|
|
 نجمتنا العالمية ستونة عادت للسودان وتقول : وردى «نبذنى» وعادل امام انصفنى
|
وصلت الخرطوم امس بصورة مفاجئة الفنانة الشهيرة ستونة التي اصبحت من النجوم المعروفة في الوطن العربي بعد ان شاركت في الكثير من الاعمال الدرامية مع نجوم السينما المصريين وعلي رأسهم النجم الكبير عادل امام الذي طلبها بالاسم لمشاركته في احد افلامه الاخيرة ، وستونة ذاع صيتها في عدد من دول اوروبا بعد ان اشتهرت هناك بالغناء ورسم الحناء السودانية ... هذا حوارا مطولا مع ستونة تحدثت فيه بكل الصراحة والوضوح حول مسيرتها الفنية وحتي بلوغها الشهرة واصبحت في مصاف نجوم الفن الكبار بمصر وبعثت النجمة الشهيرة من خلال هذا اللقاء بعدة رسائل لبعض الشخصيات وروت ايضا بعض المواقف الطريفة التي صادفت مسيرتها وموقفها مع الرئيس الاسبق جعفر نميري ، كما قالت رأيها في عدد من الاصوات الشابة المعروفة في الخرطوم والكثير المثير في الحوار المتفرد.
الفنانة ستونة الشهيرة بالمجروس محليا تفتح النار فى كل الاتجاهات .. احرزت جائزة احسن ممثل فى مسرحية فاين اعلامنا من هذا
درست بمعهد الموسيقي دراسات اضافية واستاذي عثمان جمال الدين
(عريس حول العالم) مع سمير غانم اول فرصة تتاح لي ومن ديك..
{بمسرحية (ترنيمه2) ستونة تطوف سبع دول
{احرزت جائزة احسن ممثل في مسرحية . اين اعلامنا؟
(مهلا حبيبتي) مع الفنانة بوسي
حققت حلمي ومثلت مع الفنان عادل امام (هالو امريكا)
عادل امام ..انا اخترتك ياستونة لأنك فنانة وانا مقتنع بك
عصافير السلام اغنية لدارفور
ستونة وعلاقتها بالرئيس السابق نميري
وماذا دار بينهما حول اسم (المجروس)؟
عملت سكرتيرة لجوزيف لاقو
هاجر كباشي هل التي لفتت نظري
وفرفور ومحمود عبدالعزيز
كابلي - خليل - استاذ محمد الامين ديل حبايبي
ستونة :رسالتي لوزير الثقافة
انتبهوا للذي اقدمه لاني اقدمه باسم السودان بمجهود فردي...!
عزيزي القاريء الكريم
قرابة الساعة ونصف الساعة.. ستونة الفنانة السودانية التي اوجدت لنفسها مساحة في الوسط الفني بالقاهرة واصبحت من المشاهير في القاهرة اختلف او اتفق الناس علي ماتقدمه وماتقوم به سوف تظل ستونة هي الفنانة السودانية التي جاءت للقاهرة «بهدف» وكانت بالسودان ايام تغني وترقص العرايس وكانت قبلها في الطلائع ايام مايو ودرست بمعهد الموسيقي دراسات اضافية وعملت سكرتير للسيد جوزيف لاقو وسكرتير بشركة حجار للسجائر. والان هي تحتل مكانة شهرة في قاهرة المعز وهي التي مثلت امام محمد الهنيدي وامام الفنان الكبير عادل امام وتواصل في رحلتها مع الفن..
واصبحت من الوجوه الثابتة في المهرجانات باوروبا ولها اسطوانتين .
.....................؟
انا بمثل السودان وانا قبل ما اكون في فرق الخرطوم جنوب للغناء والتمثيل كنت بمركز شباب السجانة في رابطة التمثيل ووقتها كنت بقرأ في معهد الموسيقي والمسرح ودراسات اضافية درست تمثيل ومن ضمن الاساتذة الذين درسوني الاستاذ عثمان جمال الدين ..وانا في السودان مثلت مسرحيات سافرنا بيها للاقاليم واول سفرية خارج السودان سافرت مع الفنانة نعمات حماد للخليج في الثمانينات.
.....................؟
عندما جيت مصر كان هدفي الغناء وليس التمثيل لكن عندما جاءتني اول فرصة ماكذبت اول حاجة انا مثلتها عملت فوازير مع الفنان سمير غانم اسمها (عريس حول العالم) اتصلوا بي براهم شافوني في برامج في التلفزيون المؤلف اتصل بي وقال لي ياستونا نحن دايرنك في حلقة مع سمير غانم في الفوازير جابوا لي النص ومشيت مثلتو ومعي الـGroupبتاعي بعد كده جاني orderمن مسرح الدولة الحكومة قالوا لي عايزنك في مسرحية شبه غنائىة وشاركنا فيها انا وزوجي احمد واخي عبدالله تنقوري..
المسرحية نجحت نجاح باهر وجابت لمصر الجائزة العالمية من خلال لجنة دولية وليست لجنة عربية عشان يقولوا فيها مجاملة ولا كده.. حصلنا علي الجائزة العالمية الاولي وقد طفنا بها العالم.. المسرحية اسمها (ترنيمة 2) وقبلها كان مسرحية (ترنيمة1) وترنيمة2 سافرنا بها المانيا والبوسنه وايطاليا والاتحاد السوفيتي سوريا ولبنان والامارات.ودوري فيها دور غنائى
-عملنا مسرحية ثانية مع نفس المخرج وبرضو مسرح الدولة اشتركنا فيها انا وزوجي احمد والمسرحية اسمها (طبول فاوست) واحرزت فيها جائزة احسن ممثل.
.....................؟
عملت مسلسل في التلفزيون المصري اسمه مهلا حبيبتي مع الفنانة بوسي وحسن حسني وخالد زكي وماجدة زكي يعني مجموعة كويسه.
.....................؟
اول فيلم مع الفنان عادل امام (هالو امريكا)
.....................؟
والله اذا قلت ليك وانا طفلة كنت بحلم اني امثل مع عادل امام تقول انا بكذب عليك .. لأني كنت بعتبر ده حلم انا اشتغلت مع الفنان محمد هنيدي لكن انا امثل مع عادل امام ده حلم.
.....................؟
انا في المنزل اتصل بي المنتج حسن واصف قال دايرنك في فيلم مع عادل امام.. ما اديتو كلام اعتبار لان في مخرجين «كتار» بتصلوا بي ويقولوا دايرنك في شغل نبعث ليك السيناريو وكثيرا اعتذرت نسبة للادوار المتشابهة واخرين لايبعثون السيناريو
المهم بعد اسبوعين اتصل بي حسن واصف وقال لي ياستونا انت لا اتصلت بي ولا عبرتينا يعني عشان بقيتي مشهورة وعادل امام هو الطالبك بالاسم طوالي مشيت ليهو في المكتب.. قال لي عادل امام تشاركيهو بطولة فيلم انت والفنانة شيرين وشلت منه السيناريو وقلت ليهو ده شرف كبير لي اني اشتغل مع عادل امام.. وانا قاعدة اتصل بعادل امام قال ليهو يا استاذ عادل ستونا قاعدة معانا.. قال ليهو عادل واتكلم معي وقال لازم نتلاقي واخبرته اني شغالة في مسرحية بتنتهي الساعة 10 وهو برضو كان شغال في مسرحية فترة الراحة الساعة 12 ...وفعلاً اتقابلنا وسلم علينا بالاحضان وقال لي انا ياستونا اخترتك في الدور ده لا المخرج ولا المنتج .. وانت اذا مابضيفي لي حاجة انا مابجيبك وانت فنانة وانا شفتك في قنوات وفضائيات ووفي صعيدي في الجامعة الامريكية وانا مقتنع بك والمنتج ده اطلبي اجرك صاح ونحن سوف يكون عندنا تصوير في مصر وتصوير في امريكا.
ستونه تواصل
وقد صادف كان عندي سفر بمسرحية ترنيمة 2 للهند يتزامن مع تصوير فيلم بامريكيا. المهم بقينا نعمل واسطه معاي سميرة عبدالعزيز وسامي العدلي وكلمنا عادل امام والمخرج والمنتج عشان يضبطوا لينا الوقت لان ده في امريكا وده في الهند.
الحمد لله قعدنا في نيويورك اسبوع وانتهيت من تمثيل دوري وفي نفس اليوم الذي خلصت فيهو التصوير سافرت للهند للمسرحية وخسرت 1500 دولار من حسابي الخاص عشان ده التزام ادبي.
.....................؟
نعم الغناء ادخلني للتمثيل من اوسع ابوابه.. ولكن لايمكن للتمثيل ان يدخلني للغناء من اوسع ابوابه لاني قد اكون غير موهوبة غنائىاً يعني اذا كان صوتي غير غنائى وادائي والاشياء المكملة للفنان
.....................؟
مشاريعي الفنية والسنة في نهايتها ان اقدم اغنية لدارفور وهي (عصافير السلام) وهي كلمات الشاعر السر احمد قدور وقد عملت مخصوص للمشاكل الحاصلة في دارفور والسلام الجاري بين الجنوب والشمال والاستاذ السر احمد قدور جاب لينا القصيدة وزوجي احمد لحن القصيدة وان شاء الله سوف تنفذ الايام القادمة..
.....................؟
في المهرجانات بقدم الجديد من الغناء اضافة في شيء ثابت بقدم.
.....................؟
هاجر كباشي هي التي لفتت نظري ومعها فرفور ومحمود عبدالعزيز ومحمود بغني من انا في السودان وقد اتطور في غناهو.
.....................؟
هاجر كباشي هي الوحيدة التي يمكن ان تنجح في القاهرة.
.....................؟
سوف ارجع للسودان زيارة انا واضحة وصريحة القاهرة محل شغلي ومصر والسودان مافي فرق وده ماكلام جرائد دي حقيقة انا ممكن احس بالغربة في اي بلد عربي اخر لكن مصر لا.. لذلك اصبحت مركز وعنوان ثابت لي.
.....................؟
ما اتغيرت انا ياني ستونة لكن الشهرة مسؤولية
مثلا اذا في زول ماعندو معاي مواعيد مابقدر اقابلوا..ده اتيكيت.. ولازم ارتاح ونظام حياتي كده بعد ان اصبحت مشهورة والشهرة مسؤولية لازم احافظ عليها
.....................؟
علاقتي بالرئىس السابق نميري علاقة شغل انا منذ صغري كنت في الطلائع والمعسكرات والاتحاد الاشتراكي وزمان عندما يكون في مهرجان نميري بحضروا وانا كنت بمثل وبغني.. نميري شافني قال دي مجروس لكن حركتها خفيفة وصوتها كويس من ديك هنا اسم المجروس.
.....................؟
انا اول ماخلصت الثانوي العالي اشتغلت في الاتحاد الاشتراكي لانو ده المحل الذي اتربيت فيهو.. كنت سكرتيره لنائب رئىس الجمهورية السيد جوزيف لاقو وبعد داك قلت للسيد جوزيف لاقو انا بغني في جنوب ومركز شباب السجانة لان الشغل كان صباح ومساء فقلت له ياسيادتك انا بغني عشان كده دايره اشتغل في قطاع خاص.. فقام وداني شغلني في شركة حجار للسجائر . .اشتغلت سكرتيرة للمستشار القانوني للشركة .. وبقيت شغالة حفلات لان الشغل بالنهار فقط.. وجاتني فرصة السفر خارج السودان للمسرحية مع الاستاذة نعمات حماد فاخذت اجازة بدون مرتب الاجازة للان ما انتهت (تضحك ستونه)
.....................؟
نميري عندما جاء مصر قلت ليهو سميتني المجروس بدون ضبيحه يلا اضبح لينا.. فقال نميري والله بعد كده الا اضبح ليك جمل لأن خروف مابنفع.
.....................؟
ساعدني الكثير في مسيرتي الفنية...ناس كثار مادايره اذكر زول عشان ما انسي واحد واظلمه.
.....................؟
انا بحب عدد من الفنانين ولكن حبايبي خالص كابلي وخليل اسماعيل واستاذ محمد الامين وهسه انا دايره الاستاذ كابلي يسمح لي اغني اغنية من اغنياته.
ومن الفنانات الراحلة عائشة الفلاتية.
.....................؟
رسالتي لوزير الثقافة الذي اقدمه انا نفسي بالنسبة الموجودين بالسوان وانا واحدة عادية جدا.. والذي قدمته قدمته بمجهود فردي انتبهوا للذي اقدمه بره لاني بقدمه باسم السودان بمجهود فردي.
.....................؟
الاستاذ حمد الريح رئىس اتحاد الفنانين ربنا يوفقك في قيادة الاتحاد.
.....................؟
الاعلام في السودان البكتب عني سلبا يكتب الداير يكتبوا وانا بعمل في شنو عارفه كويس... والبعمل فيهو ماغلط.
.....................؟
ناس فرقة جنوب وحشتوني شديد واتمني ليكم الازدهار والتقدم.
.....................؟
استاذنا خليل اسماعيل ان شاء الله اغنيتك اغنيها و تعجبك وانا بشكرك وماقادرة اعبر عن شكري ومعزتي لك وانا طمعانة اغني ليك اغنية ثانية وربنا يديك العافية والصحة.
.....................؟
يارب يارب السودان يعيش في سلام..
|
|
 
|
|
|
|
keiga2000
ودالعباسية
فيس بوك
تويتر
انستقرام
يوتيوب
بنتيريست