعرفوا كويس ايه معنى اللحمة واتفرج على اللحمة السودانية وهى تقضى رمضان فى بطون الشتات بمصر وده البهمنى غايتوا موضوع (الحلومر) ده لولا الصيام كان عملته فيه مقالات طيب نرجع الى معنى كلمة (مر) والمر هو سائل يتكون فى كيس يستقر فى تجويف بطون الانعام ويكون مرفوع بالسلسلةالفقرية للخروف ومشدود ببوز الفشفاش وفى حالة سكون بالكبد وكما يقول الشاعر ابوغازى التيسى مر انت فى كلماتك
ان ابتسمت يخال لنا تفجرت مرارتك وان ضحكته بان بين شللافيك فشفاشك وان وجدناك مبتسم كالباسم تزين افطارك من اراد القرب منك فماعليه الا ان يكثر من ام فتفت امعاءك
سيد جرسة اعزروه فلقد اخذ منه العطش الكثير والجوع وغيابه كان بسبب سخونة الخرطوم وحر الدرد وهو يعرفه اهل الزراعة بأنه ينضج العيش يعنى بعد الخريف طبعا انا قاصد عيش الحب مش عيش الرغيف وما زالت تداعيات السخانه متواصلة لليوم السابع على التوالى وهذا مؤشر الى ارتفاع درجات سيد جرسة فى معدلاته مما يجعله كثير الهضربة فأعزروه ان غاب او كان كثير الكلام وليكم السلام
سيد جرسة لم يكن خلال الايام التى اختفى فيها فى وعيه انتابته حالة من جنون الجرسة الحردرديه وتفسيرها كما جاء فى مؤلف رمضان بين الحرمر والدرد كما نعلم ان الحلومر مفعول بواسطة كان واخواتها والحلومر من اسمه نجد ان يجمع مابين الحلاوة والمرارة والحلاوة كناية عن استشراق شهر رمضان وهو ما يدل على قدومة والدليل اختفاء جوالات الخيش لاتمام عملية وقد يسأل احدهم بما ان الزريعه تدخل فى مكونات المريسة والبغنية فعليه يجب امتناع الصايم عن تناول الحلومر بغية اتقاء الشبهات وطبعا الحديث مازال لسيد جرسة وعندما تدخل احدهم وطلب من سيد جرسة عدم الخلط بين الزريعة الرمضانية وغيرها ولحسن فال السائل كان جرسة قد وصل الى زروة التعب فما كان منه الا ان رد عليه والله انته انا ماعارف حكايتكم شنو كل شىء اصبح من ضمن مشروعكم الحضارى وكمان حسه داير تتكلم عن اسملة الزريعة بالله شوف الناس ديل وعاد سيد جرسة الى فلسفته التى تتملكه خلال رمضان ليقول حتى لا نطلع بره الموضوع تعالوا اتم ليكم باقى (الحلو- مر) والحلو يتمثل فى لون الزرية والذى كم غنى لها الشعراء ومثال لذالك كما يقول شاعرنا الحرعريان فى قصيدته توالى المتوالى =
اخضر انت فى قدومك للاوطان ومصفر ان تواليت مع الاخوان وكالزريعة لونا ان خاطبت الكيمان
وهذا مثال قصد منه الافاضة فى الشرح اما بالنسبة للشق الثانى وهو (مر) وعندما وصل سيد جرسة الى كلمة الشق التانى تذكر اللحمة بشقيها ومع الجوعة التى نزلت عليه خرج عن النص واصبح يتكلم عن اللحمة واسعارها التى اصبحت تختلف باختلاف المكان والزمان وكمان اخيرا جابوا لنا مصطلح اخر الا وهو الاتفاقية الحصرية وقبل يومين لزوم عيون اولاد بمبا الغيت الاتفاقية الحصرية واعيد التصدير مرة اخرى وانا بصراحة ما زعلان من اولاد بمبا علشان يصدروا ليهم اللحمه لكن الممجننى الناس الواقفين امام القنصلية المصرية المجاورة لزنك الخرطوم للخضار والفاكهه سابقا لزوم التاشيره ووالغريب اولاد بمبة يدخلوا السودان برا وجوا زى ما دايرن ما انته كلكلم عارفين الحريات الاربعة لكن علينا نحن السودانيين سفر مافى الا اذا اطلت الوقوف امام المساطب واستسلمت الى الشمس وانت واقف ومن ثم يتم ادخالك فى راكوبة خضراء بالمشع الليبى معروشه وبالعساكر محروسه وطبعا الحواجز الحديدة مرصوصة واهم شىء تتحمل مضايقات رجال الشرطة وهم يشاركوك ضل الراكوبة وفى حالة استلام جواز السفر عليك الحضور بعد خمس ايام والانتظار بالقرب من القنصلية وووووووو ويا جماعة ليه بس كده المصريين ديل ادخلوا بلدنا ويتاجروا ويتمتلكوا ويقيموا وكمان حسه عليكم الله فى الجوعه ده لو كان خلوا لينا بطون خرفان التصدير ما كان الناس عملوا بيها كمونية لزوم الفطور لكن حرم الخروف قالوا فاقد الصوف بسفروه والبقر بلبيسه كعب لزوم المحافظة على كوارعه و الناس ديل بعرفوا كويس ايه معنى اللحمة واتفرج على اللحمة السودانية وهى تقضى رمضان فى بطون الشتات بمصر وده البهمنى غايتوا موضوع (الحلومر) ده لولا الصيام كان عملته فيه مقالات طيب نرجع الى معنى كلمة (مر) والمر هو سائل يتكون فى كيس يستقر فى تجويف بطون الانعام ويكون مرفوع بالسلسلةالفقرية للخروف ومشدود ببوز الفشفاش وفى حالة سكون بالكبد وكما يقول الشاعر ابوغازى التيسى مر انت فى كلماتك
ان ابتسمت يخال لنا تفجرت مرارتك وان ضحكته بان بين شللافيك فشفاشك وان وجدناك مبتسم كالباسم تزين افطارك من اراد القرب منك فماعليه الا ان يكثر من ام فتفت امعاءك
سيد جرسة اعزروه فلقد اخذ منه العطش الكثير والجوع وغيابه كان بسبب سخونة الخرطوم وحر الدرد وهو يعرفه اهل الزراعة بأنه ينضج العيش يعنى بعد الخريف طبعا انا قاصد عيش الحب مش عيش الرغيف وما زالت تداعيات السخانه متواصلة لليوم السابع على التوالى وهذا مؤشر الى ارتفاع درجات سيد جرسة فى معدلاته مما يجعله كثير الهضربة فأعزروه ان غاب او كان كثير الكلام وليكم السلام
سيد جرسة واليوم الجمعه وبرغم سهر ليل الخميس املا ان يحتفظ بدرجة زيرو من السهر لتمكنه من مواصلة النوم حتى موعد صلاة الجمعة ولكن تأتى الهيئة القومية للكهرباء لتقدم عرض مسرحيتها ( الجمرة الخبيثة) التى تصيب القلوب بالزبحه والشريان بالانسداد وتغلب الملاريا الى تايفود وحتى ننتعرض بالنقد للمسرحية دعونا ندع سيد جرسة يقيم لنا المسرحية وهو من المتأثرين بدخول الجمرة الخبيثة. بعد ان توسد عنقريبه المميز داخل موقعه الرمضانى الا ان عرض مسرحية الجمره الخبثة فجأة بداعرضها مما حدى بزولنا صرف كثير من الرشتات للجماعه ديل ناسيا ماضيه معهم وقد كان دخول الجمرة الخبيثة وابل عليه فقد على اثرها وظيفته حيث كان فى الماضى من المستفدين من التجوال بفواتير الكهرباء يعنى يا جماعة موظف قدر هدومه وله مواقف طريفه ومازالت روشتات جرسه لا تجد من يصرفها له وعندما تعب لجأ الى شلة الشجرة التى كانت تقبع فى البنابر ذدوات الارجل الاسكيموية وكان لا يحب الجلوس معهم نسبة للتوتر الذى يصيبه من افعالهم معه ولكن لا خيار فعمل بنظرية ان كتبت لك رشتة دواء فعليك بايجاد البديل مع مرعاة سياسة الاقساط التى تريح الجيب ولكنها قد تنخر فى الجسد وحتى لا تتوه مع لقاط الكلام ده كده نخلى سيد جرسة يجكى لينا عن ايام الكهرباء بعداده والناس كيف مؤدباه ايام كنا نطرد الباعوض بجهاز الكهرباء وناس اذاعة امدرمان وتلفزيون السودان مش مجروس السودان ايام نميرى ودوشكة السودان ايام الانقاذ يتفننوا فى البكاء والشكوى لدعوة المواطنين لدفع ما عليهم من فواتير بالله شفوا العز ده كيف وبرغم من انو العدادات القديمة كانت مفوته لكن كانت برضو مريحانه واحلف قسم استاذنا وردى لمن كان بغنى ويقول ( الحنينة السكره كان قاصد العدادات ) يا ناس ما تفتكروا انا قاصد عدادات الحفلات وطبعا ده لسيد جرسة معاه مواقف ومحطات وسندات وامكن يومها اجىء سيد جرسة انداح فى الحكاوى واتذكر كلب حاجة السره السكاه من ابروف الى الهجرة محطة القراشات وقال اصلو الحصل انو ضرب باب بيت حاجه السره داير يقرا العداد ويسلم الفاتورة والجيران نصحوه بوجود الكلب ولكن عمل اضان الحامل طرشه واقتحم بيت السره ليستقبله كلبها وهاك يا جرسة سيد جرسة يتحرك كلب السره اقفل الدفنس كويس - يتراجع وكلب السره يعمل هجمه مرتده - والمباراة حامية الوطيس وانتهى الشوط الاول بالتعادل وفى مجريات الشوط القانى تحرك سيد جرسة بكره ليفتح بها الميدان وكلب السره من خلفه يريد تعطيله الا ان مراوغة سيد جرسة بقفذف الفواتير كانت سبب فى خروجه من عضة مضمونه وسيد جرسة يعلق ما ذى ناس هو هو هو هو والقوووووووووووووووون انته الزول ده فات امريكا قلنا اجى نترتاح من الكواريك يتاعته شوية لكن لا جديد انا ما عارف المعلقين السودانيين ديل الواحد التقول لمن يمحتونه بكون راكب حمار وبيقول المعاه كزاز وفى موقف كروى ظريف لواحد من اخوانا المعلقين الرياضين لمن كان فى امريكا وبيعلق على المباارة والمشكلة نحنا بنعاين فى التلفزيون وشايفين الاعبين بس زولنا ده بيطبخ فى الاسماء التقول بيعمل فى حلة ويكة ولمن غلطاته كترت الزول قال الروب عديل وقال ( يا جماعة حكاية الاسماء ونطقها الصحيح ده ما مشكلة المهم انتو شايفين وكمان المثل بيقول (هذا اسم اعجمى فالعب به ) وموقف اخر وهو دخوله بيت عزابة لقراءة العداد ولاحظ سيد جرسة عدم تحرك مؤشر العداد الا انه بعد الالتفات الى من خلفه وجد مجموعة من الملاكمين وهى ترتدى الزى الرسمى وبلع سؤاله وبدلا ان يقدم ليهم الفاتورة اعطاهم كل الفواتير طالبا منهم مساعدته فى توزيعها على الجيران والزول اتخارج ولاحظت ان سيد جرسة قد بدا فى صب المياه على هدومه واحد من شلة الشجرة قال ليه ليه رايك شنو فى النظام الجديد للكهرباء وقبل ان يتم سؤاله دخل سيد جرسه بدون تابلت وقال زمان ذى ما قال الفنان حمد الريح( نحن الفوق فى عزنا قبائل ما تهزنا ) ده كان حالنا مع العداد القديم يجوكم فى البيت ويسلمومكم الفواتير وينتظروكم لمن تجوا تدفعوا ولمن خلاص ناس الكهرباء يزهجوا يحركوا تيم القطوعات وطبعا فى هذه الحالة ما على العاقل الا التحوط ببعض الجنيهات مع العلم ان تيم القطوعات كان يراعى الكثير من الحالات لكن حسه النظام المكاوى الجديد ما بدى فرصة وانا المزعلنى قوة عين الناس ديل يجوك فى البيت ويشيلوا عدادك القديم رجالة كده ويركبوا ليك عدادهم السمح شكله والمسيخ طبعه وامشوا ويتبرعوا ليك ب 30 كتر كهرباء وضحك سيد جرسة عندها والله انا المحيرنى انو ناس القماش فى السوق بقوا شغالين بالقطعه حتى الجلايب بقت بالمقطع اجوا ناس الكهرباء ديل يعملوا لينا الكهرباء بالمتر والله الواحد لمن يشوف مبنى وزارة الكهرباء وعماراتهم الجميله ده يقول الناس ديل مفروض يكونوا مع العولمة وينسوا حكاية الكهرباء ابو متر لانو الموضوع ده مزعلنى شديد والله لو كانوا عملوها بالوزن كانت مقبولة مهضومة . ويا جماعة الفطور قرب وجمعة السودان الليلة شمسها متبرجه وذى ما قال عادل امام (ماشيه بدون هدوم) وسيد جرسة فى هذه اللحظات ممنوع من الصرف الصحى بحجة عدم دفع الاقساط الشهرية للخطة السكانية للعام 1991 لنا المجارى اما ناس الاراضى ديل خلوا حكايتهم ده ما موضوعها تانى وداير سيد جرسة الساعه وحده ونص بتوقيت السودان وواحد يهبشه فيها . نواصل
10-22-2004, 08:51 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة واليوم الجمعه وبرغم سهر ليل الخميس املا ان يحتفظ بدرجة زيرو من السهر لتمكنه من مواصلة النوم حتى موعد صلاة الجمعة ولكن تأتى الهيئة القومية للكهرباء لتقدم عرض مسرحيتها ( الجمرة الخبيثة) التى تصيب القلوب بالزبحه والشريان بالانسداد وتغلب الملاريا الى تايفود وحتى ننتعرض بالنقد للمسرحية دعونا ندع سيد جرسة يقيم لنا المسرحية وهو من المتأثرين بدخول الجمرة الخبيثة. بعد ان توسد عنقريبه المميز داخل موقعه الرمضانى الا ان عرض مسرحية الجمره الخبثة فجأة بداعرضها مما حدى بزولنا صرف كثير من الرشتات للجماعه ديل ناسيا ماضيه معهم وقد كان دخول الجمرة الخبيثة وابل عليه فقد على اثرها وظيفته حيث كان فى الماضى من المستفدين من التجوال بفواتير الكهرباء يعنى يا جماعة موظف قدر هدومه وله مواقف طريفه ومازالت روشتات جرسه لا تجد من يصرفها له وعندما تعب لجأ الى شلة الشجرة التى كانت تقبع فى البنابر ذدوات الارجل الاسكيموية وكان لا يحب الجلوس معهم نسبة للتوتر الذى يصيبه من افعالهم معه ولكن لا خيار فعمل بنظرية ان كتبت لك رشتة دواء فعليك بايجاد البديل مع مرعاة سياسة الاقساط التى تريح الجيب ولكنها قد تنخر فى الجسد وحتى لا تتوه مع لقاط الكلام ده كده نخلى سيد جرسة يجكى لينا عن ايام الكهرباء بعداده والناس كيف مؤدباه ايام كنا نطرد الباعوض بجهاز الكهرباء وناس اذاعة امدرمان وتلفزيون السودان مش مجروس السودان ايام نميرى ودوشكة السودان ايام الانقاذ يتفننوا فى البكاء والشكوى لدعوة المواطنين لدفع ما عليهم من فواتير بالله شفوا العز ده كيف وبرغم من انو العدادات القديمة كانت مفوته لكن كانت برضو مريحانه واحلف قسم استاذنا وردى لمن كان بغنى ويقول ( الحنينة السكره كان قاصد العدادات ) يا ناس ما تفتكروا انا قاصد عدادات الحفلات وطبعا ده لسيد جرسة معاه مواقف ومحطات وسندات وامكن يومها اجىء سيد جرسة انداح فى الحكاوى واتذكر كلب حاجة السره السكاه من ابروف الى الهجرة محطة القراشات وقال اصلو الحصل انو ضرب باب بيت حاجه السره داير يقرا العداد ويسلم الفاتورة والجيران نصحوه بوجود الكلب ولكن عمل اضان الحامل طرشه واقتحم بيت السره ليستقبله كلبها وهاك يا جرسة سيد جرسة يتحرك كلب السره اقفل الدفنس كويس - يتراجع وكلب السره يعمل هجمه مرتده - والمباراة حامية الوطيس وانتهى الشوط الاول بالتعادل وفى مجريات الشوط القانى تحرك سيد جرسة بكره ليفتح بها الميدان وكلب السره من خلفه يريد تعطيله الا ان مراوغة سيد جرسة بقفذف الفواتير كانت سبب فى خروجه من عضة مضمونه وسيد جرسة يعلق ما ذى ناس هو هو هو هو والقوووووووووووووووون انته الزول ده فات امريكا قلنا اجى نترتاح من الكواريك يتاعته شوية لكن لا جديد انا ما عارف المعلقين السودانيين ديل الواحد التقول لمن يمحتونه بكون راكب حمار وبيقول المعاه كزاز وفى موقف كروى ظريف لواحد من اخوانا المعلقين الرياضين لمن كان فى امريكا وبيعلق على المباارة والمشكلة نحنا بنعاين فى التلفزيون وشايفين الاعبين بس زولنا ده بيطبخ فى الاسماء التقول بيعمل فى حلة ويكة ولمن غلطاته كترت الزول قال الروب عديل وقال ( يا جماعة حكاية الاسماء ونطقها الصحيح ده ما مشكلة المهم انتو شايفين وكمان المثل بيقول (هذا اسم اعجمى فالعب به ) وموقف اخر وهو دخوله بيت عزابة لقراءة العداد ولاحظ سيد جرسة عدم تحرك مؤشر العداد الا انه بعد الالتفات الى من خلفه وجد مجموعة من الملاكمين وهى ترتدى الزى الرسمى وبلع سؤاله وبدلا ان يقدم ليهم الفاتورة اعطاهم كل الفواتير طالبا منهم مساعدته فى توزيعها على الجيران والزول اتخارج ولاحظت ان سيد جرسة قد بدا فى صب المياه على هدومه واحد من شلة الشجرة قال ليه ليه رايك شنو فى النظام الجديد للكهرباء وقبل ان يتم سؤاله دخل سيد جرسه بدون تابلت وقال زمان ذى ما قال الفنان حمد الريح( نحن الفوق فى عزنا قبائل ما تهزنا ) ده كان حالنا مع العداد القديم يجوكم فى البيت ويسلمومكم الفواتير وينتظروكم لمن تجوا تدفعوا ولمن خلاص ناس الكهرباء يزهجوا يحركوا تيم القطوعات وطبعا فى هذه الحالة ما على العاقل الا التحوط ببعض الجنيهات مع العلم ان تيم القطوعات كان يراعى الكثير من الحالات لكن حسه النظام المكاوى الجديد ما بدى فرصة وانا المزعلنى قوة عين الناس ديل يجوك فى البيت ويشيلوا عدادك القديم رجالة كده ويركبوا ليك عدادهم السمح شكله والمسيخ طبعه وامشوا ويتبرعوا ليك ب 30 كتر كهرباء وضحك سيد جرسة عندها والله انا المحيرنى انو ناس القماش فى السوق بقوا شغالين بالقطعه حتى الجلايب بقت بالمقطع اجوا ناس الكهرباء ديل يعملوا لينا الكهرباء بالمتر والله الواحد لمن يشوف مبنى وزارة الكهرباء وعماراتهم الجميله ده يقول الناس ديل مفروض يكونوا مع العولمة وينسوا حكاية الكهرباء ابو متر لانو الموضوع ده مزعلنى شديد والله لو كانوا عملوها بالوزن كانت مقبولة مهضومة . ويا جماعة الفطور قرب وجمعة السودان الليلة شمسها متبرجه وذى ما قال عادل امام (ماشيه بدون هدوم) وسيد جرسة فى هذه اللحظات ممنوع من الصرف الصحى بحجة عدم دفع الاقساط الشهرية للخطة السكانية للعام 1991 لنا المجارى اما ناس الاراضى ديل خلوا حكايتهم ده ما موضوعها تانى وداير سيد جرسة الساعه وحده ونص بتوقيت السودان وواحد يهبشه فيها . نواصل
10-23-2004, 09:29 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة مع ايام الشهر المعظم وبعد مرور 10 ايام وقف امام دولابه واخذ يبحث بين الجيوب لعله يجدما يضمن له فرتيت (قروش) للافطار ولكن هيأت واصبحت حالته الماليه فى رحمة بنك السودان وما عليه فى مثل هذه الحالة الا توفيق اوضاعه الماليه او تغير اسمع الى (جرسة اسلمك) مثل تلك البنوك التى وفقت اوضاعها على منوال المشروع الحضارى وما كان من بنك المزراع الذى لهطه ابان كروش ودقون وفى اخرالمطاف اصبح اسمه (بنك المزارع الاسلامى ) شطف سيد جرسه الهواء حتى انتفخت خياشميه واصبح يهذى ويقول. طيب عرفنا بنك فيصل الاسلامى وده اصلو مولود شرعى للجماعه وكمان عمارتهم قريبة من السفارة الامريكية وده المحيرنى ولمن البنك اتلهط مجلس ادارته لجأ الى قفل الشارع بحجة توفير الحماية للسفارة الامريكية والناس القيافه صدفوا الفيلم لكن انا لو سألتنونى بيقول ليكم اصلو قفل الشارع المقصود منه حماية البنك من عملائه اللذين كانوا يمتلكون حسابات جارية وبعد الانشطار الرمضانى الشهير جمدوا ليهم ارصدتهم ولانو العملاء ديل ذى ال كابونى قالوا احسن يعملوا حسابهم طيب امكن واحد منك يقول لى عرفته كيف اجاوب ليه ,يا حدق علشان تعرف سياسة البلد ماعليك الا توفير نصف جنيه سودانى . وبعد حفر السلاح الشهيره والشولات التى كانت تخزن بها تأكد لى ان ازمة الخيش فى البلد كانت نتيجة تخزين السلاح وعلشان السلاح الشفناه ده الناس ديل قفلوا شارع على عبد اللطيف المهم ده مجرد تحليل لجرسة اسملك .تعرفوا يا ناس انا اتفاقية السلام ده العجبنى فيها بالحيل رجوع الجنيه السودانى الى حالته بعد التوقيع وذى ما قلت ليكم اشترى صحيفة الدار اليومية وستجد كل ما تريده وما لا تريده وعلى فكرة الجريدة ده انا ماعارف حكايته ايه كل يوم من الصباح جايبن لينا صورة عروس قتيله اوعريس مطعون الظاهر الناس ديل محررهم شغال فى استديو كوش الامدرمانى الشهير لتصوير العرسان وبينى وبينكم انا ذاتى بقت خايف يوم اشترى الجريدة القى صورتى والحمدالله اصلو المدام مافى بس مشكلتى مع الاسنديو ده اول ما فتوحه كانت الصور مجانى على فكرة جريدة الدار اصبحت تحتل موقعها بين اكياس ا لخضار واللحمة وطبعا ده للاسر الراقيه لكن للذينا نحن ناس عشرة بقرش بنشترى الجريدة علشان عنوانه واللبيب بلاشارة يفهم وبعدين اهل الدار ديل اكتر حاجة فالحين فيها فلان عرس وليلة الدخلة كانت اخر ايامه - وشاب يحلم بامتلاك الديجتال فيؤدى الى فقد حياته نتيجة تأثره بضربة عكاظ مضبب على راسه من صاحب دكان بسوق 6 بالحاج يوسف وتعالوا شفوا بقية الاخبار .اكتشاف جثة غامضة فى خيران السوق العربى - الطبيب الشرعى يؤكد وفاة المجنى عليه نتيجة كتم النفس - القتيل كان يهوى المظاهرات - مصدر امنى يؤكد عدم القاء علبة بنبان بالجدول لحظات وجود القتيل - اكتشاف انبوبة غاز فى المجرى المجار لمكان الجثة وبعد التحرى تأكد ان القتيل كان نائما فى مجرى رقم 10 واثناء ذالك تعرضت نسوان الشاى الى كشه صباحية مما حدى بأحد البائعات قذف الانبوبة فى المجرى وكانت النتيجة اختناق المجنى عليه والله انا ده كله ما همانى بس المجننى الشماسة ديل تانى ينموا وين والمشكلة البرد فى الطريق . غايتو يا ناس عدم الشغل مصيبة وانا ماعارف باقى رمضان ده اقضيه كيف وبينما سيد جرسة فى مناجاته ظهرت له جريدة يومية وعليها وظائف .تناولها دون ان يعرف تاريخها وكان مكتوب عليه (شركة بترولية ترغب فى تعين عمال مهره طبعا سيد جرسه على طول على الشركة واول ما وصل الاستقبال وهو داخل موظف الاستقبال قال ليه (ماشى وين يا شيخنا)وهاك يا سؤال واستفسار وفى النهاية خلاه يدخل الشركة وطلب منه الحضور للمعاينة ومتابعة الصحف اليومية لمعرفة ذالك جرسة لمن لقى الموضوع مطرشق والكندشه مرطبه عمل زوغان وترطيبه وعند صلاة الظهر ذهب واستقل الموقف بعد الصلاة واستلم المايك واصبح يخطب عن التكافل والتكاتف الاسلامى بس والله النفعه انو مطلع كويس على الجرائد وخاصة بوجود مكتبة بالقرب من بيته وصاحبها يشترط عليك استضافة الجريدة بمبلغ مائة جنيه على ان ترجعها بعد نصف ساعة ومن ثم لك الحق فى استضافة جريدة اخرى الا جريدة الراى العام طبعاصاحبها مفتح وانته عارفنه علشام الجرايد ما ترجع ليه اصبح يدبس الجريده وما يستلمها الا مدبسه يعنى القراء الغلابه يكتفوا بالتغزل فى الصفحة الاولى وهكذا دواليك وده اصبحت سياسة القراء الغلابة ما ده اصلو حال البلد محل الكريمات الحريمية عامل يافطه(قدر ظروفك )وبتاع الجزارة عمل ليه صرة فيها حجر بساوى ربع الربع وبتاع الاجزخانه تعود ان يفتح اغلفة الدواء ليعطيك (مشى امورك) ولو عندك حقن احسن حاجة تجىء جاهز وبالمرة تتطعن وكمان بتاع الاتصالات بقى يتعامل بالثانية وبتاع المغلق اصبح يكوم التراب وكسار المزايكو متوفر لمن يريد ان يحول ارضية حمامه الى طراز حديث ولا ننسى حتى جرادل البوماستيك اصبحت متوفرة ولكنها لا تصلح الا لمن هو فنان تشكيلى نتيجة خلط بقايا كل الالوان فى جردل واحد والبلد اصبح المواطنين الشرفاء يتعاملون بنظرية (قدر ظروفك وكفى - والصبر مفتاح الفرج - والزول مابموت الا بيومه - انسى الفطور لضمان وجبة العشاء - استقل الحافلة الملاينة لتقف بالباب لزوم الترشيد) معليش يا جماعة جرسة اعذروه اليوم مسخن . عند منتصف الليل وسيد جرسه يتصفح الجرائد وجد هذا الخبر
Quote: السودان يحتفل بذكرى انشاء الأمم المتحدة الخرطوم في 22/10(سونا) يحتفل السودان بعد غد الاحد الرابع والعشرين من اكتوبر بالذكرى "59" لانشاء الأمم المتحدة والذي يقام تحت شعار ثقافة السلام ، وسيخاطب الاحتفال وزير الخارجية ووالي الخرطوم والممثل المقيم للامم المتحدة وقال د. مصطفى عثمان اسماعيل وزير الخارجية في تصريح ( لسونا) أن الاحتفال سيقوم في الأساس على أهمية تطوير هياكل الأمم المتحدة لتكون أكثر ديمقراطية وعدالة ولا تعطي الرسالة الخاطئة التي تعطيها الآن بأنها تركز على بعض القضايا وتقف عاجزة عن معالجة قضايا أخرى. واضاف أن الامم المتحدة لكي تؤدي دورها لابد ان تكون أكثر تمثيلاًُ للشعوب. واشار إلى عجز المنظمة الدولية فيما يتعلق بقضايا العراق وفلسطين وعدم قدرتها على فرض قراراتها على اسرائيل وعلى الولايات المتحدة موضحاً أن المعايير المزدوجة ستكون شعار خطاب السودان في الاحتفال بالعيد الـ 59 للأمم المتحدة
علق على ذالك بعد ان دلف الى جك المديده وفعل فيه ما يفعله ديك المسلمية فى العده ومدد رجيله وقال انته يا ناس الخبر ده عجيب عليك الله ده حسه كلام ناس الامم المتحده مقبلين على الحكومه لمن جابت الدهن واجوا يحتفلوا بيها والله كان كده جرسة سيد جرسة تعتبر ايجابيه بفعل الناس ديل نواصل
10-25-2004, 07:30 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
رمضان فوق صفيح ساخن وسيد جرسة اصبح يرى نفسه فى كثيرا من الناس وبينما هو مستلقى على عنقريبه الهبابى استعدادا للافطار تعود ان يغازل اذاعة لندن وطبعا هو من المعجبين بها واكتر حاجة بتريحه لمن يكون قاعد على الشارع ويشوف ليه واحد معلق راديو بشرط ناشونال بانسونيك وكمان لونه بنى وما اكثر اللذين يحملونه وكلما مر به واحد تذكر ايام ترمس كبكبى وعجوة انا ماعارف الناس ديل مشوا وين حرم زمان شوارع امدرمان ده الجماعه حايمين فيها بالجرادل ذى الركشات وكمان بتاع الدردمه البيكون دافر قدامه عربية خشب وفى منتصفها صفيحة جبنة فاضية وبشرط مسقره وعلى جنباته بقجه من الملابس الباليه ولازم يكون فى غطى بايده واخر حاجة كوريك صغيرونى او حنكوشى لملأ قراقير البسكويت التى اصبح لونها بمبى نتيجة الاتربة والعواصف الترابية وعلشان ما واحد يقول لى انت قصدك ايه انا يا ناس ما تمشوا بعيد بس ما وقفقكم الا كلامى ده (الاتربة- والعواصف الترابية )ماالبلد فيها (المؤتمر الوطنى -والمؤتمر الشعبى ) وكمان (اتحادى قومى - اتحادى متوالى )(امه قومى - امه متوالى ) اضافة الى حركات متشعبة وانا كان على حقوا يعملوا ليها خطوط مرور سياسيه حتى تساعد الطالع والنازل الى خط اخر وتصورا فى مثل هذه الحاله انو الواحد يمشى يقيف فى ميدان الحركة السياسى السفرى ويلقى مسجل الخطوط يكوريك( شعبية حركة حره * بجاوية حركة * دارفورية حركة * جنوبية - حركة *كردفانية حركة * وفى المستقبل سوق يتم فتح خط شمالية * حركة وكمان جزيرة حركة وووووووو سيد جرسه فجأة وعلى مزلقان الراديو سمع اغنية سودانية على ال اف ام وعلى طول طلع من الهلوسة البيعمل فيها وقال يا سلام على ناس لندن وقبل ان يتم كلامه سمع ليك صوت ما بغبابه (هنا اذاعة مانجو )احتار وقعد يفكر ده شنو كمان عرفنااذاعة سوا سوا - كمان جاتنا اذاعة مانقو وضحك وهو يتذكر ويردد فى القولد التقيت بالصديق وهو خير صديق كم اكلته معه الكبيده الزول يا جماعه افتكر انو الاذاعة اسمها منقو بالله شوف الزول القديم ده بينما اسمها (مانجو ) طبعا لقى ليه موضوع جديد لكن قبل ان يتعامل معه سمع صوت الاذان ونسبة لكمية العطش الذى يتملكه بعد ان قرطع كل الماء وقبل ان يختم الاذان كان قد مر على اكثر من افطار للجيران وانتهى به الامر بالصلاة على المسجد . وبعد الافطار وراحة التامة رجع الى اذاعة مانجو اصلو انا الزول الوحيد البجيب ليك اصله بتاعت منو خاصة والله عامة وطنية والله شعبية متواليه والله قومية كده استنوا الصباح بوريكم كل شىء عنها شايف صحن اللقمه بعاين لى وسلطة الروب بتحمر لى وصحن البلية قاعد مستنينى جنب رجلى اه بشفوك يا فرد نواصل
10-25-2004, 08:32 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
رمضان فوق صفيح ساخن وسيد جرسة اصبح يرى نفسه فى كثيرا من الناس وبينما هو مستلقى على عنقريبه الهبابى استعدادا للافطار تعود ان يغازل اذاعة لندن وطبعا هو من المعجبين بها واكتر حاجة بتريحه لمن يكون قاعد على الشارع ويشوف ليه واحد معلق راديو بشرط ناشونال بانسونيك وكمان لونه بنى وما اكثر اللذين يحملونه وكلما مر به واحد تذكر ايام ترمس كبكبى وعجوة انا ماعارف الناس ديل مشوا وين حرم زمان شوارع امدرمان ده الجماعه حايمين فيها بالجرادل ذى الركشات وكمان بتاع الدردمه البيكون دافر قدامه عربية خشب وفى منتصفها صفيحة جبنة فاضية وبشرط مسقره وعلى جنباته بقجه من الملابس الباليه ولازم يكون فى غطى بايده واخر حاجة كوريك صغيرونى او حنكوشى لملأ قراقير البسكويت التى اصبح لونها بمبى نتيجة الاتربة والعواصف الترابية وعلشان ما واحد يقول لى انت قصدك ايه انا يا ناس ما تمشوا بعيد بس ما وقفقكم الا كلامى ده (الاتربة- والعواصف الترابية )ماالبلد فيها (المؤتمر الوطنى -والمؤتمر الشعبى ) وكمان (اتحادى قومى - اتحادى متوالى )(امه قومى - امه متوالى ) اضافة الى حركات متشعبة وانا كان على حقوا يعملوا ليها خطوط مرور سياسيه حتى تساعد الطالع والنازل الى خط اخر وتصورا فى مثل هذه الحاله انو الواحد يمشى يقيف فى ميدان الحركة السياسى السفرى ويلقى مسجل الخطوط يكوريك( شعبية حركة حره * بجاوية حركة * دارفورية حركة * جنوبية - حركة *كردفانية حركة * وفى المستقبل سوق يتم فتح خط شمالية * حركة وكمان جزيرة حركة وووووووو سيد جرسه فجأة وعلى مزلقان الراديو سمع اغنية سودانية على ال اف ام وعلى طول طلع من الهلوسة البيعمل فيها وقال يا سلام على ناس لندن وقبل ان يتم كلامه سمع ليك صوت ما بغبابه (هنا اذاعة مانجو )احتار وقعد يفكر ده شنو كمان عرفنااذاعة سوا سوا - كمان جاتنا اذاعة مانقو وضحك وهو يتذكر ويردد فى القولد التقيت بالصديق وهو خير صديق كم اكلته معه الكبيده الزول يا جماعه افتكر انو الاذاعة اسمها منقو بالله شوف الزول القديم ده بينما اسمها (مانجو ) طبعا لقى ليه موضوع جديد لكن قبل ان يتعامل معه سمع صوت الاذان ونسبة لكمية العطش الذى يتملكه بعد ان قرطع كل الماء وقبل ان يختم الاذان كان قد مر على اكثر من افطار للجيران وانتهى به الامر بالصلاة على المسجد . وبعد الافطار وراحة التامة رجع الى اذاعة مانجو اصلو انا الزول الوحيد البجيب ليك اصله بتاعت منو خاصة والله عامة وطنية والله شعبية متواليه والله قومية كده استنوا الصباح بوريكم كل شىء عنها شايف صحن اللقمه بعاين لى وسلطة الروب بتحمر لى وصحن البلية قاعد مستنينى جنب رجلى اه بشفوك يا فرد نواصل
10-26-2004, 09:50 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة مع اطلالة يوم جديد اصبحت حالته تكفى عن السؤال ولو قدر ان ذهب الى دكتور لكانت النتيجة الرقده بالمستشفى مع ستارة حمراء وبينى وبينكم يا حليل زمن السترات الحمراء زمن الزول العيان كان علشان يموت لازم يمر بعدة مطبات اولها العملية وان كتب له الخروج من التانتنوس لاصبح معرض الى نسيان شاشة فى موضع العملية والموت كان زمان الا بعد رفع التابلت اى رفع الستاره الحمراء لكن حسه بدقه دقه سريعه وكمان ناس سوداتل ما قصروا وياما الجرائد بتاعت زمان كانت بتقول الصاح واذكر مرة قريت فى جريدة انو فى واحد عملو ليه عمليه بتاعت لحمية وبعد الخروج من غرفة الانعاش انتكس وما كان من الطبيب الا ان ادخله مرة اخرى بعد تورم البطن لدرجةانو فى واحد خفير وهو على النقالة للعملية قال للناس االدافرينه يا جماعه ما تستعجلوا اخصائى التوليد ضرب تلفون قال بتأخر شوية وماان تم فتح البطن كانت التنيجة وجود طفل على هيئة شاش طبى شبيه بمعروضات متحف الشمع بتاع الانجليز وما تنسو الزول الفات يعمل عملية ازالة كلية وكانت النتيجة خروج الكية الاصلية يعنى الزول بمفهومى انا بشابه لى الزول الفات للحلاق وطلب نمرة 2 لكن اخونا الحلاق دقس وكانت النتيجة نمرة 3 وكمان معاه خلف . موضوع العلاج ده ياما فيه العجب ما كمان يظهر لى واحد يقول انا بقيت ذى انور عكاشة ويقوم يطلعنى من المله انا قاصد (العجب بتاع الفاضل سعيد ) لانو لو قلت العجب بتاع المريخ حرم تاج السر يلحقنى ليك ببوست من النوع الهيثمى وكمان ماداير ازعل حبينا راكوبة افتكر كده احسن طيب نرجع لموضعنا الاساسى بتاع اذاعة مانجو نبدأ ليكم بكلام الجرائد اصلو الحدودة بتقول انو الاذاعه ده بتاعت ثلاثة شبان واحد مدير خريج 1999 بتاع كمبويتر مان واسمه زاهر تاج الدين اجمد دنقلاوى اصيل وبتاع الصحيفة من اول سؤال اتهمه ليك بالعمالة الوطنية يعنى الاذاعة ده بتاعت منظمات دولية ولها مارب سياسى اخونا المدير فته وقال بالواضح انو ومعاه اتنين من الزملاء (احمد المصطفى على –مكى ابراهيم ) هم اصحاب الاذاعة والاذاعة تعتمد على عائدات النفط عزرا عائدات المانجو الصحفى غايتو اكله ورماه ليك بواحدة تانية طيب الاذاعة ده المرجعية بتاعته لمنو الزول ما قلته ليكم طلع تفتيحه وشبه اذاعته بمنت كارو وباقى الكلام بتاع اكيد اى زول بقدر يتمه بس عجبنا اخر سؤال عن الدافع من الاسم المدير الهمام جاوب وقال اصلو نحنا كنا دايرين نسميها اذاعة دومه لكن وجدنا المانجو احلى وفعلا ما احلاه لكن لو كانوا سموها اذاعة دومه كان مع قضية دارفور ده جابت ليهم الهوى يقوم مجلس الامن يبحث عن اسم الاذاعة وطبعا دومه ابوها دلدوم ويقول عليها ده اذاعه جنجويد لو ده حصل كانت حسه من ضمن بنود مباحثان ابوجا لكن المنقه خارجتم وصمت سيد جرسة لينرم لون المنقه الشاسل المنقه ماعارف كيف نحنا بنشقى لكن كده نجى لشمارات الخرطوم والكلام طبعا ما بحتوه حت وبدقوه وبغربلوه والحكاية بتقول انو الاذاعة بتاعت وزير المالية صاحب نظرية الاقتصاد الحر الودانا فى دهاية ليوم الليلة المهم الاذاعة يا ناس انا ماداير احكم عليها بس على الجميع يفتوشها فى (الاف ام ) وحتى الوصف يكون دقيق بقول اركب المؤشر وحول الموجه الى شارع الاف ام اتجه من اليمين الى الشمال بتلقاها محشورة بين مونت كارلو واذاعة لندن بالله شفته العمولمة ده. موضوع العلاج سيد جرسة عنده فيه رأى عديل وهو من رواد سوق ام دفسو ورواكيب سوق ابوزيد يعنى عديل بتاع فقره (فكى ) وده موضوع تانى وتعالوا باكر نشوف تجربة جرسة مع الناس ديل لدرجة انو اصبح يدعى العلاج بالاعشاب وحاجات تانية بس كده نخليها لوقتها نواصل -------- تخريمه انته عارفين سيد جرسه ده بيكون فى بيات شتوى وما يظهر الا فى رمضان استحملوه
10-27-2004, 10:14 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة بعد ان امتلأت معدته بكل انواع العصائر والمأكولات وكان افطارا من الافطارات الرمضانية التى تقيمها مؤسسة خد هات والصدفة جعلت من سيد جرسة ضيفا بحكم مروره على مكان الافطار ولفت نظره تلكم الملابس البيضاء والعمم التوتليه والملافح التى تتدلى على الدقون شعر بضعف شخصيته حينها وانطبق عليه قول الشيخ فرح ود تكتوك حين اتى مدعوا وكان يبلس ملابس قديمه فما كان من اصحاب الدعوة الا ان زجروه ليخرج مسرعا ويعود فى ملابس اخرى وما ان وطأت اقدامه مكان الدعوة اصبح الجميع يتهاتفون على ضيافته ولكنه حيت جلس على منضدة الاكل قال قولته المشهورة اكل يا كمى قبل فمى ولكن سيد جرسة كما تعرفونه حين اذن الاذان اصبح فمه يلامس كمه وهو يطحن فى الجداد الكويتى وضأن مزارع الباقير والذى يكتب على عربات ترحيله من التسمين الى مسلخ غناوة والعاقبه عندكم فى المطار . بعد الافطار تورزعت الكيمان وفاحت روائح الشمارات طبعا ده ما شمارات السوق الشعبى أو سوق امادفسو ده شمار مستورد والمكذبنى يزور عفراء وبعدين تعالوا حكاية عفراء ده شنو شمار حار سيد جرسة اذكره للتو عن عفراء القالوا سيده واحد ليه صلة بمؤسسة الاسواق الحرة وقبل الافتتاح كان قد اخلى منصبه لاخر بس علشان ما نظلم الزول ده قالوا معاه شوية ناس لكن يا جماعة نعمل شنو ما اصلو ناسنا ديل بفتكروالعولمة جداد تركى وطمام سلطانى وخضار وفواكه بتاع البرندات الخضراء والاسمدة الجينية وانا مستغرب بلد ذى السودان ده حرم لو زرعت فيه تيكو بعد يومين يقوم ليك لاندكروزر ولو كنت بتاع استثمار وزرعته لاندكروزر يقوم ليك قندران وفى هذه الحالة القندران يقوم ليك طياره طبعا ما بتاعت رش بوينج عديل انته ما شايفين شركات الطيرات البقت ذى محلات الاتصالات فى السودان فدرالية ولائية وطيران الغرب وحتى ناس ديل ما قصروا ما عجبهم فى اغانى الحقيبة الا عازة وعملوها شركة تعرفو السودان ده لو كان شركات الطيران ده اسماء لاحزاب حرم كان لا نيفاشا ولا ابوجا كان ارتحنا من زمان لكن نعمل شنو الاحزاب السودانية تعانى من داء الانشطار وفى ظل التوجه الحضارى اصبيت بداء التوالى اما فى المرحلة التى يمر بها السودان الان ظهر لهامرض جديد وهو الانقسام المتوالى . على منوال الزراعه ده انته حكاية مشروع سندس الزراعى شنو المشكلة الزول القاعد على رئاسته مهندس زراعى وكمان امام جامع ومن هيئة علماء السودان وبرضو لى يوم الليلة لا حس ولاخبر وقروش ناس الشتات لحقت ام طه بس بذكر اخر خبر ليه قالوا الصينين مسكوه انا ماعارف حكايته لكن البعرفه حصل لمشروع برج الخرطوم او لنقل بندرون الخرطوم الملاصق لميدان الامم المتحده بالخرطوم وبينى وبينكم حسه اصبح ما ميدان ممكن نقول عليه حوش الامم المتحدة بالخرطوم وما تفتكروا حوش ذى بتاع الريف لا ده حوش وكمان فى حى دار السلام بامبده والمساحه 200 متر. بس السمعته عن برج الخرطوم بنطبق على مشروع السليت وبينى وبينكم مع ناس وزارة الشئون الهندسية االواقعين توزيع فى اراضى الخرطوم الزول العاقل وعنده رصيد فى السليت احسن ليه يدبر حاله امكن اطلع ليه بقطعة ارض وباقى الرصيد الرجاء مراجعة خدمات المشتركين معليش ياجماعة انا عارف بعد مرات بقيت اجيب كلمات من فقه الجماعة القصد ما المغذى بس الدايره انا اوزن الكلام ما اصلو الوزن بقى سمت السودان الان عند مدخل كبرى النيل الابيض من جهة الخرطوم وعلى سور منتزه المقرن بتقابلك ايات عديدة عن الوزن والله نحنا كلام الله ما بنابه لكن الفى الحماعة ديل اتعرفت معليش اليوم البوست كلامه كله مرجعيات رايكم شنو اديك حبة ضحكات امكن تلطف الجو شوية .قبال ايام جابوا الرجل الوقور واخو الحكم بتاع الكورة المشهور درمه واكيد ناس امدرمان بعرفوه كويس لانو راجل مسكنه قبور احمد شرفى من كثرة تواجده لستر الموتى ربنا يجعله فى ميزان حسناته طبعا الحلقة كانت فى اذاعة امدرمان مش واحد يقول لى فى اذاعة مانجو معقول ده ديل بس دايرن طول الارسال ناسى عجرم ومياده وتادر خضر والبت البتقول الشعب العربى وين وين الملايين القضب العربى وين حرم البنت لوما سمحه زول يجيب خبرها مافى لانو الكلام البتقول فيه ده بدخل من اليمين وبطع بالشمال طبعا انا قصدت ما اجيب سيرة للاضنين لانو فى ناس لا بسمعه ولا بشمه وما علينا الباقى بتعرفوه المهم فى الحلقة الزول حكى عن طرائفه مع المقابر وقال فى يوم من ايام البرد البشد الاسلاك الكهربائية ويخليها تشتغل ذى صفارات المسئولين فى الشوارع كان مستنى جنازة ولمن اتأخرت اضطر الى النوم جو القبر من البرد وما يسمع ليك الا ناس جاين عليه وعلى طول قام من قبره وما يشوف ليك الجماعه الشايلن الجنازة الا شتات يا فرده والقصة التانية قال انو مرة كان بستر فى جنازة ولمن انتهى منها والجماعه فاتوا واتفقد موبايله اتذكر انو وقع منه فى القبر المهم كشف كويس واتكل على الله وخارج الموبايل شفته العولمه فى السودان وصلت وين وعلشان ما انسى بحكى ليك قصة حقيقة حصلت فى منطقة الجزيرة لاحظوا انا قلت الجزيرة ما اهل العوض الحصل انو فى حادث فى الطريق السفرى ومات فيه 3 مواطنين ولمن البوليس حضر فتشوا جيوب المتوفين ولقوا فى جيب واحد بطاقة باسم عثمان وعلى طول اتحرك رجل البوليس الى المنطقة التى يسكن بها عثمان واخبر ناس بيته وهاك يا نحيب وعويل بس الحصل انو فى نفس اللحظة الفيها الخبر يقوم اخونا عثمان ينزل من الحافلة ماشى لاولاده واول ما شاف واحد من اهل حلته وسلم عليه الزول عاين ليه وقال ليه (عثثثثثثثثثمممممممممان ) وفكه البيرق عثمان مشى لقدام وكل ما يقابل زول يزوغ منه احتار واخيرا فكر امشى لامام الجامع واول ما الامام شافه وعلى فكرة الامام كان ماشى لصلاة الجنازة يعنى بحضر حالة ما صدف ولحق الناس الشافوا عثمان قباله المهم عثمان شعر بانوا المضوع فيه حاجة وامام الجامع حكى ليه الخاصل وهو على شفاء حفرة من النار وما كان من امام الجامع الا ان طلب منه الا نتظار واول ما وصل البيت لقى العسكرى لسه واقف مع الجثمان المهم لمن فتحوا الجثمان لقوا واحد اخر وانقلب البكاء الى فرح بس انا قصدته من سرد القصة ده مدى عدم المسئولية فى التعامل مع الحوداث من قبل البوليس وعلشان ما واحد يسئ لطيب عثمان حكايته شنو اصلوالحصل انو عثمان تعرض الى سرق جزلانه وده الاخره ولانو عثمان رجل بخاف الله الحرامى لقى جزاء سنمار معليش يا جماعه الكلام الليلة كتر لكن اهو فرصة رمضان ده ما بنلقاه تانى نواصل
10-30-2004, 09:45 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
بص شوف سيد جرسه بيعمل ايه فى الميدان وكما تتعابعون هذه الايام وفريقى القمة يمثلان السودان فى المحافل الدولية ومن خلال الشهر الكريم كانت الانتصارات وكانت فرحة السودان بابطال الكرة السودانية فى زمن عز فيه الفرح وسيد جرسة مع هذا السيل المندفع من الانتصارات عادت به الذكرى الى الوراء قليلا قبل الرياضة الجماهيرية بقليل وانداح سيد جرسه يحكى لشلة الانس التى ضمته اليها بعد ان لاحظوا ميوله الكروية ولكن قبل ان يتأكدوا من ذالك كان قد فرض عليهم اسلوبه بالمثل الذى يقول (دخول الحمام ما ذى خروجه )واستلم المجلس وهو يحكى عن ايامه الخوالى التى كان ليق امدرمان العريق يتغنى باسمه وهو لاعب جوكر عاصر العديد من النجوم والفرق التى كانت لحظتها فى بداية الصعود الى الى الامام مش يا جماعه ذى حسه الزول ود البرير ده جابوه محافظ لام در بس عمل فينا حكاية (جينا لام در تغنيننا قلعت طواقينا) اصلو اول حاجة عملها فتح مكتب الاراضى وفتش ليك عن الماضى والاراضى وكانت النتجية اقتلاع ملعبان من ملاعب الليق لتقام عليه كلية التقانه الطبية وعلشان ما يبعد سماها كلية الطب الرياضى المهم انا بينى وبينكم مامذكر الاسم شنو لكن كلمة رياضة ده فيها وانا زول كورنجى وفى نفس الوقت بشرب برنجى ويا حليل ايام البرنجى لمن كان شراب مشطات واكيد كتار منكم بعرفه ده وما تشوف ليك زول عامل مجنسس وراكب بولو وشايل ليه علبة ابوكاس حرم زمان البرنجى ده ما شفته الا عند المشطات والحبوبات شماسة زمان كانوابشربوا البحارى بالله شوف المنجهه ده كانت كيف . نرجع لزولنا القبل على ليق امدرمان وطبعا قباله ناس جمعية القران الكريم ما قصروا جابوا ليك الجنزرجى وقسم ليك الليق الى اتنين واحد ليهم والتانى لليق بس المحينى انا الجنزرجى ده التقول جزار حرم حبه قطعيه ما خلاها فى القسمة يا حليل ايام الليق وناس دار الرياضة برضو اجو يقولوا دايرين نطور الرياضة اذاكان بشيلوا فى الميادين والله انا من شدةالموضوع ده حارقنى نسيت الداير اقوله وطبعا الكرة والاناطين وشوف عنيى ده وفى سنار انا كنته مع الجماعه وقعدنا مع الفكى واجمل حاجة لمن جينا ماشين قال لينا شوفوا يا جماعه اتنه بتغلبوا 2 / صفر بس اهم شىء القون بتاعكم يشيل معاه الحجاب ده ويدفنه جنب العارضة بتاعته والحصل انو قريقنا كان غالب 2/صفر لكن مع الشوط التانى انتهت الكرة 2/2 على طول السوق الشعبى واقرب لورى بيت بينا فى سنار ولمن قابلنا الفكى وحكينه الحاصل سألنا انته لمن غيرته الميدان انشاء الله القون بتاعكم يكون شال معاه الحجاب والحصل انو القون الحجاب ما شاله طبعا الفكى قعد اتضحك ويعاين لينا ولمن لقينا كلامه سكتنا ادناه باقى المبلغ واتخارجنا والفيلم التانى بر ضوعند فكى من سنار وطمنا كويس انو حنغلب وانتهت المباراة واتغلبنا ولمن قابلناه حكينا ليه الحصل قال يا جماعه انا عملت العلى لكن انته الاجنحه بتاعكم ما كان يساعدونا بحبة جكه شوية وطبعا فى الكرة ضاع لينا اكثر من هدف بسبب تباطىء لاعبى الهجوم والفليم الثالث كان بطله ديك والفكى الدور ده مركب مكنة امدرمانيه وفى منطقة القماير بس كانت المباراه بتاعتنا مهمه والكأس بره يعنى لو درون الكأس طار الا نغلب الفكى قال داير ليه ديك اسود وريش كرعينهاحمر المهم ما خلينا ليك سوق و فى زنك سوق امدرمان اعاين ليك فى القفص ذى عادل امام فى بلاج الاسكندرية وبرضو ما نفع وعلى طول الى زنكى بحرى وكنا متخيلين نلقى الديك ده خاصة انو ديوك بحرى مشهورة بالالوان ورجعنا بدونه الفكى قال لقى الديك وكمان فى القماير بس تمنه غالى وافقنااحسن حاجة انو طلب منا بعد مانذبح الديك نخليه فى النادى وكل لاعب اركب فى كدارته ريشة ولمن نجى النادى نتعشى بالديك علشان نقفل تمام لو جاتنا اى شكوة من الفريق التانى المهم المباراة انتهت مغلوبين 3/صفر واتذكرنا كلام الفكى بشرط مجلس الادراة ياكلوا الديك طبعا مجلس الادارة كلهم الا انا من الزعل واحد اكل مافى لكن العبد الله ما قصر المشكلة انو جانا واحد فى النادى وقال انا عندى ليكم شكوه مضمونه وفعلا تم رفع الشكوى لكن انا ما مشيت مع الجماعه الرفعوها وطرشقت كمانو مشينا للفكى نديه باقى قروشه اول حاجة سأل انشاء اله تكونوا اكلته الديك قبال الشكوى وكانت الاجابة اكلوا سيد جرسة وما فات معنا والفكى لقى ليه مخارجه. على فكرة الاناطين فى الكره ليوم الليله شغالين .انا شايف وقت مباراة الهلال وبترو قربت داير امشى احصله لكن قبالما امش داير اقول ليكم الانطوان سمعنا شماره وقال النتيجه انتصار الهلال 3/1 نواصل
11-02-2004, 09:11 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
على خلفية هذا الخبر الذى نشر اليوم اعود اليكم وما شجعنى هو وجود الغالية العزيزة والحبيبةالظريفة التى تسكن شرايين القلوب خوفا من ان تنزل بالقلوب فتعيق حركتها نعم انها الملاريا
Quote: توزيع معدات واثاثات ل 200 مستشفي ريفى بولايات البلاد المختلفة الخرطوم في 2/ 11( سونا ) اعلن د. احمد بلال عثمان وزير الصحة الاتحادي ان وزارته ستقوم يوم الاثنين القادم بتوزيع معدات واثاثات 200 مسستشفي ريفي بولايات البلاد مؤكدا اهتمام بوزارته بمشروع دحر الملاريا بالبلاد جاء ذلك خلال رده علي تداول الاعضاء حول تقرير لجنة تنمية المجتمع حول بيان السيد وزير الصحة عن اداء الوزارة للعام 2003 والذي اجازه المجلس في جلسته اليوم برئاسة السيد عبدالله احمد الحاردلو نائب رئيس المجلس واشاد تقرير اللجنة الذي قدته السيدة مروة جكنون رئيس اللجنة ببيان الوزير وباهداف الخطة والانجازات التي تمت ودعا التقرير الي دعم التدريب الخارجي خاصة في المجالات النادرة والاهتمام بالتدريب وخاصة في المعامل ودعم تدريب الاطر الصحية وتاهيل وتحديث المستشفيات الواقعة علي الطرق القومية وتزويدها بالاجهزة للاسعافات بجانب التوزيع العادل للاختصاصيين بالولايات وتوطين العلاج بالولايات بجانب العمل علي تطوير وتاهيل المشارح ومواصلة البحوث العلمية في مجال معالجة الملاريا للحد من ظاهرة مقاومة طفيل للملاريا للعقاقير المستعملة في علاج الملاريا وقد تداول اعضاء المجلس حول توصيات تقرير لجنة تنمية المجتمع مؤكدين علي اهمية توطين العلاج بالولايات والاهتمام بالمستشفيات الريفية
سا سلام عليك يا وزيرنا الهمام وها انت تشمر عن ساعد الجد وتكفكف عباءات التوالى المتهدلة واليوم الاثنين هو التاسع عشر من رمضان اى مواعيد القيام جعلنا الله من عباده والسيد الوزير عملا بمشروع التوجه الحضارى الذى طال بقائه وبعد ان استلم الفبزا كارت وهو فى طريقه الى الجنسية وكده نشوف اخترته 2005 جاية وما تنسوا فى تركيبة دوائية جديدة اسمها (نيافشا) سوف تطرح فى بداية العام الجديد او لنقل (نيافشا بوش) والخوف ان يقوم الساده الامريكان برمى عفش السيد بوش خارج البيت الابيض ولحظتها هل سنرى (نيافشا كيرى ) والله ايه, على فكره اسم كيرى سريع الذوبان وبما اننى انا المدعو سيد جرسة وبما لدى من مخازن للسياسة الامريكة منذ عهد اول رئيس امريكى ومتابعتهم بصورة دورية وخاصة بالاعتماد على تدوين اسمى فى قائمة اللوترى السنوية والتى ادتت انعكاسات الاشعة من الكمرات الى اصايتى بتهتك فى الحبال الجفونية نتيجة الصور المتكررة ولقد قابلت احد الاطباء فطلب منى اسنخدام الصور الديجتال فى المرات القادمة حتى لا اتعرض الى امراض اخرى وقد كان ما كان ولا انسى عدد المرات التى وقعت فيها من اليمين الى الشمال بالانجليزى والعربى ولغات اخرى لا اعرفها الا فى حينها وطبعا ده بحصل عندما يقوم اولاد الاهل بامريكا بتقديم الطلب من الداخل وفى هذه الحاله ما على المقدم الا التعود على الامضاء الذى ارسل له فربما يكون من الفائزين وعلشان الكلام ما يكتر انشاء الله يا كيرى على يديك اجى الفرج واللوترى ابو درق اصلو بوش ده من يوم ما استلم البنت الدلوعه (امريكا) خاطيها معاى قرض وبينى وبينكم هو اسمه(بوش ) حرم انا البوش ده من الثانوى كهرته وكفاية انو الواحد يشفوه فى الجامعات الان وبعد ده دايرن تقولى امشى ليه غايتو كان بوش والله كيرى بقول (مدد يا شيوخنا) تلحقونى باللوترى والباقى ساهل . وماينط لى واحد ويقول ديل ما شيوخ مش احسن علشان التحوط والله فى ناس الواحد لو قلته ليه فى البوست التحيات يرد يقول ليك ( التحيات لله) علشن كده بقول ليه الناس ديل شيوخ بس ما بدقون ديل شيوخ العالم والمكذبنى يسأل عمنا عنان . نرجع الى حكاية جمهورى وديمقراطى وذى ما قلته لو كيرى وصل انا ماعارف ايه الحيصل الديمقراطيين ديل ناس (حقوق انسان) وحتى اول رئيس دخل حقوق الانسان فى مسودات مجلس الامن الدولى هو الديمقراطى (كليتنون) انا قلته كليتنون ما ينط لى واحد ويقول انا قاصد خضر الديمقراطى بقينا نخاف نعمل شنو وذى ما قلته ليكم لو كيرى وصل انا خايف بعد يويمن من استلامه امشى يقفل اوضة النون بتاعته فى البيت الابيض وعلى اول طياره على الخرطوم وقبال ما ينزل المطار يكون الجيش الامريكى قد انتشر فى دارفور يعنى ببساطه كده قالوا ضرر اخف من ضرر بقصد انو عودة بوش امكن يكون فيها حبة امل لحل مشكلة التدخل وخاصة انو الرئيس بوش ليس لديه ما يخاف منه طالما ان مدت حكمه اربع سنين لكن حتما ما بتشبه معنى اغنية الاستاذ محمد الامين اربع سنين عاشه الحب الليله عيد ميلاده يا قلب
انا علشان زول متداعى وليس متوالى فى السياسة اختم كلامى واقول
ان عاد بوش حتما سيكون هو القدر اللحم فى جزارته قد لا يطل والسجق سيصبح الغام تصيب كل من دنا او افتكر الفول سيصبح سيدنا وقدرته ستصبح مزار لك محب ساخنة تعالج كل جيب اصابه الكبر وماء الفول بين الالواح سينهمر والكل يغنى شيخنا الفول هيهأت قد اطل
اما ان فاز كيرى
عفراء فى مطار الخرطوم ستزدهر بالبتلو وعجول اللبن والمرتدلا تزين الاسواق والسجق فوق العمارات ينسدل الضأن سيبنى له مسيدا والبقر قبابه فى غناوة تنتشر ونعود نزور الشناكل فى امدر وغيرنا فى الخرطوم على شروربة اللحوم يتنحر
انا طبعا ما علقت على الخبر النزلته اول البوست بعيون سيد جرسة لانو خبر الانتخابات الامريكية جانا للتو ولكن سنعود لتكلمة التعليق وخاصة بعد ان وجدت فى اعلان الوزير العزيزة (الملاريا )كفاكم الله شرها نواصل
11-05-2004, 09:45 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة تأزم موقفه من خلال التعب الذى يعانيه من الصيام كما قال ان رمضان فوق صفيح ساخن هذا العام فى السودان واستطاع من خلال الانتخابات الامريكية ان يقضى الكثير من الوقت على مؤشرات الاذاعات وشاشات القنوات وكان لا بد من وجود حس سياسى مع كثرة الطله على الاعلام وعملا بالمثل الذى يقول (كترت التكرار تعود الحمار ) وشايف عنه رأى فى اتعاكسات الانتخابات الامريكية على السودان طبعا يا جماعه شوية عليه الزول لسه ما تتطاول وطلب تعينيه فى قناة الجزيرة الممنوعه من الفتح فى السودان والشىء الظريف انو ناس قناة الجزيرة طالبوا بفتح المكتب شريطة ان يكون به اسلام صالح مراسلهم وبعد ذالك يتم تحويله الى اى موقع اخر لكن شلة الصقور الفى الحكومة قالوا حرم والف حرم نحنا ما بنرضى بفتح المكتب فى السودان وبوجود سى اسلام صالح وذى ما بقول الفنان حمد الريح الساقيه لسه مدورة نرجع الى انطباعات وتحاليل وليس تحليل حتى نضمن قبول كلمات جرسة حصريا . والفرصة معاك يا سيد جرسة لمدنا باخر الانباء عن فوز بوش ولحظتها وضع سيد جرسه رجل على رجل وامعن فى الكاميرات مع مكياج ابتسامة هى من بناة افكاره ودخل فى الحديث بدون ما يقول رمضان كريم اصلو حكاية رمضان ده انته عارفين سببه معاها شوفا يا جماعة الامريكان ديل ناس مافيهم كلام لو جابوا بوش والله العجور شوف بالله المصادفه العجيبة ده اسم يوش اذا ارجعناه الى مصدره الرئيسى لوجدناه سودانى والاصل منه الفول وبما ان هو غالب اكل البلد وانا مستغرب ناس مجمع الفقه الاسلامى ديل يقولوا دايرن نأسلم اى شىء ولمن اجوا فى ذكاة رمضان(الفطرة) يعملوها بالقمح وبرضو يقول ليك مشروع حضارى وكان على انا كنت عملتهابسعر الفول واهم شىء صحن فول بالزيت النباتى وموية الجبنة وبعدين تعالوا منو القال ناس السودان بيأكلوا قمح والله انا ماعارف رئيس البلد ده قاعد وين زمان ما قال ما دايرين دقيق فينا قمحنا كفاية بكفينا انا ماعارف القمح الا يكون مزروع فى فى اضابير السلطة حرم مشروع الجزيرة مافيه البتكتح وحتى الشمالية قمحه قطه يعنى فى النهاية الفطرة انا ماعارف كيف خرجت من المشروع الحضارى ولوجينا لحكاية غالبيةاهل البلد بيأكوا قمح الكلام ده يا ناس ماصاح عديل كده وفى الخرطوم كده امشى سوق امدفسو ما بتلقى عصيدة الفنريته الناس بتتشاكل فيها والعجب جنب جامع الخرطوم مديدة الدخن حرم الا يوزعوها بالبوليس وكمان فى اطراف العاصمة يا للعجب فى ناس غير عصيدة العشريف (الذرة الشامية)ما بيأكلوا اما ناس الكسرة ديل خليهم ساى بالكوم بس المشكلة ناس مجلس الفقه ديل لسه دقه قديمة هم قايلين العاصمة ذى زمان زمن المشوار بالطرحه والسهرة فى الريفيرا ايام اين تقضى هذا المساء (فيلم الن دولين- فيلم الاب الروحى- فيلم صوفيا لورين-وهندى - وافلام العم بوش يا حليل العاصمة زمن كان غنم المقرن لو ما شافت الاستوب ما بتقطع وبتاع اللبن فى الخرطوم فى بعض المناطق اجى بعربيته ومكتوب عليها كافورى وبكل ادب يضع زجاجة اللبن فى الحيطه وحتى فى المناطق النائية بتاع اللبن بحماره تلقاه لافى بيت بيت وتعالوا شفوا حتى القمح ما كان حاجة تمام افران بلدية بنكهه عود طلح سودانيه لو اعتبرنا الوضع الكان زمان للعاصمة ممكن نقول الفطره قمح انا لو كنته فى مجلس الافتاء الشرعى ده كان عملت لى بيان وقلته فيه ( قررمجلس الفقه السودانى الاتى بخصوص الفطرة يراعى فى الفطرة تنوع الاكل على ان تقوم كل مجموعه بأخراجها من القوت الرئيسى لها ) يعنى معنى كده فى ناس وديل كتار الفطرة بتاعتهم مفروض تكون بالدولار واليورور وخاصة لانو معتمدين على الاسواق الحره فى الاكل حتى الرغيف محمص . اما عن فوز بوش جماعتنا ديل شايفهم ما قصروا البرقيات تتضارب
Quote: بروفسير عمر يعرب عن أمله في أن تشهد الفترة الرئاسية لبوش تعاوناً ايجابياً مع السودان
البشير والنائب الأول يهنئون بوش وشيني بمناسبة الفوز بالرئاسة الأمريكية
الخرطوم في 4/11(سونا) هنا المشير عمر البشير رئيس الجمهورية الرئيس الأمريكي جورج بوش بمناسبة انتخابه رئيساً للولايات المتحدة الأمريكية لفترة رئاسية ثانية كما قدم الاستاذ علي عثمان محمد طه لنظيره الأمريكي ديك شيني تهنئة مماثلة سلمها لهما السفير الخضر هارون القائم باعمال سفارة السودان بواشنطن. وقال د. مصطفى عثمان وزير الخارجية في تصريحات صحفية ان القيادة السودانيةاعربت عن تطلعها لعلاقات افضل بين السودان والولايات المتحدة الامريكية خلال برقيات التهنئة التي بعث بها رئيس الجمهورية ونائبه الأول للإدارة الأمريكية
السودان يهنئ بوش علي نيله ثقة الشعب الأمريكي [3:
الخرطوم في 4/11( سونا) هنأ السودان الرئيس الأمريكي جورج بوش بفوزه في الإنتخابات الأمريكية وعلي نيله ثقة الشعب الأمريكي ، وأعرب وزير الخارجية دكتور مصطفي عثمان إسماعيل عن تمنياته أن تتمكن الولايات المتحدة الأمريكية في الفترة القادمة أن يقودها الرئيس بوش إلي مرحلة أكثر تعزيز للسلام الإقليمي والدول
لكن انا بقول مرحلة المسلسل انتهت واتحولت الى فيلم وكمان من دور واحد خاصة انو عمنا بوش بعده ده بشتقل بمزاج وذى ما قلته حتكون اربع سنين مع البوش وامسكوا الخشب
11-06-2004, 10:01 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة كما اسلفت اصبح عاشقا للقنوات الفضائية والاذاعات وكانت النيجة بعد ان انضم كمستمع العديد من الكوارث اولها فوز الرئيس الامريكى بوش وثانيها خبر اليم وفاة الشيخ زايد بن سلطان تقبله الله بواسع رحمته مما جعل العديد من القنوات الفضائية تعلن الحداد ولانه من معجبى قناةابو ضبى كما يحلو لهان يطلق عليها واصبح سيد جرسة يبحث عن القنوات فيعود الى قناة السودان البنكرياسية ان صح التعبير ورايه ان تلفزيون السودان برنامجه لا تتفير مثل مصارين المعده وتقدم بشكل محفوظ وعليه يمكن تسميها قناة السودان البنكرساية اسوة بعمل البنكرياس فى تنظيم السكر فى الجسم لكن انا المحيرنى اليومين رمضان فىالسودان وفى العشرة الاواخر ورطل السكر يبقى بالف وماتين جنيه (1200)جنيه والله حرام ناس الحكومة ديل ما بعرفوا العشرة الاواخر والله شنو بدل ما يخففوا على الناس يقوموا يستغلوا الفرصة ويزيدوا السكر وبعدين المواطن عنده شنو غير السكر حرم كل تربيزة افطار تلقى فيها الجكوك ذى الجدار العازل ومليانة بالشربات قبل الزياده والحمد الله الدور ده البرتقان والقرين والجوافة راقدة بس المطلوب الخلط وكمان ما ننسى اجمل حاجة بقت فى بيوت السودانيين نسوا حكاية الكيزان لا بلاستيك ولا المونية ما عرفوها وكرهوهه والكلام كله بقى يا ولد املأ لى الكباية من الزير ويا بت كبى لى عصير الجوافة فى كباية الصينى انا اصلو بكره كبابى البلاستيك انا ماعارف الناس بكرهوا البلاستيك المهم قلته اعمل بحث فى الموضوع ده واجمل حاجة مشين قدمت لاكثر من جامعة سودانية ولقيت البحث بقى مقسوم واحد بالمواد والتانى بكتابة بحث عن الموضوع والاهم من كده على التو تدفع خمس مليون جنيه سودانى ولمدة عام عشان كده البلد بقت مليانه دكاترة والعجب لو فى واحد مسئول مات تلقى السيرة بتاعته ديك وتور فى ----- وبنكرياس فى ----- ودب لوم فى ----- بجانب الكدتورة ال%
11-07-2004, 06:27 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
واسعار السكر فى السودان ما زالت تسجل ارتفاعا وخلال ليلة امس الاول وصل سعر شوال السكر زنة 50 كيلو الى 140 الف جنيه ليباع الرطل للمسنهلك بقيمة 1500 جنيه بالله شفته الحاله ده عجيبة كيف وسيد جرسة بات يحدث نفسه كثيرا حول هذا التناقض العجيب الذى يشهده السودان اسعار السكر وصلت الى حد لم تشهده الاسواق السودانية فى يوم من الايام ولكن الشىء البجنن يأتى وزير الصناعة المتوالى وبدلا من ان يتوالى مع القبش ويعلن الهجوم على الزيادة فى اسعار السكر نجده وهو فى ابهى مظهر يقف امام الكمرات وصفار المسجلات ويعلن الاتى
Quote: الدقير يعلن طرح الإنتاج الجديد للسكر بالاسواق خلال 48 ساعة الخرطوم في 6/11(سونا) اعلن الدكتور جلال يوسف الدقير وزير الصناعة ان انتاج مصانع السكر العاملة في البلاد سيدخل الاسواق خلال 48 ساعة واكد في تصريح لوكالة السودان للانباء ان طرح الانتاج الجديد في الاسواق من شأنه أن يؤدي إلى هبوط اسعار سلعة السكر تدريجياً في الايام القادمة وقال الدقير أن مصانع السكر الخمس كنانه، الجنيد، عسلاية ، حلفا وسنار قد بدأت انتاجها الفعلي منذ عدة ايام بزيادة تصل إلى 15% عن الموسم السابق. واشار السيد الوزير إلى أن انتاج الموسم الحالي لمصانع السكر متوقع أن يصل إلى 770 ألف طن سكر بزيادة 16 ألف طن سكر عن العام الماضي. واضاف د. الدقير أنه من المتوقع أن تباشر الشركات البيع وفق السياسات السابقة للمصانع كما هي دون تعديل خلال 48 ساعة.
طيب لو افترضنا كلام الوزير صاح يعنى معنى كده انو السكر بقى يوزع عن طريق الانابيب ليجد كل مواطن فى مطبخ بيته نصيبه من السكر بعد 48 ساعه او لنفترض انو مصانع السكر فى السودان حولت الى جزئيات متحركة على نمط الركشات لتقوم بتسلم كل مواطن حصته من السكر خلال 48 ساعه بصراحة ده مش كلام يعطش ده يعمل استون عديل غايتو انا لو خايف يقول على مجنون بقول انو تصريح ال 48 ساعه كان اولى به وزير الصحة لانو ترسيب الدم لمعرفة السكر فى الجسم يحتاج الى 48 ساعه وعليه كان يمكن ان يخرج البيان كالاتى
اعلن السيد-------- ان اكتشاف حالة السكر فى البلاد سيدخل الاسواق خلال 48 ساعه مؤكدا ان الاكتشاف الجديد فىالاسواق سوف يؤدى الى هبوط داء السكرى تدريجيا فى الايام القادمه
مش بالله كان بكون بيان احسن من بيان وزير الصناعه المركب ليه مكنه وزير صحة وحتى لا اطيل عليكم تعالوا شفوا كمان الخبر ده المهم انو سعر السكر بدا فى الارتفاع من يوم السبت م وقد سجلت بوصلة امدفسو للرطل 1300جنيه بوصلة عرب مافى 1300 جنيه سبوصلى سوق 6 بالحاج يوسف 1320 جنيه اما فى بوصلة سوق الخرطوم 1400 جنيه وفى بوصلة امدرمان 1450 وفى بوصلة بعض الاسواق الراقيه 1500 جنيها عليه سوف نوافيكم باخر المستجدات فى سعر السكر بالسودان والى هنا ينتهى اراسلنا امل ان التقى بكم فى ظروف صحيه يكون فيها نوبة الاستون قد خفت نواصل
11-08-2004, 07:24 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
وتتواصل اسعار لسكر فى الارتفاع والحكومة تضشع على اذنيها طين وعجين وكمية المعروض من العصائر المنزلية فى حالة نقصان حاد نتيجة ارتفاع اسعار السكر واصبح الاطفال خارج التشكلية الرمضانية وما عليهم الا الانتظار حتى عزوف الصائمين عن تناول العصائر هذا العام وسجلت القهوة تقدما ملحوظا فى البوصلات لتحقق اعلى فاصلة مما جعل من نسوان الشاى واللذين نشط عملهم نتيجة اسعار السكر يتفننون غى اسعارها واختفاء تراميس الشاى والقهوة فى كثير من بيوت القبش مما حدى برجال الاسرة الخروج والاكتفاء (بقهوة تيك او) اما فى ولايات السودان المختلفة وواصل السكر ارتفاعه ليصل سعر الرطل الى 1600جنيهالى 1800 جنيه ولكن رأت الحكومة ان ترفع كاهل المعناه عن الجماهير وبشرت بالاتى
Quote: عشرة الاف طن انتاج مصانع سكر الاربعه [4:8 PM] الخرطوم في 7/11(سونا) بلغ انتاج مصانع السكر الاربعه حلفاالجديدة, سنار,عسلاية, والجنيد بالامس (10) الاف طن سكر وقال المهندس فاروق محمود النص مدير القطاع الفني بشركة السكر السودانية ( لسونا) ان الانتاج لهذا الموسم سيصل الي 350 الف طن مقارنة 335 الف طن العام الماضي واشار الي ان المساحات المزروعة بقصب السكر بمصانع الشركة الاربعه بلغت 89 الف فدان وابان ان عمليات طحن القصب في المصانع الاربعه بدأت منذ منتصف اكتوبر الماضي
ولكن ماذا يستفيد المواطن من انتاج 10 الف طن طالماهى فى المصانع وبينى وبينكم اناخايف تكون بهيل يعنى مافى شوالات وكلام المهندس ده ذى الزول البحندق الناس بالله ده كلام والله المواطن السودانى اصبح يتعامل معه بكل سطحية وفى احلك الظروف التى تمر به وما ارتفاع السكر الا مثال حى لذالك وتصريحات المسئولين المهم حتى ليلة امس الاول اصبح بعض المسحراتيه يضربون الدفوف على انغام سكر سكر سكر وسيد جرسة ان ما قلته ليكم القنوات الفضائية اثرت فى ثقافته وده من ثمرات العشره الاواخر نواصل
11-09-2004, 09:51 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
رمضان فى السودان قبل الجماعه كان كل شىء يدور فى فلكه حيث تجد الافطارات الرمضانية تعج بها الشوارع وحتى الافطارات الحكومية كانت مقتصرة على اجتماعى لجنة تحرى رؤية هلال رمضان وكنا لا نعرف غيرها ولكن الان اصبحت الافطارات الحكومية تذكر سيد جرسه بحكاية اعراس زمان وتباهى الامهات بالبذخ والمنجهه وحمدا لله ان امهات هذا الزمان عندهم واحد زايد واحد خطوبة + عقد يعنى لا فتح خشم ولا كرعين ناس ماشيه وجايه وكمان هالك يا خطوبه ودبل الى ان نصل الى يوم العزومة وماارارك العزومة طبعا يا شباب حتى وقت قريب وعلى عهد المشير النميرى والذى اصبح له تؤام اخر وياسلام على السودان دخل الى قائمة(جنتس) فى عالم العسكرية(بالمشيرات) كانت الحكايات ده بالكوم لكن الان دقه سريعه وذى ما بغنى الفنان (اى ده الشغل )وبالرجوع الى موضوع الافطارات بصراحة الحكاية بقت على يد المسئولين واموال الشعب تصرف فى الترابيز المليانه بالشواءات والعصائر المستورده وكل واحد شاف زميله عمل ليه افطار جماعى مدفوع الاجرمن قبل الشعب تلقاه على طول فكر يعمل وبصراحة فى ناس بقوا متابعينالافطارات الجماعيه ده لدرجة انو الواحد ولا مره فطر فى بيته وطبعابعدالافطار تعال شوف الظروف بتاعت اللجنة اناماعارف القروش ده بجبوهامن وين تعرفوا الافطارات الحكومية بقت خشم بيوت وحادين الدعوة بكرت مذهب او فضى وارد مطابع سورياوكمان فى ظرف ولو دخلنا الى محتوى الدعوه تعال شوف العجب وعلشان الهلالب ما يزعلوا تعال شوف البرنس بتاع الفطور محكراسه فى اول الكلام وبعده المصلحة بتاعته بصراحة سألت واحد مسؤول عن التقليعه ده قال لى( انته بس مشكلتكم العولمة ده بتفكروها قنوات فضائية وانترنت لا الافطارات ده ذاته ما دخلت العولمة ) وصدق المسؤول تعالوا نتفرج على افطار الوزير علان وما تنسوا الزول ده ما متوالى ده من اهل البيت عديل علشان كده الشغل عجيب ما طاب ولذه من االاكل والشراب ده كله ما مشكلة لكن تعال شوف عددالاجهزة الامنية المطوقه المكان واذا كان الوزير واصل لا بد من وجود لبطشى كهرباء لزوم الطوارىء ومولد على اهب الاستعداد وخط تلفون ساخن لتأمين الموقف يعنى الوزير الهمام بمال القبش يتكرم وما تنسوا الدعوة طبعا محصورة على قيادات الوزارة واعضاء جمعية القران الكريم والمجاهدين وعمال وموظفى شرطة المنشئات وناس الدفاع الشعبى بالوزارة ام بقية العاملين من تطوع منهم فما عليه يتقديم خدماته الى الضيوف وانا ماعارف رمضان ده علاقته شنو بحكاية الزواج الجماعى ربنا تعالى قال لينا (شهر القران العباده) لكن اجمل حاجة فى احد الافطارات التى حضرها الرجل الثانى انتهى الافطار بمشروع زواج اكثر من 5الف شاب وشابه والله انا حكاية الزواج الجماعى ده مجنانه اهلنا زمان قالوا الزواج ستره حال وعلى مقدرتك لو زول مرتاح انشاء الله تعمل الصبيحية شعبى (بالرق) وبالليل تجيب اكوسترا الهيئة القومية للاذاعه والتلفزيون وطبعا اكيد بيكون معاهم عملاقة الفن ولونص نص عقد فى الجامع وغداء وعشاء وتركب الزلط واذا كنت تعبان ما عليك الا ان تستخدم زواج الكوره( زواج مبسط ) لكن حسه جابوا لينا الزواج الجماعى وشمارته كتيره وسط الناس قالوا فى وحده اتزوجت جماعى فى استاد الهلال وحصلت مشكلة مع زوجها وطلبت منه ن يرجعاه الى بيت ابوهاالزول احتار واصلو كان داير يطلق لكن حكاية بيت ابوها ده زعلته وقبل عليها وقال انا مستعد اطلقك لكن بوصلك محل عقدت عليك (استاد الهلال) وحتى الزواج الجماعى خشم بيوت واحدين الشنطة مستوره والشيكات مقطيه وناس الشيلة شنطة حديد ومحدودة القطع والقروش فى ظرف ابو جنيه قالوا فى واحد داخل جماعى وفى يوم لعقد خطيبته ضربتها ملاريا يعنى مافى طريقه اجيبها والزول مشى مكان الحفل ولمن سمع اسمه مشى على المنصة براه لجنة الزواج سألته عن العروس وراهم الحاصل وما كان من المأزون الا ان اخرج له الشروط الجزائية فى حالة عدم احضار العروس وهى اللعب فى السنتر ليق بعد شفاء الخطيبه ناس الكوره كلامى ده بعرفوه كويس .
خاطرة البلد كلها تقول عوووك وللسكر منعول ابوك كبابينا فى الترابيز اتحكرت وجكوكنا ذى الكيزان اتقلبت كل ما اذكر اسعار السكر تبقى الدنيا حنطل كله الما لقاه فكر اكل بلحاته واتحكر وقال للدنيا انشاء سكر بنجر
بنجر بنجر بنجر
لكن تعالوا شفوا كلام الناس ديل عن الازمة بيقول شنو
Quote: رئيس غرفة الصناعات الغذائية يعزو ارتفاع اسعار السكر لهجوم المصانع علي حصة المستهلكينالخرطوم في 9/ 11( سونا ) عزا السيد عبدالرحمن عباس عضو مجلس الادارة والمكتب التنفيذي لاتحاد اصحاب العمل السوداني ورئيس غرفة الصناعات الغذائية ارتفاع اسعار سلعة السكر الي اضطرار اصحاب المصانع لسد احتياجات مصانعهم من السكر بشراء السكر من الاسواق علي حساب المستهلك لمقابلة متطلبات موسم عيد الفطر المبارك نسبة لعدم وفاء الحصة المقررة للمصانع المقدرة بسبعين الف طن ووصف سيادته الزيادة بالامر الطبيعي لخضوعها للمبدأ الاقتصادي المتعدلق بزيادة الطلب وقلة العرض واكد رئيس غرفة الصناعات الغذائية علي ضرورة رفع حصة المصانع الي 150 الف طن لتغطية حاجة المصانع القائمة مع زيادة هذه الحصة بنسبة 20% سنويا لمقابلة احتياجات المصانع الجديدة التي تدخل دورة الانتاج داعيا الي ضرورة معالجة هذا الامر حتي لاتتكرر المشكلة مستقبلا
نواصل
11-11-2004, 06:06 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسة وليوم 28 من رمضان ولكن كم ازرف الدموع لخبر وفاة الرجل الامة الرجل الشعب الرجل التاريخ نعم انه المناضل ياسر عرفات جيلا بأكمله فى التضحيات والثبات على المواقف وعزرا اليوم دعونى اترحم على ابوعمار تغمده الله برحمته وقربه اليه اللهم ما ترحمه رحمة واسعه انا لله وانا اليه راجعون
11-12-2004, 09:02 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
سيد جرسه واخر رمضان واليوم 29 من الشهر الكريم والحاله الماديه فى تردى متواصل نتيجة انتقال السوق الشعبى الى موقعه الجديد والدى اختير له موقع بالقرب من مقابر الصحافه وكأنما القائمون على الامر يريدون ان يخلقوا علاقة وطيدة بين المقابر والسفريات والدافع الى دالك الحالة المتردية التى جعلت من السفر فى السودان قطعة من كفن فما ان يمر يوم الا ونسمع بحوداث عديده والشىء البحير الزول انو عاملين شرطة المرور السريع واكشاك امن الهدف التى تجدها عند كل مدخل كل ولاية وعليها شباب يلبسون الثياب الانيقه ويجلسون على الكراسى الوثيرة عند الشباك الصغير وقد صمم للادخال القروش اما ان زل لسانك واخدت راحتك فى الكلام فالكويسة انو الشبابك قدر الروقه ام عشرين الف جنيه فالزول الدى بالداخل لا يسمع شيئا اما عن عربات المرور السريع والتى اصبحت تجوب الشوارع السفريه وهمها الاول والاخير الوقوف متى كان المزاج رايق وعمل استوب لزوم اصدار الشيكات المرورية وهكدا دواليك ولكن لم نجد من يقف على اهبة الاستعداد لتلافى الحوداث المرورية المميته ودالك بالمراقبه وتنبيه السواقين ولكن عندما يقع الفأس فى الراس تجد عربات المرور السريع تأتى بعد وقوع الحادث وتكون النهاية جر العربة بالونش الى اقرب مركز مرور سريع واصبح المواطنين فى حالة سفر اقاربهم مطلوب منهم توفير مبلغ للاتصال التلفونى الولائى لتأكيد وصولهم وادا تعدر دالك ما عليك الا الانتظار نشرة الساعه الثامنه مساء والميت ابقى من الحى سيد جرسة والعيد على الابواب والجيوب بنت عليها العنكوبت فما ما كان منه الا التوجه الى مركز النفيدى للسفريات وشركة النفيدى حتى تتفرغ للقيام بعباء الميناء الجديد اوقفت جيش جرار من العاملين فى السوق الشعبى القديم والدى ادى ترحيله الى فقدان العديد من الناس يومياتهم وخاصة مع موسم العيد وتعين كودار جديدة على مزاج ادارة الشركة ولا ننسى قانون يوسف عبد الفتاح والدى اضاف نصف قيمةالتدكرة الى التدكرة الاصليه فى الاعياد ورغم تغير صاحب القانون الا ان مسودة القانون اصبحت ملزمة لكل من يتولى منصبه. وصل سيد جرسه الى ميناء النفيدى البرى وكانت ضربة البداية دفع مبلغ الف جنيه والا ما عليك فى حالة الوداع ان تنتظر البص عند خروجه وان كان زولك المسافر على الباصات السياحيه وكنت لا تتملك قيمةالتدكرة احرص ان تودعه قبل دخوله فزجاج الباصات السياحيه لا يسمح بدالك اما ادا كان من ركاب النيسانات او الحافلات كل المطلوب منك الانتظار على البوابة ومراقبة حركة الباصات والحافلات . سيد جرسه دخل الى الميناء وقدر ما عاين لم يجد احد من زملاء المهنه فاصبحوا جميعا فى مغبة (شتات يا فرده ) وعندما يئس ظل واقفا يراقب حركة السفريات ولكن اصبحت السمسرة والعتاله متعولمة وعلى عينيك يا تاجر ولو قلت اى حاجة ناس الهدف واقفين خرج سيد جرسه دون ان يطلع بحاجة واتجه الى السوق الشعبى امدرمان والدى اصبحت حركة السفريات نشطة حتى يتلافى اصحاب المركبات المزيد من الشيكات المدفعوة الاجر والمسافرين يستفيدوا من فروقات تداكر الوصول الى السوق الشعبى الجديد ومبلغ الالف جنيه وما بطال الواحد فى رمضان يمكن ان يستفيد متها فى اخراج الفطرة بدل ان بعطيعها الى شركة النفيدى والمثير فى الامران شركة النفيدى كانت تمتلك اسطول باصات سفرية مشهور (قندلا) ولكن بعدان استلم الميناء الجديد اوقف اسطول قندلا وسرح العيد من العاملين وعلشان ما نظلم الزول ده والدنيا رمضان الظاهر داير يتفرغ الى تسير دفة الميناء الجديد وبينى وبينكم ده دى ما بقول المثل شعر ماعندنا ليه رقبه. بس المهم سيد جرسة هاك يا سمسرة وعتالة وطبعاما كل رفعت شنطة تسمع منه الكثير والمثير واياك ان ترد عليه ادن الادان وكان سيد جرسة مترميا على برش وبجواره صحن لقمة فتريته وملاح وبالقرب منها كبابى الابرى والشربات وماان نهض كان مصير ما جمعه قد سلم نصفه الى صاحبة الحظ التى فطر عندها سيد جرسة وتحت انغام البائعين كل حاجة بجنيه جابوه بالطياره وباعوه بالخساره .وسيد جرسه ماشى وهو يسمع الكلام ده ورجع وقال ليهم ده كلام شنو البلد ده فيها حاجة مافيها جمارك ماتخلوننا من الفيلم ده انا بس داير اعرف البضاعه ده بتجىء البلد كيف والمحيرنى انو زمان لمن كنت اقيف فى شارع مدنى الخرطوم كنت بشوف الحاويات مليانة اسمنت وخشب ودقيق ووووو لكن حاويات الزمن ده تمشى فى الزلط حبة ترابه ماتلقاها بينى وبينكم ده السبب فى حكاية جابوه بالطايره وباعوه بالخساره نواصل
11-12-2004, 09:40 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
وفى اخر بوستات سيد جرسه والتى اتمنى ان لا اكون قد اثقلت عليكم فيها كثيرا ولكن عزائى اننا فى رمضان والبورد يعانى من قلة البوستات وكان دالك دافع لى كتابة تخريمات سيد جرسة فتقبلوا من سيد جرسة التهانى بالعيد السعيد وامنياته ان يعود رمضان علينا والبورد فى حيوية وتعاضد ليكون ملاد لكل الشتات وواحة لسودان جديد ودعواتى لكم جميعا بتحقيق الامانى وقبول الصوم من الجميع وجعلنا الله جميعا من عتقاء الشهر الكريم والى لقاء عبر رمضان اخر ان بأدن الله وكل عام وانتم بخير
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بلدى يا حبوب
Dr. Moiz Bakhiet
Raja
brakat
فيس بوك
تويتر
انستقرام
يوتيوب
بنتيريست