|
|
|
 Re: وصول كولن باول الى مطار الخرطوم (Re: بلدى يا حبوب)
|
Quote: وصول وزير الخارجية الأمريكي [10:4 م]
الخرطوم29/6(سونا) وصل الخرطوم مساء اليوم السيد كولن باول وزير الخارجية الأمريكي في زيارة للبلاد تستغرق يومين وكان في استقباله بمطار الخرطوم الدكتور مصطفى عثمان إسماعيل وزير الخارجية وعدد من المسؤولين في الدولة وأعضاء السفارة الأمريكية بالخرطوم وفور وصوله توجه كولن باول الي بيت الضيافة مقر السيد رئيس الجمهورية حيث من المقرر أن يلتقي بالسيد رئيس الجمهورية بباول كما يلتقيه النائب الأول ووزير الخارجية. وسيعقد باول مؤتمر صحفيا في العاشرة والنصف من مساء اليوم. ويتوجه باول يوم غد الي دارفور للوقوف على الأوضاع الإنسانية هناك
|
| |
 
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
الخرطوم ومنذ امس الاول وقبل وصول كولن باول الى مطارها كانت قد سبقته طائرة تحمل عدد من الكلاب المتدربة على اكتشاف المتفجرات بلغ عددها 70 كلب وصباح اليوم اتت طائرة محملة بالطعام الخاص لهذه الكلاب .وفى تمام الساعة العاشرة صباحا كانت طائرة اف 15 قد روعت المواطنين وهى تطير داخل المجال الجوى السودانى وكنا نرأى العلم الامريكى بوضوح وبعد مدة حلقت طائرات الاباتشى هى الاخرى.
اطفال الخرطوم كثيرا منهم روعهم ازير الطائرات الصاخب حتى القطط والكلاب هى الاخرى قد لازت بالفرار بين الشوارع وطيور وود ابرق تركت صغارها واخذت تلتلف حول نفسها لا تدرى الى اين تذهب ولكن جموع المواطنين كانوا مابين مؤيد للزيارة ورافض .
حلقات الونسة المسائية انحصرت فى مناقشة زيارة كولن باول وقد صاحبها الكثير من الطرائف فمنهم من اكد انتماء كولن باول الى الدم السودانى بحكم الشبه الشديد وكانوا جادين فى ذالك بل ان احدهم حلف بأن كولن باول ده يكون من ناس اللوترى المحظوزين زمان.
طبعا ده شمارات الونسة
واخر بكل عفوية سأل انته يا جماعة حسه كولن باول ده بجيب مرته المسيخه ده معاه وطبعا قصده (كولديزا رايس) نطه واحد وبكل عفوية قائلا يا زول الخواجات ديل ما زينا الواحد لمن يدور يسافر ما بتشوف فى الافلام مرته بتحضر ليه الشنطة من الليل والصباح لمن يسافر حرم بيباى ما بفوله مش ذى نسونا ديل الحجل بالرجل ولو ده ما حصل هاك يا دموع نحن يا زول حريمن ديل ما حنينات تب وربنا يحفطهم لكن النقولك الزول باول ده ما فارقه معاه ممكن يجيب ليه اى خوجاية والسلام (على فكرة الشمار ده بتاع ونسة كانت بتاعت عمال الفرن الفى الحى ) بعد شوية دخل واحد وبصوت عالى يا جماعه انته ما شفته الكلاب الفالوا جابوه ده بس اوعه تكون بتاعت ابوغراب بتاع العراق يقوم كلب يتفكه منها وبعدين نبقى فى حوصة غايتوا ربنا يستر رد عليه اخر يا زول قالوا الكلاب ده اكله ذى بتاع نمرة اتين حرم قالوا الجدادة بى بوخه بالله شوف الكلاب ديل اللقياه واحد قطع الحديث وقال طيب يا جماعه اه حسه باول ده بنوم وين لو ودوهه بيت الضيافه حرم م قبال صلاة الفجر بقوم من نومه ما حمير ناس اللبن القدام المطار ديك صوته حرم يقوم ناس مقابر برى وكمان لو ودوه القصر الجمهورى يا زول يا دوب ما اصوات حمير توتى مع صوت المويه تعمل فيه عمائل لكن يا ناس انا البعرفه الجماعة ديل قالوا طيراتم فيها اوض نوم ومطبخ وكمان صالون واتخيل لى حرم النجلية بشجرها تلقاه دخل على المجموعه واحد جديد وبدون سلام قال ما سمعته الخبر الليلة طبعا الجماعة كلم اتلفتوا عليه وصاحبنا قال قالوا كولن باول ماشى درافور وكمان معاه الاغاثه وانا خايف تبقى علينا خكاية الريس الامريكى ريجان الجاب العيش زمن المجاعه ولمن النا شبعوا واحد قال يا جماعه ارفعوا ايديكم ندعوا لريحان الله يديه حجة . حسه كده قولوا لى باول ده لو عمل كده انا خايف باكر واحد يسمى ولده عليه . واحد عاقل وقفه فال ليه يا زول الكلام الدوراب البتقول فيه ده شنو هو اسمه بالبا وكمان الواو داخله فيه منو المجنون البسمى عليه بينى وبينكم شمار الجماعه ديل كتير كفاية كده
تحياتى
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
| Quote: فمنهم من اكد انتماء كولن باول الى الدم السودانى بحكم الشبه الشديد وكانوا جادين فى ذالك بل ان احدهم حلف بأن كولن باول ده يكون من ناس اللوترى المحظوزين زمان. |
الجاحه (الوالدة يعني)...قالت ليك... الجاح عندنا مُصر إنه أوبرا وينفري سودانية برضه.. أنا عندي زميلي أمريكي في الشغل، عاش خمسة سنين في السودان.. اليوم داك بتونس معاه.. قال لي السودانيين مُصرين إنه أي أمريكي بلاك هو منهم.. قال لي زمان كانوا بقولوا الكلام ده عن مايكل جوردن.. ومحمد علي كلاي.. والغريب إنه بختاروا الناس المشهورين والتمام! ويقولوا ليك.. حرّم جعلي!
بنت الحسين
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
كانت طائرة اف 15 قد روعت المواطنين وهى تطير داخل المجال الجوى السودانى وكنا نرأى العلم الامريكى بوضوح وبعد مدة حلقت طائرات الاباتشى هى الاخرى.
كت كده ناس القصر ليهم حق يتجرسوا بعد عمايلهم السودة العملوها في دارفور.
| |
|
|
|
|
|
|
|
|
 Re: وصول كولن باول الى مطار الخرطوم (Re: بلدى يا حبوب)
|
مواصلة للتقطيةزيارة وزير الخارجيه كولن
Quote: الرئيس بوش يعبر عن سعادته للتقدم الكبير في مفاوضات نيفاشا [1:46 ص]
الخرطوم 29/6(سونا) أكد كولن باول وزير خارجية الولايات المتحدة أن الرئيس بوش عبر عن سعادته ورضائه التام بالتقدم الكبير الذي أحرزه طرفا التفاوض وذلك بالتوقيع على البروتوكولات الستة مؤكدا رغبة الرئيس بوش في المضي قدما في الوصول لانفاذ سلام شامل ينهي عقدين من الاحتراب. وقال خلال المؤتمر الصحفي الذي عقده في ساعة متأخرة من ليلة الثلاثاء بالخرطوم أن علاقات البلدين سوف تعود الي طبيعتها بعد التوقيع على اتفاق السلام.مشيرا الي أن زيارته تأتي للتعبير عن القلق الكبير الذي يساور الولايات المتحدة في موضوع دارفور منوها الي أن الرئيس بوش وإدارته والمجتمع الدولي والأمين العام للأمم المتحدة كوفي عنان قلقون بشأن ماوصفه بالوضع السيء في دارفور. وقال في مستهل مخاطبته المؤتمر أن لقاءه مع السيد الرئيس البشير تطرق الي موضوع الأمن في الإقليم ، قائلا إن مسألة الأمن يعتبر قمة الأمور لتمكين مواطنى دارفور من الشعور بالطمأنينة وتمكين عمليات الغوث من التحرك التام دون عقبات تذكر. واضاف كولن باول أن لقاءه مع الريس تناول أيضا موضوع العمل الانساني والخطوات التي سوف تتخذ عند حدوث عقبات في طريق العمليات الإنسانية في دارفور بالاضافة الي التأكد من وصول المواد الإنسانية للمحتاجين وعدالة توزيعها
واشار وزير الخارجية الامريكي الي أن حجم المساعدات التي قدمتها الولايات المتحدة للسودان في المجال الإنساني يلغ 160 مليون دولار في العام الماضي مما يجعل الولايات المتحدة أكبر دولة مانحة للسودان
واضاف أن الكنغرس الامريكي صادق على مبلغ 90 مليون دولار إضافية لمواجهة العمليات الانسانية بدارفور. وطالب كولن باول الحكومة باتخاذ خطوات أخرى وذلك باعتماد الحل السياسي والمصالحة بينها والجماعات المسلحة بدارفور كوسيلة لتحقيق حل شامل واستقرار تام بدارفور كيلا تظهر تمرد مرة أخرى في دارفور. من ناحية أخرى عبر المسؤول الامريكي عن أهيمة إتاحة الفرصة لمراقبي الاتحاد الافريقي لممارسة مهامهم في دارفور. واضاف أن المجتمع الدولي لا يسعده الا أن يرى تقدما ملموسا في دارفور ومن دون ذلك فإن المجتمع الدولي سوف يجد نفسه مضطرا لاتخاذ خطوات أخرى في سبيل إيجاد حل للأزمة الإنسانية في دارفور. وكشف عن لقاء يعقد غدا بينه وبين النائب الاول برئيس الجمهورية على عثمان محمد طه ووزير الخارجية د. مصطفى عثمان لبلورة صيغة مشتركة بشأن الوضع في دارفور
واضاف باول أنه سوف يناقش المسألة الإنسانية مع الامين العام للإمم المتحدة بعد عودته غدا من دارفور وذلك بعد تمكنه من تجميع معلومات حول دارفور مضيفا أن اللقاء يهدف الي مناقشة ماذا يمكن أن تفعله الأمم المتحدة والولايات المتحدة والحكومة السودانية بشأن دارفور منوها أن زيارته تهدف لمساعدة الحكومة السودانية وتحريك مساعي الولايات المتحدة التي بدأت مع الحكومة السودانية قبل عامين عندما جاء الرئيس بوش الي السلطة ،وتمنى أن تحقق زيارته أهدافها.
|
---------------
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
حتى تكتمل تقطية زيارة وزير الخارجية الامريكى كولن باول اوردت أف ب
| Quote: الخرطوم - ا ف ب وصل وزير الخارجية الاميركي كولن باول مساء يوم الثلاثاء الى السودان في زيارة تتمحور حول الازمة الانسانية في دافور ، كما افاد مصور لوكالة فرانس برس في مطار الخرطوم. والزيارة هي الاولى لمسؤول اميركي رفيع المستوى الى السودان منذ زيارة وزير الخارجية الاسبق سايروس فانس عام 1978. وقال مسؤولون اميركيون ان باول الذي سيتوجه الى دافور اليوم الاربعاء يحمل رسالة شديدة اللهجة للسلطات السودانية لانهاء الازمة الانسانية في اقليم دارفور. وسيلتقي باول الامين العام للامم المتحدة كوفي انان الذي سيكون موجودا في السودان هو ايضا |
| |
|
|
|
|
|
|
|
|
 Re: وصول كولن باول الى مطار الخرطوم (Re: بلدى يا حبوب)
|
| Quote: يا جماعة حسه كولن باول ده بجيب مرته المسيخه ده معاه وطبعا قصده (كولديزا رايس) نطه واحد وبكل عفوية قائلا يا زول الخواجات ديل ما زينا الواحد لمن يدور يسافر ما بتشوف فى الافلام مرته بتحضر ليه الشنطة من الليل والصباح لمن يسافر حرم بيباى ما بفوله مش ذى نسونا ديل الحجل بالرجل ولو ده ما حصل هاك يا دموع نحن يا زول حريمن ديل ما حنينات تب |
الله يجازي شيطانك يا    بلدي يا حبوب والله دي بالغت في وصفها حتى بتاعين الافران انت عارف المحلات العامة دي لذيذة في الونسات الزي دي خصوصاً في الجزر ومحل الخضار والسوق وما ادراك ما سوق ام درمان مرتع للونسات والشمارات لحدي بعد شويه يقولوا ليك كولن باول دا ما اصلو سوداني ماخد الجنسية الامريكية وكوندليزا رايس دا ما "حفصة" يتاعو يعني الحنان وكدا وكانوا مقيمون في بانتيو قبل ما يجوا الخرطوم بعدين قدموا للوتري سوا وبعدها اتزوجوا وسافروا لامريكا وقالوا ليك باول دا اول مما مشى كان شغال في محطة بنزين وبعد داك فتح ليه دكيكين صغير كدا في ضاحية من ضواحي نيويورك والحكاية مشت معاه لحدي ما بقى وزير الخارجية وبعدين في محطات كثيرة اختصرناها في حياتو لانو المجال لا يمسح والحديث يطول الا بنجيكم راجعين تاني يا بلدي يا حبوب .... بس ما تغير المحطة خليك على نفس القناة ، يديك العافية
وليد
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
عنان بصل الخرطوم
| Quote: الخرطوم في 30 /6(سونا) يبدأ الامين العام للامم المتحدة كوفي عنان زيارة للبلاد اليوم الاربعاء تستغرق اربعة أيام يلتقي خلالها بالسيد رئيس الجمهورية والنائب الاول لرئيس الجمهورية ووزير الخارجية كما يزور ولايات دارفور وقال الاستاذة نادية محمد عيسي جفون مدير ادارة المنظمات بالانابة بوزارة الخارجية (لسونا) ان كوفي عنان سيزور خلال زيارته للفاشر النازحين للوقوف علي الاوضاع الانسانية. واضافت ان عنان سيزور انجمينا من الفاشر ثم يعود للخرطوم لاكمال لقاءاته وسيرافق السيد كوفي عنان في زيارته كل من محمد سحنون مستشار الامين العام للامن العام والسيد هايلي ميني كربوس مستشار الامين العام للشئون السياسية |
----------
ى وصل الى مطار الخرطوم الامين العام كوفى عنان والوفد المرافق لسيادته فى تمام الساعة العاشرة صباحا
اماعن شمارات وصول الامين العام
كوفى عنان كما صرح لنا حاج نظرية راجل ابن عمنا عديل لزم طبعا الزول من غاناواكيد يكونوا عنده اهل مروا على حواشات مشروع الجزيرة ايامالمشروع كان طماطمه بدون كيماوى بين لوزات القطن الناصعة البياض واحد نطه بسأل طيب العنان اهله لمن جو فى الحواشات ده القصد كان شنو يا حاج نظرية على فكرة المجلس للتو شرفه سيد جرسة وعلى طوال انتقلت الرواية الى سيد جرسة وحكاويه اصلوا قالو زمان اهلنا فى مشروع الجزيرة بزرعوا القطن الطويل التيلة ولمن يستوى ما بلقى اليلقطه لانو المواطنين كانوا متجعرفين شوية ماليهم حق ما كانت امورم ماشية وطبعا ناس الجزيرة ديل حرم البتقول عليهم (اهل العوض) مابعرف التاريخ بتاعهم و الشافوه ايام زمان مافى زول شافه الخواجات كانوا بجيب ليهم البلفيف وزيت السمك وحبوب السلفه بتاعت كلو مرض مش ذى حسه حبوب السلفه اتغلبت وبقت سفه يعنى الناس ديل شافواالخواجات واكلوا المعلبات وكما استفادوا من فاضى القزاز نرجع لموضعنا طبعا ناس الجزيرة كانوا مرطبين ومرتاحين علشان كده فكروااجيبوا ناس اللقاط من البعاد فكروا فى كل شعوب العالم لقوا ناس اسيا قصار وعيونهم دقاق يقوم الواحد منهم يتشابى تقع فى عينيه واحده حبة بذرة تقوم القيامة علشان كده احسن ناس الجيران ما طوال وزينين بالحال اه كوفى ده ولدناعديل بس ممكن نقول عليه تربية خواجات وبتاع راحات مويته معدنيه بدون باقات وبسمع الكلام كويس علشان كده ناس العالم الاول حكروه فى المكان ده لكن والله يا جماعه جيته ده دايرنه علشان نشوف اخر الجماعة ديل شنو. واحد راقد على ظهره وارفع كراع فى كراع وبسأل نعنى معنى كده الكوفى ده مافى مشكلة فى نومه معانا كان على الباعوض متعود عليه او على الذباب شافه زمان واكيد بيكون عامل حسابه وجايب معاه ناموسية كده نشوف اول ليلة كيف وباكر نقول الباقى
-----------------------
نواصل
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
Quote: كولن باول يصل الفاشر [4:26 م]
الفاشر في 30 /6(سونا) وصل الى مدينة الفاشر حاضرة ولاية شمال دارفور بعد ظهر اليوم السيد كولن باول وزير الخارجية الامريكى والوفد المرافق له فى زيارة تستغرق يوما واحدا وكان فى استقباله بمطار الفاشر الاستاذ محمد يوسف كبر والى ولاية شمال دارفور واللواء عبد الرحيم محمد حسين وزير الداخلية ممثل السيد رئيس الجمهورية والاستاذ محمد يوسف وزير الشئون الانسانية وفور وصوله تفقد باول معسكرات النازحين للوقوف علي الاوضاع الانسانية بالولاية
|
| |
|
|
|
|
|
|
|
|
 Re: وصول كولن باول الى مطار الخرطوم (Re: بلدى يا حبوب)
|
والله الظروف يا عم باول جنتنا وترابيز الدارسة بنيرانه من برد المطر دفتنا يا عمو عنان عليك الله تلحقنا
اولادى الصفار حبابكم والله جيت عشناكم يومين بشوف احوالكم و ناس الجنجويد لو ما فاتوك بعرف شغلنا معاهم
عنان ابوى استنى قبال ما تقول كلامك احلف يمين تمشى كلامك
يا زولة الداير اقوله قلته لناس الحكومة وزدته ومصطفى اخوى جنبى بسمع كلامى ما تهتمى الجنجويد بكره بفوته وناس حكومتك لو ما قدروا حسبانا معاهم ياما تعرفه
كلام الرجال بتعرفه والجوى قلبى بحبسه نشوف كلام اولادنا كيف يعمل غايتو الصبر بعدكم بعتقه كده يالله سراع ايه بتسوى
--------
تحياتى
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
الاستاذة رجاء
شكرا على هذا التشجيع ولك تحياتى اهو احتهاد وكما يقول المثل
(ان كنت فى روما افعل كما يفعل الرومان )
تقبلى تحيات سيد جرسة والراجل مابين مصدق ومكذب زيارة كولن باول كان ومن يوم ما ادار مؤشر الراديو على موجة ال ف م ليسمع لندن ويكون مستنى اليوم بتين اجىء ويوم وصوله لزم واول ما وصل مشى على صالة المغادرة وطبعا الخلاها مطمئن شاف الناس داخلين ومارقين والطمنه اكتر لقى واحد خواجه لابس ليه قميص به علم امريكا قبضه ليك من ظهره وقال ليه (هووووووووو يووووووو)الخواجة التفت عليه وسيد جرسة على طول سأله(كولبنا وصل ) المشكلة الخواجة طلع حلبى من بتاعيم سيجمان قبل ليك عليه وشبكه ليك يا جلك شوف ناسك مش اسمه كولينا ده حكم ايطالى واسمه الصاح كولن باول سيد جرسة بزعل كده خلينا من حكم والله حكامه بالصح ابن عمنا وصل حناكيش المطار البمشوا يجكسوا فى المطار اتلموا فى سيد جرسة وهاك سا كلام حنكوشة قالت (دادى مسافر وين) قبل عليها بحرقة انا داير اقابل الامين العام ما تشغولينى بالكلام الفارق بتاعكم ده وعلى طول طلع من الصالة وعلى البوابة الرئيسة عدل موظف الاستقبال وققه سيد جرسة ما مفتح عاين ليه وقال يا دفعه انا موكول لى حراسة الكلاب الامريكانية علشان ما كلب من كلاب المطار الضالة الراقده جنب المدرج يجى يعمل ليها ازعاج والله يديها القراد بعدين لمن باول يرجع امريكا يقوم ترفع علينا جمعية الحيوان قضية ونبقى فى وضع تانى المهم الموظف مرره وعلى طول فات قعد مع ناس المطافى والساعده لقى واحد معرفه المشكلة انو الوقت كان عصر وطيارة باول بدرى عليه سيد جرسة شبك ليك ناس المطافى نقه لدرجة انو افتكروا ان كولن باول ابن عمه وخصوصا لمن قال ليهم حرم مشينا سوى سنة 50 وقدمنا للوترى بس كولينا وطبعا ده اسمه السودانى علشان ما تقول لى حاجة حظه ضرب وانا قاعد سيد جرسة لمن لقى نفسع قاعد براه والجماعة مع حركة الطائرات قال اتمشى شوية وعلى طول قطع المدرج ومايشوف ليك مصيبة جاية عليها من الخوف زولك قعد فى المدرج لو ما كانت فى طيارة مسافرة وادته نور طويل واتخارج كان اتسمر لكن لمن عاين كويس لك ليك كلب امريكى بعاين ليه قعد يصفقك ويعاين للكلب لا يا بوبى انت قايل نفسك فى بوغريب والله شنو العب غيرها
ناصل
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
بلدي يا حبوب
أحب دائما ن أقرأ أخبار الوطن في كتاباتك.
و أحلى ما في هذا التقرير بالاضافة الى المادة الدسمة و الصور المعبرة هو ما نقلته عن حكاوي محمد أحمد البسيط و هو يناقش في السياسة من وجهة نظر تلقائية و بسيطة. اتخيلت الموقف و هم يتناقشون و رائحة الخبز الطازج الساخن تلف أجواء النقاش.
شكرا.
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
ما تخافوا ناس الحكومة حذرتهم والجنجويد حسه بسمعوا فى كلامى ده وراهم والزمن طويل
سيد جرسة بعد ان طال به الانتظار وتملكه الخوف من كلاب الامريكان المكلفة بحراسة كولن باول خرج من المطار واتجه الى الفناء لخارجة للمطار ووجد مجموعة من حناكيش العتالة بتاعين الطائرات يجلسون فى النجيل الاخضر انتظارا للزوال الاسباب بوصول كولن باول ومتنابعة الرزق من الطائرات التى جثمت بالمدرجات الفرعية وخمد ازير محركاتها فى السماء يعملوا شنو ده ما حكم القوى على الضعيف وما عليهم الا الاستسلام المهم سيد جرسة بادرهم السلام ودخل على طول فى الونسة وطبعا غيرها مافى وعلشان ما اطيل عليكم نمشى للتقطية الان .
احد الجالسين بدا عليه الزهج وبيقول شوفوا يا دفعة الظاهر شغلنا بعد ده فى المطار ما بوكلنى عيش ما اصلو من الصباح الشغل واقف لا مسافرين ولا مودعين ولا جايين المطار حاله واقف ونحنا معاه حتى الواحد خرمان لسيجارة بنسون طيب ماقالوا المعلم باول ده جاي معاه المعلمه كوفى عنان وده فرصة يا شباب راييكم شنو نقدم ليه مذكرة عن توقفنا الكتير عن العمل والحكومة ده من ايام نيافشا على بالطلاق حولوا المطار الى سوق شعبى وخاصة الايام الاخيرة قبال ما يوقعه نطه واحد وقال شوف يا بلف انته مشكلتك لسه متأثر بايام السوق الشعبى والحافلات علشسان كده ثقافتك لسه شعبية عالم عجيبة وقفل الكلام بسفه وصاحبنا البلف واصل
كلامه وقال شفوا ليكم ورقة وقلم طبعا سيد جرسة لقاه فرصة ودخل فى الموضوع .
واللهانا جاهز موية ونور قولوا لى مطالبكم شنو المهم المذكرة كانت فيهاالنقاط الاتية
1- تكوين جمعية للشيالين بالمطارلمعالجة زيارات الساسة المتوقعه
2- التعامل بالجنيه السودانى
3- عمل كورسات عن كيفية ترويض الكلاب وشحنها وانزلها وشحنها نسبة ( من المحتمل زيارة وزير الخارجية البريطانى وامكن بوش او تونى بلير ) وعليه سنكون جاهزين للتعامل مع كلاب الحراسة التى تحرس المطار قبال يوم وتمنعنا من التمتع بحرية التنقل بين اروقة المطار
4- 5-6-7-8-9-10-
سيد جرسة كتب الكلام ده كله بس قبال ما يقراه نطه واحد وقال انا عندى مشكلة كبيره خلاص يا معلمين الجماعة قالوا ليه ورينا وصاحبك قال تعرفوا يا جماعة انا قبال ما اجيكم وابقى حنكوش عتال كنته شغال فى مدينة كوستى ومتخصص فى شحن الشمام والبطيخ للخرطوم لكن جابوا لينا من امريكا تيراب الشمام والبطيخ وكمان قالوا اسمه (ريجان ) سوقنا وقف تعرفوا الشمامة بعد اسبوعين تكون جاهزة للسفر وكما البطيخ وحرم اللورى قبال ما يصل الخرطوم نكون شحنا التانى ما المزارعين خايفين عليه يطرشك واسنغلوا الفرصة وجابوا اولادهم يشحنوا الللوارى ما الشمامه قدر بيض الدجاج البيطرة والبطيخة حرم قطعة قروفت لكن يا حليل ايام شمام كوستى وبطيخ الرسمون نحن اتنين يالله نرفعاها فى اللورى المهم الجماعة غلبوا من شمام كوستى ابو جلد سمين حرم السكين لو ما كانت بتاعت ضراع ما تقطعه لكن مش حسه شمام الامريكان ده حرم لو عطسته تلقاه انقدت يعنى داير اقول انو انا متظلم من تيراب الامريكان لانو ناس الخرطوم حرم قالوا لو زروعه فى الخيران بقوم وبالله ده مش حرام يعنى اهلنا بتاعين زراعة الشمام اعملوا ايه وقلته ده فرصة نرفع مذكره للمعلم باول وبالمرة نعمل ليها صورة ونديها للمعلمة ابن العم عنان.
سيد جرسة امن على كلامه واضاف عليها مذكرته البطالب فيها باول بالتدخل فى ايجاد وظيفة بشركة النيل للبترول انشاء بواب على الاقل اطلع ليه كل شهر 200 دولارعلى الاقل بجانب شكوة ناس الشمام والبطيخ و العاملين فى المجال واثناء القعده ده الجماعه سمعوا ليك اصوات انفجارات جايه من جهة القصر والامور اتغلبت حتى كلاب الامركان بدأت تهوووى وجماعتك القاعدين ديل حالتهم بقت صعبه النسى جزمته وجرى وسيد جرسة على الجامع وسلالم المأذنه وعلى جهة القصر وما يشوف ليك الا السماء بقت بالالوان سيد جرسة نزل كيف ما تعرف لقى نقسه قدام نفرين بيقولوا ده ما انفجارات ده احتفالات حكومة الانقاذ وفى نفس اللحطة كانت طائرة كولن باول يسمع ازيرها فى المطار تعلن وصول كولن باول مرتدى بدلة سلاح الطيران الامريكى وكان الاستقبال والراوية لسيد جرسة بقول فيها
حرم بعد الحصل ده راسى ما عارفه وين قلته اخط لى سفه لقيتها فى جيب الساعة المهم من بعيد قعدت اعاين للاستقبال وبالى كله مع الكلاب المولعة عيونه ذى كهارب المدرج من بعيد والجننى اكتر لمن كولن باول مشى مع مصطفى اسماعيل ناس القصر حرمصوت دلوكتم سا معه فى المطار وكما بالعاب نارية انا المزعلنى بس والله حاجة وحده ما حضرت الرقيص وبينى وبينكم مع الهيجيج ده الراجل بيكون حته حت طبعا سيد جرسة بعد ما كولن باول استلم مصطفى اسماعيل بقى خارج الشبكة حرم شبكة موبتل احسن منو بعد مرات بتظهر لكن شبكة كولن باول ما تجيبها الا بموبايل الثريا وحرم لو كان عندى موبايل ثرييا كنت دقيت لباول تلفون لكن اعمل شنو ما اليد حيلة خرم سيد جرسة ومعاه الفرت بالمذكرة من المطار و حالهم صعب واحد لابس كل جزمة من بلد واخر ماشى بفرده شبشب بس اجمل حاجة انو سيد جرسة سفته قاعده فى جيب الساعه
نواصل
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
يد جرسة تقدم موكب المذكرة متجهاالى القصر الجمهورى وحسب معلوماته ان كولن باول سوف يصل للقصر وفى الطريق عند تقاطع صينيةالتاكسى التعاونى بشارع المك نمر مع شارع البلدية لاحظ العديد من عربات الشرطة واقترب من احدهم قائلا شنو ياقمندان سيد باول ما فحض بموكبه بشارعكم ده وقبل ان يستلم باقى الاجابة كان معلق فى صندوق بوكسى وهاك يا الدح السح امبو وبقية شلة الفرت شتت فى الشوارع الفرعيه واتحرك البوكس به ولكن عند تقاطع شارع المك نمر مع شارع الجمهورية والاستوب كان احمر شاهد سيد جرسة توب دبلان معلق على مبنى اتحاد عام نقابات عمال السودان مكتوب قيه
لامريكا لا للاستكبار لا لكوفى عنان لا لباول
على فكرة مازالت هذاالشعار معلق حتى صبيحة اليوم
لقاه ليك فرصة ونطه من البوكس ودخل اتحاد عام نقابات السودان والجماعه وراه وتماسيح الاتحاد تساله والعسكر تجره ولمن لقى الموضوع بايظ طلع على تربيزة الاستقبال يهتف (ياامريكا لم جدادك -----) طبعاالتماسيح الكلام ده عجبهم وفكوه من العسكر وسيد جرسة لمن اطمئن على نفسه قبل ليك على تماسيح الاتحاد وبصوت عالى وخارج البوابة الرئيسية(ده شنو ياعالم الراجل جاينا ضيف وكمان فى يوم عيدكم بدل ما تحترموه تبهدلوه والله حكايه انته خليته شغلكم الاصلى بدل ما تشوفى للعاملين المساكين النقصت بعضهم مرتباتهم جاريين لى ورى اللقف وهاك يا طاقات دبلان وشعارات وتكميل دفاتر الشيكات بدل شعارتكم ده ترفعوا مذكرة للحكومة بخصوص دارفور والموت البيحصل فيهاانمته ما لكن على بالحرام انته ذاتكم جنجويد والجماعه ماشين عليه صاحبك ذى ما بقول ركب مكنة كلب سودانى ماامريكى وما يلقى ليك نفسه الا فى الطريق المؤدى للبيركس وعلى حظه الكعب برضو لقى العساكر ملايين الشارع وقبال ما واحد يسأله اتخارج على شارع النيل ولمن لقاه ملقم اتخارج شاف ليه لملة طلبة وعرف من كلامهم انو الجامعه اليوم مولعة والبنبان من الصباح مدور فى دار الاتحادوالشمار عجبه وما تنسوا الزول بطينى مصيرانه بدأت تكوريك والجوع جننه على البيت عدل لكن اهم شىء انوالمذكرة فى الجيب والصباح رباح وطالما كولن باول بايت معنا ما همنا وما بطال الصباح عمك عنان مشرفنا وكده نشوف اخرته الصباح.
-------
Quote: كوفي عنان يغادر الخرطوم متفائلا [1:19 PM]
الخرطوم في 3/7( سونا) أنهي كوفي عنان الأمين العام لمنظمة الأمم المتحدة زيارته للبلاد صباح اليوم متفائلا بنتائج زيارتة التي وصفها بالجيدة والمثمرة
وقال في تصريح خاص لوكالة السودان للأنباء بمطار الخرطوم قبيل مغادرته أنه سعيد جدا بنتائج الزيارة خاصة بعد لقاءه مع السيد الرئيس والذي عبر في حديثه بالتعامل بحزم مع قضية دارفور
وأضاف أنه يغادر وواثقا من قدرة الحكومة علي وضع حد لأزمة دارفور. وأوضح عنان في حديثة ( لسونا) أن تفاعله ينبع من وعد الحكومة بحماية المدنيين وتوفير الأمن لهم والعمل علي إعادة النازحين إلي قراهم الأصلية
|
--------------
Quote: وصول 2000شرطي الي دارفور [1:19 PM]
الخرطوم في 3/7( سونا) وصل إلي دارفور أكثر من 2000 شرطي وأكثر من مائة عربة للمساهمة في توفير الأمن والإستقرار بولايات دارفور الكبري وذلك تنفيذا لتوجيهات السيد رئيس الجمهورية بإعادة الأمن والإستقرار لدارفور. وقال السيد المهندس إبراهيم محمود حامد وزير الشؤؤت الانساتيه في تصريح لوكالة السودان للأنباء ان وصول طلائع قوات الشرطة لدارفور يعد البداية الفعلية لخطة الرئيس في بداية التحقيق لمعاقبة المجرمين
وأشار الوزير إلي لجنه تقصي الحقائق التي تم تكوينها من قبل الرئيس برئاسة مولانا دفع الله الحاج يوسف بدأت أعمالها علي مستوي الخرطوم وسوف تنتقل إلي دارفور هذا الإسبوع
|
-----0----
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
اخر تصريحات الامين العام وهو فى طريقه الى المطار
Quote: وحذر أنان في مؤتمره الصحفي في الخرطوم من نقص الوسائل التي تملكها الأمم المتحدة التي قال إن لديها أقل من نصف الأموال الضرورية لتجنب مجاعة في دارفور وتشاد، ولم يقدم إيضاحات عن المبالغ الضرورية.
وانتقد الأمين العام طريقة إدارة الخرطوم للأزمة مؤكدا أن "الحكومة كانت بطيئة في ضمان وصول المساعدة الإنسانية". وردا على سؤال عن احتمال أن يتخذ مجلس الأمن تدابير ضد الخرطوم إذا لم تنفذ الحكومة التزاماتها, اكتفى أنان بالقول "لا أستطيع أن أتحدث عما سيفعله مجلس الأمن".
|
------------
(لا تعليق )
| |
|
|
|
|
|
|
|
|
|
Re: وصول كولن باول الى مطار الخرطوم (Re: بلدى يا حبوب)
|
حول تداعيات زيارة كولن باول وكوفى عنان فى الشارع السودانى انقل اليكم العديد من الاراء .وللعلم هذه الكلمات كانت فى جلسات المساء على مساطب زواياالحيشان واخرى على الكراسى كعادة السودايين بعد ان يتجردوا من عباءة الوظيفة ويجتمعون بعد صلاة العشا مع اختلاف اسمترارية الونسة مع العلم بأن عامل السن لا يدخل يعنى بالبلدى كده الونسة تتفاوت فى الثقافات ولكنها لا تأثر بالاعمار .
الاراء التى طرحت فى كانت كلها تؤيد الزيارة حتى اتباع النظام كانوا يروا فى الزيارة (كسب سياسى لهم)بقض النظر عن دوافع الزيارة وهذا تعودنا عليه من اهل النظام على المستوى السكنى ان صح التعبير .
اما عن بقية الاراء فأكيد تختلف وتتفاوت ولكنها تصب فى نهاية الامر فى (التأيد) وندخل فى احد الونسات وكانت قبل بداية الزيارة والسؤال المطروع للنقاش ماذا يريد باول وكوفى عنان بهذه الزيارة من الجالسين من ـمن على ان الزيارة ماهى الا بداية لمسلسل الدخول الامريكى فى الشأن السياسى خاصة بعد اتفاقية السلام ولان امريكا لا تريد ان تضع نفسهاامام العالم فى لحظات ضعف بزبارة وزير خارجتها لبلد مازالت تضعه فى قائمة الارهاب وتفرض عليه عقوبات ولذا استغلت امريكا مشكلة دارفور وجعلتها عنوان للزيارة هذا رأى .
ورأى اخر يقول ان امريكا شعرت بتدهور الاوضاع فى دارفور واستخدام الحكومة للسلاح كوسيلة لانهاء المشكلة وبمااناامريكا الى الان لم تجنى ثماراتفاقية السلام عبر مهرها لتكون احد اوراق الربح للانتخابات الامريكية فى نوفبر القادم خافت من ان يصبح السلام ناقصا عبر مشكلة دارفور وعليه اتت الزيارة من اجل ان تحل المشكلة فالوقت ليس فى صالح الرئيس بوش مع قرب الانتخابات وتووقع هذه المجموعة ان تستخدم امريكا التدخل العسكرى ان لم توقف الحكومة مليشات الجنجويد ويعود الوضع الى طبيعته وحتى يدول التدخل عالميااستعادنت بالامين العام كوفى عنان لاطفاء الشرعية الدولية لاى قرار يخضع للتصويت فى مجلس الامن الدولى .
وراى ثالث يعتبر الزيارة بمثابة ترتيب للبيت السياسى السودانى المتمثل فى نظام الانقاذ وتهيئته لما بعد السلام واصحاب هذا الراى يذهبون الى ان زيارة باول ماهى الا دفع لمهندس التفاوض على عثمان محمد طه ومباركته ليكون (كرزاى السودان الجديد )
هذه بعض الاراء فى الشارع السودانى حول زيارة كولن باول اتمنى ان اكون قد وفق فى نقلها
تحياتى
| |
|
|
|
|
|
|
| |
بلدى يا حبوب
aymen
مريم بنت الحسين
سجيمان
waleedi399
Raja
فيس بوك
تويتر
انستقرام
يوتيوب
بنتيريست